حــوار في حمام الجــامعة !!!!

[*بنت عائشة*]

اقتباسالمشاركة الأصلية كتبت بواسطة الشيهانةحقيقي موضوع رااائع
يستحق التقييم
جزاك الله خيرا وجعله في ميزان حسناتك
ودمت بخير

جزانا واياكي ياقمر
ربنا يبارك فيكي يااارب

[nٌen!o]

موضوع قيم جزاكى الله كل خير

بس انا مش ادرة استنة اكتر علشان اعرف الباقى هموت

بس انا بردة فى انتظارك

[*بنت عائشة*]

اقتباسالمشاركة الأصلية كتبت بواسطة fanny girlموضوع قيم جزاكى الله كل خير

بس انا مش ادرة استنة اكتر علشان اعرف الباقى هموت

بس انا بردة فى انتظارك

ربنا يكرمك يا فاني يااارب
من عيوني التنين هحط الباقي دلوقتي عشان خطرك يا قمر

[*بنت عائشة*]

يللا بينا نكمل الحاجة المهمة
ألا وهي :

الموالاة في الوضوء

من فروض الوضوء حاجة اسمها الترتيب و الموالاة

*الترتيب : ده اللي هو ترتيب خطوات الوضوء نفسها وعملها بالترتيب اللي فعله النبي صلى الله عليه وسلم في أعضاء الوضوء

سارة: طب لو نسيت وعملت حاجة قبل حاجة ؟

مريم: تعيدي الوضوء تاني

سارة: ياااه للدرجة دي ؟

مريم تبتسم: أيوة.. لأن رسول الله صلى الله عليه وسلم توضأ الوضوء بالترتيب ولم يتركه ولا مرة واحدة، فده دليل على وجوبه، وفعل الرسول صلى الله عليه وسلم إذا كان بيبين فيه شئ واجب فهو واجب.‏

دينا : طيب يعني ايه موالاة ؟

مريم : الموالاة ..

لازم اللي بيتوضأ يغسل أعضاء وضوئه في وقت متقارب، ولا يؤخر عضو منهم عن الآخر.‏

‎‎ فلو أخّرنا عضو لغاية ما نشف العضو اللي قبله فعليه إعادة الوضوء من جديد.‏

يعني مثلاً مش يغسل ايده ويروح يشرب شاي ويرجع وبعد كده يغسل وشه ويروح ربع ساعة ويرجع وهكذا ! ( ده غلط طبعاً )

أو زي ما عملتي يا سارة تركتي الوضوء وفضلتي تشمري في الكم كتير

‎‎ والدليل :

أن رجلاً توضأ فترك موضع ظفر على قدمه ، فأبصره النبي صلى الله عليه وسلمـ فقال: (ارجع فأحسن وضوءك فرجع ثم صلى )

‎‎

فلو الترتيب او الموالاة غير واجبة لكان كفاه غسل ما تركه من غير إعادة الوضوء.


سارة : نورتي المحكمة ... ربنا ينور سكتك يا شيخة

دينا : ماهو كله من التونيك الضيق اللي أنتي لابساه

سارة : الله يرحم التونيك الباستاج بتاعك... مش عايزين نتكلم


مريم تقاطعهم مبتسمة : ربنا حيي ستيـــــر ... المهم أن لبسنا يكون بيرضي ربنا .. لأن ربنا اللي بنقابله في الصلاة هو ربنا اللي بنمشي على أرضه و بندور في ملكوته !

سارة و دينا في نفس واحد:

على فكرة أنا حبيتك اوي
ثم تضحكان لهذه المفارقة

مريم : ربنا يحبكم يارب..

سارة: يارب!.. طيب سؤال.. ساعات باشوف ناس وهي بتتوضى بتغسل رقبتها وقفاها هل ده صح؟


مريم : لا طبعا غلط لأن ده زيادة عن فعل النبي صلى الله عليه وسلم

دينا : فكرتيني بالواد ميدو ابن أختي أول ما يجي يتوضى يروح حاطط راسه تحت الحنفية عشان يغسل راسه ولما يوصل لرجله يغسلها لحد الركبة

مريم تضحك : يااه يظهر عنده ذمة اوي!

خدوا بالكم! .. في فرق بين:


* المسح على عضو*
(مجرد مس خارجي زي المسح على الرأس والأذنين)

* غسل عضو*
(ننزل مية كتير على العضو..زي غسل الرجلين واليدين
وفيها شيء مهم لازم الماء يتقطر(ينقط) من العضو عند غسله)


سارة : استعدي بقى للسؤال القونبُلة ده

مريم تضحك : أفزعينا بقنابلك يلا..

سارة : طيب بفرض أني نسيت عضو في الوضوء خالص.. هل أعيده من الأول...طيب ما النسيان مش بنتحاسب عليه؟

مريم: عندنا في الشرع مصطلحين الفرق بينهما كبير

واجب (فرض): هو اللي لو عملته أخد عليه ثواب ولو تركته استحق عليه عقاب(عليّ ذنب)

مستحب(سنة): هو اللي لو عملته لي ثواب ولو تركته مش علي عقاب

الفرق بينهم أن

* واجبات (فروض) الوضوء
لو نسيتي حاجه منها تعيدي الوضوء

* مستحبات (سنن) الوضوء
لو نسيتي حاجة منها لا تعيدي الوضوء

سارة : عشان كده!..طيب أنا مااعرفش الفرض من السنة!!

مريم: بسيطة ! نقولهم ....

بس بعد الفاصل ....

[*بنت عائشة*]

يللا بينا نعرف الفروض والسنن
فروض الوضوء هي اللي ربنا ذكرها في الآية

أعوذ بالله من الشيطان الرجيم

يَا أَيُّهَا الَّذِينَ آمَنُواْ إِذَا قُمْتُمْ إِلَى الصَّلاةِ فاغْسِلُواْ وُجُوهَكُمْ وَأَيْدِيَكُمْ إِلَى الْمَرَافِقِ وَامْسَحُواْ بِرُؤُوسِكُمْ وَأَرْجُلَكُمْ إِلَى الْكَعْبَينِ


1. ‏غسل الوجه
(وداخل فيه غسل الفم والأنف بالمضمضة والاستنشاق)
2. غسل اليدين إلى المرفقين
3. مسح الرأس
4. غسل الرجلين إلى الكعبين
وكمان
5. الترتيب
6. الموالاة



فدول لو نسيتي حاجة منهم تعيدي الوضوء .. الباقي كله سنن لو نسيتي حاجة منهم لا تعيدي الوضوء


لكن طبعا الأفضل إسباغ الوضوء كما علمنا النبي صلى الله عليه وسلم



دينا : طب بالمرة قولي سنن الوضوء عشان نكون بس على نور..

مريم :

1. السواك
2. التسمية
‎3. غسل الكفين ثلاثاً في أول الوضوء

تنبيه هام..

لو كنتي لابسة خاتم لازم تخللي الماء من تحته.

4.البدء بالمضمضة والاستنشاق قبل غسل الوجه

5. التيامن (البدء باليمين)‏

6.المبالغة في المضمضة والاستنشاق
إلا للصائم فمكروهة له .

‎7. غسل الأعضاء ثلاث مرات أو مرتين

8. تخليل اللحية للملتحين (إدخال الماء فيها بالأصابع)

‎9.تخليل أصابع اليدين والرجلين ‏

10- بعد الوضوء نقول (أشهد ان لا إله إلا الله وحده لا شريك له وأشهد ان محمدا عبده و رسوله)

دينا : ربنا يغفر لنا ...جزاكي الله كل خير

يلا يا آنسة سارة ورينا الوضوء اللي على أصوله


مريم : هو للأسف مش هينفع تتوضأ عشان المونيكير لازم تشيله الأول


سارة: يااه فكرتيني ما ده اللي جاية أسألك عليه من الأول

مريم : هو فعلا زي ما دينا قالت ماينفعش!

بس حظكم الحمدلله كان معايا أسيتون .. هو لكم هدية.. اتفضلوا !


سارة : جزاكي الله كل خير... خلاص هاشيله دلوقتي

مريم: ربنا يكرمكِ ...
ثم تلتفت لريهام :

طيب أختي أنتي اسمك ريهام صح ؟

ريهام: آه


مريم: هو ماينفعش تجمعي الصلوات طالما في إمكانك تصليها على وقتها ... لأن ربنا رفع عنا المشقة في العبادة

"وما جعل عليكم في الدين من حرج"

فأنتي استعيني بالله واتوضي الآن وصلي ياقمر

ريهام : بس أنا مش عايزة أخلع الايشارب

مريم : ممكن تمسحي عليه من برة بس تاخدي بالك وأنتي بتغسلي وشك أن حدود الوجه كلها يكون وصلها مية كويس

ريهام : آاه طب شكرا

مريم : العفو حبيبتي

لو في جزئية مش فاهمينها قولوا وأحاول أوضحها

سارة: لا كده فهمنا كل حاجة

مريم : طيب معلش أنا مضطرة أستأذن عشان عندي سكشن...
ولو ليكم أي سؤال تاني ادخلوا منتدى الطريق الي الله وهيردوا عليكم إن شاء لله

سارة و دينا : مع السلامة!

=====================

حد بأة ليه سؤال : ) ؟

[عاشقة ذكر الله]

توبيك جميل جدا

يالا كمليه بئة يا قمر

منتظرين الباقى

يسلموووووووووووووووو

[*بنت عائشة*]

ربنا يخليكي ياقمر
كدة الحوار خلص خلاص

[عاشقة ذكر الله]

معلشى أصل أنا مكملتوش للآخر

بس بجد حوار راااااائع ومفيد جدا

سلمت يمناك

[سكون القمر]

موضوع جميل جداااا وليه افادة عظيمة للمبيعرفوش يتوضوا...شكرااااا

[Ŝmilể Ḿőøn]

تسلمى حبيبتى على هذا الموضوع