خفايا الروح

[غريـب ألأطـوآر]

جيت احكى مقطع من حدوتة
كلمتين زمان قولتهم
جماعة منهم صدقونى
وجماعة منهم ببساطة زلونى
وجماعة تانية عنفونى
الاولانى عنده بصيرة
والتانى من غير ما يزعل عنده زتونة
اما التالت فللاسف هو فجلة او كمونة
لا كنت ف يوم اخوانى ولا لبرالى ولا يسارى ولا حتى صومالى
والله يا ناس انا مصرى كان كل همى دمى مستقبلى مستقبل ولادى واخواتى
ماهى الناس انواع اختلافات ثقافات وكله لمصلحته هات هات
بس الحمد لله نعمة من ربنا مصلحتى كانت لا منصب ف وزارة
ولا شقة ف عمارة ولا ابويا ظابط وبمضيله استمارة
مصلحتى كانت وطن هيا بصيرة اللى بيها بتعرف الاسود من الرمادى
وادى الايام بتفوت وتعدى وتمر بسكوت
فهمتو حاجه طب نقول كمان
عملو قناة وعلاقات خارجية وهرى كتير مفاده الوطن بيقوم
عومو الجنيه خد غطس مطلعلوش حس
ابو جنيه بقا بخمسة جنيه
اللى كان وسط بقا تحت ويادوب بيعيش
واللى كان تحت هوبا سكوت مطلعلوش صوت راح فين بيموت
كلامى ده يمكن مش مفهوم بس اشك
ده حتى العقل زينة ف البترينة
وادى مصر شيفينها
ناس بتهاجر وتموت
وناس على لقمة العيش ومبتجيش
وتبص ف التلفزيون تلاقى مارينا وشرم واعلانات قرى ومنتجعات
وفاصل ونواصل
تلاقى اتبرع بجنيه وصندوق وتنط لفوق
تنزل ما تفوق مالك مش شايف
طب حاسس طب شامم
طب ايه مالك فيك ايه
يخرب بيتك مبتفهمش
بصو اللى يفوق يفوق
واللى عايش ف البرقوق خليه برقوق
اصل العمر مش بعزقا
اتعب نفسى ولمين لناس مبتقولش امين
هقولها تانى انا مش اخوانى
ولا انت عشان عقلك واقف
مبتفكرش
فتقول ده ضدى ده اخوانى خاين وعميل
مش معنى انى طريقى يمين
اكون خاين او عميل او اخوانى او ارهابى
لا بص كويس انا يمين طريقى يمين والله يمين
وانت اللى شمال طريق وعقل افعال وكلام
مش شايف حق ولا بتنجان
يلا سلام