..حت بيتنا بياع حشيش أقولو بانجو يقول مفيش !!..

oЯҜeĐα · منذ /03-09-2010, 04:17 PM

::::::: تحت بيتنا بياع حشيش ........

أقوله بانجو يقولى مافيش :::::::

جملة سمعتها بالصدفة

فى أغنية من الأغانى الشعبية الهابطة

اللى بقت منتشرة بشكل

مش طبيعى وكل شغلها

تتكلم عن المخدرات

شوية يطلعولنا فى الفاكهة

وشوية يقلبوا على المخدرات

وشويه لونى السجاير لونها بنى

لما نشوف هينقبلوا على ايه تانى

عنوان الموضوع وان كان

هزلى أو كوميدى شوية

ولكن الموضوع المرة دى

مش هيكون كده

المرة دى هناخد

الموضوع جد شوية

لأنه بجد موضوع خطييييييييييير

وأصبح بيمثل ظاهرة

غريبة على شبابنا ومجتمعنا

وهى انتشار المخدرات بشكل غير عادى

وخصوصا الحشيش والبانجو

لرخص اسعارهم وسهولة تعاطيهم

لدرجة انهم بقوا أكتر وأسهل فى الشراء

من سلع التموين اللى بتدعمها الدولة

مافيش ناصية شارع فى مصر

الا وتلاقى حد واقف بيبيع الهباب ده

لدرجة انها بقت مرخصة من الحكومة

ولا حول ولا قوة الا بالله

تلاقى واحد فتح كشك سجاير

أو محل بقالة أو أى نشاط تجارى

وتلاقيه واخد من نشاطه قناع

بيغطى بيه على تجارته فى المخدرات

تلاقى الشاب من دول مقابل صاحبه

يقوله رايح فين يا مان

يرد عليه ويقوله رايح الدولاب

صاحبه يقوله طيب خد

هاتلى معاك قرش حشيش

بكل بساطة وكأنه بيقوله

هاتلى معاك ترمس

ولو سألت الشاب من دول

انت بتعمل كده ليه

تلاقى ردود غريبة وعجيبة

يقولك انا لما بعمل دماغ

بنسى الدنيا اللى حواليا

وادخل فى المود كده

وابقى شاب جرئ وكول

واللى يقولك عايز انسى

ولو سالته تنسى ايه

هيقولك مش عارف

وخد عندك كتير من ده

لدرجة ان حتى البنات دلوقتى

بيتعاطوا البلاوى دى

ربنا يسترها علينا يارب

نداء لكل شاب وكل فتاة

بيتعاطى المخدرات دى

علشان انا بحبكم وخايفه

عليكم بقولكم الكلام ده

قولى ايه اللى بتستفيده

لما تشرب الحاجة دى

بتعمل دماغ هههههههههههههه

على أساس يعنى ان ربنا والعياذ بالله

خلقك من غير دماغ وانت

بشربك للحاجات دى هتعمل الدماغ

يا راجل اتقى الله فى نفسك وأهلك

بتخسر فلوسك وبتخسر صحتك

وقبل كل ده بتخسر احترامك لنفسك

بالله عليك اقف مع نفسك وقفة

شوف نفسك قبل الادمان كنت ازاى

وبعد الادمان بقيت ازاى

وما تقوليش الحشيش مافيهوش ادمان

لا فيه ادمان يعنى انت مدمن

أه انت مدمن ماتستغربش

بس مش معنى كده انه مستحيل تبطله

لحسن الحظ ان الحشيش والبانجو

ادمانهم مش ادمان كيميائى

زى الهيروين والكوكايين مثلا

يعنى بشوية صبر مع شوية عزيمة

تقدر تبطل وترجع زى الأول وأحسن

يا أخى بص لشكلك فى المراية

بص لعنيك وهى كل يوم بتضيق

وكل يوم نظرك بيضعف

حس بصدررك اللى

مليان سواد من جواه

فكر فى مشاكل ضيق

التنفس والجيوب الأنفية

فكر فى الحبوب والبرشام

اللى بيضيفوه للمخدرات دى

علشان تحققلهم مكسب أكتر

ومش مهم اللى هيشرب

الحاجات دى هيحصله ايه

فكر كام صلاة فاتتك بسبب الهباب ده

هات ورقة وقلم واحسبها وشوف

انت صرفت كام علشان

تجيب الحاجة دى

هتلاقى انك ضيعت فلوس كتير

لو حافظت عليها كان ممكن

تساعدك فى حاجة تانية تفيدك

فكر ان كل ده على والدك

الغلبان المطحون

اللى بيطفح الكوتة

علشان انت تاكل كويس

وتعيش كويس وتتعلم احسن تعليم

وانت تيجى على الجاهز

وتضيع تعبه فى كلام فاضى

فكر فى الوقت اللى بتضيعه

فى الحاجات دى

لو استغليته فى قراءة القرآن

أو عمل حاجة مفيدة

فكر لو لسه مخك عايش وبيفكر

خد عهد على نفسك انك

مش هترجع للحاجة دى تانى

المهم يكون عندك الإرادة والعزيمة

انك بجد مش هترجع للحاجات دى تانى

جرب تصلى أو تقرا قرآن

وحاول تقارن بين الراحة النفسية

اللى بتحس بيها لما تصلى أو تقرا قرآن

وبين الدماغ اللى بتعملها

وانت شارب حشيش أو بانجو!!!!!!!!

قارن وانت تحس الفرق بنفسك

ولو ان المقارنة هتكون

ظالمة وغير متكافئة

ابدأ من دلوقتى وخد العهد

وبإرادتك وعزيمتك واصرارك

هتبعد عن الحاجة دى

ومش هترجعلها تانى

وصدقنى حياتك هتتغير

تغيير كبير للأحسن

وللا أنا غلطانهـ؟؟؟

وسلامى ديما ختامى

fula · منذ /03-09-2010, 04:44 PM

السلام عليكم ورحمة الله......معاكى حق يا سحابة احساس فى الموضوع ده وبجد الحكاية دى بقت منتشرة زى الوباء وتلاقى مبقاش فى اى خجل او حياء ابدا والموضوع بقى عادى كدا الاغانى كلها بتتكلم عن المخدرات وكتير من الشباب بقو يشربوها اكتر من الشاى والقهوة وتلاقى الفرح الشعبى عبارة عن غرزة كبيرة عينى عينك فى الشارع ولغاية الفجر تلاقى المخدرات والبيرة والدخان المتصاعد بيدخل للناس بيوتها وبقت ظاهرة بشعة لآ والاسواء ان السينما عندنا بقت فرحانة قوى بالظاهرة دى وبدل ماتتصدى ليها بتعرضها بصورة كوميدية ومشوقة وكأنها حاجة عادية....بس بجد مش لا زم نسكت وكل عاقل فى البلد دى لازم يحاول يعمل حاجة للحد من الظاهرة البشعة دى ..وتسلمى يا سحابة على طرحك المتميز للموضوع الخطير ده وربنا يبارك فيكى ويرحمنا برحمته

oЯҜeĐα · منذ /03-10-2010, 06:33 PM

يسلملي مروورك ياقمري
حقيقي منورااااني

فراشة حبنا · منذ /03-10-2010, 08:03 PM

معاكى حق بالكلام ياسحابه
مواضيع ونقشات رائعه يسلمو

oЯҜeĐα · منذ /03-10-2010, 08:06 PM

يثلموووو ياجميله
اسعدني مرورك ياقمري

Ќonto · منذ /03-10-2010, 09:13 PM

موضوع رائع جدا كالعادة

وبصراحةالظاهرة دي بقت منتشرة بطريقة تخنق

وكتير لما أكون قاعدة في العربية والاقي دخان سجآآير

واللي بيدخن مش عامل أي احترام للنآآس اللي معآآآه

طيب ذنبي وذنب النآآس اللي قاعدة دي ايه

وذنب الأب اللي بيشتغل ويعرق عشان يجيب فلوس لابنه

وفي دماغه ان ابنه بيستخدم الفلوس دي في الخير

والحقيقة انه بياخدها للسهر وشرب البانجو والحشيش عشان يعمله دمآآغ

لو هو ماكن باباه هتكون ردة فعله ايه

وفي الآخر ربنا يهدي شبابنا ويبعدوا عن أي حاجة تضرهم

وشكرا ع الموضوع القيم والجميل

oЯҜeĐα · منذ /03-11-2010, 09:59 AM

معاكي حق والله
بقت منتشره بجنون كمان
ربنا يهدي بجد
وميرسيهااات ياقمري على مرورك الأجمل
نورتيني بأجمل طله

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ضبط‏30‏ سلاحا ناريا و‏175‏ كيلو بانجو و‏25‏ كيلو حشيش بالجيزة	اهلاويه موت	منتدى الاخبار - عربيه - عالميه - اخبار مصر	3	04-07-2012 04:28 PM
بياع قنديل	وهج الشموس	قسم الخواطر - وهمس القوافى حصرى بقلم الأعضاء	6	10-25-2011 02:16 AM
يا بياع النصيب	Silver Flower	يوتيوب - موقع يوتيوب - يوتيوب فيديو - مقاطع يوتيوب	0	08-31-2011 05:17 PM
حصرى اسمع مفيش حشيش	Sa7fia	اغاني شعبية - اغانى شعبى - تحميل اغاني شعبية mp3	4	04-11-2011 12:36 AM
تصاميم بانيو	بنت اخر دلع	ديكور - أثاث - غرف نوم - مطابخ - حمامات	2	01-26-2009 05:38 PM

الذين يشاهدون محتوى الموضوع الآن : 1 ( الأعضاء 0 والزوار 1)

..{ فع‘ــآآليـآآت المنتــدى }..

الإهداءات

..حت بيتنا بياع حشيش أقولو بانجو يقول مفيش !!..

قسم مناقشة المواضيع المتداوله والمنقوله