وحشتنى يا ميرو ... (( الغربه وأخى وأنا )) ..!!

[صدي الهمس]

أمى تراب ابنك بات عنك غريب ... أبوس ايدك يا أمى يرجع الجدع

أمى الأصيل بالغربه يشحت لقمته ... وأنتى اللئيم بأرضك عمره ما شبع

أمى دموعى دابت فى خدودى صديد .. سبتيه لوحده ليه فى البعد اتوجع

أمى أخويا التالت فرحه بعد يومين ... وكان مهره ترجى زرع أمى ما انقلع

الزرع أمى كان أخوه والقلع منك ... أمى حنينه ليه صوت منك ما انسمع

شنطه سفر أمى باتت جبال جليد ... فى سطوح كل بيت بشارعنا وقع

طلع النهار يا غاليه التلج زاد .... و ظنى من دفا شمسك وهم أنقشع

حبيبه أخويا أمى فيها طير مدبوح .. والذنب منه تار بديه ما أندفع

أكفان هواها يا أمى للغالى حنين .. والصمت منها ذهول فى عيونها لمع

و لسان حالها يقول تحرم فرحتى .. لحد ما الدنيا لروحى تكتب مرتجع

أما أبويا وأمى يا أمى دابو شموع .. وسنينهم جرف شتا من النيل ارتفع

برج الحمام مغصوب بمر فراق ... لطيور يا أمى الزغب منها وقع

أما أنا . أماه . أنا يا أمى بهذى ... وكلام شوق بعتاب . بالعافيه طلع

فيا أم الدنا فيروز وأحن من أمى ... أنا الصبر ولى الصبر ان يوما نفع


وائل جلال19/3/2012


معانى لكلمات : تار بديه (ثأر بفديه) ؛أمى المخاطبه بالأبيات مجازا : (مصر)

(أهداء خاص لأخى ميروالعضو أيضا فى هذا الصرح الجميل )؛ فى أول يوم له بالغربه اليوم بالمملكه العربيه السعوديه ولكل المغتربين من أبناء بلدنا العزيز بالخارج عامه. داعيا الله الكريم العوده بألف سلامه للجميع . وتحياتى .