لو سمحت عايز واحد كانز!!

[SiLver Spectra]

كلمة (كان) يعني ايه؟
can يعني علبة
cans يعني علب
و دي بتطلق عندنا باختصار على علبة البيبسي
لما تقول لراجل بياع لو سمحت عايز واحده كانز ,,يعني كأنك بتقول لو سمحت عايز واحده علب ( واحد هندي جاي يشتري:biggrin
طيب يعني هو المفروض يقول ايه؟
عايز (كان) و خلصنا
مش لازم تقول لو سمحت عايز واحد كيس سكر ,,بتقول عايز كيس سكر و خلصنا
لكن الي بيحصل و الي بيتقال ,,تلاقي واحده مثلا : لو سمحت ياعمو عايزه كنزاية!!
هي طبعا بدلعها ,,فبدلع الكلمة على بعضها مع s الجمع فتبقى كنزاية
طب لو هنقول ان كلمة (كان) كلمة مش واضحة ,,يعني اضافة الاس بيخليها تكون اكثر وضوحا
مع ان الاسم بتتنطق بالz كمان بتبقى كدا canz :sml39:يعني حالتنا صعبة أوي
طب هو ماينفعش نقول لو سمحت عايز علبة بيبسي؟
ماله العربي يعني ,,

بيفكرني باسم محافظة مصرية بيقولوا انها تالت محافظة بعد القاهرة و اسكندرية في الأهمية و اسمها بيتنطق غلط ,,أو هو اصلا اتكتب في السجل المدني غلط
كانوا شوية خواجات بيصمموا المدينة فواحد من العمال (اما وادنه كان فيها شمع كتير و مش بيسمع أو انه كان شغال بالحفارة فمش سامع ) سألهم : و هتسموا المدينة ايه ان شاء الله
فالخواجة قاله : يا خبيبي دي بورت سعيد
فالعامل قاله : اييييه؟
الخواجة : بورت سعيد
فالعامل : بوووورسعيد
فراحوا مأيدينها في السجل المدني بورسعيد و بالانجليزي بورت سعيد
باعتبار ان كلمة (بور) يعني ميناء :biggrin:
طبعا الأجانب استغربوا قالك poor said !!
هو سعيد دا طلع فقير و لا ايه!! ,,فكرناه غني و كبير الحته ,,و ما اهتموش المهم ان الاسم صح بالانجليزي حتى لو عايزين يسموها donkey said بالعربي احنا مالنا :sml39:

نيجي للنقطة المهمة
اللغة ,,اللغة مالهاش قواعد تحكمها في الاصل
لكن الانسان بيحطلها قواعد عشان يحافظ عليها
لكنها في البداية بتنشأ من الفراغ و بتتطور مع الوقت
ميزة اللهجة العامية هو ان قواعدها بتتوقف على فهمها ,,يعني المهم انك تكتب كلام يتفهم للعامة بس
و دا اصلا كان الهدف من أي لغة نشأت في أي مجتمع ,,هو ان الناس تفهم بعضها مش انك تحط قواعد و ضوابط و رخامة :biggrin:
واحد هيقولك طب انت كدا بتناقض كلامك في أول الموضوع!!
أنا من أري ,,قول الي يعجبك المهم يكون المفهوم واصل للعامة
و الله ما الأجانب بيقولوا cotton و دي كلمة عربية اصلها قطن ,,حد بيحاسبهم
احنا كمان هنقول كنزاية:079:
موضوع كلمتين أهو عشان ماحدش يقول اني برغي
و مواضيعي الخفيفة بتبقى في النقاش
رأيك انت ايه ؟ هل بتأيد ان الكلام يكون له قواعد دايما
و لا تسيب الكلام يطور زي ماهو عايز؟

[بسمة العمر]

انا من راى انو الكلام لو كان لية قواعد يبق افضل
يعنى مفهاش حاجة لوا طور بعض الشئ
بس مش قوى
كدا هنضيع قواعد اللغة
يسلمو دكتور
والله عمر كلامك ما كن رغى بالعكس ديما بيكون جميل
دا احمد بيقول كدا علشان غاير بس خليها فى سرك يعنى
ههههههههه
تسلم ايدك

[Lost Pearl]

بص يعني يا طارق هو علي حسب
بس انا المثال بتاع ال can ده بيعصبني جدا

اقول للراجل عايزة can pepsi
يبصلي كأني جاية من كوكب تاني و يقولي عايزة ايه

يا عمو can pepsi يقولي اه عايزة واحد كانز
ههههههههههه

ببقي عايزة اضربه

و علي موضوع Port Said ده بقي فهو ممكن يبقي رخم اننا مش بنقولوا صح
بس انا مش شايفاها مستفزة اد ((الكانزز))

ف من الاخر هو في حاجات تنفع كدة و حاجات تانية بتبقي مستفزة

و موضوعك جميل يا طارق

welcome back

ف انتظار جديدك بقي

تحياتي )

[دمعه حائره]

على فكرة دى مشكلة العصر
اللغه بتتاكل مننا وبتدخل كلمات اجنبيه فى حوارنا
بتغير معانى كلامنا غير المصطحات الشبابيه الجديده
ومصطلحات النت اللى طغت على كل كلامنا
وبقينا عاوزين قاموس جديد حتى للعاميه
انا شايفه ان لو فاهمين بعض اوك
لكن هاتقعد مع ناس مالهاش فى اللهجه دى
هايعتبروها منظره او بتتريق عليهم
الحل كل مجموعه تتكلم مع بعض زى ماتفهم بعضها
مش تروح للبياع تكلمه انجليزى وتبقى مطالب انه ييفهمك
وياريته انجليزى ده انجليزى يامرسى
يسلمو يادكتر موضوع جميل
تحياتى وتقديرى

[Mind language]

فعلا والله دى حاجه تنرفز احنا لو استمرينا
بنطق اللغه بالمنظر دا مع مرور الايام والزمن
هتلاقى اللغه العربية بقيت لغه تانية خالص اللغه
العامية بتاعتها متحرفه وداخل عليها خمسمائة لغة
تانية وتبقى سلطة لغات حط دا على دا يطلع لغه
جديده ملهاش اى صله باللغه العربية غير الاسم
فقط علشان كدا لازم يكون نطقنا له قواعد ومخارج
الالفاظ عندنا لازم تليق بلغة القران الكريم منجيش
احنا ونبهدلها كدا بحجت دى الموضة فى النطق او
دى لغة العصر لغة عصر اية انتم بتضحكم على نفسكم
وهضيعوا لغتكم علشان كدا ياريت نصحح من نطقنا فى
الكلام مفيش حاجه اسمها موضه او علشان تبقى كوووول
والكلام الفاضى دا كوول اية بس دا اسمه هبل اللى بنعمله
فى اللغه مع مر السنين هتلاقى عيالك واحفادك بيتكلموا
لاتينى ويقولولك دى لغة العصر لدرجة انك ممكن متفهمش
هما بيقولوا اية ؟؟؟ من الاساس فلازم لازم انى اللغه يكون
ليها قواعد فى النطق حتى عند النطق بالعاميه برضوا حفاظا
على اللغه من الضياع شكرا يادكتور موضوع جميل تسلم ايدك

[فداااااااااااء]

اولا طريقتك مضحكه جداااا
والله يا أخى اصبحت طريقه الكلام بين معظمنا لا تخضع لمعايير زوقيه فى اختيار الكلمات المعبرة فمن يظن ان الطريقه العاميه فى التحدث هى الافضل اقول ولكن القرآن الكريم المحدث لعباد الله لم يأتى الا بالطريقه العربيه الصحيحه فلو كان الناس لن يتفاهموا الا بهذه الكلمات الرديئه لكان كتاب الله نزل بها حتى يفهمه الجميع
ولكن ان السبب فى انتشار هذه اللغه العاميه هو بعدنا عن التثقف جيدا والتمسك بقواعد اللغه
طرح راقى منك سلمت يداك

[احضان الحبايب]

ايه الأمثــال دى بس . .
و الله يا أبو طــارق حااجه يعنى ــ فعلا تضايق .. ..
موضوع نطقنــا غلــط للغـات الاجنبيه و حتى اللغه العربيه بنــالف فيها :d
انا طبعاا معاا ان الكلام يبقا له قواعد دايمــا ،، لااسباب ياامه
يعنى مثلا انت عندك الناس ال هتطور الكلام دول ما فيهم : أحمـد هلى بكثير ولا الاصفهانى ولا طه حسين و لا حتى ايمن بهجت قمـر
و كماان التحريف ال بيحصل فى النطق للكثير من الكلماات ،، بيجرد الكلمه من معناهاا الاصلى ،، و غير كده انها بتفضل فى دمااغ الانسان بالمعنـى الخأطئ . .
و ربنا يستــر . .

شكرا لـك يا طـارق على موضوعك ،، و طريقة سرد ممتازه
و آاسف على الإطاله
تحياتــى

[عادل طه]

نايس توبيك طروق
شوف يا طروق
احنا شويه شويه وهنلغى اللغه العربيه او العاميه
من قاموس حياتنا الاول وما زالنا بنقلد الغرب
فى كل شىء من لبس وعادات وتقاليد متنفعش
فى مجتمعنا الشرقى وصلت الان لدرجه اننا نقلدهم فى اللغه بتاعتهم
يعنى تلاقى الواحد او الواحده مثلا تقول للراجل عمو انا عايزه كانز
بيبسى وشاليموه مناديل طبعا الراجل البياع بيسمع كلمه بيبسى بس
ومناديل بس ولو مش واخد باله يقولها فى الصيدليه اللى جمبى :sml39:
بعد كدا لما نعوز نشترى فول وطعميه من عند الراجل نقوله
ادينى بجنيه فوليشن وبجنيه طعميشن عشان الراجل ان شاء الله يحطنا فى طاسه الطعميه
وفيها الزيت مغلى
والله يا طروق ما عارف هنوصل لحد فين
انا خايف بعد كل ده تقول عليه رغاى
وانا طبقت المثل اللى بيقول خير الكلام ما قل ودل
هما كلمتين بس اللى قولتهم

[Taha 92]

تكلمت الان عن اللغه .. والتصحيح بين كلمتي can و cans
اساساً المفروض لا نقول can ولا cans نقول علبه ( صفيح )
وزي ما قلت انت (طب هو ماينفعش نقول لو سمحت عايز علبة بيبسي؟ )

[بنت المختار]

لو الكل يطور زيما هوا عايز
مش هنفهم على بعض وكلواحد هيكون عنده لهجة يتكلم بيها
لأ انا ضد هالشي...ولازم نلتزم بقواعد اللهجة لما نيجي نحكي بالعامية
علشان نفهم على بعض
واذا حكينا باللغة العربية لازم نستيقظ ونركز ونصحى يعني ضروري نحكيها صح من غير اختلاطات
جديدة علي الكانز
طرح حلو
يسلمووووووووووو
[IMG]http://upload.***************************/file2/13174136885.gif[/IMG]