مسابقة The Generator

[خارج عن القانون]

السلام عليكم ورحمه الله وبركاته


مسابقة
The Generator






مقدمة وتعريف المسابقة

المسابقة عبارة 5 مستويات منفصلين عن بعض تماما

لا يشترك بينهم سوى قوانين ومعلومات اساسية

يعنى عايز تحل المستوى الاول حل عايز تحل المستوى الخامس حل

غير مشترط ان تحل الخمس مسابقات جميعا

اللى تعرف تحله ابعته واللى هتحله هتاخد عليه المشاركات

ويتم ارسال الحل فى رساله خاصه لعضويتى



شروط وقوانين المسابقه


1- ان يكون للعضو 100 مشاركه حتى يتمكن من ارسال الرساله المحتويه ع الحلول

2-المسابقه مفتوحه للجميع للجميع للجميع
(اعضاء ومشرفين ومراقبين واداره)


3-يمكن ان ترسل حل كل مسابقة لوحدها
يعنى حليت الاولى ممكن تبعتها
من غير ما تستنا لما تخلصهم كلهم علشان تبعتهم مع بعض

*بس لو عايز الاسبقية فى الحل
يبقا تجمعهم مع بعض فى رساله واحده علشان هيتم من خلالها تحديد الاسبقية فى الحل

4- اذا كان يوجد استفسار او توضيح يسأل عنه هنا فى هذا الموضوع وليس فى رساله خاصه

5- مده استلام اخر اجابه هى 15 يوم ابتداءا من ميعاد اعتماد التوبيك



طريقه ارسال الحل


بعد ان تقوم بايجاد الحلول تقوم بوضعها فى رساله خاصه وترسل لعضويتى

ويتم ذلك بالشكل الاتى



عنوان الرساله



"حل مسابقه The Generator"


محتويات الرساله

حل المستوى الاولى

كذا كذا كذا .....

حل المستوى الثانى

كذا كذا كذا ....

حل المستوى الثالث

كذا كذا كذا....

حل المستوى الرابع

كذا كذا كذا ....

حل المستوى الخامس

كذا كذا كذا ....



جوائز المسابقة

للمسابقة كلها 20 نقطة
كل نقطه ب 25 مشاركه

ويتم توزيع النقاط ع النحو التالى

المستوى الاول نقطتين

المستوى التانى 3 نقط

المستوى التالت 4 نقط

المستوى الرابع 5 نقط

المستوى الخامس 6 نقط

يعنى الاجمالى 500 مشاركة

ده غير جوائز استثنائية لــ اول 3 مراكز مع اسباقية ارسال الحلول


المركز الاول

250 مشاركة + 10 نجوم سيلفرية + وسام


المركز الثانى

150 مشاركة + 7 نجوم سيلفرية + وسام


المركز الثالث

50 مشاركة + 4 نجوم سيلفرية + وسام


*ملحوظات هامة:-

1- اذا كان يوجد فى المركز الاول والثانى والثالث مكرر باعداد كبيره
فستكون الاولاوية للاسبقية فى ارسال الحل
بحد اقصى 6 اعضاء

بمعنى انه لا يتعدى عدد الفائزين بالمراكز الثلاث مجتمعين 6 اعضاء
واذا تعدى ذلك فستكون الاولاوية للاسبقية فى ارسال حل جميع المستويات فى رساله واحده
وباقى الاعضاء لن يحصلو سوى على المشاركات

2- يجب ان يتم ادارج جميع الحلول بالشرح
ومن لن يرسل الشرح فلن تحسب درجاته نهائيا نهائيا نهائيا

3- لن يقبل باى تعديل للاجابات
يعنى لو بعت رساله فيها حل لمستوى وبعديها ارسلت رساله لنفس المستوى بها حل تانى
لن يقبل الا الرساله الاولى حتى لو ارسلتها بعديها بثانيه
يعنى خد وقتك وركز وفكر وبعديها ابعت

والله الموفق

[خارج عن القانون]

فى محل لبيع المولدات الكهربائية

- السلام عليكم

- وعليكم السلام ورحمه الله وبركاته

- لو سمحت انا عايز مولد كهرباء بيعمل بالسولار

- انت عايزه استخدم شخصى والا تجارى

- يعنى ايه مش فاهم

- يعنى عايزه للبيت والا لمحل والا لشارع والا لايه بالظبط

- ايوه شخصى عايزه للبيت عندى

- خلاص طالما كده يبقا خليكى فى الطراز الامريكى

- وده يفرق ايه عن الطرازات الباقيه

- الميزه هو انه بيحرق السولار على مقدار الاستهلاك




- طيب وهو ده بيطلع كام وات/ساعه

- مه ده الفايده فيه انه غير محدد يعنى عايز وات واحد هيطلع عايز 10 كيلو هيطلع

- وده بيطلع كام وات فى اللتر الواحد

- ده بيستخدم اللتر الواحد لاخراج 7 كيلو وات

- ودول بيطعلو فى قد ايه

- مه انا قولتلك على مقدار استهلاكك يعنى خلصتهم فى ساعه او يوم او فى شهر مش هتفرق

- طيب وعلى كده هيبقا ارخص من الكهرباء العاديه والا اغلى انا بستخدم 2 ميجا وات تقريبا فى السنه

- ديه حاجه معرفهاش بس هو مزود بخزان سعة 11 لتر ولتر السولار ب 1.1جنيه احسبها بقا انت

- خلاص اوك هحسبها وارد عليك

المطلوب
1- معرفه عدد المرات اللازمة لملء الخزان لانتاج 2 ميجا وات

2- معرفة التكلفة وبدقة شديدة لانتاج 2 ميجا وات

[خارج عن القانون]

فى الشارع بتاعنا

- ايه يا وائل فيه ايه

- عايزين نعمل لمبات فى الشارع علشان شهر رمضان



- طيب وايه المشكله

- الناس مش عايزه تدفع خايفين من شركه الكهرباء ليعملولهم محضر ويدفعو غرامه زى السنه اللى فاتت

- طيب خلاص سيب الحوار ده عليا انا هتصرف فيه بس قولى الاول انتو هتجيبو كام لمبه

- احنا هنجيب 60 لمبة مسمار 100 وات

- خلاص اوك يومين كده وهجبلك الحل

..............

فى محل المولدات الكهربائية

- المره ديه بقا انا عايز مولد اشغل عليه 60 لمبة 100 وات/ساعه

- موجود المولد اللى انت عاوزه بقدرة 6000 وات/ساعة



- طيب وده هيشتغل ازاى

- ده مولد طراز صينى سعه خزان 12 لتر ولو الخزان مليان هيفضل شغال لمده 45 ساعه

- طيب لو انا استخدمت لمبة زياده او اقل ايه اللى هيحصل

- لو استخدمت اكتر من ال 60 لمبة المولد مش هيشتغل اصلا
اما لو اقل فمافيش مشكله المولد هيطلع نفس القدرة زى ما هى ويستخدم نفس كمية السولار وهيقوم بتسريب القدرة الباقية للارضى

- يعنى فى كلا الاحوال ال 12 لتر دول هيشغلوه لمده 45 ساعه سوا كانوا لمبة واحده او 60 لمبة

- بالظبط كده

- خلاص اوك انا هشتريه

.................

فى الشارع بتاعنا

- خلاص يا عم وائل انا اتصرفت وحلتلك مشكله الكهرباء ديه خالص

- ازاى يعنى اصلى خلاص اتخنقت من الناس اللى فى الشارع ديه

- انا بس عايز اعرف انت هتشغل اللمبات ديه كام ساعه فى اليوم

- انا هشغلها على مدار شهر رمضان كله يعنى 30 يوم هتشغل من الساعه 6 مساءا الى 5 فجرا

- طيب تمام قوى كده
معاك يا عم اهه مولد كهرباء هيشغل اللمبات والا تقولى شركه كهرباء والا وجع قلب




المطلوب
- حساب تكلفة كمية السولار المطلوبه لاناره الشارع على مدار شهر رمضان كله

[خارج عن القانون]

فى البيت عندى

- بقولك ايه يا محمد

- قول يا وائل

- الناس يا عم اللى فى الشارع اللى جمبنا لما شافو حوار المولد ده كلمونا علشان تشوفلهم واحد هما كمان

- طيب وهما هيشغلو كام لمبة

- هما قالولى انهم هيشغلو 35 لمبة 140 وات

- ومن امته لامته بقا

- هيشغلوه معنا ويفصلوه برضو معانا

- خلاص اوك هشوف كده الكلام على ايه وهرد عليك

..............

وعند محل المولدات

- انا بقا عايز المره ديه مولد يشغل 35 لمبة 140 وات

- ان شاء الله طلبك موجود

- ايوه بس عايز حاجه بتستهلك فلوس اقل فى الاناره

-طيب بص يا عم انت عندك 3 حلول بالطراز الصينى

الاول مولد بخرج 5100 وات وده بسعه خزان 8 لتر سولار ولو مليان يشغل لمده 30 ساعه




التانى مولد بخرج 5400 وات وده بسعه خزان 10 لتر بنزين ولو مليان يشتغل لمده 50 ساعه

- الطريقه ديه طبعا ارخص من اللى فات

- مش عارف بس ما تنساش ان البنزبن اغلى من السولار بجنيه




- طيب والحل التالت

- هو انك تستخدم مولدين 2500 وات لكل واحد
المولد الواحد بسعه خزان 6.5 لتر سولار ولو مليان يشتغل لمده 35 ساعه

- طيب خلاص هفكر كده واقولك

المطلوب
- ايجاد الحل الارخص تكلفه لتوليد الطاقة اللازمة لاناره الشارع

[خارج عن القانون]

فى البيت عندى

- مستر محمد

- ايه يا عم وائل ارحمنا شويه

- يا عم انا جايلك فى مصلحه

- قول يا عم قول مه انت ما يجيش من وراك غير وجع القلب

- بص يا عم انت عارف المشروع السكنى الجديد اللى فى المنطقه اللى جمبنا

- ايوه عرفه ماله ده

- الراجل صاحب المشروع لما عرف حوار الكهرباء ده قالى اطلب منك انك تعمله نفس الفكره عنده

- طيب انا مش عارف المنطقه كلها ولا عارف هى هتاخد كام لمبة

- ده رسم للمنطقه كلها




- طيب وهو هيستخدم كام لمبة لكل شارع

- هو عايز لمبة لكل 2 متر يعنى الشارع لو 10 متر هيستخدم 5 لمبات

- اوك كده انا فهمت طيب هى اطوال الشارع كام

-النسبة بين شارع 2 وشارع 12 هى 1 : 3
والنسبة بين شارع 10 وشارع 5 هى 2 : 1
وشارع 1 طوله 180 متر

- طيب وهو هيستخدم لمبات كام وات

- فى الشارعين رقم 1 و 12 هيستخدم لمبات 200 وات
وفى الشارعين رقم 11 و10 هيستخدم لمبات 160 وات
وفى باقى الشوارع هيستخدم لمبات 140 وات

- خلاص بكره هرد عليك

.......

وفى الغد

- جبتلك المولد اللى انت عاوزه بخزان سولار لو مليان على اخره هيشتغل لمدة 45 ساعة




- هو اللتر الواحد بيعمل خرج كام وات

- هيعملك خرج 177كيلو و600 وات بس خد بالك اوع تحط اى لمبة غير اللى اتفقنا عليه او زياده والا المولد مش هيشتغل

المطلوب
-معرفة سعة الخزان لهذا المولد

[خارج عن القانون]

على القهوة

- بقولك ايه يا محمد

- اشجينى يا عم وائل

- فيه صاحب مصنع اعرفه عايزك تروحله فى شغل

- شغل ايه ده ان شاء الله

- عايزك تشغله الماكينات اللى عنده بالمولدات

- طيب ما يوصل كهرباء من الشركة اوفر له

- معرفش روحله وانت تعرف

- طيب ادينى رقمه وانا هبقا اكلمه واروحله

..........

وبعد الاتصال وتحديد ميعاد ومكان اللقاء

- بص يا محمد انا روحت لشركة الكهرباء علشان يوصلولى الكهرباء لمصنع الملابس
بس لسه وقت كتير وانا مش عايز عطله

- طيب والمطلوب منى

- المطلوب منك انك تشوفلى مولد اشغل بيه المصنع بالكامل

- طيب انت هتشغل عليه ايه بالظبط

- بص يا سيدى المصنع ده عباره عن 3 ورديات كل وردية 8 ساعات وفيها ساعه راحه
بفصل فيها الكهرباء عن المصنع كله وديه بتكون بعد 4 ساعات من بداية عمل الورديه



الوردية الاولى هى قص المنتج
والتانيه هى تخييط المنتج
والتالته هى تعبئه المنتج

الورديه الاولى بتحتاج 35 كيلو وات
التانيه بتحتاج 42 كيلو وات
التالته بتحتاج 28 كيلو وات

- طيب خلاص بكره هكلمك بعد ما اكون وجدتلك المولد المطلوب

...........

وفى محل المولدات

- بص يا عم انا عايز مولد بخرج 6 كيلو وات/ساعه بس عايز اعمل حاجه علشان لو استخدمت اقل من 6كيلو وات/ساعه

- فيه مولد 6 كيلو وات/ساعه مزود ببطاريه بسعة تصل الى 30 كيلو وات وبسرعه تخزين اقصاها 1.5 كيلو وات/ساعه

- ولو البطارية اتملت ولسه المولد شغال ايه اللى هيحصل

- هتقوم البطارية بتسريب الزياده للارضى ومش هيحصل اى تلفيات

- اوك هاخد المولد ده



...........

وفى المصنع

- انا جبتلك المولد المطلوب بخزان سعة 120 لتر سولار لو مليان يقدر يشتغل 60 ساعه ده غير البطارية

- ايه حوار البطاريه ديه

- ديه بتتشحن من المولد نفسه وتشتغل تلقائيا بعد ما السولار اللى فى المولد يخلص وانا كمان جايبلك ال 120 لتر على حسابى

- اوك على البركه ركب المولد يا كبير

المطلوب
-مع افتراض ان اول عمل للمولد هى الثامنه صباح اليوم

اذكر ميعاد امتلأ البطارية وميعاد تفريغها
الميعاد يشمل رقم اليوم ورقم الورية والساعة

[شاعرة الرومانسيه]

يااااااااه كل ده

طيب هى لازم حل المستويات بالترتيب

ولا ممكن مستوى يسبق مستوى

مسابقه كبيره

محتاجه وقت ومجهود عالى

انا هاشارك بس ما اوعدك ب 5 مستويات

الى هاقدر عليه ههههههه

الله المستعان بقا

[აα∂ Ԑγεა]

انا كدة حليت لحد المستوي الرابع
وبعتهم كلهم ^__^

اما اشوف الخامس بقي ايه نظامه
بسم الله ^_^

’’’’’’’’’’’

حقيقي مسابقة روووووووووووووووووووعه
خلت الواحد يفكر ويحسب
ويشغل الجمجمه اللي راكنها من زمااااااااان
تسلم ايديك بقي يااااااباشا

تقيييمي بس بعدين اما اخلص ههههههههه

[Arco Baleno]

بالتوفيق يارب لجميع المشاركين بصراحه مليش في الحساب مجهود عالي منك اخي وبالتوفيق يارب

[აα∂ Ԑγεა]

اشطة خلصت :d
الحمد لله خلصتها بقي كلها
يارب يطلعو صح مش غلط

بعتلك كل مستوي في رسالة لوحدة
وبعدين جمعتهم كلهم في رسالة واحدة وبعتت



حقيقي المسابقة فيها فكرة وفكرة جامدة كمان
انا مليش في حسابات الكهرباء دي بس حاولت
يمكن هغلط في مستوي منهم علي ما اظن
لاني معرفش حسابات الكهرباء زي الذاكرة ولا في الميجات والكيلوات
بس عملت اللي اقدر عليه

تسلم ايديك للمسابقة الجامدة دي