::: تكريم أعضاء المنتدى ::: | ||||||||||
::: فعاليات المنتدى ::: | ||||||||||
آخر 12 مواضيع | ||||||||||||
|
الإهداءات | |
| LinkBack | أدوات الموضوع | انواع عرض الموضوع |
منذ /05-25-2012, 11:31 AM | #1 |
مدير عام ومؤسس العصر الذهبي للمنتدي | شفيق و مرسي و اركن انت!! أظهرت نتائج فرز 11,327 صندوق انتخابي من أصل 13,099 صندوق على مستوى الجمهورية في الانتخابات الرئاسية بلغ إجمالي عدد الأصوات الصحيحة 17,965,315 صوت حتى الآن أظهرت النتائج الاتي : محمد مرسي – 4,968,184 بنسبة 27.7% أحمد شفيق – 4,416,909 بنسبة 24.6% حمدين صباحي – 3,290,375 بنسبة 18.3% عبد المنعم ابو الفتوح – 3,157,465 بنسبة 17.6% عمرو موسى – 2,132,382 بنسبة 11.9% طبعا باقي الألف و نص صندوق مش هياثروا في النتيجة بشكل ملحوظ و هيكون تقريبا دا شكلها النهائي مع تغيرات طفيفة يعني الإعادة هتكون بين مرسي و شفيق هلوم مين و لا مين! بعد ما الناس كانت مبسوطة بالعرس الديمقراطي فجأة حسوا بنكد و حزن!! يختار مين!! ,الاخوان و يديهم كل السلطات و لا شفيق و نضحك العالم علينا! طبعا ناس كتير مستغربة ازاي شفيق ياخد النسبة دي و مين صوتله! الإجابة بسيطة جدا ,,انزل الشارع و حاول تتقرب من البسطاء و الناس العادية و شوفهم بيفكروا ازاي هتعرف ان النتيجة منطقية أنا واحد من الناس سألت كذا واحد اعرفهم ساكنين في قرى و مراكز و كفور مين الي له شعبية عندك يقولي صباحي و شفيق دا غير بعض من اصحاب الطبقات الغنية , و بعض كارهي الاسلاميين و أصحاب نظريات : عايزين واحد يدي بتوع التحرير على افاهم زي العباسية!! بس عارفين ,,احنا نستاهل الاعادة دي نستاهلها و نص كمان لأننا ببساطة مش شاطرين غير في اننا نشتم في الفلول و نهزق فيهم و بعدين نفتت نفسنا!! وفي كل مره بنعمل خدمة كويسه للاخوان ما اتعملناش أي حاجه من الانتخابات البرلمانية الي كان بيتابع استطلاعات الرأي في صفحات الفيس بوك و المواقع عامة بعد اعلان القائمة النهائية للمرشحين كان هيلاحظ اكتساح لعبد المنعم أبو الفتوح بشكل قوي جدا و بفارق كبير طبعا احنا ازاي نتفق على مرشح ؟ ازاي القوى الثورية و الاسلامية و الليبرالية تتحد على مرشح ؟ لازم نشتت نفسنا! بعد اسبوعين تقريبا زادت شعبية حمدين صباحي و تحديدا بعد ظهوره في برنامج (مصر تنتخب) و لاحظت ناس كتير جدا من مؤيدي أبو الفتوح حولوا على صباحي و مثال صفحة كلنا خالد سعيد (اشهر صفحات الثورة المصرية) شاهدة على تغير مزاج الناخب بشكل مفاجئ وقتها أنا قولتها أكثر من مره ,,الانقسام دا مش لصالحنا نهائيا و كلمة (مش لصالحنا) لأن بحكم معرفتي بناس كتير من مؤيدي حمدين و ابو الفتوح فهم ناس تقريبا لهم فكر واحد و بيحترموا الاتنين و شبه متوافقين على الشخصين في حين انت بتواجه حيتان (الاخوان بمرسي) و الفلول ب (شفيق) و (موسى) و لكن ! لا حياة لمن تنادي يا جدعان مش عايزين نتشتت و حمدين شخص محترم و كل حاجه لكن كدا في خطر على عدم فوز اي طرف فيهم يقولك لا اصلي مش مرتاح لفلان أو اصله كان اخواني و اصل و اصل و اصل (( و الكلام دا سمعته من كذا شخص بنفس المنطق مش من شخص واحد)) طبعا عارف انه حقك تختار الاقرب الى قلبك , بس ما تزعلش بقى من النتيجة النهائية ! لأن السياسة لازم يكون فيها مرونة و لازم تختار شخص ناجح مش مجرد اختار شخص فكره شبهي و الا فالاولى اني انتخب البسطويسي او خالد علي! لا انتخب الاسلامي و لا الناصري! دي بيسموها سياسة الاختيار الصحيح , و بتحصل في كل العالم تفتكر مثلا كل الفرنسيين اشتراكيين عشان يفوزوا واحد اشتراكي في اخر انتخابات!! أنا قولتها خمسين مره قبل كدا مافيش مرشح هتلاقيه 100% بيتوافق معاك لكن انت عليك انك تختار الافضل من حيث مواقفه الثورية و في نفس الوقت تحاول تحشد القوى و تلفهم حواليه بس مافيش فايده برضو أنا واحد من الناس كنت محتار في الفترة الاخيرة اصوت لحمدين و لا لأبو الفتوح ,و لآخر لحظة لاقيتني بفكر في سيناريو الاعادة ابو الفتوح و حمدين الاتنين شخصيتين محترمة و ثورية و لكن , الاعادة حتميا هتكون مع المرسي يبقى لو مرسي و ابو الفتوح فأبو الفتوح بتسانده قوى اسلامية + ليبرالية و ثورية و يسارية فهيكون في امل كبير أما في حالة الاعادة بين حمدين و مرسي فالتيار الاسلامي كلو هيحتشد لصالح مرسي , خلافا لحملات التشويه زي انه مش اسلامي و اشتراكي و ناصري و شيوعي و غيره هو آه ممكن يكسب اصوات الداعمين للفلول و كارهي الاخوان و بعض مؤيدي ابو الفتوح لكن هيظل في احتمال كبير لفوز مرسي في ظل دعم قوي و موحد من التيار الاسلامي يمكن دي اهم الاسباب الي خلتني ارشح ابو الفتوح و طبعا خلافا على اني أيدته من البداية و ضد فكرة تشتيت الاصوات بين شخصين كويسين أنا النهارده بس اتمنيت عمر سليمان كان يبقى في السباق ,,على الاقل كان هيشتت و هيسحب من احمد شفيق نسبة كبيرة من الاصوات و تكون النتيجة لصالح حمدين و ابو الفتوح الي هقوله في الآخر : احنا نستاهل النتيجة دي و الاخوان موقفهم صح , انت مش ضامن ايه الي كان ممكن يحصل لو مش كانوا رشحوا حد مش بعيد التشتيت يكون بين تلاته او اربع مرشحين و ندخل مع حمدين و ابو الفتوح خالد علي و البسطويسي!! أنا مش هلومهم هما ناس منظمة حتى لو بختلف معاهم حتى النخاع ,لكن حقهم يترشحوا مش هلوم ال 5 مليون الي انتخبوا شفيق لا الصعيد و لا الغربية و لا الساحل و لا بنها و لا اي دوائر صوتت بأغلبية لشفيق أنا هلوم نفسي و هلوم الناس الي فكرها قريب مني و راحت تشتت نفسها بين كذا مرشح بعد ما اجمعوا سلفا على مرشح واحد كان في امل كبير , و الشتت ضيعه و تقدر تلمس الامل دا لو جمعت اصواتهم الاتنين على بعض ::::: طيب هصوت لمين في الإعادة ؟ هصوت لمرسي و اسلم مفاتيح الرئاسة و الحكومة للاخوان خلافا على مفاتيح الشعب و الشورى الي معاهم ! و لا اصوت لشفيق الرجل المدني العسكري , محسوب على النظام السابق عشان اقطع على الاخوان ؟ و نخلي العالم كلو يضحك علينا! الإعلامى فيصل القاسم : إذا فاز أحمد شفيق فستكون ضربة قاصمة للثورات العربية جمعاء. وسيكون من حق الطغاة عندها أن يقولوا للثائرين: سنجري انتخابات وسنفوز ديموقراطياً مش قادر أنطقها لكن مضطر اقولها لأن أنا ما اقدرش اقاطع جولة الاعادة و اسيب انصار الفريق و موسى و بعض انصار حمدين و كارهي التيار الاسلامي يصوتوا لشفيق مصر مش هتستحمل وجود شفيق لمدة اربع سنين من الاضطرابات و الاحتقان هقولها بقى : صوتي لمحمد مرسي و مافيش مسار تاني لاستقرار مصر غير ان مصر تفقد إلكترون :biggrin: عندي رغبة في اللحظة دي اني ارجع صغير تاني و ألعب عسكر و اخوان ) وقتها كنت ببقى تبع أي طرف منهم بدون ما أحس باي ذنب !! |
الكلمات الدلالية (Tags) |
مرسي, اركو, انت, شفيق |
الذين يشاهدون محتوى الموضوع الآن : 1 ( الأعضاء 0 والزوار 1) | |
|
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
وتستمر هستريا أنصار شفيق بعد فوز مرسي | P R ! M O | يوتيوب - موقع يوتيوب - يوتيوب فيديو - مقاطع يوتيوب | 6 | 06-28-2012 06:44 AM |
دينية شفيق & مدنية مرسي! | د. محمد الرمادي | مواضيع عامة - ثقافة عامة | 8 | 06-18-2012 08:42 PM |
مرسى يتصدر في قطر و****************** بفارق 31908 أصوات عن شفيق | اهلاويه موت | منتدى الاخبار - عربيه - عالميه - اخبار مصر | 3 | 06-14-2012 01:16 AM |
الجبهه الثورية توافق على دعم مرسي او شفيق بشروط | اهلاويه موت | منتدى الاخبار - عربيه - عالميه - اخبار مصر | 4 | 05-30-2012 09:03 PM |
بالصور| مرشح الرئاسة أحمد شفيق يتعرض للضرب بالأحذية | مجدي الحفناوي | منتدى الاخبار - عربيه - عالميه - اخبار مصر | 3 | 05-25-2012 07:56 AM |
^-^ جميع المشاركات المكتوبة تعبر عن وجهه نظر صاحبها ,, ولاتعبر بأي شكل من الاشكال عن وجهة نظر إدارة المنتدى ~