لا هم اخوان ولا هم مسلمون

[قلم بلا حبر]

بسم الله الرحمن الرحيم

السلام عليكم

قبل ما تسن قلمك وتجهز مدافع كلماتك واتهاماتك ليا بسبب العنوان

اتأكد الاول من هدفك

لانك حتخطئ لو صوبت ردودك ناحيتى

لان العنوان ما هو الا اقتباس من بيان حسن البنا بعد محاولة تفجير المحكمه اللى كان فيها مقر النائب العام

وده الجزء اللى اللى اجزم ان اغلب الاعضاء هنا مش مركزين فيه

وهو التاريخ الدموى للاخوان المسلمون

مش بهاجمهم ,,

لان االهجوم معناه انا اقول عليك ما ليس فيك

انما ده تاريخك اللى المفروض ,, ان منكم اللى برره ومنكم اللى اعتذر عنه ومنكم اللى ترك الجماعه بسببه ومنكم اللى بيتمنى ليل نهار ان محدش يتكلم فيه

لكن على اية حال ,,,

فكرة الاغتيال هى فكره ثابته ومتجدده عند الاخوان المسلمون

بدأت مع انشاء حسن البنا للتنظيم الخاص فى الجماعه اللى اتولى عمليات اغتيال كتيره

لكن خلينا نتعرف الاول عليه عن قرب

حسن البنا فى بداية تأسيس الجماعه قادته افكاره الى نهج تبنى عليه الجماعه وتتبنى سياسته فى المستقبل وده من خلال 3 اجيال

الجيل الاول -- جيل الدعاه اللى حيتربوا على ايد البنا ويشربوا افكاره

الجيل التانى : جيل المواجهه وده احنا شفناه فى الستينات والسبعينات واللى انتهى باغتيال السادات ,, وده اللى واجه بيه عمرو موسى عبد المنعم ابو الفتوح اقتباسا من كلام لابو الفتوح فى مزكراته عن منهجية العنف وايمانهم بيه كحل

الجيل التالت :: اللى احنا بنعيش معاه دلوقتى وهو جيل الانتصار ,,, اللى معاه حتتحقق كل طموحات حسن البنا

بعد فتره من قيام الجماعه قدر حسن البنا يحشد مؤيديه فى الاسماعيليه وتكوين اول شعب هناك ,, وبعد كده طلب النقل للقاهره (( هو اساسا كان مدرس ))

بعد نقله للقاهره قدر هناك يوسع قاعدة الاخوان ويجذب اليه ناس كتير وده بشهادة ناس عاصروه وقيادات فى جماعة الاخوان ومكتب الارشاد كان لقدرته الفذه على استمالة الناس ومخاطبة ميولهم ,, وطبعا كان عامل الدين فى مصلحته ,, بالاضافه لانه كان انسان ذكى جدا

ساهم فى تكوين شخصيته نموه مع التجديد اللى قام بيه جمال الدين الافغانى والامام محمد عبده لكن المرجعيه اللى اعتمدها لشخصه كانت مستمده من رشيد رضا صاحب المنهج المحافظ

وده اللى أثر فيما بعد على فكر الاخوان كجماعه ,, لان الفكر الى اعتمده حسن البنا كان قائم على محاربة المد العلمانى ولا سيما بعد الحرب العالميه الاولى اللى انطلقت فيه افكار جديده بتنادى بالعلمانيه الوطنيه او الوطنيه المصريه وفصل الدين عن الدوله ,,

وده اللى يخلينا ننفى حكاية فصل الدين عن الدوله عن السادات تاريخيا ,, لانها بدأت قبل منه بكتير قوى ,, وكان اول تصاد بين فكرة شمولية الاسلام بقيادة الاخوان والمسلمون وفكرة الوطنية المصريه بقيادة الحكومه السعديه أنذاك ,,,

على كل كان حسن البنا فى افكاره قريب لافكار الاخوان دلوقتى ,, ولو بتستغربوا دعمهم لناصر وبعد كده انقلابهم عليه ,, او وقوفهم لجانب السادات وبعد كده اغتياله ,, او مساندتهم لمبارك فى اخر ايام حكمه على اساس ينتزعوا شرعيتهم المسلوبه منهم

فاحب اقولكم ان اول حاجه اتعملت زى كده ,, كانت مع ترسيم الملك فاروق ملكا على مصر ,, الاخوان كانوا واقفين على الصفين بيهنوه ,, وده اللى بعد كده يخلينا نفسر قد ايه الانتشار اللى حصلت عليه الجماعه فى ظل فاروق نفسه

واللى برده رجعوا قلبوا عليه ,, فى دعم البنا لانقلاب اليمن

ايا كان خلونا نركز على التنظيم الخاص لانه محور الموضوع,,, المقدمه اللى فاتت كانت لتوضيح بعض اللبس عن البنا وتأسيس جماعة الاخوان

التنظيم الخاص فى البدايه قام على اساس مواجهة الانجليز فى القناه وعملاؤهم فى الداخل ,,

لكن المشكله وقتها زى المشكله دلوقتى ,, الكلام حلو بس الفعل حاجه تانيه خالص

لان التنظيم الخاص اللى اسسه حسن البنا وترأسه بنفسه وضم ليه 5 شخصيات من اخلص واقرب الناس ليه فى الجماعه ,, واللى كان مبنى على الطاعه فقط ,, بعد كده انحرف عن مساره

وعمل حوادث اغتيال قادت فى النهايه الى حل جماعة الاخوان ونزكر منها

كبدايه كانت تفجير الحانات اللى بيرتادها جنود الاحتلال هى اولى عمليات التنظيم ,, وطبعا بصرف النظر ان كل اللى شغالين فى الحانات عادى نحكم عليهم بالموت مش مشكله ,, مع ان مش من حقك مهما كان المبرر وتحت اى مسمى نبيل انك تقتل روح مسلمه انت مش عارف ممكن يكون فيها السيئ وممكن يكون فيها الكويس اللى مستنى فرصه يكون فيها نظيف ,, بس انت جيت وريحته من الدنيا كلها بقرار شخصى منك وفتوى الله اعلم بمدى صحتها

2- اغتيال احمد ماهر باشا رئيس الوزاره على يد محمود عيسوى اللى كبار قادة الجماعه قالوا فى مزكراتهم انه اخوانى

3- تفجير عدد من اقسام الشرطه فى القاهره ردا على قمع المظاهرات المضاده لمعاهدة صدقى

4- اغتيال القاضى احمد الخازندار اللى كان بيحكم فى قضية القنابل واللى حكم فيها بالمعلى بعض اعضاء الاخوان ,, وكان ردهم اغتياله

المشكله لما سألوا فتحى السندى قائد النظام الخاص فى الجماعه ساعتها والكلام ده على لسان قيادات الجماعه فى مزكراتهم ,, قال بالحرف الواحد

لما رئيس الجماعه يقول (( لو ربنا يريحنا من الراجل ده )) والقصد طبعا على القاضى احمد الخازندار ,, كان لازم التنظيم الخاص يقوم بدوره ,,, واللى نفاه بعد كده حسن البنا وقال انه مكنشى يقصد القتل

لكن بصرف النظر عن تخيله او قصده ,, الفكر اللى وصلته الطاعه العمياء ,, ان جمله تتفهم غلط يكون تمنها حياة بنى ادم (( قاضى )) كانوا زمان بيقولوه فى الخطابات (( صاحب العزه )) وبصرف النظر حياة الانسان اى انسان مستحيل تكون رهن طاعه بلهاء بدون وعى او فهم او ادراك ,,

يعنى ايه قائد الجماعه يقول لو ربنا يريحنا من الراجل ده ,, فيجرى واحد من الجماعه ويقتله ,, ويرجع قائد الجماعيقول لا انا مكنشى قصدى كده انت فهمتنى غلط

المهم فى الاخير قدروا يمسكوا الاتنين اللى عملوا ده ,, والجماعه بعد كده عملت التحقيق مع البنا والسندى وتوصلت انه قتل خطأ :biggrin: ,,

وقالوا ان الواجب الديه واهى الحكومه دفعت الديه لاهل الخازندار واهى برده من مال الشعب ,, واحنا الشعب يبقى كده خلصت


2- اغتيال سليم زكى ,, حكمدار امن القاهره ,, كان فى مظاهره طلابيه فى جامعة القاهره ,, وكان معروف عن الراجل ده شدته فى مواجهة التظاهرات ,, فطالب اخوانى رمى قنبله من الطابق الرابع نزلت بين رجل الراجل وهو على المصفحه فمات على الفور ,,وتقريبا اكتر كلمه سمعناها مع كل العدد من القتلى اللى وقعوا فى الثوره هى (( سلميه سلميه )) وحبيب العادلى نفسه بيتحاكم قدام قاضيه المدنى ,, ده الفرق بين هذا وذاك

5- كان فى قضيه شهيره اى حد اخوانى اكيد عارفها لانهم لحد وقتنا هذا بيحبوا يبرروها باى شكل ,, المهم القضيه دى خاصه برده بالتنظيم الخاص ,, كاناو حاطين الورق والخطط فى مكان معين وتقريبا حاسو ان المكان ده مش امن فقرروا ينقلوه لمكان تانى ,, ولسوء حظهم كالعاده الراجل اللى كان حيتنقل الحاجات دى لبيته كان متخانق مع مخبر وقتها ساكن معاه فى نفس البيت ,, وكانوا واقعين فى بعض ,, وفى يوم كان راجع بيته عادى لقى عربيه جيب واقفه قدام البيت ,, بيبص فيها من ورا لقى اسلحه وخطط ( امسك ,,,,,))

طبعا قضيه زى دى هزت مصر تانى بعد احمد الخازندار وتقريبا بقى فى جيش مسلح فى مصر ,, محدش عارف حيستهدف مين بعد كده ,, اتقبض على العربيه الجيب باللى فيها واتحولت القضيه كلها للنائب العام ,, واللى مكتبه كان فى المحكمه وقتها ,,

فالتنظيم الخاص طبعا مش حيسكت ,, راح واحد منه فجر قنبله فى المحكمه علشان يبيد ادلة الاتهام قدام النيابه فتطلع القضيه فشنك

بعد كده اى مبررات من الاخوان عن قضية السياره الجيب يبقى ده تدليس ,,, لانك مش حتروح تفجر مكتب النائب العام الا لو انت متأكد ان فيه اللى يدينك

6- اغتيال رئيس الوزراء النقراشى باشا

طبيعى بعد حوادث القتل والاعتداء على الاقسام وشيوع مسمى الارهاب بين المصريين ,, بعد ما كانت دوله مسالمه خلق نوع من الضغط كان لابد مواجهته ,,

فاتخذ النقراشى باشا قرار بحل الجماعه ,, ومفيش خبر وبعدها بكام يوم شاب اخوانى لبس لبس ظابط وووجه ليه رصاصات عن قرب ادت لوفاته

المهم ان فى جنازة النقراشى باشا كانت الكلمه الاكثر سماعا هى (( الثأر الثأر )) وده اللى اتحقق فعلا باغتيال حسن البنا على يد جهاز الشرطه انذاك

طبعا فى بعد كده استمرار للتنظيم الخاص وانضمام ضباط من الضباط الاحرار ليه زى جمال عبد الناصر وخالد محيى الدين ,, وحدوث انقلاب 1952 اللى مصادر كتير بتقول انه برده كان مخطط من مخططات البنا الا وهو الاستعانه بضباط من الجيش للانقلاب العكسرى

واللى كان سبب بعد كده لانقلاب عبد الناصر على الاخوان لانه كان عارفهم عن قرب وعارف مخططات تنظيمهم الخاص وقد ايه خطره على مصر وعلى كل اللى يختلف معاهم

الغريبه بقى ان معظم الاحداث دى بل كلها تبرأ منها حسن البنا وقال انها تمت من ورا ضهره وده اللى خلاه يقول جملته الشهيره (( لا هم اخوان ولا هم مسلمون )) واستكمل حديثه بتمنيه لو يعود بيه الزمن ويحل الجماعه بنفسه ,,

المهم علشان نربط السابق باللاحق

انا فى اول الموضوع قلت ليكم ان الاغتيال بالفعل منهج عند الاخوان بيتغير شكله مع تغير معطيات العصر

يعنى مظنش دلوقتى ان الاخوان ممكن تقوم باغتيال جسدى

لان فى زمانا فى سلاح اقوى من كده بكتير

الا هو

الاغتيال المعنوى

وده شفناه بيوجه ضد كل من شارك فى الثوره من رموز واحزاب وحركات شبابيه

حتى البرادعى اللى مهد لهم طريق الخلاص,, اغتالوه معنويا

ايا كان

بلاش نعتبر الموضوع هجوم الا فى حالة انكار اى معلومه من اللى انا قلتها فيه

انما غير كده يبقى ده طرح لتاريخ جماعه ,, حتقولو اعتذرنا واتغيرنا

حقولكم وجهة نظرى ,,,

ان الاخوان يعتمدون مبدأ (( الغايه تبرر الوسيله ))

والوسيله زمان كانت القتل ,, لكن النهارده ممكن تكون باغتيال الشخص معنويا ,,,

وفى الاتنين الوسيله غير شريفه وغير ادميه وغير منصفه

ربنا يهدى

وعلشان ميكونشى فى حجج لتعذيب عبد الناصر ةالسادات ومبارك ,,, مع اختلافى معهم جميعا فى ممارساتهم القمعيه

لكن انتم كمان اى رئيس يخشى على نفسه منكم بصراحه ,,

واللى مياخدشى من التاريخ عبره

عمر ما حيكون ليه مستقبل

شكرا للمتابعه

تحياااااااااااااااااااااااااااااااتى""""""""""""

[Mo7aMaD 3aLa2]

والله فعلا كلمة الحق
الاخوان يعتمدون على مبدأ الغاية تبرر الوسيلة
موضوع افادنى كتير يا سيد
تسلم ايدكـ
..

[!دلوعها وكلمتها مسموعة!]

مصلحتى اولا
يعنى ممكن تقتل علشان مصلحتهم تماشى عادى
الغاية تبرر الوسيلة
ودة منهجهم
بجد موضوع يستحق التقيم
ورائع

[نهر النيل]

المحترم / قلم بلا حبر
تابعت وقرأت موضوعك الهام عن ما يسمى بالاخوان
واسمح لي فقط بتعليق بسيط
اولا
ديننا الاسلامي العظيم هو دين التوحد والعدل والحريه وكل مسلمي العالم مدون ببطاقاتهم سواء شخصيه او عائليه مسلم او مسلمه ولم ارى يوما مكتوب سلفي او اخواني او جهادي او ما الى ذلك
فجميعها مسميات ما انزل الله بها من سلطان
ومنذ اللحظه الاولى لركوب هذه الجماعه على الثوره وحصد كل او معظم المكاسب لها وحدها تأكدت بأننا أمام حزب وطني آخر وبشكل مختلف لذا كانت معظم كلماتي موجهه لهؤلاء المتأسلمين والذين يقولون ما لا يفعلون
عذرا للتطويل
بالتوفيق دائما

[قلم بلا حبر]

اقتباس المشاركة الأصلية كتبت بواسطة mo7amad 3ala2 والله فعلا كلمة الحق الاخوان يعتمدون على مبدأ الغاية تبرر الوسيلة موضوع افادنى كتير يا سيد تسلم ايدكـ ..

شكرا لتقديرك يا ابو علاء

منور يا غالى

[قلم بلا حبر]

اقتباس المشاركة الأصلية كتبت بواسطة !دلوعها وكلمتها مسموعة! مصلحتى اولا يعنى ممكن تقتل علشان مصلحتهم تماشى عادى الغاية تبرر الوسيلة ودة منهجهم بجد موضوع يستحق التقيم ورائع

مشكوره على ردك وتقييمك

نورتى الموضوع

[قلم بلا حبر]

اقتباس المشاركة الأصلية كتبت بواسطة شيئ ما سيبقى المحترم / قلم بلا حبر تابعت وقرأت موضوعك الهام عن ما يسمى بالاخوان واسمح لي فقط بتعليق بسيط اولا ديننا الاسلامي العظيم هو دين التوحد والعدل والحريه وكل مسلمي العالم مدون ببطاقاتهم سواء شخصيه او عائليه مسلم او مسلمه ولم ارى يوما مكتوب سلفي او اخواني او جهادي او ما الى ذلك فجميعها مسميات ما انزل الله بها من سلطان ومنذ اللحظه الاولى لركوب هذه الجماعه على الثوره وحصد كل او معظم المكاسب لها وحدها تأكدت بأننا أمام حزب وطني آخر وبشكل مختلف لذا كانت معظم كلماتي موجهه لهؤلاء المتأسلمين والذين يقولون ما لا يفعلون عذرا للتطويل بالتوفيق دائما

تطويل ايه بس

يا راجل كمل

انا شايفك لسه 20 مشاركه يعنى لسه جديد معانا

بتمنى اشوفلك مواضيع هنا فى المنتدى عموما وفى القسم خصوصا

حاسس انك فلته مش عارف ليه :biggrin:

بالتوفيق


ومنور والله يا حاج

[ماتركس]

الاستاذ سيد اللي بقي فاضي دلوقتي من اول ما سافر السعوديه :biggrin:

انتا موضوعك يا سيد وضح حجات كتير بصراحه مكنتش واخد بالي منها

وكلامك بصراحه علي حق الاخوان دلوقتي بقيه اغلبيه الشعب

بيكرهم يلا ربنا يسترها علينا يارب

بس بجد مضووع جميل الواحد امنيه حياتي اني ابقي محنك في السياسه كده مثلك

علمنا يا عم :biggrin:

موفق يا ابو السيد

[yasmine refat]

والله موضوع كويس ...

وحلوه معلومة رشيد رضا

لان الاخوان والسلف كلهم واحد سلفيييييييييين مافيش اختلاف ...

انا شخصيا بختلف معاهم في التوجه بالنسبه لاشياء معينه وده الاختلاف الرئيسي لان كل شخص بيدور على الي يريحه

اما غير كده ففيهم غباء فعلا يعني قدي الشعب الي عايزوه الشعب هيخليك ويحافظ عليك

ونقطة التلاعب بالدين والشريعه والردود الفظيعه هنا عايزين الشريعه عايزين الشريعه

طب اقرأوا اطلعوا وبعدين أفتحوا افواهكم

عارف لك جمله لفتتني يمكن في موضوع لضياء ( إن الفراغ الي سمح لهم للصعود)

وهو فعلا الي حاصل الثوره الي ملهاش قائد سهل تنقلب عليها ( اتوقع دي الجمله قرأتها لجمال عبد الناصر في كتاب فلسفة الثوره * عموما مش فاكره:biggrin

المهم افعالهم كلها عباره عن حرب على السلطه وبغباء للاسف

لانك لو عايز توصل وتدني حريتي فاهلا وسهلا وده شيء شخصيا مش متوفر ليه لاني بختلف معاهم كتوجه ...

مش عارفه الناس الي عايزه طبق الشريعه دي بدون نظر للحكمه وفلسفة الدين مع ان مش شرط معرفتك لتفاصيل الدين تعرفك فكرته العامه

مش بعيد بكره نلاقي شخص يقلك تاني عايزين ارضاع الكبير

وعلى فكره انا من الناس الي هتستفيد اهو الحجاب يخنق ابقى اعملي بقى شركة البان:079:

ولا حكاية نتف الحاجب تقهرني دي بجد :biggrin:

مش عارفه ايه الفرق بينها وبين التشقير والشيل بالموس

يلا اذا سدت طريقه فتحنا طريقه وده كل بسبب غياب الفلسفه الكليه للدين

ولو كان النجاح بتطبيق الامور الدقيقه دون الفهم لكنا اكتسحنا

انه الجهل يا أستاذي أنه الجهل

وعموما الناس نفرت منهم والي بيكرورا مش فاهمين هيفهموا بكره في يوما ما كنت كذلك:biggrin:

مشكور

[Words Whisper]

شاكِرة لحضرتك الموضوع القيم

بس هتحفظ على الرد

تسلم

ودمت بحفظ الرحمن ..