نتيجة مسابقة حلم الشيطان ,,

[SiLver Spectra]

معلش لو كانت النتيجة اتأخرت شوية
أول حاجة خلونا نبدأ بالحل سريعا

رابط المسابقة
هنا

المسابقة غامضة شوية لكن منطقية
و حلها ممتع

القصة و ما فيها هو انك بتحاول تخرج بطل القصة من السجن المركزي الي في الجزيرة المهجورة

------------------

في البداية هتلاقي المكان كلو مظلم
و مش هتلاقي غير غرفة التحكم ( control room )
هتدخلها و هتدوس على الزرار الأحمر فالكهربه هتشتغل و الدنيا هتنور
لما تطلع برا الغرفة هتلاحظ ان الكمبيوتر محاصر ببحديد و هيقولك روح شغل الزر التاني الي في غرفة ( control room )
و هنا في ناس واجهة صعوبة ((يقولك الزر مش بيعمل حاجة))
مع ان واضح في المذكرات و بالتحديد الصفحة 6 زي الصورة



يبقى كل الي هتعمله هو انك هتضغط على الزرار دا



من تلت الى اربع ضغطات بين كل ضغطة و التانية 4 ثواني
المشكلة في انك لازم تظبطها على اربع ثواني بالظبط
انا مش عاملها بالملي بس مخليها قبل اربع ثواني بسنة صغيره و بعدها كمان بسنة
كل الي هتعمله هو انك هتعد او هتشغل ساعة ايقاف و كل اربع ثواني تعدي تدوس و تفضل شغال لغايه ما تظبط معاك و الزر ينور



و يطلعلك مشهد تحرك الحاجز الحديدي من الكمبيوتر



هتفتح الكمبيوتر هتلاقيه بيقولك ان السجن معمول بأربع انظمة و كل نظام مسؤول عن فتح ابواب و له كود من تلت حروف
و هيطلب منك تدخل كود منهم

هترجع و هتستكمل قراءة المذكرات تاني



اسم المكان الي هما متواجدين فيه موجود في مقدمة اللعبة و حتى أنا معدل فيها مخصوص قبل ما كنت أنزلها عشان أخلي الاسم بالأصفر ((الكلمة الوحيدة الي بالأصفر في المقدمة)) , زي ما تقولوا صعبتوا عليه و قولت أخليها باينه
فطبعا أي حد هيفتح اللعبة من تاني بعد ما يشوف الكمبيوتر الي بيطلب باس من تلت حروف هيلاحظها في وشه



يبقى كدا أول باس هو
sst
هتدخله في الكمبيوتر هيفتحلك النظام الأخضر و هتلاقي عشر أبواب اتفتحت

---------------

هتلاحظ ان في كل غرفة فيها ساعة , العقرب الصغير واقف على ساعة معينة و بتختلف من غرفة للتانية
و هتلاحظ ان في غرفة الاستراحة في لغز ساعة و بيطلب منك تدخل 4 ارقام للساعات
فواضح جدا ان لها علاقة بالساعات الي في الغرف

يبقى بعد ما هتدخل الغرف و تاخد نظره عليها هتستكمل قراءة المذكرات عشان تفهم اكثر و تحل اللغز

هتلاقي في المذكرات رغي كتير , المفيد منه هو انه قالك ان كل واحد أخد غرفة يبيت فيها و حط متعلقاته الي بتعبر عن شخصيته فيها

و قاعد يشرحلك في بعض الشخصيات و قالك ميول بعضهم
و في النهاية ادالك اسماء الاشخاص بالترتيب الي حل لغز الساعة موجود في غرفهم



الترتيب كان (أنا) صاحب المذكرات يعني ((الي ذكر انه بيحب الأفلام)) و دا معناها ان غرفته هتكون 205 أو 207 ((حسب البوسترات))
يبقى الاحتمال لأول رقم هيكون حسب الساعات الي في الغرفتين اما 2 أو 3

الرقم التاني كان (لفريد) و فريد قالك ان ماكنش له في حاجة
دا هنسيبه للآخر

الرقم التالت كان (لكريم) و كريم قالك انه فنان
عندك في اتنين رسامين
غرفة 109 و 110
الساعات فيها
10 و 11

الرقم الرابع كان (لسالم) و قالك انه متدين
مافيش غير غرفة واحدة فيها خلفية مكتوب عليها (الله)
و هي غرفة 208
الساعة فيها 9

نرجع للرقم التاني و الي هنستنتجه بمبدأ الاستبعاد
بما أن (فريد) مالوش في حاجه و مش حط حاجه في غرفته
فمش هتلاقي غير غرفتين , واحده محروقة و قالك في القصة انها بتاعت شخص تاني
و واحده مافيش فيها غير شخبطة الي هي 211
و الساعة فيها 7

يبقى هتروح لغرفة الاستراحة (restroom)
و هتبدأ تنظم احتمالاتك و تدخلها في الساعة



هتعمل 4 احتمالات بس و هيطلع معاك الباس بالترتيب
2
7
10
9

هتظهرلك صورة فجأة مع أغنية (لزوم الخضة )



هتلاحظ كلمة you
كلمة من تلت حروف ,,هتروح تدخلها في الكمبيوتر
و هيفتحلك النظام التاني (الأحمر)
و معاها هتلاقي عشر أبواب تانيين اتفتحوا

-----------------------

النظام الأحمر هو أسهلهم
الأول برضو هتاخد بصة عالسريع على الغرف عشان تفهم نظامها
هتلاقي في كل غرفة مكتوب حرفين
و بعدين هترجع للمذكرات و تستكملها



الحرف الأول : الغرفة الي بجانب سلم من الغرف المضيئة بالاحمر هتبقى
204 و فيها حرفين و هما A و S

الحرف الثاني : غرفة بجانب الغرفة المحترقة
الغرفة المحروقة هي 106
الي جنبها حمرا هي 107
فيها حرفين G و K

الحرف الثالث : غرفة بجانبها شبح عند اطفاء الاضاءة
هتروح زي الشاطر و هتطفي النور و ترجع للمكان الظلمة و تبص على الأبواب
هتلاقي غرفة جنبها شبح زي الصورة



الغرفة هي 111
هترجع تنور الاضاءة و تفعل زرار التحكم من جديد و تدخل الباس YOU و بعدين هتدخل الغرفة 111
هتلاقي فيها حرفين C و W

هتروح للكمبيوتر و هتعمل احتمالاتك
بالظبط هما 8 احتمالات
المهم تنظم حلك بورقة و قلم عشان مش تضيع وقتك
و هتلاقي الاحتمال الصحيح هو
AKW


هيفتحلك بعدها النظام الأزرق
يبقى كدا فاضلك آخر نظام (بتاع باب الخروج)

______________

في النظام الأزرق هو مش مديك تفاصيل في المذكرات و ساب العملية غامضة
ذكر بس ان في كل غرفة في كلمة , و الجملة هي مفتاح الخروج



طبعا الجو فيه شوية رعب ,,يعني حاجات بتطلع فجاة و اصوات و اضاءة بتخفت عشان اشتت انتباهك
و هوريكم دلوقتي بالصور الكلمة الي في كل غرفة




حولها



حسب



عدد



تسلسل



السنة



الأيام




إلى



الأبجدية



في



حروف

في جو اللعبة بتبقى اصعب شوية عشان المؤثرات
ممكن كلمة مش تعرف تجيبها بس تقدر تعرفها بالتوقع او بالفهم لما هتيجي ترتبهم
لو قاعدت تجيبهم يمين في شمال مش هتطلع معاك غير عبارة
(( عدد الأيام في السنة رتبهم إلى حروف حسب تسلسل الابجدية))
أو
(( عدد الأيام في السنة رتبهم حسب تسلسل الأبجدية إلى حروف))

(( حد كان باعت مخصوص رسالة حل تانيه عشان يقولي ان الجملة ممكن تترتب بشكل مختلف ,,دا باعتبار ان الي بيشوف الحل دا كمبيوتر و مش بيفهم ههههه ))

كام عدد أيام السنة ؟
365
شوف كل رقم بيوازيه حرف ايه في الابجدية الانجليزية
هتبقى
CFE
هتدخله في الكمبيوتر و هيتفحلك النظام الأصفر و الأخير الي فيه باب الخروج
هتخرج منه و هيقولك مبروك عليك انهاء اللعبة

==============

و دلوقتي هنيجي لعرض أسماء الفائزين
العرض حسب أسبقية الحل

الأول : أحضان الحبايب
الثاني : ميشو
الثالث : محمد علاء
الرابع : قاسم
الخامس : آركو بالينو
السادس : محمود محي
السابع : عاشقة ذكر الله
الثامن : أحلى سمايل
التاسع : حافظة القرآن
العاشر : رنين
الحادي عشر : حبر القمر
الثاني عشر : لوست بيرل
الثالث عشر : دريم
الرابع عشر : ملاك
الخامس عشر : ساد آيز
السادس عشر : حنون
السابع عشر : سيرين
الثامن عشر : تيتشر نفشه
التاسع عشر : مشتاقة للجنة
العشرين : ميس كيوت
الحادي و العشرين : ساد برينس
الثاني و العشرين : أمير الاحزان

نيجي بقى للجوائز
300 مشاركة لكل فائز
و 4 نجوم سيلفرية
و اسرع تلاته حلوا هياخدوا 100 مشاركة زيادة

+ وسام لكل واحد
بس هنميز في الأوسمة بين الذهبي و الأحمر
الذهبي هو وسام الشخص الصبور
و الأحمر هو وسام الشيطان

مين الشخص الصبور و مين الشيطان ؟
الشخص الصبور هو الي فتح اللعبة في البداية و ساب الشاشة بتاعت press to start
لمدة دقيقتين تقريبا بدون ما يضغط
هتظهرلك عبارة أنت شخص صبور و هيديك مساعدة ازاي تحول الارقام لحروف ابجدية ( تفيدك في حل اللغز الأخير)

و الناس دي هي (حسب اسبقية الحل)
رنين
لوست بيرل
دريم
سيرين
مشتاقة للجنة
ميس كيوت
((ستة من 22))
دول الملايكه ( كلهم بنات) ,,خلقهم واسع ما شاء الله,, عرفتوا بيربوا العيال ازاي ؟ هههههه

ليهم الوسام الذهبي



و الباقي شياطين
ليهم الوسام الأحمر




و بس كدا
نقول مبروك للفائزين

-----------------

عيوب في اللعبة :
1) كان في خطأ في زر و تم تصحيحه لاحقا و اعادة رفع اللعبة من جديد ((و مش فرقت كتير لان ناس كانت بعتت حلها عادي , الخطأ بالتحديد كان لما تطفي النور عشان تشوف الشبح الي واقف جنب الغرفة, بترجع بتلائيك مش عارف تولعه تاني و دا ممكن يخليك تعيد تشغيل اللعبة من جديد,,و السبب كان في ان الزرار موجود بس مش في مكانه الصحيح))

2) الخطأ الثاني كان في الصوت الي بيطلع بعد ال error , الي هو صوت الحروف و هي بتتكتب على الكمبيوتر في حين الكلمه بتكون ثابتة ( مش فارقه بس دي ممكن مش تديك الاوسكار )

3) الخطأ الثالث و هو في القصة
بداية القصة كانت بتوحي بان البطل وحيد , في حين ان الرحلة في المذكرات كان فيها عشر اشخاص أو تسعة مش متذكر
و دا طبعا بسبب اني بكتب القصة بشكل ارتجالي , المقدمة اتعملت أول حاجه قبل نزول اللعبة بأسبوع , أما المذكرة فاتكتبت في نفس يوم نزول اللعبة
مجرد اني بربط الألغاز بأي أحداث مش أكثر
و كمان كان في خطأ أو خطئين كيبورديين في المذكرات نتيجة السرعة في الكتابة

و العيوب دي مش اثرت في اللعبة عامة

--------------


و قبل ما أنهي , حابب بس اوضح ان المسابقات دي بيبذل فيها مجهود كبير و معقد عشان انت تتسلى و أظن دا الهدف الحقيقي من المنتدى هو انك تقضي وقت ترفيهي ممتع


و انتظرونا يوم الخميس بدون تفاصيل مع أول يوم عطلة + عيد ميلاد المنتدى + وقفة الثورة

[jasmean]

المشكله اني مكنتش عرفه اعد هههههه
لعبه حلوه وكانت صعبه اوي الصراحه
مبروك للكل
تسلم عـ المجهود

[Magic Dreams]

والله لعبه روعه وانا فعلا استمتعت كتير اوى تسلم عايزين حاجه تانى بقى

[توحد ارواح]

مبارك عليكم يا جماعه

بجد برااااااااااافو

عقبال المره الجايه و اشترك بقا

شكرا جدا اخى مجهود جميل مميز

دمتم بحفظ الله

[حلم عمري]

الف مبروووووووووووك للفائزين
بالتوفيق ان شاء الله

[مِسكُ الشَهادة]

الف الف مليون مبروك للفائزين ...
جهد راقي يا أخ طارق ربنا يكرمك
ويحفظك ...
دوام التميز يا شباب
ودوام الرقي بمنتدانا المتألق
دمتم بألف خير

[حبرالقمر]

هههههههههههههههه حقيقي استمتعت بجد وفكتلي مود والحمدلله انا عمر مكان من صفاتي الصبر ابدا والا كان حيجيلي الوسام الذهبي حعيط لاني مش بحب غير النبيتي الحمدلله اني مش صبوره مجهود جميل ياطارق بالتوفيق ديما تقبل م روري اختك حبــر القمــر

[ساحر الأحزان]

واخيرا ظهر الحق وكشف حلم الشيطان

يا بخت البنات بسم الله ما شاء الله رزقهم واسع

الاكثرية بنات الى اشتركت والشباب ضاعت وسطيهم

فالف الف مبروك ليهم

بالفوز فى تلك المسابقة القيمة والممتعة دى

شغل عالى يا دكتور

وبانتظار الاحتفالية الكبرى فى المنتدى

متجمعين على الوفاق دوما

تحياتى للجميع

[Lost Pearl]

هههههههههه الله

حلو حوار الملايكة ده

تسلم يا طارق و بجد من احلي المسابقات و استمتعت بيها حقا

و ف انتظار يوم الخميس بقي

[Mo chahin]

لا بجد يا طارق لعبه ممتازة جدا ,,

وانا وصلت لنقطه معينه ومكملتش بقى ,,

بس فى ناس كتير طلعت فكيكه اهى وحلت ما شاء الله ,,

عندنا عباقره يا طارق والله ههههه

موفق بقى وفى انتظار اللى جاى ,,