حكايه قلب

[الأميرة رودي]

لما نصبح كل يوم على أخبار غير مألوفة علينا ولا على مجتمعنا ولا على ديننا
* راجل خنزير يغتصب طفله عمرها سنتين(طفلة البامبرز )
* أخ ينصب على اخوه ويسرق أموال الشراكة بينهم ويهرب

* زوج يقتل زوجته ويحرقها أو العكس

أم تقتل أطفالها التلاته !!

* آب يغتصب بنته ويهددها

* ابن يسرق أمه عشان بشرب مخدرات

* شباب يقتلو عروسه قبل فرحها بأيام

*يوميا قتل نفس بغير حق فى وضح النهار دون خوف او رقابة قوانين
لما يكتر البلاء علينا بالشكل ده
ساعتها لازم نعرف أننا بقينا عايشين فى القريه الظالم
اهلها
ولازم نطلب ونتوسل لطف ربنا بينا لأن الحال وصل لأعلى درجات من الكرب.

[الأميرة رودي]

هبه ( عاشقة الهدوء ) فرحها كان يوم الأحد و كانت أحلى عروسه بالفستان الابيض .
ربنا يسعدها ويفرح قلبها دايما ويرزقها ذريه صالحه

وعقبال ماافرح ب رووكه واروق منهم بقا يارب
أحسن الواحد خلاص صدع منهم

[الأميرة رودي]

رووكه قضيت معاها يوم مايتنسيش فى القاهره
بس كنت فى وقت صعب أيامها وكانت الظروف مش اوي ف مقدرتش انبسط بوجودي معاها كفايه.

البت دي تقولش حته شاكليته ياناس
المهم يومها جابتلي علبه شيكولا فاخرة اوي
كنت عاوزه أقولها ليه الصرف ده كنتى هاتي تمنها ومش مهم الشيكولا عادي انا برضى بأي حاجه
لو مكنتيش تحلفي يامروه

ملحوظه/ مروه اوزعه جداااااااااا كنت ماشيه جنبها حسه أنى أمها كنت هسيبها وامشي من المنظر المكسف ده

كان من اجمل الأيام حقا .

[الأميرة رودي]

ردي على أحد الموضوعات اليوم ..

بدايات الحب.
الحب زيه زى اى طريق بنمشيه له بداياته .
نظرة الحب بداية ..
الاهتمام بالحبيب وتفضيله دون غيره بدايه .
الثقه فيه ومنحه كل ماتسطيع من سبل السعاده بداية.
شعورك بالراحة والطمأنينة بمجرد وجودة بالقرب منك بدايه..
إنما النهايه دي فى ايد الطرفين
يااما يستمر الحب العمر بأكمله أو ينتهى عند مرحله معينه.
الحب محتاج ارتواء وعناية
هو شعور جميل ربنا بيودعه فى قلوبنا وحلله لينا
بس فيه ناس ب تسئ العنايه بالشعور ده.
بارعين فى اهماله لحد مايموت فى القلب.

نهايه الحب مش مقرونة بالزواج زي الاعتقاد الخاطئ.
الحب ممكن يبتدي بالزواج
وممكن ينتهى ب الزواج
وممكن يبتدي وينتهى قبل الزواج

الحب شركه بين طرفين أما يكون رباط ناجح أو يعيش صاحبه فى جحيم بسبب تصرفات الطرف الآخر.


والله الواحد ساعات بيقول حكم

[الأميرة رودي]

علبه الدوا الل كنت بشتريها ب 104 ج
رحت اشتريها قبل مااسافر بيوم لقيتها بقت 184 ج
وهو اصلا كل الل فيها شريط واحد بس مستوردة وكمان مش موجوده ف الصيدليات أو بمعنى أصح ييخبوها الصيدلانين المحترمين عشان سعرها يعلى اكتر
طيب والناس اللى محتاجة تاخد الدوا أو مريضة تعمل ايه؟
دول مش مهم المهم الواحد منهم يعمل مصلحه حلوه على حس مهرجان زياده الاسعار
شويه دوا مستورد يجي عليه اليوم مش هيبقى فى السوق يقوم المحترم يظهره بالسعر اللى على كيفه
سوق سودا وكده
يعني حتى أدوية المرضى هتتباع سوق سودا .

اتفاجئت بالزيادة فى السعر ومكنتش عامله حسابي وواخده بس 150
بقوله ليه الزياده الرهيبة دي يعني اكتر من 70% زياده فى علبه الدوا وكل اللى فيها اصلا شريط واحد .
قالى مش بأيدينا يامدام هو ايه فى البلد فضل على سعره .
قولتله لا باديكو انتو لو امتنعتو عن شراء الأدوية من شركات الأدوية وعملتو مقاطعة واعلنتو كده كنقابه الصيادلة بأن الدوا سعره أعلى من مستوى المواطن البسيط وانكو مش قادرين تستفادو وان الأدوية من أسعارها محدش بيشتريها حتى لو محتاجها كانت الحكومه اتحركت وشركات الأدوية صرخت من الخسائر اللى هتسببوها لهم
إنما انتو مش حاسين بحد ولا خاسس عليكو حاجه
وفعلا مهنة الصيدلي بقت مهنة بياع بيكسب من السلعة اللى عنده وشكرا.
الراجل تنح بس حسيته إتأثر ..
قالى خلاص خديها زي ماكنتى بتاخديها مش مشكله
بصتله بعدم احترام وسيبته ومشيت مااخدتهاش. ..

.قولت لما اسافر اجيبها من بره البلد االى عاوزه طلقى نار تفوقها دي... ولما سافرت وجيت هنا وقولت أنزل اشتريها لقيتها بتعادل 750 جنيه بالمصري
اقتل نفسي عشان ترتاحو
😯

لما أكون واحده محتاجه علبه دوا كل 10 أيام ب 184 جنيه نوع واحد.. اجيب بقيت الدوا بكام وأكل واشرب وافتح بيت وفواتير كهربا هبله بتوصل الفاتوره ل 1000 جنيه وغاز ومايه والتزامات ومصاريف اخرى ..
يمكن انا مستوره عن غيري الحمد لله بس غيري مش قادر يمشي.
نسرق يامصر عشان ترتاحي
البلاء والجشع كتر اوي اوي ربنا يلطف

[الأميرة رودي]

كل سنه وانتى طيبه يا مدونتى
^^ كل سنه والمنتدى الجميل ده بكل اعضاؤه بخير وسعاده.
غيبت فتره ورجعت اعايدكم بالشهر الكريم.
بعودة الأيام

[الأميرة رودي]

ياااه على ذكرياتنا ف المنتدى ده وخصوصا المرتبطة بالشهر الفضيل.
سهرات رمضان ومسابقات وجوايز بالهبل كنا بنديها للناس كده ونضحك ع الاداره .
لو مفرحناش ف شهر زي ده واستعبطنا عليهم هنفرح امتى يعني.كا
أجمل مافيها اللمه والضحك والسهر لحد السحور.
كتير اوي م الأعضاء كانو بيشاركو ويبقى الموضوع واقف فيه عدد مش قليل من الأعضاء والزوار.
ناس منهم مشيو وسابو المنتدى بس يابو كمان ذكريات حلوة.. فاكراهم بالخير دايما.
وناس منهم لسه موجودين ويارب دايما كده.
الحاله النفسيه والمود عموما ايامها كان مشجع على عمل سهره يوميه وكان فيه طولت بال وتحفيز م الكل
الوقتى الوضع اتغير تماما بالنسبة لي.
بس لسه بحب المكان وبحب اللى فيه كلهم حتى اللى غابو وسابونا لهم فى قلوبنا كل الحب وكل الذكريات الجميله والدعاء ليهم بالتوفيق والسداد ف حياتهم.

#ياريتها_ترجع_ايام_زمان

[الأميرة رودي]

الحمد لله حمدا تطيب به الحياه

[الأميرة رودي]

الساعه 12
جيت اقول لنفسي ولمدونتي كل سنه واحنا طيبين.
ماينفعش ابدا سنه جديده من عمري من غير ماابدأها مع مدونتي زي مااتعودت.
دي السنه ال 6 ليا ف المنتدي الجميل ده .
وبرغم كل شئ له مكانه ف قلبي وقضيت فيه أيام مش هتتنسي مع صحبه جميله ومحترمه أكن لهم كل التقدير واتذكرهم دائما بالخير.
كل سنه وانتى طيبة مدونتي الغاليه على قلبي

[الأميرة رودي]

اللون الاسود يجنن اقسم بالله
المنتدى وحشنى بالناس الحلوه الل فيها