قوم عاد ليسوا بناة الأهرامات بشهادة القرأن نفسه

[فرعونية و أفتخر]

بسم الله الرحمن الرحيم

أولا: أوجه تحية خالصة لكل أشقائى المصريين لإنهم كانوا الأكثر ذكاء و بالتالى الأقل تصديقا لهذا الهراء الذى كتبه هذا المخمور المتستر خلف عباءة الإسلام الذى يدعى بالباطل أن قوم عاد هم بناة الأهرامات.

للأسف بسبب هجرنا للقرأن و تسطيحنا للإسلام أصبحنا نصدق كل متأسلم أفاق و لا أقول مسلما لإنى مسلمة و أعلم تماما ما هو الإسلام .. و هؤلاء المتأسلمين لا يأخذون من الإسلام إلا ظاهره حتى ينخدع بهم الناس فيصلون إلى مأربهم الشخصية من شهرة و مال و متاجرة بالدين و فش غلهم و حقدهم فى الأموات قبل الأحياء و تجد من أهم سماتهم الخوض فى سير الموتى و تلبيس الحق بالباطل و الإتيان بأيات من القرأن لا علاقة لها بالموضوع و إقحامها و تأويلها على كيفهم و المقدمات الطويلة الغير لازمة و التى تبدأ عادة بأيات عن الإيمان و الكفر - يعنى لو خالفتنى فى الرأى تبقى كافر يا حلو - أنا باكلمك بإسم الله و هما ربنا فى الحقيقة برىء منهم و من أفعالهم .. و لو بحثت فى شخصية الرسول و عملت بحث موسع و صحيح لوجدت أنه كانت من أهم سمات الرسول - صلى الله عليه و سلم - الإيجاز غير المخل .. أما هؤلاء فتجد الكلام عن الكفر و الإيمان فى البداية على ودنه و ممكن الموضوع يكون أصلا بيتكلم عن زيت شعر ... ..

و أقول أفاق و متأسلم لإن القرأن يقول "ما يلفظ من قول إلا لديه رقيب عتيد" ... و هوا قعد يتكلم يمين و شمال بدون سند علمى و بمخالفة ما أقره القرأن حقيقة عن قوم عاد و إقرأ موضوعى حتى أخره ستعلم ما أقصده ..

أولا هذا شخصا لا يبغى من وراء هذا الهراء إلا شيئين: أولهما الشهرة و عمل فرقعة تجعل إسمه الأكثر إنتشارا و تجعله نجما يلمع بقوة فى الأوساط العربية و للأسف نحن المسلمين كننا الأسرع إنسياقا وراء هراؤه و مزحه على الرغم من إن كتابنا بيقول:

"يا أيها الذين أمنوا إذا جاءكم فاسق بنبإ فتبينوا أن تصيبوا قوما بجهالة فتصبحوا على ما فعلتم نادمين"

صدقه الجهلاء رغم أنه و بدون أى حياء إتهم الفراعنة و هم 30 أسرة كاملة شهد العالم كله بنبوغهم فى الطب و الفلك و الهندسة و المعمار و الفيزياء و الكيمياء و غيرها من العلوم ، جه هوا بقا فى لحظة كده و بشوية صور مسروقة و بتفصيل أيات القرأن على كيفه و إتهمهم بسرقة تاريخ قوم عاد و نسبه لأنفسهم .. و كتبها صريحة "الفراعنة سرقوا و فعلوا" .. و الحقيقة أنه هو السارق لأنه أتى بصور هياكل و جماجم قوم عاد و التى تم إكتشافها فى بعض المناطق فى جنوب السعودية و منطقة اليمن و عدلها بالفوتوشوب ووضع فيها رجل صعيدى و لو عرضتم الصور على خبير ستتأكدون من ذلك ... ليس هذا و فقط - أحد المؤسسات الهندية إشتكت من إقتباس بعض صور لحفريات جماجم من موقعها الإلكترونى و إعادة نشرها رغم إن عليها حقوق نشر .. أقول له المسلم الحق لا يسرق .. ألا تعلم شدة النهى و الزجر فى الإسلام عن السرقة حتى أن الله جعل عقاب السارق فى الإسلام بقطع يده؟؟ ألم تصلك هذه المعلومة؟؟

الدليل على أنه لم يفعل ذلك إلا طلبا للشهرة:

1- حاطط إسمه بالكامل
2- حاطط صورته

لإن هوا ده المطلوب تحديدا .. إنه يتعرف و يتشهر ..

الدليل على أنه ليس لديه علم فى هذا الموضوع من الأساس:

1- كاتب إن له 3 مهن ليس لهم أدنى علاقة ببعضهم و كل منها يحتاج إلى عمر كامل حتى يصبح متخصص فيها .. خد عندك بقا كاتب إنه:

1- رجل أعمال : و مش عايزة أقوللكم إن كل اللى شغال فى مجال الأعمال مش فاضى يهرش حتى لو كان ما يملكه هو محل صغير. و اللى يعرف حد عنده أى بيزنس من أى نوع حتى لو محل صغير يسأله إن كان لديه أى وقت لشىء أخر ..

و إن كان رجل أعمال حقا فما هو مجاله لو كان صادقا؟؟؟ هناك أكثر من ألف تخصص فى مجال الأعمال ... التجارة بأنواعها - الصناعة بأنواعها (إمتلاك المصانع) - الشركات - الإستيراد و التصدير .. طبعا كل فرع لوحده موال يحتوى على مئات الأفرع .. فلو كان صادق لماذا لم يكتب مجاله؟؟ و للا هوا كل اللى مالوش شغلانة اليومين دول بيقول على نفسه رجل أعمال ..

2- مبتكر 12 إختراع مسجلين عالميا فى ألمانيا و سويسرا : فلو كان صادقا و يملك براءات الإختراع فلينشر صور من الشهادات التى تثبت أنه مخترع 12 براءة إختراع .. أنا دارسة الماجستير بتاعى الحمد لله فى أمريكا و عارفة كويس أوى أن كل شىء فى العالم المحترم بأدلة و كل شهادة بوثيقة و ليس بوقيقى (يعنى كلام و بس) - هوا الكلام بفلوس؟ أهو أى حد عايز يقول حاجة بيقولها و أهو رزق الهبل على المجانين ... فإن كان صادقا فليضع صورة من وثائق براءات الإختراع هذه - على الأقل عشان نعرف هوا إخترع إيه بالظبط - لإنى متأكدة إنه لو كان عاش يوم واحد فى أى جامعة محترمة هناك كانوا علموه إن فى حاجة إسمها منهج للبحث العلمى و هو لا يعتمد إلا الصور الصحيحة و ليس الملفقة و لا يكون كله قائم على الصور و على تفسير القرأن لصالحه بل يكون قائم على الحقائق العلمية و الأسانيد حتى لو يدعمها بالقرأن و لكن ليس على الخداع البصرى (كام صورة و عليهم أيتين و كلام ليس له أى دليل علمى) ..

أقول له: إتقى الله فالقرأن أشرف و أرقى من أن يستخدم فى مثل هذه الأشياء (محاولة استجلاب الصيت و السمعة على حساب الحق و الحقيقة) ..

3- باحث متخصص فى مجال الإعجاز العلمى للقرأن الكريم: و دى بقا طبعا عشان يغسل دماغكم بيها - اللى هوا أنا راجل باحث فى القرأن يعنى بافهم فيه أكتر منكم صدقوا كل كلامى بقا حتى لو قولتلكم إن الشمس بتشرق من الغرب ... طب أنا باقولله يا سيادة الباحث قول لنا من أين أخذت أى شهادة علمية فى الإعجاز العلمى للقرأن الكريم؟؟؟؟ يعنى لو صادق صحيح إنشر لنا وثيقة تؤكد ذلك سواء واخدها من الأزهر أو من أى مؤسسة إسلامية حتى لو من الخارج .. المهم جامعة إسلامية محترمة تقر بأنك كما تدعى .... بس ياريت ماتكونش مفبركة بالفوتوشوب زى إخواتها ...

و قوللنا بقا بالمرة .. هوا إنت رجل أعمال و للا باحث فى القرأن الكريم و للا مخترع و للا مبيض محارة و للا إيه بالظبط؟؟ .. واضح إن الأخ بتاع كله ههههههه و بالتالى مابيفهمش فى كله ...

4- أطلقت على نفسك باحث، الألقاب بعد الثورة بقت بتتوزع ببلاش .. فلان بيه و فلان باشا و فلان الباحث و أهو رزق الهبل ع المجانين - حد عاد فاهم حاجة و للا عارف فلان بيه ده بيه بأمارة إيه ، و للا فلان باشا بأمارة إيه ، و لا سعادة الدكتور الوزير الباحث الأوسطى أونكل عزت أنهى جامعة علمية محترمة فى أى حتة فى العالم أطلقت عليه باحث أو حتى درس فيها يوم واحد ... يللا ربنا يخليلهم الحاج إنترنت بقا بيوزع ألقاب ببلاش ...

أنا بس متضايقة عشان حاجتين إتنين .. البنى أدم ده بيطعننا فى ديننا و فى هويتنا ، يبقى فاضل إيه؟ .. أولا كمسلمة أرفض إنه يشوه صورة الإسلام بالطريقة دى و ثانيا كمصرية أرفض التقول على تاريخ مصر بالباطل .. عاد إيه و بطيخ إيه؟ هما عمرهم عتبوها أساسا؟؟ و فين الدليل على إنهم عتبوها؟؟

اللذيذ بقا فى الأخ إنه بيحاول يستميل عاطفة المصريين و حبهم لبلدهم حتى لا يثبتوا كذبه .. عشان يؤيدوه بيقوللهم إيه فى أول البطيخ اللى هوا كاتبه ده ... إن عمر مصر 70 ألف سنة و ليس 7 ألاف سنة .. عشان المصريين ياعينى يطيروا من الفرحة و مايبقوش مصدقين نفسيهم يا حرام ... أحب أقولله بقا إن عمر مصر أكثر من 20 مليون سنة ببساطة لإن أرض مصر الخصبة فى منطقة دلتا النيل و حسب كلام العالم المحترم (المعتمد عالميا) الدكتور فاروق الباز لا يمكن أن تتكون إلا بعد تراكم الطمى عليها على مدار 20 مليون سنة .. يعنى إلعب غيرها .. المصريين مش هيفرحوا بكده لإن البلاد تقاس بكم من الحضارة صنعت للعالم و ليس منذ متى هى موجودة .. و لو كنت قرأت دينك ووعيته أو حتى قرأت القرأن الذى تقتبس منه و تتقول عليه لعرفت أن أيام سيدنا نوح حدث طوفان عظيم جب كل ما قبله .. و من التاريخ بعدها لم يبق إلا أبناء سيدنا نوح مصداقا لقوله "و جعلنا ذريته هم الباقين" .. و تزاوجوا و أنجبوا و أتى من نسلهم أقواما .. منهم العرب و الفراعنة و الغربيين و الأمازيغ و الهنود و الصينيين ..إلخ

يعتمد فى كل بحثه على البنيان الجسدى ليثبت أن عاد هم بناة الأهرامات بالعافية عشان كان حجمهم كبير .. طب أنا باسأله ليه مش قوم ثمود؟ ماهم كانوا حجمهم كبير أيضا أو سيدنا إدريس أو سيدنا أدم ... سيدنا أدم كان 63 ذراعا يعنى كان كفيل بإنه يرص حجارة الأهرامات كلها لوحده بمنتهى السهولة .. إشمعنى عاد؟؟ أنا أقوللك إشمعنى - عشان الكلام ببلاش ... ماهو لو كان الكلام بفلوس كان أمثالك دفعوا كتير أوى .. مكنتش نطقت أساسا

و بعدين بتقول إنك عامل 12 براءة إختراع فى ألمانيا و سويسرا و فى نفس الوقت بتقول إن الجامعات الأجنبية دى اللى بتبحث فى علم المصريات كل كلامها غلط و إنهم مغرضين .. مش شايف إن ده تناقض؟؟؟؟ يعنى شوية تقول إنك مسجل عندهم براءات إختراع و لو إستنينا 5 دقائق كمان هتقوللنا إن معاك 16 دكتوراة من هناك و بعدها بسطرين بتقول إن كل أبحاثهم غلط .. طب لما هما خايبين أوى كده كان الأولى إنك متسجلش عندهم التريليون براءة إختراع دول اللى بتقول عليهم ههههههه

أجيب لك بقا أنا دليل من القرأن نفسه بمثابة صفعة على وجهك إنت و أمثالك من الجهلاء ...

بالصدفة و الله يا جماعة قرأته و أنا باقرأ فى المصحف بعد الفجر ..

كلنا عارفين إن سورة الأحقاف تتحدث عن قوم عاد و سميت الأحقاف لهذا السبب .. "و اذكر أخا عاد إذ أنذر قومه بالأحقاف و قد خلت النذر من بين يديه و من خلفه ألا تعبدوا إلا الله إنى أخاف عليكم عذاب يوم عظيم" ...

بص بقا بنص القرأن ربنا لما دمرهم لم يترك إلا إيه؟؟

"تدمر كل شىء بأمر ربها فأصبحوا لا يرى إلا مساكنهم كذلك نجزى المجرمين"

يعنى ربنا سبحانه و تعالى نفسه بيقول لم يتبقى إلا مساكنهم ... أكدب ربنا و أصدقك إنت؟؟؟؟؟؟؟؟؟؟؟؟؟؟ .... و قال "تدمر كل شىء" و ربنا لما يقول كل شىء يعنى كل شىء ... هل ربنا - حاشا لله - كان عاجز عن إنه يدمر الأهرامات؟؟؟؟

الأهرامات لا تصلح نهائيا أن تكون مساكن قوم عاد لسبب بسيط أوى هو إن الأهرامات لا تحتوى مطلقا على باب يفوت شخص حجمه "كأنهم أعجاز نخل منقعر" .. القرأن وصف قوم عاد فى حجمهم كأنهم أعجاز نخل منقعر ... لا يوجد باب بهذه المواصفات نهائيا فى الأهرامات .. و كل الموجود هى ممرات ضيقة جدا جدا جدا إحنا لما بنزور الأهرامات مبنرضاش ندخلها بنخاف لإننا لازم نوطى راسنا و نثنى جسمنا و أقسم بالله يمين أحاسب عليه من ربنا إنى شوفت السائحات الإيطاليات نفسهم بعد ما المرشد المصرى قطع لهم التذاكر عشان يدخلوا جوه يتفرجوا على حجرات الدفن أول ما نزلوا السلم قعدوا يبرطموا بالإيطالى خايفين و طلعوا خافوا يدخلوا .. و أنا روحت كتير و عمرى ما دخلت لإن إخواتى طلعوا قالولى لازم توطى جدا جدا و إنتى داخلة مع إن إخواتى قصيرين أصلا يعنى مش أعجاز نخل منقعر .. يعنى الممرات دى لو إتحشر فيها صباع واحد من قوم عاد مش هيعرف يطلعه تانى ، تبقى إزاى مساكنهم؟؟؟؟

و هذه صورة لسائح تانى جسمه عشان يعرف يدخل من الممر داخل الهرم

http://forums.msryat.org/attachment....1&d=1280443269

و صورة للرئيس أوباما موطى راسه داخل الهرم عشان ماتخبطش فى السقف

http://forums.msryat.org/attachment....1&d=1280443314


ضيف على كده بقا إن كمية الأوكسجين داخل الهرم أقل و الناس اللى دخلوا فى منهم كتير داخوا جوه عشان مكانوش عارفين يتنفسوا كويس .. لإن كمية الهوا اللى داخلة الهرم قليلة لإنهم ممرات جوه ممرات .. و من المعلوم إن كلما زاد حجم الإنسان كلما إحتاج لكمية أكسجين أكثر بسبب زيادة الدم فى جسمه فيحتاج لكمية أكسجين أكبر لإن الدورة الدموية عنده أكبر و ما قاله القرأن عن حجمهم أنهم "كأنهم أعجاز نخل منقعر" يعنى فتحة مناخير الواحد فيهم يمكن أد كف إيدك .. شوف بقا بيسفوا هواء أد إيه فى كل دقيقة .. كان زمانهم إتخنقوا لو كانوا إتخذوا من الأهرامات مساكن لهم ...

طبعا سمورة الجن مش هيسكت .. و دى تيجى برضو؟ إحنا بتوع الكلام ده؟؟ .. هيقوللك كان فى باب لقوم عاد يا جدع بس الفراعنة المصريين شالوا الحجارة على قلبهم و سدوا بيها مكان الباب على طريقة طمعانجى بنى له بيت فلاسنجى سكن له فيه .. هههههههه طب ما إنت لسه بتقول مايقدروش يشيلوها عشان حجمهم صغير .. هتناقض نفسك برضو يا سمورة؟؟؟ كفاية فضايح يا راجل ده إنت إتفضحت فى النت فضيحة السمكة فى طاسة القلية و فى مصريين كتير كتبوا أدلة غير بتاعتى كمان بيؤكدوا فيها كذب كلامك ...

طب هنسمع كلامك يا سمورة ، الفراعنة المصريين شالوا الحجارة على قلبهم و سدوا بيها مكان الباب، طب إنت قوللنا بقا يا سمورة وصلوا لأعلى نقطة فيه إزاى؟؟؟؟ يا راجل ده قوم عاد كأنهم أعجاز نخل منقعر يعنى الفراعنة لو وقفوا كلهم على كتاف بعض مش هيقدروا يوصلوا لأعلى نقطة فى الباب (ده حسب كلامك طبعا) .. شوفت بقا ربنا بيفضح الكداب إزاى يا سمورة الأمورة؟؟ إخص الله يكسفك خليت سمعتنا كمسلمين فى الأرض، العالم المتحضر اللى أصدر لحد دلوقتى أكثر من 2000 نظرية مبنية على أسس علمية سليمة فى بناء الأهرامات تف علينا و بيقول المسلمين بيخرفوا من كتر الجهل ... محدش قاللك يا سمورة إن فى علم كااااااااامل فى كيفية بناء الأهرامات (علم مستقل بذاته يصعب على أمثالك فهمه)

اللذيذ بقا فى سمورة الجن إنه بيقول إن قوم عاد كمان هما اللى عملوا أبو الهول ، يللا بقا من جملة الهلس ... هوا الكلام بفلوس؟ أهو كل واحد ضارب له سجارتين حشيش يعمللك موقع و يعيش حياته و المغفلين يصدقوه و أهى شهرة ببلاش و زيادة فى سعر الموقع بيحققها له كل جاهل يدخل الموقع - حد طايل؟ .... هوا واضح بس إن الأفيونة كانت عالية معاه شوية معلش ...

ربنا بيقول فى الأية "تدمر كل شىء بأمر ربها فأصبحوا لا يرى إلا مساكنهم كذلك نجزى القوم المجرمين" ... واضح من الأية "لا ......... إلا ...." تفيد القصر و الإستثناء يعنى ربنا لم يترك منهم إلا مساكنهم فقط - لا أبو الهول و لا دياولوا - هيا البيوت و بس ... غير كده فى أول الأية - سبحانه و تعالى بيؤكد النفى و الإستثناء و بيقوللك كل شىء .. يعنى مساكنهم فقط هى ما بقى ... طبعا فى بعض الناس غريبة الأطوار بتقول طالما أبو الهول كان فى جزء منه مندثر تحت التراب يبقى إتدمر ... نقول طور يقولوا إحلبوه .. ربنا يا شاطر لما بيدمر ما صنع قوم بيأمر الأرض أن تبلعها بالكامل يعنى بيخسف بيها الأرض و يجعل مكانها بحيرة مثلما فعل سبحانه و تعالى بقارون "فخسفنا به و بداره الأرض" و كلنا شوفنا بحيرة قارون .. لكن مش هيسيب نصه فوق الأرض و نصه تحت الأرض .. يا جماعة عيب ده إحنا مسلمين و المفروض أكتر ناس نبقى عارفين قدرة ربنا .. الكلمة واضحة جدا "تدمر" .. إنت عارف يعنى إيه دمار؟؟ .. يعنى يجعلها فتات تذره الرياح .. دى قدرة ربنا .. و لم يترك إلا مساكنهم .. و دى إكتشفوها فى اليمن و مبنية من الأعمدة زى ما ربنا قال عليهم فى القرأن "إرم ذات العماد" .. أبو الهول جزء منه كان مندثر زمان لإن منطقة الأهرامات كلها منطقة رملية و الرمال هناك بتتطاير مع أى شوية رياح .. تخيل بقا كمية الرياح اللى حصلت فى مصر بقالها 7000 سنة كانت كفيلة بإنها تغطى أبو الهول كله و ليس نصفه ، لكن ربنا عايزه يظهر و المصريين يرمموه .. ربنا مقدر كل ده عشان يجبر بخاطر المصريين بعد ما جه عليهم إحتلالات من اللى يسوى و اللى مايسواش على مدار ردح طويل جدا من الزمن .. ربنا بيذكرهم إنه على نفس الأرض قامت أعظم حضارة فى التاريخ و يجب عليكم إنتم كمان يا مصريين تسيروا فى ضوئها و تعملوا حاجة لمصر .. يجب الرجوع لصحيح الدين الإسلامى و بلاش موسم الفتى العالمى اللى إحنا فيه ده .. ربنا سبحانه و تعالى كرم مصر بذكرها فى القرأن و إحنا عمالين نهين فى أمها كل شوية ...

و الأنكت من كده بقا إن سمورة العطعوطى من خفة دمه بينسب المعابد الفرعونية لقوم عاد و بيقول إنهم هما اللى بنوها .. طب سؤال يا عطعوطى .. لو قوم عاد هما اللى بنوها و زى ما بتقول الفراعنة كتبوا عليها هيروغليفى (لغة الفراعنة) فيما بعد .. أنا بقا باسألك إزاى الفراعنة المصريين قدروا يرسموا النقوش الفرعونية فى أعلىىىىىىىى نقطة فى الأعمدة العالية جدا بتاعت معبد الكرنك ؟؟ .. مش شايف إنها عالية عليهم شوية؟؟؟؟ هههههههه

شوف يا حاج عطاعيطو ... إذا كنت ماشى فى سكة (فراعنة؟؟؟؟ أستغفر الله العظيم .. فراعنة؟؟؟ يا راجل إستغفر ربنا) .. لو كنت منهم يعنى و المؤكد إنك منهم دول اللى بيقصدوا إما إنهم يطلعوا الفراعنة دول كلهم قوم كفار أو يحاولوا نسب تاريخهم لناس تانيين أحب أقوللك إحنا كمصريين بننتمى للفراعنة أصحاب الحضارة و ليس إلى أل فرعون المذكورين فى القرأن ... ببساطة شديدة لإننا لم نأتى من نسل أل فرعون لإنهم ببساطة أكتر و بشهادة القرأن ربنا غرقهم فى اليم يبقى هنيجى من نسلهم إزااااى؟؟ إسمع القرأن بيقوللك إيه علك تستفيد "فأخدناه و جنوده فنبذناهم فى اليم" .. يعنى إنتهوا و الفراعنة أصحاب الحضارة لا علاقة لهم بهم ..

بيقول " و دمرنا ما كان يصنع فرعون و قومه و ما كانوا يعرشون" التانية بقا أل فرعون ليسوا أصحاب الحضارة التى نفتخر بها و أصحابها هم الفراعنة و ليس أل فرعون و ده بشهادة القرأن نفسه ربنا سبحانه و تعالى ... طبعا العالم اللى عايزة تغسل أمخاخ الناس حاجة ببلاش كده بتقوللهم "أصل ربنا ترك كل الأثار اللى إنتوا شايفينها دى للعبرة و العظة" ... واضح إن الناس دى لم تقرأ القرأن و لم تعرف ما هو الله .. ده ربنا لما ترك مساكن قوم عاد ذكر إنه ترك مساكنهم ... سبحان الله .. "ما فرطنا فى الكتاب من شىء" ... صدقت يا رب العالمين يا غوثى و ملاذى فى عصر إنتشر فيه الجهل و سادت فيه السياسة بإسم الدين و المتاجرة بإسم الدين .. حسبى الله و نعم الوكيل ... بقا بتتقولوا على ربنا؟؟؟ سبحانه و تعالى - جل قدرته - اللى خسف بقارون و داره الأرض و لم يبقى له أثر و دمر كل شىء يخص قوم عاد إلا مساكنهم ... لو كانت الأثار الموجودة حاليا تخص أل فرعون لما كان الله تركها .. كان - سبحانه و تعالى - قادر إنه لا يترك منهم إلا الأهرامات و أبو الهول أو معبد الكرنك مثلا .. لكن هيسيب - سبحانه و تعالى - كل هذا حتى المكاحل التى كانوا يكتحلون منها ، كل ده للعبرة و العظة؟؟؟ و للا تخلف و صدأ فى أمخاخكم لعدم قدرتكم على الفصل بين أل فرعون و بين الفراعنة أصحاب الحضارة التى نشاهدها الأن ... ياخى إتقوا الله فى كلامكم ... "قل هاتوا برهانكم إن كنتم صادقين" ...

على العموم محاولة نسب تاريخ الفراعنة لأقوام أخرى هى محاولات ليست بالجديدة و سنظل نتصدى لها إلى أنا يتوفانا الله و حدثت كثيرا بدئا باليهود مرورا بقوم عاد و غيرهم و الله إحنا معاك لحد لما تقول الأمريكان هما اللى صنعوا الحضارة الفرعونية هههههههههه .. بس ساعتها برضو هنرد عليك و بالأدلة .. دمك خفيف أوى يا سموووورررررة ههههههههههههه

يللا هنعتبرك عيل و غلط

أنا خلصت كلامى و اللى عايز يصدق الهراء و غسيل المخ هوا حر .. على أقرب مغسلة بخار وودى عقلك ، غسيل و مكوة هناك فل الفل ...

مش هاكتب إسمى لإنى لا أبغى الشهرة و لا المال - الحمد لله عندى عمل شريف أتقوت منه و لا يعنينى أن أكون مشهورة لإننا فى النهاية هنرجع من مطرح ما جينا - سوف نموت و ندفن و نصير ترابا و محدش هياخد معاه حاجة لا شهرة و لا مال و لا أى بطيخ - أقدم موضوعى هذا هدية بسيطة تحت رجلين مصر أمى و بلدى اللى ربتنى و نيلها بيجرى فى دمى و هدية لإخواتى المصريين اللى شاربين من نفس النيل و هدية للفراعنة اللى شربوا من النيل .. و فى حديث صحيح مسلم كلنا عارفينه إن النيل نهر من أنهار الجنة .. يكفى الفراعنة فخرا و شرفا إنهم كانوا بيشربوا من نهر من أنهار الجنة و كان بيجرى فى دمهم ..

فرعونية الأصل مسلمة الدين و أفتخر
ومن آياته خلق السماوات والأرض واختلاف ألسنتكم و ألوانكم إن في ذلك لآيات للعالمين

المصدر
منقول من مدونتى "فرعونية و أفتخر" على blogspot