مصر قبل وبعد ( 25 يناير ) و ( عجبى )

[morshooo]

بسم الله الرحمن الرحيم

25 يناير يوم عظيم فى تاريخ مصر وشبابها الجميع خرج للتظاهر

وكانت مظاهرة سلمية وكانت معبرة عن شباب مصر والكل قام

بعرض طلباتة الى كلنا اتفقنا عليها ومحدش فينا اختلف عليها

امتلىء ميدان التحرير بشباب مصر وخرج مثقفية وخرج عائلات

وخرج مسنيين وخرج عمال وخرج موظفين وخرج اصحاب الطبقات

المتوسطة وخرج اصحاب الطبقة المنعدمة خرج الجميع وطلب متطلباتة

وانا واحد من الناس كنت حابب ان اخرج معهم ولكن لظروف عملى لم استطيع

ولكن فى حاجا مهمة بعض المواطنين مش واخدين بالهم منها وبقول تانى بعضهم

الخروج للتظاهر مش معناة اسقاط نظام يعنى انا هخرج اعرض مطالبى فى مظاهرة

عشان توصل لرئيس الجمهورية مش خارج عشان اقول لمبارك وحكومتة ارحل

مر يوم 25 يناير والناس عرضت طلباتها بكل تحضر وكلنا تابعنا الاحداث صحيح

يومى 26 و 27 يناير كانت فى بعض المظاهرات ولكن انا بعتبرها كانت بشكل عشوائى

غير منظم والدليل ان مفيش اى جهة سياسية اعلنت ان هذة المظاهرات العشوائية

تابعة لها حتى كانت مظاهرات 26 و 27 كانت باعداد قليلة جدا

لحد الان انا اتحدث عن الشباب المصرى وبقولها تانى ماحدث يوم 25 يناير

حدث بأرداة الشباب المصرى ولحد الان الاحداث راقية جدا شعب يتظاهر لعرض

متطلباتة دون تخريب او تكسير والدليل رجال الشرطة يوم 25 يناير لم يتعدى

على الشباب المتظاهر ولم تعرض اى صحيفة مصرية اخبار عن تعدى الامن

على المتظاهرين




الجمعه 28 يناير

خرج الجميع بعد صلاة الجمعه للتظاهر مرة اخرى بس فى سؤال مهم

الشباب خرج يوم 25 يناير وعرض مطالبة وكانت مظاهرة سلمية حد يقولى اية سبب خروجهم مرة اخرى بعديها بيومين ؟

طبعا حاجا غريبة الخروج مرة اخرى خلال 72 ساعه للتظاهر بهذا الشكل فى ناس قالت سبب الخروج ان الحكومة

المصرية ماخدتش بمطلباتنا يوم 25 يناير طيب بالعقل فى حكومة فى العالم هتحقق متطلبات شعبها

خلال 72 ساعه يعنى مثلا الشباب طالب بخفض الاسعار يوم 25 يناير يبقى المطلوب الحكومة تخرج تانى يوم

وتعلن انخفاض الاسعار الشباب طالب بفرص عمل يبقى المطلوب من الحكومة تعلن تانى يوم

فتح ابواب العمل للشباب طبعا خروج المظاهرات يوم الجمعه 28 يناير انا شايف انها مخطط ضد مصر

وليس التظاهر من اجل عرض متطلبات شعب

الدلائل : الهجوم على جميع اقسام الشرطة فى وقت واحد والتعدى على جميع قوات الشرطة

التخريب والسرقة والنهب بداية من فرض حظر التجوال بداية من السادسة مساء

التعدى على الممتلكات العامة والخاصة ايضا بداية من السادسة مساء

الهجوم على البنوك والمصارف ومحاولة سرقتها

اشعال النيران على المبانى الحكومية

التعدى على المنازل وسرقتها والتحرش باهاليها ليلا

التعدى على جميع سجون مصر وهروب المساجين منها خاصة سجن ( طرة وابو زعبل )

وفى اشياء اخرى كتيرة جدا جدا جدا جدا

فى شاب مصرى عاقل خارج عشان يعرض طلباتة هيعمل كدا

اقسم بالله مستحيل هيستفيد بى اية اى شاب مصرى يخرج يخرب فى البلد

هيستفيد بـــ اية اى شاب مصرى لو اشعل النيران فى الممتلكات العامة

هيستفيد بـــ اية لو قام بهروب السجناء من السجون وارعاب الشعب بهم

انا اتحدى اى شاب مصرى وبقولها تانى شاب مصرى سواء معارض او مؤيد

يكون مبسوط بالاحداث الى حصلت مهما كانت ظروف البلد

خطابين مبارك للشعب المصرى
الجمعه 28 يناير - 1 فبراير

خرج الرئيس مبارك بخطاب يوم الجمعه 28 يناير

واعلن مطالبتة باستقالة حكومة نظيف ودا كان مطلب مهم كلنا بنطالب بية

واعلن عن تشكيل حكومة جديدة وبالفعل قام بأخذ عدة قرارات وكانت اهمها

تعيين عمر سليمان رئيس المخابرات المصرية ( نائب للرئيس )

وتعيين الفريق / احمد شفيق ( رئيس الوزاراء ) وتشكيل حكومة جديدة

طبعا المتظاهرين الى بيقولو على نفسهم انهم شباب مصر لم يعجبهم الخطاب والقرار الى اتخذة مبارك

بس فى حاجا غريبة اننا بجد شعب غريب والمتظاهرين المعارضين والى موجودين لحد الان بميدان التحرير

والا يعلمو شيء عن مصر واستقرارها انا بوجهلهم سؤالين .

س / بقالنا 30 سنة بننادى بتعيين نائب للرئيس لماذا بعد تعيين نائب لم يعجبكم ؟

س / لما كان بيتم اقالة وزير كنا بنفرح ونهلل لية بعد اقالة حكومة كاملة لم يعجبكم ؟

الخطاب الثانى للرئيس مبارك اثبت قد اية الراجل دا فى قمة الاحترام واعلنها صريحة

انة سوف يموت على ارض الوطن واعلن عدم دخول الانتخابات مرة اخرى كما اعلن عن عدم

عزمة ترك الامور كما هى وسوف يستمر حتى يسلم السلطة فى امان وكمان اعلن ان التاريخ

سوف يشهد ويسجل تاريخة العظيم فى مصر .

نفسى اعرف حاجا انتو يالى موجودين فى ميدان التحرير عايزين اية تانى انتو اصلا مش عارفين

انتو عايزين اية طالبتو باقالة الحكومة وتمت اقالتها طالبتو بعدم استمرار الرئيس واعلن عدم

دخول الانتخابات مرة اخرى والله العظيم انتو ما عارفين عايزين اية الناس دى مبسوطة ان

بيجيلهم وجبات كل يوم وفاكهة وبطاطين هما هيعوزو اية اكتر من كدا مش هيهمهم البلد تخرب

والا الناس ماتلقيش تاكل انا روحت ميدان التحرير من يومين قولت اشوف الناس دى بتعمل اية هناك

والله العظيم والله العظيم الناس مبسوطة ان بيجلها اكل وشرب وفاكهة الى مش مصدق يروح يشوفهم

واحد زى البرادعى دا ههههههه بعد خطاب الرئيس رايحلهم ميدان التحرير يقولهم ماتمشوش خليكم على رائيكم

طيب ماتخليك معاهم فى ميدان التحرير واقعد معاهم بدال مانتا عمال تبعتلهم فى وجبات اكل وشرب وفاكهة

والله العظيم الناس دى مغيبة ومش مصريين زى ما بيقولو ان بيهم مصر واستقرارها احنا اصبحنا منقسمين فى كل حاجا

قى الوقت الى بكتب فية الموضوع دا قدامى الناس بتضرب فى بعض امبارح كان حجارة النهاردة ماشاء

الله بقى ضرب نار وخلونا نبقى فرجة للغرب وللعالم وعجبى عليكى يا مصر


انا حابب كمان اكلم فى حاجا

من كام يوم طلعت بنت على شاشات التليفزيون وكانها

بطلت المقاومة المصرية ههههههه تقول ان هى سبب المظاهرات عشان بسلمتها

عملت جروب على الفيس بوك وطلبت باحداث 25 يناير ماشاء الله علينا بقت مصر

بتطلع مظاهرات بسبب مسجات ورسائل على النت والفيس بوك على العموم شكرا ياستى

على الخراب الى حصل وعلى وقف حال البلد وعلى السرقة الى تمت وعلى النهب الى حصل

وعلى الاقتصاد الى ادمر وعلى الناس الى مش عارفا تقبض فلوسها وعلى الناس الى

مش عارفا تاخد معاشها وعلى المحلات الى اتقفلت وعلى المولات الى اتنهبت وعلى حال البلد

وعلى فرجة الناس علينا وعلى رعب الشعب وعلى رجوعنا 50 سنة للخلف وعلى كل حاجا

حصلت فى 9 ايام ولسة هنشوف هيحصل اية تانى وعجبى واكيد للحدين بقية

سلام يا شباب مصر

[Dr.nour]

اولا يا بورشو :

بالنسبه لكلامك عن خطابي الرئيس المبجل سيادته حسنى

فده كان قمه الاستهزاء والتجاهل لكرامه الشعب المصرى

يعنى ايه يطلع بعد 3 ايام من المظاهرات ويلقى خطاب

كان فين هو التلات ايام دول !!

اقولك انا كان فين ،،، كان فى شرم هو وعيلته وعيله عيلته

قاعد وجنبه طياره عشان يشوف اخر الاحداث هترسى على ايه ،،

لما هو قائد عسكرى .... ليه ما خرجش ووقف على رأس المظاهرات دى كلها وهدى الناس بكلمه منه !!

ليه !! ماهو لو فعلا عاوز الخير لينا كان عمل كده.... انما اقول ايه !!

على الاقل كان احترمنا واحترم حريت تعبيرنا عن الرأى

ما كانتش شبكات المحمول اتفصلت لمده يوم كامل ..

ما كانش الانترنت اتقطع المده دى كلها ...

ما كانش مات بالميات واتصاب بالالاف ...

ما كانش وما كانش

وحسبى الله ونعم الوكيل ....

:cv48:

[DR.SMA]

اولا بشكرك على الموضوع والكلام

الي يمكن بتفق معاك فيه فحاجات كتير

بس بختلف برضه فحاجات تانيه

التظاهر ليوم واحد المجتمع المصري جربه قبل كده

وتم الاستهتار بالمطالب ولم يتم تنفيذ اي منها

زي الي حصل 6 ابريل

كان تظاهر ليوم واحد وعرض الشعب مطالبه كلها

ولم يتم تنفيذ اي من هذه المطالب بشكل عام

التظاهرات الي حصلت كانت واضح جدا انها سلميه

وده كان واضح ف وجود اللجان الشعبيه والعمل الي قامت بيه

وده مش بس باعتراف الناس،، بس لا الحكومه نفسها اشادت بالعمل ده

وشكرت كل من كان باللجان الشعبيه على شاشات التليفزيون

وده معناه انهم كانو بيقولو احنا مش بنخرب احنا متمسكين برأينا بس

التخريب جه مفاجيء وبطريقه منظمه وتصدى لها المتظارهين نفسهم

واضح جدا انهم مجموعه كانت عارفه هي بتعمل ايه

مش هفتي واقول انها تابعه للحكومه او غيرها

لكن ايا كانت هي مش من الناس الي خرجت تعبر عن رأيها بسلميه وتطلب حقوقها

اشمعنه دلوقتي عين نائب رئيس ما الناس بقالها 30 سنه بتطالب بكده

لو كانت المظاهرات اعدت يوم واحد مكنتش الحكومه هتتغير ولا النائب هييجي ولا غيره

كان سيبقى الوضع كما هو عليه

وعلى المتضرر اللجوء للقضاء

وقرارات القضاء اصلا مش بتتنفذ كمان

الغلط كبير ف الي بيحصل طبعا والي حصل محتاج وقت كبير اوي عشان يتصلح

وكلنا بنأسف من الاسلوب الخاطئء الي موجود دلوقتي

الي باعتراف الجميع مش بدايته من المتظاهرين لكن ....

بكره نعرف تبع مين @_@

لكن تفتكر كان فيه حل تاني عشان يعبرو عن رأيهم بدون استمرار في التظاهر

اما التخريب فده مشكله كبيره لازم يتصدى ليها الشرطه مع الشعب مع الجيش كمان

مش ينسحب فجأه ويترك المكان ويسيب الدنا بايظه ويختفي !!!!!!

راحوا فين؟؟؟؟ ومين المسؤل عن ده ؟؟؟؟

ولو كانو خايفين على البلد ليه سابو المخربين بالشكل ده ؟؟؟؟

في غلط كبير حصل مش معروف بشكل رسمي مين المسؤل عنه من الجهتين

لكن التظاهر لعده ايام كان الشكل الوحيد المعترف بيه عند الحكومه

لان ياما جربو غيره قبل كده ومنفعش

طولت عليكم ^_^

بس شكرا لموضوعك القيم

في اتفاقات واختلافات وده مطلوب فأي مكان

تسلم الايادي

دمت بأمان الله ورعايته

تحياتي

[morshooo]

اقتباس اولا يا بورشو : بالنسبه لكلامك عن خطابي الرئيس المبجل سيادته حسنى فده كان قمه الاستهزاء والتجاهل لكرامه الشعب المصرى يعنى ايه يطلع بعد 3 ايام من المظاهرات ويلقى خطاب كان فين هو التلات ايام دول !!

اعتقد ان سيادك من اسبوع مكنتيش هتقولى علية كدا

الكلام دا سيادة حسنى او حتى كنتى هتتعرضيلة بحاجا

خطابة الى بتقولى علية قمة الاستهزاء دا كان المفروض يطلع يقول اية فية

كل الطلبات الى طالبنا بيها هو عملها تغيرر حكومة عدم دخول الانتخابات مرة اخرى

تعديل المادة 76 هيتم تعديلها يعنى حقق كل مطالبنا

اقتباس اقولك انا كان فين ،،، كان فى شرم هو وعيلته وعيله عيلته قاعد وجنبه طياره عشان يشوف اخر الاحداث هترسى على ايه ،،

نسيتى تقولى انة كان كمان بيلعب بلاى ستيشن مع حفيدة فى شرم
هو احنا كدا شعب بيكلم على مزاجة ونبدا بقى اصلو مظهرش عشان
خايف دا كان هيسيب البلد ويمشى لالالالا دا سابها اصلا ومشى والمؤتمرات
الى بيعملها دى بيعملها وهو خارج مصر طيب ماتسئلى نفسك كدا مسبهاش ومشى لية
وهو فى احداث اكتر من دى هتحصل عشان يشوفها لسة ويقرر هيمشى والا لا

اقتباس لما هو قائد عسكرى .... ليه ما خرجش ووقف على رأس المظاهرات دى كلها وهدى الناس بكلمه منه !!

تفتكرى لو كان خرج ومنعها كنتى هتبقى مبسوطة والا كنا هنقول
انة خارج يمنعنا عن مطالبنا وتحقيقها وبعدين قصدك يخرج فين
الميدان والا يخرج على شاشات التليفزيون

اقتباس على الاقل كان احترمنا واحترم حريت تعبيرنا عن الرأى ما كانتش شبكات المحمول اتفصلت لمده يوم كامل .. ما كانش الانترنت اتقطع المده دى كلها ...

تمام كلامك صح بس تفتكرى ان قرار منع الاتصالات دا
كان من رئيس الجمهورية جميع شبكات المحمول فى مصر
خرجت وقالت ان الى حصل دا كان بامر من نظيف حتى لو
مبارك يعلم بدا يبقى اكيد عشان الامن العام للبلد ومش انا والا انتى
هنعرف اكتر من الناس دى

اقتباس ما كانش مات بالميات واتصاب بالالاف ... ما كانش وما كانش وحسبى الله ونعم الوكيل ....

الناس الى ماتت دى ماتت بسبب عدم وعيهم بالاحداث
والناس الموجودة فى ميدان التحرير لحد دلوقتى
ناس مغيبين بس عايز اعرف حاجا قدام انتى شايفا
انة مايصلحش للرئاسة مانزلتيش لية مع الناس
الى فى التحرير دى

[♥..pure]

^^

فعلا تمام يا مورشو هو دة اللى حصل وبيتكرر فى التليفزيون كل يوم

على راى نور ,,, هو كان فين بعد 3 ايام من المظاهرات

المفروض ان الرئاسه عارفه ان الشعب هيعمل مظاهرات 25 يناير

كان المفروض على الاقل يعنى يطلع يوم الاربع يقول اللى قاله يوم الجمعه بس هقولك بقا

هو مكنشى متوقع ان الشعب ينتفض كدا ويعمل اللى عمله >> الريس كان بيقول لامريكا دة الشعب دة غلبان بيفرح باى لقمه تترميله

بس خلاص الشعب متعتشى غلبان واللى استحملك طول السنين اللى فاتت دى

هتقولى دة راجل عسكرى ووطنى >> طيب ماا ابويا وابوك وجدى وجدك حاربوا فى 6 اكتوبر

المفروض بقا يتعملهم تمثال على اللى عملوه ... المفروض ان دة واجبهم اصلا يعنى هما ما عملوش دة عشان خاطر عنينا يعنى

لو مكنشى عمل كدا كان اتحاكم ... مش عشان يعنى شارك فى الحرب يبقى بطل ما كلنا ابطال ,,,,

شئ مستفز اننا نقعد نقتع نفسنا بحاجة احنا اصلا مش مقتنعين بيها

ياريت نبطل سذاجه بقا ....

[احلى رجل]

نسأل الله ان يحمي مصر و اهلها من كل شر

[тoкα..♥]

عـلى فكـره يـ أحمد أنـآ جـدو شـآرك فـ حرب أكتـوبر >> يعني بطـل زي حـسني =))))
آلله يرحمـه بـأهـ .,, المهم ,,
فـ الآول أنـآ كـنت مـع الشبـآب إللي خـآرجين يو 25 بقلـبي وبروحي كـنت معـآهم ,, وبـدعي ربنـآ بكـل الطـرق ينصرهم
لآنهـآ كـآنت حمله وآعيه .,. نـآس طـآلعه ليهـآ أهـدآف وآضحـه وصريحـه ,,
بـس الحكـومه الوآعيه بتـآعتنـآ لمـآ قطعت النت عـن مـصر إفتـكرت أنهـآ بتهدي الوضع عشـآن ميوصلوش لبعض >> غلطـآنين جـدآ ,, يعني 5 ملـيون شـآب لمآ قطعـو عنهم النت هيعملو إي !! أكيد هينزلو للشوآرع بـأهـ ,,
والنـآس إللي هنـآك لحد دلوقتي دي ومنهم معـآض ومنهم مؤيد ,, مـآبيقولو كـدآ كـدآ خسرآنه
مفـيش حـآجـآ يبكـو عليهـآ مـن آلآخـر ,, وإللي دآيق المصريين ودآيقنـآ كلنـآ بطء الإستجـآبه إللي كـآن فيهـآ الرئيس
يعني كـآن لآزم دآ كـلو يموت ويحصل كـل إللي حـصل عشـآن نتحرك ,,
لآ وآلله كـآن ممكـن من أول يـوم يشـوف المطـآلب وتتحقق وإنتهينـآ ,, بس لمـآ عند همـآ كـمـآن عندو ,,
وعمـومـآ تكـوين الحـكومه الجديده بدآ بحـآجـآ كـويسه ,, أحمد شفيق دآ بيقولو كويس
لو الرآس كويسه البـآقي هيبقى كـويس .,,
بـس إللي بيحصل دلوقتي فـ التحرير أنـآ ضده بكل الطـرق والوسـآئل ,,
مينفعش مصريين يضربو فـ بعض ,, فـوقو يـ بلد الحضـآره
إصحـو بـأهـ وكفـآيه ضحكتـو النـآس عليكو
بتـضرب فـ أهلـك !!!!!
عجبي بجد يعنـي !!!!
لآزم وقف المهزله دي

ودلوقتي بقول نعم لمبـآرك لسبب بسيط
أنو هيمشي وآلله هيمشي
بس كمـآن كـآم شهر
إستحمولهم زي مـآستحملتو 30 سنه
مـش صعبه القضيه بس محتـآجـآ تفكير
شكـرآ يـ أحمد .,,!

[Dr.nour]

اقتباس
المشاركة الأصلية كتبت بواسطة morshooo

اقتباس نسيتى تقولى انة كان كمان بيلعب بلاى ستيشن مع حفيدة فى شرم هو احنا كدا شعب بيكلم على مزاجة ونبدا بقى اصلو مظهرش عشان خايف دا كان هيسيب البلد ويمشى لالالالا دا سابها اصلا ومشى والمؤتمرات الى بيعملها دى بيعملها وهو خارج مصر طيب ماتسئلى نفسك كدا مسبهاش ومشى لية وهو فى احداث اكتر من دى هتحصل عشان يشوفها لسة ويقرر هيمشى والا لا

متفقه معاك فى الكلام
النقطه الوحيده الى بحسبها لمبارك لحد الان تلات حاجات ...
*ما دخلناش ف حرب بقاله 30 سنه
*عمل انشاءات فى البلد بس الناس الكبيره نهبت كتير علشان الانشاءات دى تقوم
*ما هربش وساب البلد

اكتر من كده يا احمد ما عملش غير انه كان موالى للفساد
وورى شعبه ظلم كتير اوى
لما يبقى تقريبا 50 % من الشعب على مقربه من خط الفقر
وكل ده ف عهده
ماعينش وزير تعليم واحد عدل
لما التعليم فى مصر انهار واتبهدل والمستوى بقى زفت

ها... اقول كمان !!

اقتباس تفتكرى لو كان خرج ومنعها كنتى هتبقى مبسوطة والا كنا هنقول انة خارج يمنعنا عن مطالبنا وتحقيقها وبعدين قصدك يخرج فين الميدان والا يخرج على شاشات التليفزيون

بأى شكل واى طريقه ياحمد ..
الى خلاه يهز نفسه ويخرج بعد تلات ايام
كان اتهز الهزه دى من اول يوم وما كانش الوضع وصل للى احنا فيه ده

اقتباس تمام كلامك صح بس تفتكرى ان قرار منع الاتصالات دا كان من رئيس الجمهورية جميع شبكات المحمول فى مصر خرجت وقالت ان الى حصل دا كان بامر من نظيف حتى لو مبارك يعلم بدا يبقى اكيد عشان الامن العام للبلد ومش انا والا انتى هنعرف اكتر من الناس دى

انت بتكلم ازاى يعنى !!
على اساس ان نظيف بيتصرف تحت امر نفسه
طبعا واخد الاوامر كلها من جهه عليا
انت بتقول امن البلد !!
انت شايف حتى بعد قطع الاتصال والحوارات الى حصلت ف البلد دى كلها
فين الامن الى انت شايفه
الامن بسحب الشرطه واطلاق المجرمين والحراميه على الناس فى بيوتها
الامن فى الرعب الى عشناه ايام وليالى وما زلنا ؟؟
وما تقوليش الشرطه نزلت خلاص .. الشرطه نزلت صوريا
وما زالت الجوامع بتنادى كل ليله على الرجاله عشان كل واحد ينزل يحمى بيته
الكلام كتير اوى ومش هيخلص يا مورشو
واكيد فى حد معين هو سبب كل ده
والرسول قالنا فيما معناه ان كل واحد مسئول عن رعيته وهيتحاسب عليهم
يبقى لما نيجى نحاسب دولوقتى نحاسب مين !!

اقتباس الناس الى ماتت دى ماتت بسبب عدم وعيهم بالاحداث والناس الموجودة فى ميدان التحرير لحد دلوقتى ناس مغيبين بس عايز اعرف حاجا قدام انتى شايفا انة مايصلحش للرئاسة مانزلتيش لية مع الناس الى فى التحرير دى

الناس الى فى التحرير زى مانتا قولت مغيبين
مافيش تنظيم ولا قياده ليهم
معادوش عارفين فين هدفهم ولا هما عاوزين اى ...
حصل تدخل اجنبى ف الموضوع
لما يلاقو مهندس اسرائيلى وسط المظاهره
طيب انت اى الى جايبك هنا يا صهيونى يا معفن
....

بص انت نرفزتنى بردك جدا
مش جايب اى حمل ولا مسئوليه على الريس
وكلنا كنا بنقول الكلام ده على مبارك من زمان اوى
بس كل واحد كان بيقوله جوا نفسه وخايف يطلعه
عشان الى كان بيتكلم كان بيعتقل يا احمد
ولما كنت تلاقى اخوك نازل ضمن المظاهره ومخالفك ف الرأى
ويرجعلك جثه هامده
كنت هتحاسب وهتدعى على مين !!

[morshooo]

اقتباس التظاهر ليوم واحد المجتمع المصري جربه قبل كده وتم الاستهتار بالمطالب ولم يتم تنفيذ اي منها زي الي حصل 6 ابريل كان تظاهر ليوم واحد وعرض الشعب مطالبه كلها ولم يتم تنفيذ اي من هذه المطالب بشكل عام

كلام جميل جدا يعنى معنى كدا ان قدام اتظاهرنا يوم قبل كدا

ولم يتم تحقيق المتطلبات يبقى نطلع تانى ونخرب ونكسر

وننهب ونرعب شعب كامل ونسرق ونحرق ممتلكات عامة عشان

متطلبتنا توصل وتتحقق اكيد انا مش معاكى فى دا

اقتباس التظاهرات الي حصلت كانت واضح جدا انها سلميه وده كان واضح ف وجود اللجان الشعبيه والعمل الي قامت بيه وده مش بس باعتراف الناس،، بس لا الحكومه نفسها اشادت بالعمل ده وشكرت كل من كان باللجان الشعبيه على شاشات التليفزيون

اللجان الى اتعملت اتعملت امتى بعد الرعب الى اتعمل

للناس وهروب المساجين ومطالبة الجيش من الشعب

بحماية الشوارع والممتلكات العامة وفين دى المظاهرات السلمية

المظاهرة السلمية الوحيدة كانت يوم 25 يناير فقط

من يوم 28 يناير حتى الان مستحيل حد يقول عليها

سلمية

اقتباس وده معناه انهم كانو بيقولو احنا مش بنخرب احنا متمسكين برأينا بس التخريب جه مفاجيء وبطريقه منظمه وتصدى لها المتظارهين نفسهم واضح جدا انهم مجموعه كانت عارفه هي بتعمل ايه مش هفتي واقول انها تابعه للحكومه او غيرها

الحمد لله انك عارفا انها مجموعات ومنظمات

وكويس انك عارفا انها غير تابعة للحكومة واكيد مش تابعه

لى اى منظمة داخل مصر ولكن تابعة لى اشخاص مصريين

ولكن تحت تأثير قوة سياسية خارجية

اقتباس لكن تفتكر كان فيه حل تاني عشان يعبرو عن رأيهم بدون استمرار في التظاهر اما التخريب فده مشكله كبيره لازم يتصدى ليها الشرطه مع الشعب مع الجيش كمان مش ينسحب فجأه ويترك المكان ويسيب الدنا بايظه ويختفي !!!!!!

التظاهر ليس بالخراب والتدمير يعنى مش عشان

اعرض متطلباتى يبقى اطلع احرق واخرب وادمر

كلنا متفقين ان الى حصل دا كان غلط والشرطة

انسحبت بعد تهيج الشعب عليها وحرق الاقسام

وعربيات الشرطة الشرطة لو كانت فضلت كانت

هتستخدم السلاح عشان تدافع عن نفسها وكانت هتبقى

مشكلة اكبر بكتير من الى حصل دلوقتى

[حَرفُُ هجآءّ]

السلام عليكم

من يوم 25 يناير وما قامت علية ثورة الغضب قامت

على اكتاف شباب مصريين يستحقون كل التقدير

لانهم كسروا حاجز الخوف واثبتوا انهم ذوات شجاعة لم

تشهدها مصر من عصور قديمة

لكن دعونا نضع كل ما حدث على جانب وننظر الى الجانب

الاخر من حال البلد الان وما اصبحت علية

خروج المتظاهريين ينادون بحرية الشعب والوطن اين هى

مصلحة الوطن الان ؟

مصلحة الوطن من النهب والهدم والحرق والسرقة هل هذة هى المصلحة
هل هؤلاء الشباب قادرين على اصلاح ما افسدوا من

منشأت هل هم قادرون على تعويض الالاف من الاشخاص ما

فقدوه هل هم قادرون على ارجاع الامن للبلد مرة اخرى ؟

الان هؤلاء الشباب هدموا بناء قديم المفروض يأتون بعده

ببناء جديد على اساس متين لكن من القادر على

البناء؟ فى وجود احزاب تتسلق على اكتافهم وتدعمهم

انا مع تغيير النظام ولكن بطريقه تحفظ ما تم بنائه فى

وقت طويل لان كل ما تم نهبه وسرقته وحرقه من دم

المصريين الذين هم الان من حرقوه

اما عن البرادعى فهل يصلح حاكم لمصر ؟

فى ظل وجود القوى العالمية التى لا يشغل بالها نظام

مبارك او غيره بقدر ما يشغلها وجود رجل اخر بديل لهم

لكننا قريبا بعد رحيل مبارك سنرى الانقسام فى اختيار الحاكم وبالتأكيد سيحدث ما حدث من قبل

لان القوى العظمى لا تهمها مصلحة مصر

قال تعالى: (ولا تنازعوا فتفشلوا وتذهب ريحكم) صدق الله العظيم.