على سلامه(شاعر العاميه) بعض اشعاره

[خارج عن القانون]

على سلامة






على سلامة شاعر مصرى , ولد وتربى
فى حى السيدة زينب بمصر 1960
درس الهندسة لكنة كان يتردد على قصر
ثقافة الغورى
مما ساعد على تكوين موهبتة الشعرية
هو لا يدعى أنة من شعراء المعلقات
أو أنه من اعظم شعراء هذا العصر
, لكنة يدعى انة مواطن شاعر
شاعر بالابيات
شاعر بأحاسيس المواطن.


احيانا يظهر الاكتئاب والحزن
واحيانا يظهر التفاؤل والامل
ابتسامة دهشة
إعجاب تساؤل
كلها ردود أفعال قد تراودك
عندما تقرأ قصيدة واحدة لعلى سلامة.


تأثر على سلامة فى شعرة بصلاح جاهين
وبديع خيرى
وبيرم التونسى


بعض أشعار علي سلامة


عيرة

============

الشعر عيرة والكحل عيرة
والورد فوق الخد
ولحد الضفيرة عيرة
الصبر عيرة والضحك عيرة
والفرح والأحزان كمان وحاجات كتيرة
حتى الحنان جوه البيوت
حتى الكلام...حتي السكوت
حتى الهتاف جوه المسيرة برضه عيرة
حيرني حيرة
بقينا ليه حبة حاجات
قمصان بدل على بالونات
ما بقيتش شايف إيه اللي جاي وإيه اللي فات
ما بقيتش افرق
ده أزرق ده ولا أحمر رمادي
ودي كارثة ولا ده وضع عادي
وده طفل ولا راجل عجوز
وده إيه ده راخر
جايز يجوز
نعسان ده ولا ساكت وساير
بردان ده ولا ده دور وداير
وده إحنا ولا الكل حاير





مصر والكاميرون

============

بقول لهم مين اللى بيعيط بحرقة ده؟
قالوا لى مواطن أتصور وهو بينضرب
قلت لهم ومين الأمور اللى بيضحك ده؟
قالوا لى ده واحد عمل شوية كوارس وهرب
قلت لهم والدنيا عتمة هناك ليه؟
قالوا لى دى حتة جديدة بتتخرب
قلت لهم ومين الحاوى اللى بيتكلم ده؟
قالوا لى ده الوضع بيتقلب
وإيه الهيصة اللى فى الساحل الشمالى دى؟
قالوا دى البقرة بتتحلب
قلت لهم وأنتوا قلقلين كده ليه؟
قالوا لى أصل بنلاعب الكاميرون وخايفين نتغلب.







ميدان الجيزة

============

ضيعت شويةسنين كده
بحب من بعيد لبعيد
والحكاية مقضيانى
ومبسوط وراضى وسعيد
أفرح بأى حاجة
وأستنى هدوم العيد
وبعدين ضيعت شوية سنين
نفسى أبقى أشطر واحد فى الكيميا
مع أنى مش فاهم ميدان الجيزة
والحياة رغم قسوتها
شايفها لذيذة
وضيعت شوية سنين بقى
نفسى أعدى أختبارات الكورة
فى النادى الأهلى
وأشتغل فى وكالة ناسا
وأبقى واحد من العلماء المهمين
وبعدين ضيعت شوية سنين
منتهى املى كرسى فاضى
فى أتوبيس تلات خمسات
عين الصيرة أم المصريين
وضيعت شوية سنين
عايز أفهم الفرق
بين النكسة والهزيمة
والأحترام وقلة القيمة
وأبقى نجم سيما مـ المشهورين
وبعين ضيعت شوية سنين
واقف عند نظرية المؤامرة
لا عارف أعيش ف الزمالك
ولاراضى أعيش فى غمرة
ومش عارف ليه الحشيش ممنوع
مدام مصرحين بالخمرة
وياترى بقى أتجوز
واحدة بيضة ولا سمرة
ولا أسأل فيها
رجال الفتوى والدين
وضيعت شوية سنين
مركز فى السيراميك
والبيبان والشبابيك
وألوان الحيطان
وده بيج وده سن فيل
والموضة الأصفر
وقشرة الموزة
وضيعت شوية سنين
لا أنا بحر ولا نيل
حاجة كده بعيد عنك
ملهاش عوزة
ولما بقيت كام وخمسين
لقيتنى لسة
بحب من بعيد لبعيد
وبرضة مش فاهم
ميدان الجيزة






الغٌربة

============

الواد أبنى أبو لسان طول
قالى
يعنى يا بابا سافرت واتغربت
مشوار طويل
وفى الآخر راجع
ف شارع متفرع من شارع
وشقة فى الدور الرابع
ودولار نازل طالع
وشوية حاجات
دكان مستنى التراخيص
ومكنسة على خلاط
وكمبيوتر مش نافع
من الآخر معرفتش تتصرف
مقدرتش تقول لاء
مش مسافر
منين الكحة دى يا بابا
ده عمر ولا برد ولا سجاير
أنت عارف يا بابا أنا بقالي أد أيه بستناك
إيه يا بابا أنت ح تعيط
ده أنا كنت بهزر معاك
كنت بهزر معاك




ميزان حياتى

============

ميزان حياتي
ناقص حته
وكل ما أوزن
ألاقي لسه
ناقصلي حته
أحط حته
تقل حته
وأجيب قميص
تضيع چاكته
وأعيش لي ساعة
يفوتني سته
وكل ما أوزن
ألاقي ناقص
أقول بناقص
لو هي حته
أتاري لسه
ولسه تاخد
سنين وحته
وحاجات تسيبني
وحاجات تاخدني
لحاجات تخبط
في كل حته
وأقول ها نفرح
ف يوم
ها نفرح
ويوم مانفرح
علي الله يفضل
في القلب حته




كتاب القراءة

============

بمنتهي البراءة
سأليتني
بنتي نور
ف أربع خمس
أمور
مش ف كتاب القراءة
قالتلي بابا بابا
مش إنت .. يا بابا
بتكتب أغاني
وتقول أشعار
أنا سمعت
الشيخ يا بابا
بيقول إنك يا بابا
ها تروح النار
زي الوحشين يا بابا
الحراميين الكفار
قوللي يا بابا
يعني إيه إستعمار
يعني إيه نيل
يعني إيه هرم
ومين اللي حط
النسر فوق العلم
يعني إيه يا بابا
إستفتاء
و يعني إيه إنتخاب
ويعني إيه حر
ويعني إيه نصاب
يعني إيه إختلاس
ويعني إيه هجاص
ويعني إيه خصخصة
يعني إيه يا بابا
دستور
يعني إيه معارضة
ويعني إيه مظاهرة
وليه النهاردة
خدنا أجازة
م المدرسة
قوللي يا بابا
يعني إيه قهر
وفين
خط الفقر
ويعني إيه حظ
ويعني إيه زهر
يعني إيه يا بابا
حريه
يعني إيه إنسان
ويعني إيه سرطان
يعني إيه يا بابا
خربوها
وكنت فين لما خربوها
ومين دول يا بابا
ولاد القطقوطة
ومين دي
سمارة يا بابا
وإزاي يا بابا
ضاعت من قلبك
يا بابا
إنت معايا
فيه يا بابا ناس
بتقول كفايه
وفيه كمان عساكر
مسكين عصايا
وبنات متعورين
وتانين
ماشين بيضحكوا
هما دول إسرائلين
يا بابا
ويعني إيه
ويعني إيه
قولتلها
نور
ممكن أسألك سؤال
قالتلي
إتفضل يا بابا
قلتلها
هيه قناة سبيس تون
رقم كام
وخدتها
عشان تنام






جايز .. يمكن .. احتمال !!

============

مش دى بطاقتى
وده رقمى القومى
ودى الحقيقة وده الخيال
ومش دي الخريطة
ودي المدينة وده المحور وده المترو
وكده يمين وكده شمال
مش ده ظابط وده عسكرى
وده طبيب وده كمسرى
وده منجد وده بقال
مش ده جامع ودى مدرسة
وده سمسار وده شيال
مش ده فستان ودى جلابيه
وده شورت وده مفيش وده شال
مش ده اتوبيس ودى عجلة
ودول حمير ودولا جمال
مش ده عمى ودى أختى
و دول صحابى وده كمال
مش ده شارعنا وده بيتنا
ودى مراتى ودولا العيال
مش ده الوطن وده المواطن
وده التاريخ اللى إتقال
أمال ليه كل ما اروح فى حته
و أسأل سوأل
يقولولي جايز .. يمكن .. احتمال !!




على حد علمى

============


على حد علمى
احنا و اسرائيل حبايب
و فيه سلام و ما فيش حرب
طب الظباط و العساكر دول بيعملوا ايه
في ميدان طلعت حرب
ده بنت و ولد نازلين يشوفوا بلوزة تليق ع الايشارب
بيحلموا .. بيغنوا
و احلي ما فـ غناهم انه طالع من القلب
من امتي العشق كان بيموت من الخوف
و منا امتي الحلم كان بيخاف من الضرب
يا كابتن يا باشا
خليك ابن بلد
هوه انتا ما عندكش اخوات
صبيان و لابنات
يعني انتوا كل عيلتكوا ظباط
يعني انتوا اصحاب اكاديمية الشرطة
و اصحاب الشوارع
و الميادين و المحلات و اصحاب البلد
طيب
طب ان هاخرم من التحرير لدار القضاء العالي
هاكل كشري و اخش سيما
مالك بقي و مالي
معايا بطاقة و خلصت الجيش
بتسمي ده أكل عيش
يبقي عرفتك
طب عريني بقي
فتشني قطع لي هدومي
و افحصني و خلصني
لا انت اول و لا اخر واحد
عارف
انا مرة القطر عدي و داسني
و ما متش
عشق الحياة ماهوش ترف
عرفت ايه معني الشرف





خايف أصحى مالاقيش مصر

==============

ساعات بقلق بالليل
يعني بالليل شوية كده
قبل الفجر
حسب الظروف كده
بعد العصر
خايف يوم أصحي
وأفتح الشباك
مالاقيش مصر
ألاقيها لمت هدومها ومشيت
لمت هدومها
علي نيلها
علي هرمها
وطفشت
وحلفت ميت يمين ماهي قاعدلنا
ماهي زهقت
تعبت
إتخنقت
أصلنا زودناها
أكننا استعمرناها
ورثناها
مصر البنوتةالحلوة
اللي زي القمر
بقت عجوزة وشايبة
وبان عليها الكبر
خايف يوم أصحي
وأفتح الشباك
مالاقيش مصر



امبارح

==============

مش أنا امبارح
رحت من بيتنا في السيدة
للشغل في حلون
في سبع دقايق
لا شوفت حد زعلان
ولا حد متضايق
والورد إنسان
والنخل متعايق
والناس جميلة مؤدبة
والجو رايق
والدنيا ماشية لوحدها
ولا حد سايق
ومش انا
امبارح برضه
رجعت من الشغل في حلوان
لبيتنا في السيدة
في خمس دقايق
لا حاسس بغربة
ولا شايف غريب
وقلبي ابيض حليب
عندليب
كروان فرحان
شايل ف قلبي وف جيوبي
الفرح أشكال وألوان
وزعت ع الشوارع
والبيوت والجيران
وطلعت البيت
ضربت الجرس
فتحت مراتي وبالأحضان
والعيال كمان فرحانين
ناجحين وجايبين
الدرجات النهائية
من غير دروس خصوصية
قمنا رقصنا وغنينا
واحتفلنا واتغدينا
فضلة خيرك
سمك واستاكوزا
وجمبري م الكبير
وحلينا ب مهلبية
وشربنا الشاي كمان
وفجأة
لقيتني بردان بردان
بصيت لقيت
الشباك مفتوح
ومفيش بطانية
ومراتي جنبي وزي ما هيه
لسة بتعاني من آلام المفاصل
وده اللي حاصل
والحمد لله
على كل شيء


م الاخر

==============

بص ح أقولك
م الأخر
أنا عندي عربيه
مركبتهاش
ومعايا فلوس
مكسبتهاش
وجوزوني بنت حلوة
محبتهاش
وإشتريت بدلة جديدة
ملبستهاش
كسرت الحمام وغيرتة
محستش بأي إنتعاش
خدت بعضي علي جنب
وكان يوم حر رطوبة
وقولت لروحي
إيه ياعم
إنت طوبة
قاللي لأ
يا صحبي دي حسبة
ومحسوبة
أنا أصلي زمان
لمست قلبي
غنوة حب جميلة
لكن يا خسارة
محضنتهاش






علي باب سفارة كندا

==============

علي باب سفارة كندا قبلت ابليس وفي ايده استمارة
قولتله علي فين قالي بص يا هجرة يا إعارة
يا عم خلاص زهقت كفرت ألاقيش معاك سيجارة
أنا انتهيت خلاص
لا عاد نافع وسواس ولا خناس ولا عاد ليه عيش بين الناس
دي عالم مجرمين عندكو فائض فساد في كل البلاد
مش محتاجين شياطين مليش عيش في البلد ده
بقينا عاطلين وانتو بتعرفوا تقلبوا الحق باطل تسكتوا عن القاتل وتمشوا في جنازة المقتول ومفيش مشاكل
يا عم ده أنا بقيت أوسوس بالمقلوب بقيت أقول للحرامي توب أنت لوحدك هتعمل كل الذنوب
دانا ابليس اشتغل واعظ وكمسري في اتوبيس
يا عم من زمان بستني حد ينسي يسمي وهوه بياكل لقمته
دلوقتي اكلكم ملوث وبصراحة الواحد خايف علي صحته
ده مفيش ضمير اساسا علشان اموته
كل واحد بمزاجه خربانة زمته
يا عم ده كل حاجة اتسرقت والاجيال الجاية من الحرامية اتظلمت
يا راجل ده من كتر ملطتشت معايا طلعت في مظاهرة مع الناس اللي بتقول كفاية وبرضه مفيش فايده



وإحنا لسه في إبتدائي

==============

وإحنا لسه في إبتدائي
وسط أوراقى القديمة
اللى لسه منها باقى
شوفت صورتى بين زميلى
و أحنا لسه فى إبتدائي
الوشوش كانت بسيطة
طاهرة لكن مش عبيطة
نرسم الأحلام خريطة
فى قلبها نقطة تلاقي
هو صاحبى
لما كان فى الدنيا صاحب
أما دول كانو من جيرانى
كل واحد فينا حقق جزء من بعض الأمانى
أما دى الشاطرة البليدة
العنيدة أم الضفاير
تبقى حبى الأولانى
أد إيه حزنت عليها
لما راحت فصل تانى
ما أحنا كنا تخته واحده
فى تانيه تالت
مره قلت
و هى قالت
لما مدت أيدها شالت
دمعة وقعت غصب عنى
جوه كراسة الحساب
كنا لسه صفحه بيضه فى الكتاب
الوشوش كانت بسيطه
طاهرة لكن مش عبيطه
نرسم الأحلام خريطة
فى قلبها نقطة تلاقى
وأحنا لسه فى أبتدائي





المــرايه

==============

قلت أبص ف المرايا
يمكن أكون إحلويت
فضلت داير أبص
مخلتش ولا مرايا ف البيت
في الحمام ف الأودة ف دولاب
أو متعلقة ع الحيط
شوفت
سكت شويه
وبعدين إتخضيت
معقول أنا قضيت العمر ده كله
وزي ما روحت زي ما جيت
معقول أنا عمري مافكرت ولا إتغيرت ولا حبيت
وإزاي ساكت علي روحي ده كله
وليه إستنيت يا ريتني ما كان عندي مرايا
وياريتني ما بصيت





لب وسوداني

============

بقول لها
ما تيجي نهزر
نجري ونلعب
ونكسر كل الحاجات
ونجيب م اللي فات
يومين حلوين
قالتلي والنبي إنت فايق ورايق
قولتلها
طب وليه نتضايق
إحنا لسه صغيرين
وأكبر عيالنا
يا دوب تسع سنين
يعني لو بنحكم مصر
تبقي يا دوب لفة ونص
مش عشرين
وطي صوتك البت بتذاكر
والواد مصدقت إنه نام
إنما إيه اللي صحي ف قلبك
من تاني الغرام
قولتلها جوايا كلمتين غزل
قالتلي والنبي إنت عسل
بس الظروف
مالها الظروف
فاكرة لما كنتي
بتحوشي م المصروف
جبتيلي ورد ف عيد ميلادي
وجبتلك بلوفر صوف
وجبتيلي بلوفر صوف
فاكر لما بوستني
وإحنا لسه مخطوبين وأبويا لاحظ
يالهوي كنت هموت م الكسوف
فاكرةأول مرة قلت لك بحبك
وشك إحمر ..
إنت اللي وشك كان مخطوف
مش إنتي كنتي بترسمي زمان
وإنت كمان كنت بتكتب شعر
هو احنا بطلنا نحس
إحنا بطلنا نشوف
وطلعنا اللب والسوداني
وفتحنا التليفزيون
وسكتنا تاني
ولا زال السبب
غير معروف
غير معروف





فارس

=========

بتنسى يافارس
فلوس المدارس
و كا أنك ولا فاكر خالص
مطنش يافارس
ولادك ياخويا بتدرس لغات
ده غير الباصات
وإلا الدروس
ح تبعت فلوس
ح تنسى يافارس
بتنسى يافارس
أتارى ل أسامه
وجزمة سلامه
وشنطة منال
مهما العيال
بتنسى يافارس
والله بتنسى يافارس
وبرجع ألاقى الصغير صغير
ونفس الشوارع بتحلم تغير
ح تنسى يافارس
ف أول اجازة
نشوف الأراضى
ف مصر الجديدة
يا أما المعادى
بتنسى يافارس
وربنا بتنسى يافارس






بوابة تفتيش

==============

بوابة تفتيش على بابك
كل ما أحاول اعدى تزمر
وبتشرط وبتأمر
أرجع أدور تانى وأدور
وكل ما عدى برضه تزمر
طب آدى الساعة
وآدى حزامى
وآدى بطاقطى
والنضارة
وآدى عنوانى
وكل حكايتى
وآدى آمارة
حتى الفكة الباقية ف جيبى
والأشعار
والمحفظة مفهاش غير صورتك
ليل ونهار
كل هدومى
زى ما نازل من بطن أمى
من غير حتى ورقة توت
وكل ماأفوت
البوابة برضك بتزمر
ولما لمحنى
واحد طيب م الحراس
وقال لى أسمعنى يابن الناس
إرمى الحتة الحلوة ألى فقلبك
وعدى
والبوابة عمرها ماتزمر





صالة السفر

==============

من كتر م الحزن بقي في دمنا واكلنا وشربنا
حتي في غونانا والسهر بقت بتتساوي الحاجات
صالة الوصول تشبه تمام صالة السفر
بنادي ع القبح نقوله يا عسل يا سكر انت يا قمر
والموت بقي مجرد خبر
تصدق
ساعات بخاف لو قلبي دق
ما انا كنت قربت خلاص اقول عليه حته حجر
عارف
رغم احتياجي للفرح لكني بتلخبط اوي
لو دق بابي بدون سبب وبدون شروط
أبقي نفسي أعيش كمان مليون سنة
و اقول يا ريت دلوقتي اموت
معقول بقيت بخاف كمان من الفرح و م الأمل و م الهدوء
واقلق و أقول يا هل تري ايه مستخبي وايه اللي جاي بعد السكوت
عارف
لو كل الحاجات الحلوة كان مسموح لها وتقدر تفوت
لو كان حقيقي ده وطن مش مجرد مساحة ع الخريطة وناس وزحمة وشوية بيوت
عمري ما كنت يوم اخاف م الفرح
لو دق بابي




الضريبة

==============


مش غريبة
ندفع الأوجا ضريبة
قسمي الأحزان شرايح
عبي دمعي ف الصفايح
واسألي عمري
اللي رايح
المصيبة
لسه شايلك ف العيون
أجمل حبيبة
قولي كذبة
حبي ليكي يبقي حسبة
والأماني والهوا
والشوق بنسبة
وإنتي عزبة
للي ماله فيكي حسبة
المصيبة
لسه شايلك ف العيون
أجمل حبيبة
مين اللي قرر
يقتل الحلم
في عيون كل الطيور
ليه تسلميني
من طابور تاني لطابور
قيدي البخور
بركات جراحنا المزمنة
كل الأماني ممكنة
تبقي يا دوبك دمعتين
فوق صورة باهتة ملونة
سايبة الجراح ليه تهدني
إبه فيكي تاني يشدني
ده أنا اللي حبي عززك
وإنتي اللي عشقك ذلني
لسه يا هبلة بتسألي
بتحبني
نفسي أشتري
شبرين في حضنك وآرتوي
فكرك مسافر اغتني
خدي اللي حيلتي
الهدمتين والقرشينات
بس استري عرض البنات
لو حسينا علي دمنا
في قلوبنا مات
لو بكره فات
وإحنا بياكلنا السكات
كل الأماني ممكنة
تبقي يا دوبك
دمعتين
فوق صورة باهتة ملونة

[♥Donya♥]

موضوع رائــــــــــــــــع

تسلمـــ الايـــــــــــــــــــــــــادي

دمتي بود

اختك فيولا

[خارج عن القانون]

اقتباس
المشاركة الأصلية كتبت بواسطة viola vivo





موضوع رائــــــــــــــــع

تسلمـــ الايـــــــــــــــــــــــــادي

دمتي بود

اختك فيولا

تسلميلى ع المرور

وردك الرائع

[نسيم الريح]

موضوع جميل جدا وقيم

واتمنى لك التوفيق دائما

[خارج عن القانون]

اقتباس
المشاركة الأصلية كتبت بواسطة نسيم الريح





موضوع جميل جدا وقيم

واتمنى لك التوفيق دائما

الاجمل هو مرورك

والتوفيق لى باذن الله

ما دمتى تنورى صفحاتى دائما

[احمد الحلو]

اشعار جميلة جدا لشاعر رائع والله



جهد مميز ورائع سلمت الايادي




اختيار مميز ننتظر جديدك ايها الراقي





تقديري واحترامي كنت هنا انا 000احمد الحلو

[خارج عن القانون]

اقتباس
المشاركة الأصلية كتبت بواسطة احمد الحلو





اشعار جميلة جدا لشاعر رائع والله



جهد مميز ورائع سلمت الايادي




اختيار مميز ننتظر جديدك ايها الراقي





تقديري واحترامي كنت هنا انا 000احمد الحلو

احمد الحلو

اشكرك ع المرور

والرد الرائع

الذى انار صفحتى