يا ترى الدور على مين ؟

[Mo chahin]

بسم الله الرحمن الرحيم ..


بدون مقـــدمات ..

يمكن فكرت كتير قبل ماكتب الكلام دا .. لكن قعدت مع نفسى شويه ..

وحسبتها بالعقل .. لاقيت ان فى حاجه بنا تايهه وضايعه ..

من فترة كانت فى عضوه هنا اسمها .. أمه الله .. اتمنى تكونوا فاكرينها ..

ومن قريب كان وسطينا .. محمد كينج ليون ..

الاتنين اتخطفوا من وسطينا .. واتمنينا يكونوا موجودين ..

عشان لو حد مزعلهم .. يلحق يصالحهم ..

وبدل ما نتعظ ونحب ونسامح بعض .. بندور ازاى نيجي ونقضى على بعض ..

وعجبــــــــــــي !

منتظرين ايه تانى ؟ .. لما حد مننا يروح هو كمان ؟

والمرادى محدش عارف الدور على مين !

ليه مبناخدش بالنا من الشىء لما يكون قدامنا ..

ونرجع ندور عليه لما يتوه ويضيع منا ؟

يمكن حد يخد الموضوع بسخريه او بتريقه ..

وهنا مش هيكون تقليل منى قد ما هيكون تقليل من نفسه ..

لان الموضوع مش محتاج سخريه ..

الموضوع محتاج نفس نقيه وقلب طاهر ومساحه تسامح واخلاص ووفاء ..

الموضوع محتاج نظره حب خاليه من ذره كُره ..

مش اقولك بحبك .. ومن وراك ألعنك !!!

فكرتوا وانتوا ماشيين مع نفسكم كده . انكم تسألوا نفسكم ..

مين زعلان منى ؟ .. او انا زعلت مين ؟ ..

ولا هى كرامتكم ناقحه عليكم ؟ ..

طب لو كرامتكم ناقحه عليكم وصعبانه عليكم نفسكم اوى كده ..

ليه مصعبتش عليكم نفسكم وانتوا بتغلطوا فى غيركم ؟ .. يا ســـلام !!

ولا هو انت عندك عزه نفس .. وغيرك عنده عز الدخيله ؟

وعجبـــــــــــــي !

نهــايته ..

بتيجي عليا اوقات وببقى ممكن اترجى حد عشان ميزعلش منى ..

تفتكروا ليه بترجاه ؟ .. مع انى ممكن يبقى عندى كبرياء وعزه نفس ..

اكتر من اى حد فيكم ..

لكن تعرفوا ليه ؟

عشان بحاول افتح صفحه جديده مع المولى عز وجل ..

عشان اطهر نفسى من ذنوب ارتكبتها .. عشان اكسبه مخسروش ..

عشان يدعيلى .. مش يدعي عليا ..

انهارده احنا مع بعض .. محدش عارف بكرة هنكون فين ..

انهارده معانا فرصه نصلح بيها اللى انكسر ..

قبل مايجي علينا الوقت اللى نندم فيه فى وقت مش هيفيد فيه الندم ..

لو مزعل حد روح صالحه .. ولو زعلان انت من حد .. حاول تسامحه ..

دا حتى من اجمل الاحاسيس انك تعفى وانت قادر .. ربنا قال كده ..

ارضى ربك وغيرك قبل ما ترضى نفسك الاول ..

اتقى الله فى كل اللى حواليك .. وطهر قلبك وصفى نيتك ..

عشان ربنا ينورلك طريقك ويحفظك ويحققلك امنياتك ..

ممكن حد يقول ان دا مجرد كلام والسلام .. ماشى خليني معاك للنهايه ..

طب لما حد فينا يتخطف فى غمضه عين .. هيبقى برده مجرد كلام ؟

بلاش دى ..

لما اموت انا ان شاء الله .. هيبقى كلام برده ؟ .. ولا هتقولوا ايه ؟

عارفين هتقولوا ايه ؟

ولا حاجه ..

هتحطوا ايدكم على خدكم .. وتقولوا ياريت اللى جرى ما كان ..

زى ماتعودنا ..

وياترى الدور على مين ؟ .. محدش عارف ..

وعجبــــــــــي !

[نجم وزهره ومسافات فراق]

اخي الكريم
الموت قدر
كما الحياة قدر
ولكن
علينا يا اخي عمل الخير والاستعداد لهذا اليوم بكل رضا ورغبه وقناعه
هذه هي الحياه يا اخي الطيب
نلتقي
نفترق
نحزن
نضحك
متقلبات وعواصف مستمره
ولكن
بالعمل الطيب لوجه الله تكون ناجحه
اشكرك على موضوعك الروحاني الطيب
والفاتحه على ارواح الراحلين الافاضل
دمت بكل الخير

[تيتشر نفشه ツ]

والله م في احلى م التساااااااااااامح
حلو كلام حضرتك

تسلم يارب عليه
بالتوفيق دايما

[طِيشْ !]

كلام جميل منك يا محمد ..~

أكيد طبعا عندك حق

و التسامح شيء مهم جدا

لكن النفوس الأيام دي مش زي قبل كدآ

و القلوب مبقتش بيضة زي الأول

يعني احنا لما نزعل من بعض دايما بناخد للطرف التاني

النية السيئة و نفترض أسوأ الأشياء وبنشحن نفسنا

و دا طبعا خطأ كبير

و الإنسان بردو لو غلط مبقاش حتى بيحاول يعتذر بطريقة غير مباشرة

شيء مؤسف

جميلة كلماتك أخي

أتمنى تؤخذ بعين الإعتبار

ودي ووردي

[جبل عالي]

مش لاقية اي كلام يامحمد غير

ربنا يتم عليك نعمة الرضا والسلام النفسي

لأن كلامك وإقتناعك ده نعمة من ربنا ورضا

وفعلا كل اللي بتقوله صح ... بس زي مابقول

بننفعل وقتياً وبعدها يرجع الحال كالسابق حتى تأتينا

للأسف لحظة الندم ...... عن نفسي اللي حتى بيغلط في حقي

والله بسامح وكمان بطلب ماحد يزعل مني ولو على حساب تفسي

حساب نفسي مش كرامتي وعلى فكرة مش صعب نحافظ على كرامتنا

وفي نفس الوقت ماتخلي حد يزعل منك ولا يفتكر لك الا كل طيب


شكرا للحظتك التي شاركتنا بها بكل صدق

تحيتي وتقديري

[ساحر الأحزان]

الاعمار بيد الله عز وجل هو من يعلم اخرتنا وما بقى لنا من العمر وليس احد منا مخلد فليس مخلد الا الله عز وجل

فلننثر التسامح ولنتصافى ولننبذ التخاصم فلا شىء يبقى الا العمل والذكرى الطيبة التى جمعتنا

هى ايام وتمر علينا ونكون ماضى تطوى صفحاتة

فلنتذكر بعض بكل خير

على تلك الايام الخوالى

دعوة جميلة منك

دمت بكل خير

[الرحــاال المٌتَمرد]

دائماً أقول
أن هَذه الفَتره مِن حياتنا سوف تصبح مَرحله في ماضينا ,,
لنكون ذكرى طيبه في حياة الأخرين ,,
بعيداً عَن الموت والحياااه ,,

طَرح بــ نَبض هَذه الأٌمه لـ نَكٌن أكثر شموليه
فــ هَذا الوَطن يحتاج مِن أبناؤه التكاتٌف والإخلاص والوفاء
لبَعضهم ولأرضهم ,,

شٌكراً شاهينا ,,

[Mahmoud Mohie]

ليكن التسامح غايتنا دائماً
التسامح ليس ضعف ,, بل قوة وكبرياء..

فالقدر لا يستأذن قبل ان يدق الباب ..!
لنضع هذه النقطه نصب اعيننا جميعاً

راقى هو طرحك اخى شااهين
تسلم ..

[Arco Baleno]

فعلا الدور على مين الجواب مجهول لانه في علم الغيب التسامح والحب والموده والصفاء والنقاء اجمل الصفات
حتى الانسان لما يموت يكون تارك اثر طيب في القلوب
فعلا دا هو المفروض الي الجميع يعمله ويحسب حسابه
ويحاول يكسر كل حواجز الزعل ويرسم بسمه
يشيل جبال الحزن ويرسم بسمه
يعمل المستحيل من اجل ان يكون مبتسم ولطيف مع الجميع
لان الموت لا يستذن ولا ينتظر قبول فجاه تخطف الارواح
انا حقا دي اللحظه تخوفني كثييييييييييير
ويمكن عامله علامه جواتي مستحيل اي شي في الدنيا يشيلها وهو الخوف من النهائيه
لعشان كذا دوما اكون طيبه مع الكل
لان متاكده راح يجي يوم وتكون كل الايام دي ذكريات
اما يفرقنا موت او ظروف العلم عن الله بس الاهم
اننا نحاول نحافظ على كل الاخوه والصدقه بالحب والموده والتسامح
حقا موضوعك نال على اعجابي
وفيه كلمات موثرت اخرج الدمع من عيني
كم انت حقا مبدع اخي ميرو

[مشتاقه للجنه]

كلام مظبوط يا محمد
فاليوم أنا بينكم غدا يعلم الله اين أكون
والموت شئ متوقع فى أى لحظه ومش مهم سن
فكتير بنسمع عن شباب ماتوا موتة ربهم بدون مقدمات
فالنسارع الى الطيبات والاعمال الصالحه والتصالح مع أنفسنا
والتسامح مع الآخرين ولنعلم ان محدش واخد حاجه إلا عمله الطيب
شكراا أخى الفاضل على الموضوع القيم
ورحمك الله كنج أنت وأمة الله وجعل مثواكم الجنه
موفقين