جربـت تزق الحيطـة قبل كدة ؟ّ ماعتقدش - طب متجرب وتزقهـا

[big bốss]

اكيد عمرك ما هتحاول مجرد المحاوله انك تزقها
لانك عارف انك مش هتقدر تحركها من مكانها
اهي الحيطه دي بقي اعتبرها حلم حياتك
ما هو كلنا عندنا احلام نفسنا نوصللها
بس لو اعتبرنا الحلم هدف
يبقي ممكن نحققه
وبالاراده هنحققه

اتنين بيحبوا بعض
والظروف لسه مسمحتش انهم يرتبطوا رسمي
لو الشاب هنا حط البنت دي هدف عايز يوصلله
يبقي هيشتغل وهيطلع عينه كمان علي ما يوصللها
وهيوصللها
وساعتها هيكون حاول يزق الحيطه

ولاد وبنات كتير شايفين ان اهاليهم متزمتين اوي
يعني بيقسوا عليهم دايما
وللاسف تسأل اى واحد او واحده فيهم عن السبب
يقوللك من غير سبب هو بابا كده عنده كل حاجه لا
بس لو كل ولد وكل بنت فكر يقعد يتكلم مع اهله بهدوء
حط التفاهم مع اهله هدف له
يحاول يقنعهم انه من جواه عارف فين الصح وفين الغلط
ساعتها ممكن موقف الاهل يتغير
وتزيد الثقه والتفاهم في نفس الوقت
ويبقي حاول يزق الحيطه

شاب حياته متأسسه علي المخدرات
يصحي الصبح ينزل من بيتهم علي المكان اللي فيه صحابه
ويفضل معاهم يشربوا مخدرات لحد باليل يرجع بيتهم
ينام ويصحي تاني يوم يعيد اللي عمله اليوم اللي قبله
وعلي كده تفوت سنين شبابه اللي هي المفروض احلي سنين عمره
علي الفاضي
وكل ده عشان هو شايف انه خلاص ميقدرش يبطل الادمان ده
شايف ان الادمان حيطه مبتتزقش
مع انه لو فعلا قرر يبطل اللي بيشربه ده
هيقدر ومش بس هيزق الحيطه
لا ده هيهدها

المخدرات حيطه
البطاله حيطه
غياب الثقه حيطه
الظروف حيطه

كل دي حيطان بنلاقيها في وشنا
واقفه بتستفز ارادتنا
رافضه تخلينا نكمل طريقنا
فينا اللي عمره ما بيفكر يزقها
وفينا اللي بيحاول عشان علي الاقل يبقي نال شرف المحاوله
وفينا اللي بيهدها
وهو ده اللي بيكمل طريقه زي ما بيحلم

ها هتقدروا تزقوا الحيطة ولا ؟

[smasher]

طبعا بالأرادة يقدر يزق الحيطه وشكرا الموضوع الجميل ده تقبلى مرورى smasher

[big bốss]

مرسي على المرور


نورت التوبيك

[đΘόđΘό]

تصدق وانا صغيره كنت بحاول ازق الحيطه ولما كبرت شويه عرفت انو مينفعش
بس بدل ما نزق الحيطه ممكن نعدي من مكان تاني احسن

تسلم الايادي على الطرح المميز

[big bốss]

هههههههههههههههههههههه


حلوه دودو



نعدى من تحت مفيش مشكله


كل الطرق مؤديه الى هدف

[noniii]

عندك حق
اكتر حاجه بكرهها السلبيه
فيها ايه لو حاولنا نقنع الي قدامنا بالي احنا عايزينه
هيحصل ايه يعني
هيعارضونا في راينا
عادي مانحاول اكتر من مرة نفهمهم وجهة نظرنا
ولو احنا صح وكلامنا مظبوط يبقى نخاف من ايه

بعدين بقية المشاكل
البطاله مثلا
مش لازم نسلم امرنا للفشل ونقول خلاص مفيش شغل ويجيلنا احباط
ونروح نقعدعلى قهوة
لو في دماغنا هدف وعندنا عزيمة يبقى هنقدر ندور على شغل كويس ولو بسيط
كبدايه يعني وبعد كده هتفرج ونلاقي شغل احسن
وبقيه المشاكل لازم نتغلب عليها
زي ماانتي قولتي
المصطح الجميل بتاعك
نزق الحيطه

ثانكس عالتوبيك
جامد

[ياسمينااا]

فعلا معاك حق في كلامك السلبية دي هتخلينا في مكانا مش هنتحرك خالص لكن بالعزيمة والارادة والاصرار يقدر الانسان يغير حاجات كتير موجوده في حياته
توبيك روووووعه
تسلم ايدك
تقبل مروري