بليز عاوزة حد يفكر معايا بصوت عالى

[rorocat2005]

أنا من كتر حبى فى المنتدى اشتركت فيه حسيت انى وحيدة ومحتاجة حد يسمعنى وزى ماقلت يفكر معايا بصوت عالى الموضوع بأختصار انى فى مشكلة وارجو من اخواتى فى المنتدى يساعدونى بارائهم واقتراحاتهم ليا الموضوع انى حبيت انسان هوة اخو اعزصديقة ليا من ايام الكلية هوة حد متدين قوى عارف ربنا بيصلى الفرض بفرضه اعجب بيا وانا كذلك وانقلب الاعجاب لحب متبادل ولانو انسان دوغرى جدا بعد 4شهور من الشعور الجميل دة قالى انا لازم اتقدم رسمى لان اى حب بدون ارتباط رسمى ميبقاش حب المهم هوة بيشتغل فى شركة محترمة فى دبى وعنده كل امور الزواج الحمدلله يعنى ممكن نتجوز فى اقل من سنة لحد كدة مفيش مشاكل اسمعوا بقا اللى جاى هوة بس العقبه الوحيدة اللى قدامى عشان اصارح اهلى اننو معهدفنى تجارى وانا ليسانس حقوق طيب لووحدة مكانى مش ممكن اهلها يرفضوة عشان كدة زائد ان كل صدقائى بيقولوا دةحب محكوم عليه بالفشل لازم يكون اعلى منى اوزيى مش العكس حد يدلنى الله يكرمكم انا كل يوم بمووووووت لمابتخيل القصة دى انتهت محدش يبخل عليا بالردود بليز:052:

[مى الشقيه]

ربنا يوفقكم يارب وتقدرو تتوجو قصه الحب ديه بالزواج ان شاء الله

هو الموضوع ده بيكون عقبه عند معظم الناس

ووللاسف بينسو ان الهدف منه هو ان يكون في تفاهم بين الطرفين وكمان تقارب فى درجه الثقافه وطريقه التفكير بحيث مثلا متكونيش انتى بتتكلمى فى موضوع معين وهو مش فاهم انتى بتتكلمى عن ايه

بس انا شايفه ان مدام فى تفاهم بينكم وفى حب كمان يبقى مفيش اى مشكله

وبعدين موضوع انه معهد وانتى كليه ده اعتقد انه مفهوش اى مشكله مش فرق كبير يعنى

والاهم انك بتحبيه وانه انسان مناسب ليكى


بس ده بيتوقف على قبول او رفض اهلك بس بردو انتى هتقدرى تقنعيهم ان شاء الله


وربنا يكرمكم وتقدرو تكملو حياتكم مع بعض ان شاء الله

[منال ابوالوفا]

فعلا التفاهم هو اهم شئ شئ في اي علاقة حب بين الطرفين مش عايزة اقولك تني انا كمان ممكن اكون واقعة في نفس المشكلة بس بصراحة فوجئت بحديث مع ماما بسألها عن واحدة صاحبتي حصل معاها كده ردت على رد كويس وعجبني ان التهم والقبول بين الطرفين اهم شئ في الحياه واهم شئ في اي علاقة دائمة وسعيدة
يارب نحقق كل امانينا وناخد كل اللى احنا عايزينه من الدنيا
ربنا يوفقك

[لوليتا المصريه]

لالالالالالا حرام عليكى فيه ايه يابنتى انتى محسسانى انه مش متعلم خالص
بصى يا قمر والله دة عمره ما كان عيب فيه خالص والله هو متدين وانسان محترم وظروفه الاجتماعيه كويسه وواضح انه شاريكى ومالوعش معاكى بل بالعكس دة خد الموضوع بجد ودغرى وقال انه لازم يتقدم عشان تبقو فى النور والله النوعيه دى من الشباب قليله يابنتى يعنى اتمسكى بيه والله بس قبل اى حاجة لازم تقنعى اهلك بالنقطة دى لان فى الاول وفى الاخر الرأى ليهم وبعده رأيك يعنى لازم هما يتمسكو بيه زى مانتى متمسكه بيه ويارب يارب يارب يكرمك فيه والله والله لو ليكى نصيب فيه هتشوفيه هتشوفيه بدون تفكير ولازم طبعا الاهل يبقو موافقين لان الجواز يابنتى عمره ماكان واحد وواحدة بيحبو بعض لا دة بردو عيلتين بيتناسبو يعنى لازم يبقو مقتنعين ببعض فهمانى وربنا يوفقك

اختك
لوليتاااااااااا

[امير العذاب]

السلام عليكم
الاخت الكريمه rorocat20005 كلامك كله كويس وجميل وانا شايف ان الاختلاف الاجتماعى بين الطرفين مش مشكله لو كان بيهم تفاهم واكرر لو كان بينهم تفاهم انا عايزك قبل ما تقنعى اهلك تفكرى بشكل عقلانى وبعيد عن المشاعر ((لان واضح انك بتحيه قوى )) انا عايزك تشوفى هل فعلا ممكن الحياه تستمر ما بينكم هل وانته عندكم 50 سنه هتبقوا فاهمين بعض ولا لآ
لو لقيتى ان ده ممكن خلاص يبقى حاولى مع اهلك وكمان ابشرك واقولك ان لو ربنا رايد انكم تكونوا لبعض لا يمكن حد يبعدكم عن بعض لكن لو ربنا اراد العكس فلن تكونا لبعض مهما فعلتم
سيها لله ((واذا اردت شئ بشده فاطلق سراحه فان عاد اليك فهو ملك لك للابد وان لم يعد فهو لم يكن لك من البدايه))

[محطات الرحيل]

اتمنى ان اوضح لكي ايجابيات هذا الموضوع وسلبياته

اختي الغاليه

انا من الخليج العربي واحب ان ابين لكي بان الزواج لايعرف بكالوريوس او معهد وانما الزواج حب واحساس صادق المشاعر
ويجب ان تكون العلاقه الزوجيه مبنيه ع هذا الاساس
الرجل اللذي تقدم لكي يعيش في دبي وهي من اشهر عواصم العالم بالدخل المادي وهذا ايجابي وسوف تعيشين حياه مترفه ومليئه بالخير ان شاء الله واذا اصحابك مش مقتنعين بهذا الزوج فهذا غلط فادح وتخريب بيوت فالزواج حياه مشتركه بين الرجل والمراه وليسة بين الاصدقاء

اتمنى من كل قلبي اذا انتي راضيه عنه فتوكلي على الله وعيشي حياه جميله وسعيده
للملاحظه معهدفنى في دول الخليج لهو سيطره كامله ومنصب قوي لقلة الشهاداة العلميه في الخليج

اتمنى لكي التوفيق

[سمسمتى]

اختى انا مقدرة جدا اللى انتى فيه
لان كان ليه تجربة مشابهة
طبعا مع اختلاف التفاصيل
والحمد لله ربنا وفقنا واتجوزنا وعندنا ولد مالى دنيتنا
فنصيحتى ليكى لو انتى بتحبيه وحاسة ان هوه ده اللى هيقدر يسعدك اوعى تترددى لحظة انك تقفى جنبه وتساعديه انه يكون مقبول من اهلك
لان ببساطة ممكن يكون فيه شخص معاه شهادة زيك ويمكن احسن منك بس ميقدرش يصونك ويصون بيته ولازم اهلك يعرفوا كده كويس
اتمسكى بيه لان الحب الحقيقى مش بنصادفه كتير فى حياتنا واتمنى لكى التوفيق

[Şα3Đ..♥]

اهلا بيكي يا اخت رورو
احب ارحب بيكي اولا
ثانيا انا مش شايف اي مشاكل في انه معهد
وانتي كليه
وبما انك حبتيه
وقصه حب ناجحه وجميله زي دي
مينفعش سبب تافه زي ده
يوقفها
واللي بيضحك عليكي وبتقولي انه اصحابك اللي بيقولولك ان دي قصه حب محكوم عليها بالفشل
دول مش اصدقاء
وصدقيني لازم تكملو
لان حرام وصعب اصلا انك تفقدي حد بيحبك
وبتحبيه
وان شاء الله يكمل مشواره
واهلك ان شاء الله هيرحبو بكده
لما يلاقوه ناجح
وتقبلي مروري

[GLAMOROUS]

و الله انا كنت هقول الكلمتين قلي

اتقالو بس طبعا انا شايف انه طالما متدين و جد زي منتي

بتقولي يبقي بلاش تضيعيه من ايدك

مينقصوش ابدا كونه معهد ممكن تكون ثقته

تتعدي شخص تعليمه اكاديمي

استخيري ربنا و فكري براحة

لانك اكتر حد ممكن يحكم علي الموضوع بشكل صحيح

اتمني لكي التوفيق

و لكي تحياتي

[الضحية البريئة]

حبيبتي الشهادة مش كل شي في
حياة الانسان
اتكلي وصلى ركعتين استخارة الى الله ثم اعلمي اهلك لعل الله يكتب لك
السعادة لك وله
ويجمع شملكم بالحلال
والمكتوب عالجبين لازم تشوفه العين واذا مكتوبلك غير تزوجيه حتى
لو بعد 120 سنه
أطلبي منه ان يطلب اهلك ويتكل على الله ما ادراك
لعل يكون الخير لك وله
لا تحكمي على اهلك قبل ان تسمعي رايهم تحياتي