حلقات ( اجمد عضو ) مع ( morshooo )

[كبرياء رجل]

اقتباس المشاركة الأصلية كتبت بواسطة ,,همس القلوب ,, حلقة رائعة بجد وسامى اثبت لكتير مدى صدره الرحب وتقبله للموقف ورذوعه كان هدية كبير لينا تسلم يا مورشو على الحلقة الرائعة دى

ده مرورك هو اللي هديه لينا همس
شكرا لحسن التواجد
دمتي بكل الخير
تحياتي لكي

[كبرياء رجل]

اقتباس المشاركة الأصلية كتبت بواسطة طمطم بجد الاجابات العقلانية والمميزة دى مش هتطلع غير من سامى حوار مميز واستمتعت بيه جداا .. وسامى شخصية محترمة وكل الاعضاء عارفين كده كويس اووى بالتوفيقـ دايما ليك ي سامى ,, تسلم ي احمد ع الحلقة الجميلة دى

ربنا يوفقك طمطم
واشكرك على ردك الجميل والرائع
دمتي بكل الخير وحضور راقي كشخصك دائما
تحياتي لكي ونوريت الموضوع

[Single girl]

بجد حلقة في منتهي الجمال
والعضو بجد انسان اكثر من رائع
ولازم بجد نبطل اللي الشعب المصري بقا فيه
احنا كلنا مصريين
نفسي الناس كلها تبقي ايد واحدة تاني في مصر
والفتنة دي تختفي من الوجود
لانها بجد بتضر و بتشوه المصريين
واكيد المنتدي نور بيك يا قمر
ميرسي يا مورشو ع الحلقة الجميلة

[morshooo]

بسم الله الرحمن الرحيم

اهلا ومرحبا بكم

وحلقة جديدة من برنامجكم

( اجمد عضو )




فى البداية اشكر ( محمد علاء ) على المبادرة الجميلة

فى عودة نشاط المنتدى .

كلنا تابعنا الاحداث الاخيرة بالمنتدى الــ فضلت حوالى شهر وزيادة

فكان لازم نعمل حوار مع ( أدارى المنتدى ) عشان يوضحلنا الــ

حصل وكمان يرد على بعض تساؤلات الاعضاء .

معانا النهادرة



فى البداية تعالو نشوف

عناوين من الحوار




SiLver Spectra : المنتدى محتاج اعادة انضباط من جديد والاجتماع مع المشرفين فكرة قديمة من ايام ابو ادهم

دا سبب اغلاق المنتدى الفترة الماضية ومقدرش اقول ان دا مش تقصير فى حماية المنتدى

لو الناس تعرف انا تعبت اد اية فى الشكل الجديد للمنتدى بعد رجوعه كان لازم اكون متمسك بية ومغيروش

السؤال دا اسئلهولى بعد شهر وتم عمل نظام جديد للتقييم وقريب ان شاء الله هنعيد التكريمات من جديد

فى ناس بتحب تهاجم الادارة كنوع من انواع الشهرة او الجرأة الــ تخلية بطل وعامة احنا بنتقبل بصدر رحب

دا كان سبب اعلانى عن فتح باب الترشيح لــ ( الادارى المنتخب ) بعد عودة المنتدى .

اكيد الى حصل عطل الادارى المنتخب بس انا شايف انة شغال كويس وبنشاط عالى

حملة اعادة تنشيط المنتدى ليها اهمية كبيرة ودا خلانى استعجل الاجتماع الاشرافى قبل الحملة بيوم

دا رئيى فى الرئيس مرسى ولو تم عمل انتخابات رئاسية مر اخرى اعتقد لم يتم ترشيحة لان شعبيتة انخفضت

الفقرة الثانية فى حلقتنا هتكون بعنوان ( بصراحة ) انتظرونا

انتظرو الحوار كاملا

اليوم ^_^

[morshooo]

ودلوقتى مع الحوار كاملا :




س / اهلا بيك طارق فى ( اجمد عضو )

س / كالعادة بتظهر فى اجمد عضو بعد اى مشكلة ^_^ ؟

اه المتحدث الرسمي باسم المنتدى

س / قبل ما ندخل فى احداث المنتدى والى حصل فية عايزين نعرف اية حكاية الاجتماعات الى هتبقى مع المشرفين ؟

مافيش , فكرة الاجتماع دي فكرة قديمه شخصيا عاصرتها مره بس من ايام ابو ادهم وقت ماكنت مشرف جديد
بأمانة هي كانت ظريفه و الجو فيها كان حلو
بس الي فهمته من ابو أدهم انها بتعمل مشاكل و تعارف لناس كتير فممكن تحصل مشاكل
و دا كان السبب في انه يلغي اي اجتماعات بعد كدا عالميل

الفترة الحالية المنتدى محتاج يتعمله اعادة انضباط من جديد
فكرت في اننا نجتمع عالميل بس حسيت الموضوع هيبقى مجهد انك تلم ايميلات مشرفين كتير جدا
غير ان الكونفيرينس في الياهو بيعلق و ناس مش هيظهر عندهم الكلام و الي نته يفصل لحظه و يقولك ضيفني تاني و غيرها من المشاكل
خاصه في وجود الكم الهائل من المشرفين

فكرت في اننا نعمل جروب خاص عالفيس حسيت برضو انها هتبقى مش حلوة لانك عشان تعرف بقى كل واحد هو مين على المنتدى , دا غير ان الاجتماع في موقع تاني بعتبره امر مش محبب لان الغرض هو اعادة التفاعل في المنتدى مش في موقع تاني

و من هنا و جاتلي فكرة عمل الاجتماع في صندوق المحادثات (الشات) و دي خاصية بيتم تفعيلها في بعض المنتديات في الواجهة الرئيسية
أعتقد انها هتأدي الغرض في سرعة التفاعل و الرد الفوري (بمعنى انك مش هتحتاج تحدث الصفحة كل شوية عشان تشوف الردود الجديده)
و كمان هتفيدك في انك هتتعامل مع المشرفين بنفس الاسماء و الالوان و في نفس الموقع

أما بقة عن ايه الي هيتقال و كدا فأنا لسه في طور التحضير للإجتماع
هحاول اكتب ايجاز لاهم النقاط الي هيتم مناقشتها
و هنركز على التفاعل العام لكل المشرفين
و هنخصص لكل مشرف وقت يقدم فيه اقتراحه و هناقشه في الي يقدر يقدمه و يعمله
و هنتلكم في القوانين عامة
و بعد كدا هنلخص اهم النقاط و هيتم تفعيلها و عرضها على الاعضاء


س / مش شايف ان الفكرة دى اتاخرت كتير جدا ؟ والاجتماع هيبقى بانتظام والا حسب الظروف ؟

زي ما ذكرت هي اتأخرت لاني قبل كدا ماكنتش بحبذ الاجتماعات على الميل للاسباب الي ذكرتها قبل كدا
و الظروف الحالية حتمت عليه ضرورة عمل اجتماع و فكرت في طريقة عملية و جبتها

و لسه هنشوف نظام اول اجتماع و من بعدها ممكن نعمل اجتماع شهري او كل شهرين
بحيث اننا نعمل زي لقاء مشترك بين الادارة و المشرفين


س / المنتدى وقف تقريبا من 18 / 8 او بعديها بكام يوم وكانت بداية المشكلة ؟ هو كان فى اية ^_^ ؟

هيثم ناس هكروا جهازه بالكامل بشكل احترافي
و تقدر تقول بشكل انتقامي , و دبروا العملية و خططولها كويس بحيث انهم زرعوا ملفات و اوامر في السيرفر
قدروا من خلالها يوقعوا قاعدة البيانات كل شوية
و احتاجنا لوقت كبير عشان نقدر نشخص المشكلة جايه منين بالظبط
و دا تطلب مننا اننا نغير نسخة المنتدى و نعطل الهاكات و نقفل مراكز رفع و غيرها من الاجراءات

س / هو ازاى منتدى زى بنات مصر مايكنش لية حماية من اى حاجا تحصل زى كدا ؟

طالما جهازك اتهكر يبقى عملية الحماية ماعتش ليها اي تأثير
لأنه هيقدر يدخل من جهازك للسيرفر كأنه مدير
و هيزرع الي هو عايزه
و انت هتتعب عشان تعرف هو لعب في ايه و تعرف تحل المشكلة
و دا بالظبط الي حصل
لكن ما اقدرش اقولك ان دا مش تقصير

س / كلنا اعترضنا على نسخة المنتدى الجديدة الى كانت نزلت ورجعتو تانى للنسخة القديمة مش شايف ان كان ممكن مع الوقت الاعضاء تاخد على الشكل الجديد ؟ خاصة لو كان الشكل الجديد كان افضل للمنتدى ؟

انت لو تعرف الشكل الجديد أو (الجيل الرابع) دا تعبني أد ايه كنت هتدرك ان أنا أكتر شخص المفروض يتمسك بالشكل الجديد

بداية كدا الجيل الرابع مش بيقبل اي دوال من الجيل التالت , يعني كل القوالب و الاستايلات و الاضافات بتاعت الجيل التالت مش هتركب على الرابع و لا هتتقبل اصلا
دي أول معضلة

تاني معضلة هو ان الجيل الرابع معقد جدا في التعديلات , على سبيل المثال قالب postbit legacy الي هو قالب صفحة الموضوع و المشاركات , في الجيل التالت بتعدل عليه و خلاص
أما في الجيل الرابع فبتعدل عليه + قوالب تانيه postbit css و addition css و غيرها
و دول بيكونوا مربوطين ببعض
هو طبعا فكرتها هو انه بيديك احترافية اكثر في التعديلات و التحكم
لكن في النهاية الي انا شوفته هو ان في حاجات كتير مش بتظبط زي التالت
زي مثلا عرض مكان معلومات العضو على اليمين مع الصورة الرمزية , دي بيبقى عرضها ثابت حسب ما تحدده في الجيل الرابع على عكس التالت بيكبر او بيصغر حسب عرض الرمزية

تالت معضلة هي ان الاضافات للجيل الرابع قليله جدا
الجيل التالت موجود من سنة 2004 و نزلت منه تحديثات كتيره لحاد اخر نسخه له الي احنا شغالين بيها 3.8.7
و لحاد دلوقتي اغلب المنتديات بتستخدمه , و دا خلى ليه اضافات زي البحر من ناس بتعملها او بتعربها
اي حاجه تيجي على بالك تبحث عنها هتلاقيها موجوده و بأكثر من شكل

اما الرابع فمش هتلاقي غير حاجات محدوده جدا دا لو لاقيت اصلا الي انت عايزه
زي مثلا الاهداءات
لاقيت ليها شكلين بس
واحد منهم تعبان جدا و التاني الي كنت ركبتها و كانت مش بتدعم الكتابة الانجليزي و بتدخل الاهداءات في بعض لو حطيت رابط مثلا

المعضلة الرابعه هي اني بعد ما عملت التعديلات و خلصت و ظبط كل حاجه و اشطه بقى و فتحت المنتدى يوم 14 سبتمبر
فتحت من جهاز امكانياته مش عالية لاقيت الصفحة بتهنج جامد في الحركة
و قاعدت اعدل في قوالب ال css من جديد و غيرت شوية في الشكل العام بحيث اني اخفف من التهنيج دا
و فعلا قدرت اخفف شوية لكن برضو ماكانتش بسرعة الجيل التالت الحالي

كل الامور دي دفعتنا على اننا نقرر استعادة المنتدى لوضعه السابق برغم كل المجهود الي بذلناه مع الرابع , خاصة مع ضعف التفاعل من قبل الأعضاء و شعورهم ان المكان غريب




س / فى اى مميزات هتضاف للشكل الحالى للمنتدى والا هيبقى زى ماهو ؟

الاضافات مالهاش معاد
يعني لما بدور و بلاقي حاجه كويسه و بحس انها هتضيف للمنتدى و هتركب كويس بدون مشاكل بضيفها
لكن بصفة عامة دا هو الشكل الي هنستقر عليه لمدة لا تقل عن 6 شهور
الواحد بصراحة تعب
لما عد فترة كبيره بالشكل الحالي ممكن عالصيف الي جاي بعدها نبدأ نحاول نعمل تعديلات على الشكل
حاليا بس بفكر اني ابدل في الالوان
يعني اخلي الافتراضي احمر مثلا
بس قبلها عايز اعمل استفتاء عن احلى لون من الخمسه

س / من فترة كنت عايز تلغى التواقيع الفلااشية كان اية السبب ؟

ناس كانت بتحط بال4 و 5 تواقيع فلاشية
و كل توقيع حجمه مش بيقل عن 2 و 3 ميجا
فكانت العملية بتستهلك كتير في التحميل خاصة لما تكون انت بتدخل من يو اس بي مودم و بيحسب عليك كمية التحميل , ابص الاقيني اتصفحت نص ساعة و الاقي 100 ميجا مسحوبين !

دا غير ان الاطالة في التواقيع بيعمل نوع من الملل و انت بتعدي بالفارة
الي لازم تكون كمان حذر و انت بتعدي منها لانها ممكن تصرخ في وشك و الاغنية تشتغل ههههههه
عامله زي الألغام الأرضية كدا

لكن بصفة عامة فأنا شخصيا بستخدمها في مسابقاتي و انت عارف كدا
و انا عامة ماكنتش همنعها حتى لو النتيجة ايدت القرار
هي الفكرة بس اني كنت بشوف اراء الناس ايه و من خلالها نحاول نقلل من التواقيع الفلاشية الي بتكون 4 و 5 لعضو واحد !

س / فى بعض الاعضاء بتشتكى من تجاهل الادارة ليهم وعدم تكريمهم او ترقيتهم ؟

السؤال دا في الفترة الحالية صعب لأن حصلت مشاكل فنيه و كدا و ماكناش فاضيين
دا غير ان التفاعل كان ضعيف
تقدر تسأل السؤال دا بعد شهر من دلوقتي تكون الامور باقيت طبيعية و نقدر نراجع الاعضاء
انا عامة عملت نظام تقييم جديد
بمعنى اني بعد كدا لما احب اعرف المميزين هستعين باحصائيات بتظهرلي انا كاداري فقط , و من خلالها هقدر اعرف مين اكتر واحد شارك خلال الشهر دا و اكتر واحد كتب مواضيع و غيره
و طبعا مش هنتجاهل الناس الي مش بتشارك و تكتب كتير لكن مشاركاتها مميزه

و قريب ان شاء الله هنعيد التكريمات من جديد

س / دائما الادارة بتكون محل انتقاضات هنا فى المنتدى ؟ شايف ان الادارة مش قادرة تحتوى جميع الاعضاء والا بيكون فى اعضاء هدفها الهجوم فقط ضد الادارة ؟

في ناس بتحب تهجم , حتى لو كان معاه حق بشكل نسبي , بس تلاقيه عايز ينقض او عنده احساس بان الهجوم على الادارة هيديله نوع من الشهرة و الجرأه الي تخليه بطل

و عامة احنا بنتقبل الانتقادات بصدر رحب

س / بعد عودة المنتدى اعلنت عن فتح باب الترشيح لانتخابات الادارى المنتخب ؟ وتم الغائها كان اية سبب اعلانك عنها وسحبها مرة تانية ؟

بص انا كانت في نيتي فعلا اني اخلي الاداري المنتخب الرابع يشتغل فترة الصيف فقط
لو تشوف الموضوع و حتى صفحة التقييم الاداري هتلاقيني كاتب خلال العطلة الصيفية
المشكلة الي حصلت بقى بوظت الخطه شوية
كان المفروض فاضل عشرين يوم من بعد العيد
دول كنا نقدر نعمل حاجات كتير فيهم
شخصيا كنت بعمل ( تعلم كيفية صنع مسابقة احترافية بنفسك)
و كنت خلصت الدروس و فاضل بس اني ارفعها و اعمل الموضوع
و فجأة حصلت المشكلة دي و دمرت كل حساباتي
حتى خلتني حاليا أأجل الدورة دي لفترة يكون فيها اجازة ممتدة شوية

لما المنتدى اعلنا افتتاحه بصراحة ماكنتش اتوقع ان هيكون في حاله هبوط حاد في التفاعل سواء في التقديم للترشح او في المنتدى عامة
و دا السبب الرئيسي الي خلاني أأجل الانتخابات شوية لما الناس تحس ان المنتدى مستقر و يرجع شوية من نشاطه
+
ان الماجيك ياخد حقه في الفترة الي باظت دي بحيث اننا نقدر نقيم شغله زي الاداريين التانيين

حسب الاحصائيات من اللوحة فالتفاعل زاد بنسبة 3 مرات عن لما كنا فاتحين المنتدى في الجيل الرابع
لكن بتظل النسبة اقل من قبل حدوث المشكلة
لاسباب لها علاقة بانها كانت فترة اجازة و رمضان مثلا و الناس قاعده في بيوتها و كمان كان في استقرار في المنتدى و تفاعل مستمر
و دا الي احنا بنأمل في تحقيقه مستقبلا
احنا عندنا كل العوامل لكدا الحمد لله
منها مثلا ان معدل التسجيل مرتفع دلوقتي عن قبل ما تحصل المشكلة
مع العلم اننا الاول كنا بنلجأ لمحاولات لجذب الزوار زي التسجيل الاجباري لمشاهدة الروابط و الفلاش الي كان بيظهر للزائر عشان يسجل ,
(( لسه من شوية مانع مشاهدة الروابط )) لكن قبل ما امنعها و كان معدل التسجيل يعتبر كويس , بمتوسط 40 عضو يومي




س / فى اعضاء قالت سبب الغائها ان اشترك 3 اعضاء فقط ؟

تصدق اني نسيت السؤال
انا كتبت كلام كتير , تقدر تقول ان ضعف التفاعل العام في المنتدى هو السبب قبل التفاعل الخاص بالموضوع

س / لو اعلنت فتح باب الانتخابات واعلن عضوين فقط هتكمل الانتخابات والا فى عدد معين انتا بتحددة ؟

هكملها عادي جدا
حتى تبقى منافسه قوية زي مرسي و شفيق و مش هيكون في تشتت للاصوات زي ماكان بيحصل قبل كدا بين ناس بتشترك في الجمهور )

س / اية رائيك فى أداء الادارى المنتخب وشايف انة اخد فرصتة والا الى حصل عطلة ؟

اكيد الي حصل عطله
و الله انا شايفه شغال بهمه و نشاط عالي جدا

س / حملة محمد علاء والمقرر لها النهاردة شايفها ازاى ؟ واية اهميتها ؟

تصدق انك خضيتني بكلمه النهارده دي
بس يلا ما انت عامل حسابك انك هتذيعها يوم الحملة
شايف ان ليها اهمية كبيره
و دا ممكن كمان الي خلاني استعجل الاجتماع الاشرافي و اخليه قبل يوم الجمعة بحيث اننا نكون مكلمين اغلب المشرفين كمان بانهم يتفاعلوا في المنتدى
عارف انت العربية لما تبقى عايزه زقه عشان تدور
اهو دا حال المنتدى عايز زقه كدا عشان نشاط الاعضاء و التواجد يزيد شوية

س / انتا شايف ان جميع المراقبين شغالين وعارفين اية دورهم فى المنتدى ؟ لانى شايف ان 3 او 4 مراقبين فقط شغالين والباقى ضيف شرف ؟

هنحاول نعالج الموضوع دا في الاجتماع
لاني بجد عندي نيه في الابقاء على الناس الي بتشتغل في المناصب غير كدا يبقى مميز او مشرف سابق زي ما يحب

س / امتى هنلاقى الاعضاء الغائبين والى مش شغالين بيتم استبعادهم من الطقم الادارى للمنتدى ؟

شوية كدا
لما نحس ان المنتدى شغال بقاله فترة نبدأ نعملهم اختبار اعمال السنة
لكن ما اقدرش احكم دلوقتي و لا اشيل او احط حد
لازم نصبر شوية

بس ما تقلقش مش هطول
يعني اسبوعين بالكتير

س / طبعا مش هينفع تبقى ضيفى ومسئلكش ؟ هما الاخوان المسلمين طلعو اخوان مسلمين والا طلعو لا اخوان والا مسلمين ؟

بص أنا شايفهم فصيل سياسي مش أكتر
احنا شعوب مضحوك عليها , يقولك اختار الاسلاميين بقى عشان الشريعه
و في الي كان يقولك لا انا مش هنتخب ابو الفتوح عشان موقفه من الردة , حاجات كدا لما افتكرها بعد اضحك عالناس دي و بفكر هل الوعي عندهم وسع شوية و لا لسه زي ماهو !
بمعنى انك دلوقتي لما تنتخب رئيس هل شايف ان الرئيس مهم رايه في الردة مثلا !
ردة مين يا عم الحاج !! البلد عايز عقلية تعرف تنهض بيها

فأنا شخصيا عندي الليبرالي زيه زي الاسلامي زيه زي العلماني زيه زي الاشتراكي زيه زي القومي , الي بيفرق بينهم هو العقل
هل انت عندك برامج اقتصادية قوية , هل هتقدر تصلح من الوطن
مش واحد بدقن و لا من غير دقن , و ايه رايه في الردة و الحدود!
دا يدل على مدى السطحية الي بيعاني منها البعض
فلما تقولي ايه رايك في الاخوان المسلمين , ما هما مسلمين زيهم زي حمدين صباحي و زي اي مصري مسلم !

و فصيل سياسي له مطامع في السلطة زي اي فصيل

س / بأختصار اية رائيك فى الرئيس ( مرسى ) حتى الان ؟

و الله مش بشوفه وحش , و لا بشوفه مثالي
هو بأمانه بيحاول يجتهد و دا ماحدش يقدر ينكره
بس هي البلد مش سهلة في ادارتها
شخصيا مش هقدر احكم عليه قبل ما اشوفه فترة كافيه
100 يوم مش حاجه
على الاقل هحتاج من سنتين لتلت سنين عشان اقد اقولك هل سياسته فاشله و لا لأ و ناجحه بكام في الميه حسب راي
لان وقتها هيكون في واقع ملموس تقدر تحكم بيه
لكن الي انا شايفه دلوقتي , هو انه بيحاول يجتهد و عمل سفريات كتير الايام الي فاتت
سياسته الاقتصادية هي اقرب لسياسة مبارك
و بالأخص سياسة الإقراض , لكن هل هيقدر يفيد بيها البلد و لا هتبقى علاج تسكين مؤقت فقط و بعد ما الاموال تستنفذ المشكلة تتفاقم أكثر؟ !
كل دا هنحسه و هنقدر نحكم عليه بعد سنتين أو لتلت سنين

أنا شخصيا مش خبير اقتصادي عشان اقولك طرق تانيه لمعالجة الاقتصاد المتعثر
فاحنا نستنى و نشوف




س / شايف ان لو فضل على نفس الاداء دا ممكن يتم انتخابة فترة اخرى ؟

اعتقد لأ
لأن شعبيته انخفضت الايام دي بالمقارنة بقبل كدا و خاصة ايام خطابه في ايران

ودلوقتى مع الجزء الثانى فى برنامجنا

الفقرة بعنوان

( بصراحة )

دلوقتى هسئلك 5 اسئلة فقط وتجاوب عليهم بصراحة :




1 - مين افضل ( مراقب ) بالمنتدى ومين اقل ( مراقب ) بيقوم بواجبة
مع الالزام بزكر الاسماء وليك الحرية فى اختيار اكثر من اسم

محمد علاء و لوجي قبل اختفاءها

اما اقل , اكيد اكيد قلم بلا حبر
و أنا اقر انه طلب كتير قبل كدا يتشال بس انا مش وافقت
تقدر تقول منصب شرفي باعتباره من اقدم الناس و من الناس الي بتكتب من زمان جدا باستمرار في المنتدى و كتاباته قوية , شخص ما يتعوضش بمعنى اصح
فيعني ايه الضرر الي واقع عليه و هو مراقب

2 - اية التوبيك الــ فى المنتدى كنت تتمنى انة يكون ليك بسبب نجاحة
مع الزامك بزكر اسم توبيك واحد فقط وتقولنا لو انتا صاحبة ممكن تجدد فية والا لا

و الله انا من كتر المواضيع الكويسه الي بشوفها فمش بفتكر
بس انا ممكن احطلك موضوع فاكره كويس
بصم في ذاكرتي
قـتـلـهـا الــحــب
قصة كان كاتبها قلم بلا حبر باسلوب رائع جدا
تمنيت وقتها ان انا الي اكون كاتبها

3 - عندك استعداد تترك الادارة وتعود عضو عادى او مشرف او مراقب بالمنتدى وتقولنا اية السبب

طب تعرف اني كنت بفكر فعلا و بجدية في كدا خلال الفترة الي فاتت
لما تشوف المنتدى بينهار أدامك بيصعب عليك أو عليه انا شخصيا لأني بحسه ابني الي ربتيه بقالي سنين
بس ما قدرتش اخد الخطوة لاني عارف انه في محنه و عايز الي يقف جنبه , و مدرك كمان ان قرار انسحابي في وقت زي دا هياثر على ناس كتير و مش بعيد يخليهم ينسحبوا , و دا مش بقوله عشان اتكبر أو حاجه
خالص ,,بالعكس أنا مؤمن ان المنتدى مش بيقف على حد
بس انت في فترة صعبه شوية و محتاج تزء عجلة المنتدى فلما انت كمان تسيبه هيدي نوع من عدم الاستقرار و الانتهاء للمنتدى

غير كدا كمان فأنا برضو بحسبها كويس و بفكر في اضرار القرار
المنتدى يعتبر متنفس ليك و كتير بيكون الواحد زهقان و مش لاقي حاجه يعملها ممكن يفكر في مسابقة مثلا
و لو انا مش ادارة فمش هقدر افرز تميزي في المسابقات لاني مش هقدر انكر ان الادارة بتيدين مساحة اكبر في الابداع و اخراج المسابقة

لكن انا هقولك حاجه كدا مقررها بيني و بين نفسي
أنا الفترة الي جايه هحاول قدر الامكان ان المنتدى يرجع التفاعل فيه بشكل كويس قريب من الاول بشتى الطرق
و مقرر اني لو فشلت فدا فعلن انسحابي و هشيل اللون الاحمر بتاعي بنفسي




4 - امتى بعت رسالة خاصة لعضوة وكانت الرسالة بسبب اعجابك بموضوع ليها او رد فى مشاركة وقولنا هى مين العضوة دى

اتصور انها حصلت قبل كدا كتير
بس بصراحة انا ذاكرتي بتخوني دايما
فمش بفتكر اسماء بأمانة و لا حتى فاكر موقف معين

5 - انتا خايف تدخل حد فى الادارة معاكو وسبب خوفك انك ممكن الاعضاء تضايق لو رشحت عضو او عضوة وخايف على زعل الباقيين وليك الحق فى زكر اكثر من عضو تتمنى دخولة الادارة

طب ايه الي يزعل في كدا
خالص و الله مافيش خوف و لا حاجه
بس الفكرة في اني وكلت مهام كتير للاداري المنتخب
فماعتش في ضغط عليه غير في الاشراف فتح قسم جديد تمييز
و الحاجات دي بتبى موسمية
مش زي بقى التزويد و الاوسمة و البنرات




وبكدا بتنتهى حلقتنا النهاردة

انتظرونى وحلقة جديدة وضيف جديد

فى

اجمد عضو

mors hooo

[واد حبيب]

اولا بجد اشكرك يا مروشو علي الحوار ده
اول مره اشوف حوار كامل من كله
بقالي ساعه بقرء في الحوار ومش عوزه يخلص
كلام طارق بجد من غير مجامله زي الفل وعقلاني جداااااااااااااا
تسلمو علي الحوار الجميل
الحبيب

[الحان الورد]

،

حلقـة جميلة وفيها شرح لكل حاجة
طارق , منور البرنـامج .,
وشكراً يا أحمد على المجهـود

[Ŗăήćy]

آلحلقة روعة بجد,,وآجآبآت دكتور طآرق جميلة آوى
آلصرآحة بحس آنه متوآضع جدآ وشخص محترم وآجآبآته عقلآنية
بجد تسلم يـآدكتور طآرق على مجهودآتك العظيمة دى,,ربنـآ مآيحرمنآ منك
وآكيد شكر كبير جدآ لـ مورشو عآلبرنآمج الجميل ده
تقييمى آكيد+نجومى بإنتظـآر جديد آبدآعآتك دآيمـآ يآمورشو.

[M@HMOUD]

بجد الحلقه جميله وتحفه
وطاق قايم بالواجب ع اكمل وجه
وربنا يوفقه

[Lost Pearl]

حلوة اوي الحلقة علي فكرة

مش كل الحلقات بتتقري كاملة بس دي حقا حلوة

و ان شاء الله المنتدي يرجع احسن

و اظن فعلا يا طارق لو غيرت لونك ده هيأثر بالسلب علي ناس كتير :d

يعني دايما اما حد بيمشي خصوصا لو قديم بيأثر علي باقي الموجودين


تسلم ايديك يا احمد ,, و نورت يا طارق

احترامي و تقييمي