عصر التيوووووس

[حكايات مصرية]

دقيقه من وقتك يا سعادة البيه دقيقه من وقتكِ يا هانم وياباشا
ويا أبن الأيه

دقيقه من وقتكم وقبل ما نبداء بالكلام خلوني أقول أزيكم
وعقبال عندى وعندكم
المهم ندخل في الكلام وفي الكلام يتضح البيان والبيان في كشف الحساب
وكشف الحساب أنواع ومن طرق كتير المهم تشغل مخك والمسأله سهله وبسيطه وزى شكة الدبوس الشرط الوحيد أنك تكون مش منحوس ولأ وش فقر ولأ بتاع ضمير فلو كنت واحد من دول وطلعت منحوس وعندك ضمير أعرف أنه من الصعب تدوس ولأ حتي تشك بالدبوس تحضن تبوس وتعبي زكايب فلوس
وأن قلت وأيه يعني وكله عادى وقالوا زمان الفلوس مع التيوس
برضو زمان قالوا علي قد لحافك مد رجليك
أرجع أقولك مهو التيوس سرقوا الفلوس وسرقوا اللحاف حتي العيش الحاف مبقاش بغموس وكل تيس وحجمه يقدر يدوس
ومش شطاره ولا ذكاء شوية فهلوه علي شوية رياء
طيب والحل أيه تهاجر وتسيب اللحاف والعيش الحاف وتهرب للعيش التوست
قدامك خياريين عفوا صندوقين
أما انك ترجع بصندوق محمول علي الأكتاف أو ترجع بصندوق مليان فلوس وكشف حساب
طيب منين ؟؟
في الأولي والتانيه الحساب يوم الحساب ولأني كنت شاهد علي جواز المعزه من التيس
ودى كانت قصه حقيقيه مش محض خيال أستنبطت منها واقع الحال وعرفت يعني ايه مدن الخيال والأحلام اللي بنسمع عنها كل يوم في التلفزيون وبنشوفها في الأفلام
ولأنه معدتش زى الأول كلمة منين المهم معاك كام !!!
ونرجع للكلام يا سادة يا كرام قصتي كانت مع شوية معيززززز اقصد اللي كانوا معيز وبقوا تيوس
المعيز دول قبلتهم ولاني كنت منهم و زيهم أقصد كنت زيهم
حضنتهم ووقفت جنبهم مش عشان شيئ لا فقط لاني منهم وهمي كان همهم
وفي يوم اتعرفوا علي تيس من اللي معاه الفلوس وعلي اى شيئ يدوس وكان التيس دا مثال الورع الشكلي وهو كان عمهم
ولانهم عرفوا اللعبه حضروا العده والعده لازم تكون من نفس اسلوب التيس
وجريت البليه وبقت قضية
يا حياه او موت وكان شعارهم لا نعيش تيوس او نموت معيز
مش مهم ازاى أو منين ما دام التيس عايش كل يوم في دور العريس
بداءت الحكاية بلعبة ورق ولأن حياتنا كلها بقت ورق في ورق
كل ورق عن ورق يختلف حياتنا ورقه في شهادة ميلاد ملهاش قيمه
عمرنا في بطاقه وشهادة تعليم عديمه اللي يكسب فيها اللعيبه وشجيع السيما
وفي ورق بنكوت وورق في بهرريز
بس البهريز دى مخصوص للتيس
ويوم ورا يوم التيس بقي مشغول لكونه عريس لان في خرفان كتير متربصاله
والمذكور اطال الله قرنه مش فاضي
وفي يوم وليله انقلب الحال اللي كانوا معيز بقوا تيوس والتيس بقي فحل واستفحل
والمعيز اللي بقوا تيوس بقوا من اصحاب المعالي ورواد مدن الخيال والأحلام
ولأني دلوقتي بقيت ماضي للمعيز بقيت وحيد لأني دا كان خلافي معاهم
هي شطاره وحق وأجتهاد ولا فهلوه واحتيال وحاجات كتير انتشرت في البلاد
فضلت مكاني وصحيت ملقتش ليا مكان لأ بين التيوس ولا المعيز مع أني كنت قادر أكون في صفوف التيوس وبكل بساطه
وقلت أرجع لفرشتي وانام مكاني وافتكرت كلمة أمي اللي كانت تقولهالي
علي قد لحافك مد رجلييك
جريت علي اللحاف
لكن للاسف لا لقيت اللحاف ولا العيش الحاف

وفضلت علي كلمه واحده
يارتني اخدت الوصل يا رتني أخدت الوصل

كلام يمكن يكون مش مفهوم بس اللي يفكر ممكن يفهم ولو ما فهمش يبقي العيب فيا مش فيه
ومفيش داعي للأفصاح لأن الصباح لاح
وواقعنا بينطق بكل شيئ مباح وغير مباح
هنا وهناك


بقلمي
حكايات مصرية