الحلقة الثالثة من ( بهدوووء ) معانا ( Big Booss ) ( قلم الاعضاء )

[morshooo]

بسم الله الرحمن الرحيم

اهلا بيكم جميعا

والحلقة الثالثة من برنامجكم

( بهدوووووء )

البرنامج باختصار هيتم استضافة احد اعضاء المنتدى المميزين اصحاب النشاط

وهنخلية يقول رئية بصراحة فى ( قسم ) هو هيختار وطبعا القسم الى هيختارة

اكيد هيكون مميز فية وبيدخلة وهنحاول نعرف منة لو كان ( مشرف ) كان هيعمل اية

يمكن مشرفين الاقسام دى تاخد برئى ضيوفنا ويحاولو يطبقوها .

النهاردة الحلقة الثالثة

معانا / Big Booss




( اتعهد انا العضو ( BIG BOOSS ) ان اكون صريح امامكم ولا اضع امامى اى صداقات شخصية مع من اتواجد مكانهم وسوف اعبر عن ما بداخلى بكل صدق وسوف اتحمل مسئؤلية ما سوف اقولة ولا اقبل اى ضغوط من احد لكى يعدل من رئى الشخصى )

س / اهلا بيك فى برنامج ( بهدوووووووء ) ؟

اهلآ بيك يا احمد

س / طبعا انتا اقسمت وعارف ان البرنامج قائم على الصراحة ؟

الصراحه راحه

و بعدين انا بحب الصراحه جدا و بنبذ المجاملات

متخفيش مش هنقش راي او اغيره او اعمل حساب لحاجه

الا الحق فقط

س / هتختار قسم اية تقول رئيك فية ؟

قلم الاعضاء زى ما انت قولتى

بهزر

ههههههههه

س / طيب عايز اعرف رئيك الشخصى فى ( قلم الاعضاء ) ؟

هو قسم مهم جدا بيحمل بداخله ارقى ابداعات عقول وافكار

الاعضاء و وجهات نظرهم

وبيعتبر القسم الاول فى المنتدى

بصراحه لا غبار على القسم الان فى نشاطه و كتاباته

واجمل ما فيه ان المنقول ممنوع و دى مشكله اى قسم

وبتخلق نوع من العزوف عن القسم

س / اية عيوب القسم من وجهة نظرك الشخصية ؟

انا شايف شويه سلبيات مش عيوب هقولها

اولآ فيه نقطه سوداء هى عدم المساوه فى الكتابات

و كذا عضو اشتكى منها ان لو ادارى او مراقب كتب موضوع

حتى لو خارج فكره القسم او سياسى او بيعتبر خط احمر لا يمس

اما لو عضو تانى بيتنقل لقسم تانى او يتحذف

ثانيآ التواصل مع المشرفين صعب

دا فيهم مشرف مره زعقلى و قلى هو مفيش غيرى

ثالثآ فكره التقيم سابقآ كانت غير عادله اما الان فقد اصبحت اكثر عدلا

بعد التعديل

رابعا المواضيع المثبته تفتقد الى التنويع والتغير والافكار الجديده

بس مفيش حاجه تانى

س / البعض شايف ان قسم ( قلم الاعضاء ) خسر كتير بعد خروج ( قلم بلا حبر ) ؟

هو شخصيه غنى عن الوصف بصراحه خسر

وخسر بسكال رحيق الجنه

كلها عقول تستحق كل الاحترام والتقدير

س / مش شايف ان فى بعض الاوقات بعض المواضيع بتقلب لــ ( نقاش ) ؟ شايف ان القسم عادى لو حصل نقاش فية والا النقاش لة قسم معين ؟
اى موضوع بيتكتب معرض انه يتقلب نقاش لانه بيعبر عن وجهت نظر

فاكيد فيه معترضين و عادى جدا يتناقش فى قلم الاعضاء

اما قسم النقاش ففيه عزوف من الاعضاء عنه لانه بسبب بسيط

افتقر الى التميز و التطوير و نسج عنكبوت المنقول خيوطه عليه

س / شايف ان تكريمات المشرفين فعلا لمن يستحق فى القسم ؟

الاول كانت غير عادله بس بعد التعديل اصبح اكثر عدلآ

بس فيه ملحوظه لو فيه اتنين ليهم نشاط ملحوظ ايه المشكله يتكرموا

ليه لازم واحد بس يعنى

هى مش قاعده ولا روتين لازم نمشي عليه و منخلفوش

س / شايف قسم قلم الاعضاء ماشى كويس زى ما كان والا المستوى العام للقسم انخفض ؟

هو قسم شغال و تمام اوى بس الايام دى بيفتقر لجو التطوير

و التغير

اصل القسم لما يمشي على نمط واحد فتره طويله بيزرع الملل فى الاعضاء

دا مش انتقاد على فكره

س / انتا اقسمت على الصراحة عايزك تخرج مشرف من مشرفين القسم ليتم تعينك بدلا منة ؟ هتخرج مين ولية ؟ ممنوع الرد الدبلوماسى .

هههههههههههه ليه الاحراج دا يا مرشو

هخرج دكتور سما لانها اصبحت مشغوله جدا

و هخرج ساحر الاحزان لانه مشغول بالمراقب

و هتعين بدلهم هما الاتنين

و هنسيب Whisper words

لسبب واحد بس

لان عندها سرعه بديها توصل لعمق الموضوع والفكره

س / د. سما اعلنت انشغالها فعلا وانها بعيدة عن القسم بسبب الدراسة شايق ان يجب اخلائها من الاشراف ويتم اسناد الاشراف لشخص متفرغ والا الادارة تستنى ؟

لالالالالالالالالالالالالالا دكتور سما منقدرش نستغنى عنها طبعآ

ربنا يرجعها بالسلامه و هنستناها

على فكره هى مشرفه عسوله جدا فى تعاملها مع مشاكل القسم بصراحه ذوق واخلاق

لا توصف ولا تقارن مع احد

س / ساحر الاحزان كمراقب عام لية شايف انة اهمل القسم رغم تواجدة فى جميع المواضيع بالقسم ؟

حاسس ان الحمل عليه تقيل و هو شغال لوحده الى حد مآ فنظرة نظره تعاطف معاه مش نقد

هو مراقب منتشر فى اغلب الاقسام بصراحه و ردوده جميله و عاليه

س / لية ميزت اسماء عن ساحر مع ان الاتنين ادخل اى توبيك هتلاقيهم بيردو يعنى مجهود واحد ؟

مش تميز ولا نقص من احد

انا قولت اسماء بتتميز بميزه سرعه البديها

و مش قولت امجد فيه عيب او ينقصه كدا بالعكس امجد عشره على عشره فى ردوده

وربنا يوفقه

و بعدين مش كل العقليات واحد فى الفهم

يعنى ممكن اكتب موضوع مشتت شويه

فيه عضو بيوصل للفكره بسرعه

و فيه الى بيتشتت

و فيه الى بيوصل لنص الفكره

و فيه الى مش بيوصل خالص

ودى مشكله بتقع على عاتق الكاتب للاسف

س / شايف ان ممكن فعلا يتم تعينك مشرف لهذا القسم ؟

طارق رافض اتعين على القسم دا بالذات

مش عارف

علشان ارائى غريبه يمكن

س / يعنى اية ارائى غريبة ؟ تقصد ارائك من خلال مواضيعك فى القسم والا ارائك لدارة القسم ؟

لا ارائى من خلال مواضيعى

فيه ناس كتير بتنتقدها و بتعتبرها غريبه

و عايزينى ابيع دماغى

بس انا قولت كذا مره

دا اسلوبي و دى ثقافتى و دا تفكيرى و عمرى ما هغيرهم علشان حد

س / انتا قادر على ادارة القسم ؟


اكيد هو قسم مميز و سهل جدا مش كيمياء معقده تحتاج الى احتراف

س / اية اول قرار هتعلنة فى حالة حصولك على منصب مشرف قلم الاعضاء ؟

انتهاء عصر المجاملات و بدايه عصر جديد على القسم

وو ضع ضوابظ تطبق على الكبير قبل الصغير

س / لو حصل خلاف بينك وبين عضو بما انك مشرف القسم ؟ هتتصرف ازاى ؟

طبعى هشوف وجهت نظره و نظرى ونحاول نوافق الوجهتين

لو كان الحق عنده ساقنعه وان كان عندى ساعتذر له

ولن اترك عضو مصاب بالحزن من خلاف حدث مع مشرف القسم

س / مين العضو الى شاكك ان مواضيعه فعلا مش بقلمة ؟ تقدر تعلن عن اسم عضو او اكثر ؟

لا اى عضو بيكتب موضوع منسوخ بيبان فى البحث

و على فكره ممكن العضو يكتب موضوع بقلمه بس فكرته مسروقه

و فيه عضو بيكتب بقلمه و بيفتكر الفكره من دماغه برضو

و دا هو الاستاذ

و فيه عضو بيكون كوكتيل من الاتنين مره كدا و مره كدا

و على فكره العضو الى ميعرفش يعبر عن نفسه ويكتب

يساوى صفر بصراحه دا من رايي

س / ترشح مين يكون مشرف للقسم من الاعضاء ؟

فيه كتير زى العضوه طيش ردودها جميله جدا و مثقفه

و جراح امه و نجم و زهره و مسافات فراق برضو ردودهم قيمه

و لبيقه ومثقفه وبتناقش فكره الموضوع

س / مع احترامى للاعضاء الى زكرتهم لتولى اشراف القسم مش شايف انهم مش افضل الاعضاء بالقسم ؟

بص يا احمد

فيه اعضاء فى القسم بترد باهته لا تدل على شىء و دا مينفعش يكون مشرف

و فيه اعضاء بترد ردود مفيده بلباقه ثقافيه حتى لو كانت قليله ولكنها اكثر افاده من رايي

و كل انسان وله وجهت نظر

وانا ذكرت اعضاء على وجه المثال لا الحصر


س / لو قولتلك قول نصيحة لمشرفين القسم عشان ياخدو بالهم منها ؟

مممممممممم

خلوا بالكم من الاعضاء الجدد فهم موهوبون بحق

و فيم اقلام جميله جدا و مثقفه جديره بالاهتمام


س / اخيرا تحب تقول اية لقسم قلم الاعضاء واعضاء المنتدى ؟


ربنا يخليكم ليا يا مشرفي القسم

و يارب ما تزعلوا من كلامى

و انتم افضل مشرفى قسم فى المنتدى

و اعضاء بنات مصر

كل سنه وانتم طيبين

و عايز اقول كلمه للاداره

( فيه علاقه بتربط اى عضو بالكيان دا علاقه ملمسه و حقيقيه تقوم على الحب و الود و الوصال فحافظوا عليها باهتمامكم و بحكمتك و لا تقطعوها بسلبيتكم و تسلطكم )

و شكرا يا ابو حميد

طبعا بعد كلام الضيف

كان لازم ابعت كل السلبيات دى

لمشرفى القسم .

ودلوقتى تعالو نشوف هما قالو اية .

ساحر الاحزان

س / صحيح لو ادارى او مراقب كتب موضوع خارج فكرة القسم بتسبوة انما لو عضو جديد بيتم نقل موضوعه ؟

ألى بيكتب عندى فى القسم سوء ادارى او مراقب بيكتب فى اطار القسم

ومن محتوى الموضوعات الى مسموح انها تعرض طالما بقلمة وبتناسب القسم

ولو شايف حاجة بخلاف كدة حصلت سوء تفرقة بين عضو جديد او مراقب ولا ادارى او ...

مشرف او عضو مميز ابعت لية وقلى يا ساحر حصل دة ودة وان فية تفرقة وانا

ارحب بكدة جدا وعمرى ما حزعل من انى لو غلطت ألاقى الى يصححلى

غلطى وينبهنى مع ان عمرى انا ومعى زملائى ممكن يحصل مننا تفرقة

فى المعاملة سوء فى الموضوعات او فى الردود المخالفة اين كانت رتبة صاحبها من دون تفرقة

س / اية حكاية ان يتم تكريم عضو واحد فقط فى القسم بالرغم ان ممكن يكون فى اكثر من عضو يستاهل التكريم ؟

حكاية التكريم أننا بنكرم مجموعة أعضاء مش عضو واحد بسى هو فية عضو بيكرم

بجائزة كبرى بوسام +200مشاركة ودى احنا عملين ليها ضوابط فى القسم

ان الى يستحق جايزة نجم الشهر يكون بينزل موضوعات وايضا بيرد على

الموضوعات داخل القسم والباقى بنكرمة بشهادات تقدير مع مشاركات

برضة تقديرا لتواجهم بداخل القسم

وممكن تطلع على نظام التكريم بداخل القسم من هنا

مميزي قسم قلم الأعضاء

والحمد لله فية اقسام سارت على نهجنا فى التكريم برضة ودة دليل على نجاح منظومتة

س / قسم قلم الاعضاء بيفتقد لجو التطوير والتغيير ؟

احنا الحمد لله لسة مخلصين كام مسابقة واحدة لزميلتى اسماء

ودى مسابقة كانت جديدة من نوعها والتانية للاخ كريم عاصم

ولو اى حد عندة اى فكرة بنرحب بيها على طول وبنشجعة انة يعرضها وبنكون معاة

فى اى طلب يطلبة وعموما اى حد عندة جديد فنحن نرحب بية وشىء يسعدنا

س / انتا مشغول كمراقب عام ومهمل قسم قلم الاعضاء ؟

مشغول ازاى مش فاهم برغم الصلاحيات الرقابية برد على كل ما يعرض بداخل

القسم من موضوعات وبرضة بكتب موضوعات داخل القسم وخارجة وايضا

ردودى غير مقتصرة على قسمى فقط بل خارجة فى معظم الاقسام

والسؤال دة حترك الحكم فية للاخوة الى حيشوفوا الموضوع اعتقد ان ردهم

حيكون افضل من كلامى للتوضيح على اجابة السؤال كرد ورئى محايد

موفق يا مرشدى

كمان دا كان رئى المشرفة

Words Whisper

س / صحيح لو ادارى او مراقب كتب موضوع خارج فكرة القسم بتسبوة انما لو عضو جديد بيتم نقل موضوعه ؟

هتكلم خلال فترة إشرافي
لا مش حصل
لما نزل التنبيه بأنه أي خواطر هيتم نقلها
بعدها أي موضوع في هذا السياق كان بيتم نقله
أيا كانت رتبة الكاتب
لما كان بيحصل نوع من التغاضي كان بردو بيكون للكل
+ حتى الردود المخالفة بتُحذَف حتى لو رد للإدارة ..
مش شايفه انه حد من مشرفي القسم بيطبق التفرقة دي ..

س / اية حكاية ان يتم تكريم عضو واحد فقط فى القسم بالرغم ان ممكن يكون فى اكثر من عضو يستاهل التكريم ؟

نجم الشهر بيكون واحد
أولا للتنافس
وثانيا مع النظام الجديد للحفاظ ع الاستمرارية
لكن بيتم تكريم ع الأقل 4 كمان لنشاطهم ..
دا تكريم يبئا أكيد محصور بعدد معين وإلا مش له قيمة ..

س / قسم قلم الاعضاء بيفتقد لجو التطوير والتغيير ؟

ريللي !!
دا حتى كان فيه قريب مسابقة ( كلمات مرسومة ) مختلفة تماما عن غيرها ..
ع العموم لو أي حد عنده إضافات أو مقترحات يتفضل ..

ماتنسوش قبل ما نختم

تستنونى الحلقة الجاية

وضيف جديد ووجهة نظر جديدة

وكلة ^_^

( بهدووووووووووء )

[SiLver Spectra]

اقتباس س / صحيح لو ادارى او مراقب كتب موضوع خارج فكرة القسم بتسبوة انما لو عضو جديد بيتم نقل موضوعه ؟ هتكلم خلال فترة إشرافي لا مش حصل لما نزل التنبيه بأنه أي خواطر هيتم نقلها بعدها أي موضوع في هذا السياق كان بيتم نقله أيا كانت رتبة الكاتب لما كان بيحصل نوع من التغاضي كان بردو بيكون للكل + حتى الردود المخالفة بتُحذَف حتى لو رد للإدارة .. مش شايفه انه حد من مشرفي القسم بيطبق التفرقة دي ..

شهادة حق فعلا انا مره عدلتي ردي قبل كدا
و عادي مش زعلت هي بتشوف شغلها

-----------------
منور يا نور )

[۩۩ elMagic ۩۩]

حلقه سخنه وحوار جاامد
وردود أمجد واسماء الاخيره جميله
مشرفي قلم الاعضاء
يستحقوا كل الاحترام والتقدير
شايفين شغلهم كويس
والميزه انهم اصحاب اقلام مميزه وفاهمين شغلهم
نورت الحلقه ي نور
ربنا يوفقكـ ي برنس
تسلم ي أحمد للمجهـــود ,,

[Hearts Whisper]

ماشأء الله الحلقة روعة
وعجبتنى صراحتك اوى يا نور
وطبعا قسم بقلم الاعضاء له مكانته
ومشرفينه معروفين جدا باقلامهم وتواجدهم
تسلم يا نورشو الحلقة ماشاء الله جميلة جدا

[شاعرة الرومانسيه]

حوار رائع جدا يا احمد

مع مُحاور جميل صاحب قلم جرىء

انا شخصيا من قراؤه المتابعين له

ولكن أخ نور لى كلمه حق تعليق على كلامك

التعليق على الأخ ساحر الأحزان

بصراحه ساحر من الشخصيات الى لا يختلف عليه اتنين

من الناحيه الاشرافيه بجد مشرف نشيط جدا جدا

ومن الناحيه الرقابيه بصراحه ممتاز ودائما متواجد

واحلى حاجه فيه تواجده بكل الأقسام ولم يقتصر على قسمه فقط

والله دى شهاده حق خالصه لله

ساحر من أنشط المشرفين والمراقبين بمنتدى بنات مصر

أنا شخصيا اتعلمت منه كتير جدا

وهو دائما بيشجع الجدد والقدامى

له منى ومن كل الأعضاء كل الإحترام والتقدير

وبنقوله يارب دائما فى نشاط مستمر

وشكرا للجميع

واحتراااامى لكم جميعا

[تيتشر نفشه ツ]

حوار جميل اخي مرشد مع نور

ولكن ليا تعقيب بسيط بئآ

انا اكتر حد يقول ان أ/ امجد حريص دائما على قسمه برغم الرقابه على باقي الاقسام

من الناس المجتهده فشغلها سواء داخل او خارج القسم سواء من ناحية موضوعات او ردود وانا اشهد له بدا

بس خلصت

منورين كلكم

[حنـــــون]

اقتباس اولآ فيه نقطه سوداء هى عدم المساوه فى الكتابات و كذا عضو اشتكى منها ان لو ادارى او مراقب كتب موضوع حتى لو خارج فكره القسم او سياسى او بيعتبر خط احمر لا يمس اما لو عضو تانى بيتنقل لقسم تانى او يتحذف

ايه دا بجد يعنى حد من الادارين بيدخل يكتب موضوع
عن وصفه المكارونه البشاميل فى القسم
والمشرفين بتوع القسم بيسبوا اكمنه ادارى
نفسى مره فى نقد يكون مش لمجرد النقد وخلاص
فى حاجه اسمها مواضيع الادارى ولا المراقب
مش بتتنقل ولا تتحذف عشان هو ادارى
وبعدين استند على ايه هاتلى موقف حصل خلاك تقول كدا
ولن اتنازل عن انك تجيبلى موقف سواء ليا او لطار ولا حوراء
ولا ساحر ولا اى حد مراقب او ادارى كان حاطط موضوع
مش يتناسب مع القسم واتساب عشان هو ادارى فقط ؟؟

على فكره اسماء حذفه رد ليا قبل كدا
فى موضوعى حتى
وساحر مش محتاج ان نكلم عنه حد محترم
واكبر من انو يتغاضى عن خطأ حد عشان رتبته

حلقه موفقه يامورشو
نورت يانور :d
تحيااااااااتى

[واد حبيب]

تسلم يا مروشو علي الحلقه الجميله
وبشكر نور علي الصراجه في الردود
لكل واحد له وجهه نظر ولزم الكل يحترمها
تقبلو تحياتي لكم

[احساسى صحيح]

حلقة جميلة مورشو مع عبقرينو منتدى بنات مصر
هو نور مش قال انتقادات هو قال ملحوظات هو شايفها
عادى يعنى من حقة يرد على الاسئلة زى ما هو شايف .
مش هزيد عن اللى اتقال من الاعضاء
قسم قلم الاعضاء فى وجود اسماء ودكتورة سما وامجد
يدرس لباقى الاقسام فى كيفية تقيم الاعضاء
وكيفية ادارة القسم بكل شفافية ومنطقية وحرفية متناهية
شكرا لمورشو ونور
موفقين

[Mahmoud Mohie]

قسم + مشرفين
شهادتى بحقهم مجروحة

حلقة مميزة
شكرا