[fanaa]

طياره حلم معديه قدامى .. وفاتت

مع نسمه هوا حلوه شقيه

مليانه أفراح

صحت جوايا حاجات ليا .. كانت فيا

صحت احلام أتمنتها من زمن

أهو راح

مابين الغيمه بتعدى

خيطانها تجيبها وتودى

طيور من حب حواليها

وبتحى بشمس صباح

عيونى معاها فين ما تكون

بتسحرنى بشيئ مجنون

بشوف أيامى من تــــانى

ممحـــى منها كل جراح

تعدى ... على كل شارع

للرايح ... والا راجع

ترسم البسمه ... فى نسمه

تزف الارض بالأفراح

أمل من تانى قدامى

ولحظه هزتلى كيانى

خلتنى أبدأ من تانى

وأنسى ماضى عدى ... وراح

بطير وياها أنا بخيالى

وقلبى من الهموم بقى خالى

ياريت الدنيا دى تخلالى

ومايسكنها الا طيـــر صداح

وفجأه الريح ... تغيرها

للأحزان ... تديرها

بغل عاوزه تدمرها

وتكسر فيها كـــل جناح

تصـــرخ فى الهوا وتنــادى

خيطانهــا أتشبكت فى أيــادى

اليـــأس يضمها ع الهادى

ويسكن فيها كل براح

ياطياره .. مابين الويل

يا دمعه حزن عتمه وليل

قرارك فى الامل كان غلطه

وكل شيئ أتهد ورا ح

ولحلمى معا كى دمعى يسيل

ورق الحــزن تــانى يميل

وسكــنت تانى جوايــا

ضلمـــه ليــــل مالوهش صبـــاح