حلقة جديدة من ( اجمد عضو ) معانا ( نجم وزهره ومسافات فراق )

[morshooo]

بسم الله الرحمن الرحيم

اهلا بيكم جميعا

وحلقه جديدة من

( اجمد عضو )

النهاردة هيكون معايا ضيف منتشر فى جميع

انحاء المنتدى معانا

المتميز /

نجم وزهره ومسافات فراق

تعالو نشوف الحوار اتقال فيه ايه

س / أهلا بيك فى أجمد عضو ؟

أهلا بيك ياعمنا وربنا يستر ما تودنيش في مصيبه او داهيه

س / ايه ياعم النشاط الجامد دا فى المنتدى ؟ اكنك متعود عليه ؟

وهو عيب اكون عضو نشيط ؟

انا إنسان عاشق النشاط واعتقد ده لصالح المنتدى ومش غلط اكون نشيط ( تقدر تقول بركات الحجه نهضه شغاله ويايا )

س / اية سبب الانتشار السريع ليك فى المنتدى ووجودك فى كل أقسام المنتدى ؟

بحب تكون ليا بصمتي بس مش في كل الأقسام لا في أقسام ماليش معرفه او خبره فيها خصوصا الأمور الفنيه ذي الفوتوشوب والحاجات دي ومش معقول يعني الإنسان يحتكر كل الهوايات او المواهب

س / يمكن فى أعضاء شايفين نشاطك الفترة الى فاتت ومع ذلك لم يتم تميزك حتى الان ؟

ازاي ياعم الحاج
اعد لك تميزاتي وصلي على النبي
اول تميز كان بقسم الإبداعات
الثاني قسم الفضفضه
الثالث الخواطر
والقسم العام
والرياضه
وحواء
والمصارعه
لا ياعم اتميزت كتير واتكرمت الحمد لله انت جبت المعلومات دي منين
اني مش اتميزت صلح معلومات ياعم مورشو
وآسف لو نسيت قسم بس الحمد لله اتميزت كتير من الاخوه مشرفي الاقسام
بالمنتدى ومش شايف اني مش اتميزت بالعكس اتميزت وكتير كمان والحمد لله

س / انا اقصد تميزك من الادارة كضو مميز ؟

تميز الاداره من عدموا امر يخصها لوحدها
انا بعمل مجهودي وبس يميزوني شكرا وشغال يرفضوني بردوا شكرا وشغال اصل الحب والتفاعل مالوش مقارنه بتميزات اه التميز امر حلو وكل حاجه انما اللي بيحب مكان مش بيفكر في كده

س / ليه فى بعض كتاباتك بحس انك بتوجه الكلام لاشخاص معينين ؟ والدليل انك كتير بتنفى دا فى بدايه مواضيعك ؟

بص يامورشو ( يامولعها )
بنفي ده وخصوصا بالفتره الأخيره لأني لقيت اخوه ليا
زعلوا مني على مواقف برغم اني أقسمت لهم بالله
اني ما بقصدهم وكلامي كلوا شخصي عن مواقف بالحياه
ولا تمس احد ( وبلاش تولعها ياحج )
فكان طبيعي لما اكتب شيئ كده اوضح منعا لتكرار الزعل
طالما بيفكروا كده واي حد مكاني هيعمل كده ويوضح
عشان محدش يزعل وده تقدر تقول عليه تقدير للناس .

س / يعنى فعلا فى اعضاء اخدو بالهم بس مش غريبه انك عضو جديد والاعضاء بمجرد نزولك لموضوع ياخدو الكلام عليهم ؟

طيب وايه المشكله ما الغالبيه جدد ومميزين واحسن مني
في ابراهيم دياب احسن مني وفعال عني وفي اسيل وغيرهم
الفكره فكره تقديريه تواصليه انت بتقدر ناس والناس
بتبادلك نفس التقدير بس

س / هم مين الاراجوزات ؟

المزيفين
الوصوليين
اللي بلا مبدأ
الناس اللي ممكن تعمل أي شيئ وكل شيئ للوصول لكرسي او الوصول لمنصب او البحث عن مصلحه او ماشابه في أمور الحياه بوجه عام
انا بعتبر دول اراجوزات علما بان وظيفة الاراجوزات الاصليه هي امتاع الناس بشكل جميل بالضحك المقبول .

س / يعنى الارجوزات مش مقصود بيهم اعضاء من المنتدى ؟

ياعمنا
ما انا ممكن اقولك اللي على راسوا بطحه بس ما ينفعشي
انت فاهم ان ممكن شاشه تستفزني ياعم مورشو
ياعم احنا مش شايفين بعض احنا بنتفاعل كتابات وخطوط وصور انما ساعات انا بمر بموقف في حياتي بنفعل وياه بيخرج مكتوب
يعني لو كتبت دلوقتي انا طاير في السحاب هتعترفوا اني طاير بلاش يكون فكرنا سطحي كده مع احترامي
وبلاش تفضل تولعها كتير بئا ياعم انت

س / اية حكايه ترشيح مدونتك فى قسم صفحات مكشوفه ؟ وشايف ان بعد خروج شاهينـ من الاشراف تم خروجك من الاستفتاء ؟

بص يامورشو
موضوع مدونتي ده ومع الاحترام لا يعنيني
السبب
الحمد لله التكريمات كتير والتميزات اكتر والنجاحات امام الجميع
( بفضل ربنا ) وبفضل معاونة اخواتي وبفضل مشرفين عندهم نزاهه وعداله وبيقدروا لكل واحد حقوا ومن هنا بقول كلمة شكر ليهم جميعا
فدخولي الترشيح او عدموا امر لا يعنيني ولا يؤثر على مدونتي ولا قافلتي لان قافلتي سايره برغم كل المعوقات بفضل ربنا
وحتى بعد عمر طويل لو حصل وتم اختيارها انا بنفسي هطلب الاعفاء من كده وبكل احترام اكيد .

س / انتا فى اى خلاف مع مشرفه صفحات مكشوفه ؟

هي موجوده اسالها
انا لو مختلف وياها ما كنت راسلتها لما بعتت لي تقييم غلط
ولو مختلف وياها ما كنت ارسلت لها لينكات موضوعاتي
انما لقيتها متجنباني فضلت انا كمان اتجنبها وبكل هدوء
ومؤكد زوارها موجوده ودليل على صدق كلامي
يامورشو انا مش بحب اختلف مع أي حد وبحترم الكل وبقدر الجميع انما بردوا الانسان كرامه ومش معقول هفضل ابعت لك انت مثلا بزوارك وتتجاهلني واكلمك تاني ولا اعتقد أي حد هنا يتقبل ده ابدا

س / تقييم ايه الى غلط الى اتبعتلك ؟

والله يا مورشو يا اخويا ما فاكر لان الحمد لله اخوك منشار تقييمات وكل يوم
بفضل ربنا توصلني بين 2 او 4 تقييمات وبلاش تبص البصه الشنيعه دي
وتحقد عليا المهم وقتها راسلت الاخت ولا قالت لي انت بتقول ايه وبعديه
بردوا ارسلت ليها لينكات لموضوعاتي ومؤكد هي حره ترد او لا بس بأكد
لك اني جوايا صافي ومش وياها انما وياها ومع الكل

س / بصراحه شايف ان مدونتك افضل من المرشحين ؟

الموضوع مش فكرة احسن ياعم مورشو الموضوع بس
يكون في شيئ من الحياديه يعني انا مثلا مختلف
مع مورشو وهو مشرف قسم اليوميات وجه الدور عليا
بحوار هل معنى ده عشان مختلف فكريا معايا يحجر
حق اضافتي وبقول حوار ما بالك بتميز لناس متواجده ونشيطه وفعاله وبكرر اخرجني من الحسابات ناس غيري
مراعاة ربنا لا تطلب من حد يامورشو انما بتكون بالانسان نفسوا وعادي
الحمد لله على كل واخرج مدونتي من كل الأحداث
بس لما يكون فيه اختيار ياريت والكلام عن أي شيئ مسابقات
تقييمات أي شيئ ياريت نبعد عن علاقاتنا وعواطفنا
وصداقاتنا عشان يكون في شيئ من العداله بين الكل بالتساوي .

س / انتا عرفت منين ان مدونتك كانت مرشحه من الاساس ؟ يعنى حد بلغك بدا والا عرفت بعديها زى ما انا عرفت من احد الاعضاء ؟

تقريبا مخدش باله من السؤال

س / تفتكر بما انك عضو جديد المفروض شايف ان المنتدى فيه مجاملات ؟

كتير أوي
وهقولك مثل
دكتور طارق مثلا راجل بحترموا جدا جدا خليه يعمل
موضوع دلوقتي
هتلاقي الحاضرين والغايبين يظهروا ويردوا ويمكن الناس اللي
بالمنتديات المجاوره هتلاقيهم بقدرة قادر يردوا بالموضوع وهتلاقي ناس مختفيين نهائيا بالمنتدى ويمكن ليهم
شهور يخرجوا من تحت الارض
وبكرر
انا مش ضد الاخ طارق على الاطلاق
وبكرر
بحترم تماما فكروا وموضوعاتوا
انما يبقى السؤال
طيب ليه النشاط والتفاعل ده مش يكون لكل الناس ومع كل الاعضاء ؟
ولا يعني عشان الدكتور طارق صاحب الموضوع مع الاحترام
له ولفكروا ولموضوعاتوا وبكررها مره تانيه
انما لما يكون في رد من الكل على موضوعاتوا يكون
نفس الفكر للجميع حتى عشان الأعضاء الجدد
تحس بتقدير الكبار

س / انا بختلف معاك فى النقطه دى لو انا عضو بقالى سنين هنا اكيد هيكون ليه اعضاء متبعانى ماينفعش اقارن عضو جديد بعضو بقاله سنين هنا فى الشعبيه والاهتمام ؟

قوة قلمك وتفاعلك مع الناس يامورشو تخليهم يتفاعلوا
وياك وطالما بيوصلك لينك وتروح ترد لازم وامر عادي
هما كمان يبادلوك نفس الشيئ مثال كده اخويا العزيز
ابراهيم دياب ابعت له بصراحه يرد اول واحد عليه وانا
نفس الشيئ فالامر هنا تواصل تقديري ومؤكد بيرجع
بالفايده على المنتدى طالما في نشاط
وبكرر الكبار واكيد كلنا عارفين وفاهمين ويحصل
التفاعل والنشاط المرجوا في المنتدى.
المحزن ان بعض الناس اللي بتنادي بعودة النشاط هما
اكثر الناس بلا نشاط ! شيئ غريب

س / ايه رأيك فى الترقيات الاخيرة ؟ شايف ان كان فى عدل من الادارة للترقيات ؟

كنت متوقعها مع تحفظات بسيطه عليها
انما في ناس تستحق وكنت متوقع ليهم ده وتيقنت من الاستبيانات والامور دي كلها ان في حالة ترقيات انما
بصراحه كنت متوقع ده يحصل لناس مقطعين روحهم بالمنتدى
( ومش بقصد نجم )
اقصد مشرفين ومشرفات اصحاب حضور قوي وبصمات واضحه
وياريت محدش يفهم ده تدخل مني في الشئون دا جواب على
سؤالك ياعم مورشو وكمان بعض الاعضاء يستحقوا دون ما
اذكر أي اسم وبكرر وبأكد انا لا بتاع اشرافات ولا بدور
عليها ولا منتظرها لاني كده حر بدون قيود وبعيد
عن النزاعات
بس اهم شيئ ان البدايه حصلت وده كان لازم يحصل
ضخ دم جديد في الفتره دي المنتدى محتاجوا وبقوه كبيره

س / لو تم ترشيحك تكون مشرف هتختار قسم ايه ؟

لا ياعم
انا زي العسل كده وفل الفل
انما لو انت مصمم تورطني ياعم مورشو ياغالي ياريت تتكرموا
عليا وتمسكني قسم الترحيب بالاعضاء الجدد بعيد عن أي صراعات وقسم هادي ومكان مريح بعيد عن أي مشاكل خالص ولو في اختيار كمان يكون قسم صور الفنانين اخبط فيه
لوحدي وواثق بأمر ربنا اني هوريكم صوركم ماحصلت
ومحتمل انزل صور جدتي كمان بالمنتدى لعيونك
يامورشدي يامولعها انت

س / ايه حكايه الدويتو الى بتعمله مع الاعضاء ؟ يعنى شوفنالك كذا خاطرة مع عضوات المنتدى مين بيطلب من مين تعملو دا ؟

انا اللي بطلب يامورشو واقولك ليه
تقدر تقول انا طماع شويه احب اعمل ارقام قياسيه حصريه
وتقدر تقول بتحدى قدراتي بيني وبين روحي كنوع من اثبات
الذات والقدره على المحاوره مع اغلب الاقلام وفي ناس وافقت
وفي ناس رفضت وفي الحالتين بشكر دول ودول لان الفكر
حريه ورغبه وقناعه واحسد براحتك واندب كمان وبعدين
مين قال عضوات وبس انا عملت مع الاخ احساسي صحيح
وانا اللي طلبت منوا ده وهو غايب ولو واحد غيري كان
عاش الدور وقال هو اللي طلب انما انا اللي طلبت منوا
ولو عندك رغبه يامورشو تعالى نعمل دويتو سوى
ياعم واهلا بأي اخ يشرفني بعمل دويتوا وياه طالما هيكون
فيه فايده فكريه وادبيه

س / مفيش دويتو هينزل بينك وبين عضوة قريب ؟

لا كانت مرحله وفاتت انما الجديد بفكر في سلسلة دويتات
مع الولاد عشان اكون عملت المعادله مع النوعين
وخمسه وخميسه في عنيك ياعم ياساتر عليك فظيع

س / اخيرا تحب تقول ايه فى اجمد عضو ؟

احب اقولك يامورشو ان للأسف النوايا مش حسنه
وكلنا عيوب وانا اولكم
احب اقولك بمنتهى الأمانه
مش هيستمر المنتدى بالوضع الغريب ده طالما فيه احزاب
وشلليات ومجاملات ونفسي فعلا نتقي ربنا ونفسي نبعد عن
عواطفنا ونفسي لما نتعامل نتعامل بشيئ من الحياديه دون
النظر لمنصب او لون او أي شيئ غير كده
ونفسي كمان وفرصه اتكلم على الملأ محدش يفهم خواطري
موجهه له انا مش بضرب الودع انا قلم هاوي وممكن اعمل
شيئ قوي وممكن اعمل شيئ بلا وجود من الاصل يعني
برجاء محدش بالمنتدى يفهم اني بوجه له كلامي ودي
فرصه للتوضيح عشان اتسالت كتير السؤال ده لدرجة
انوا بئا معهود كل وقت عليا
بكتب بالبركه وبالفطره ومش بقصد أي حد نهائي
وبحترم المعارضين ليا والمؤيدين
الكتابه فعل احساس من مواقف في الحياه ومش ممكن
المواقف دي تتولد على شاشات زجاجيه وكلمات مكتوبه جامده
وارحمنا ياعم مورشو لانك بجد
فظيع
مورشو
وبمنتهى الأمانه انت مجرم حوارات ولو ليا حقوق اهديك لقب
خاص ليك جدا طبعا مع احترامي للكل
وهو
لقب ( محترف حورارت )
بس بتولعها ساعات عشان تقعد بعيد ذي بيج بوس كده وتقول
مش انا
والله مش انا
هقول شيئ كمان
حب المنتدى مستحيل يكون بلون
ولا منصب
ولا وظيفه اداريه فيه
وللعلم والتوضيح هقول سر علني
انا بعتبر روحي مراقب وممكن اختنا اركو تشهد بكده
الحمد لله على اد ما ربنا يقدرني بكتب وبتفاعل بالاقسام
اللي ليا فيها
وعلى قدر توفيق ربنا ليا بيكون العطاء مني
هقول كلمه كمان
أي اخ
أي اخت
أي حد
فاكر ان نجم زعلان منه او متضايق منه
بالعكس
ويعلم ربنا انا بحترم وبقدر وبحب الكل
انما لكل شيئ حد ومش هقدر افرض روحي على مورشو كصديق
وهو مش طايق منظري
ولو اي حد زعلان مني في اي شيئ انا بعتذر كمان وعلني اهو
ياعم وارحمني بئا ياشيخ

بس خلاص ارحمني بئا ياعم انت

وبكدا بتخلص حلقه النهاردة

انتظرونى وحلقه جديدة

وضيف جديد

[۩۩ elMagic ۩۩]

حلقه حلوه مع شخصيه مجنونه
نجم من الناس اللى شغاله كويس فـ المنتدى وبتموت نفسها فيه
الشغل حلو ي نجم ولكن براحه ع نفسكـ شويه ي عم ~
بالتوفيق ليك ي برنس بقآ
تسلم ي أبو حمييد للمجهود
,,

[الرحــاال المٌتَمرد]

نشاط وموهبه ما شاء الله يا أدهم
لكن حصل نقاش بينا إمبارح فى قسم النقاش
وأظن وضحت لك بعض الأمور
إللى أنت هِنا أكدت عليها وشكلك إقتنعت ههههه
منور يا نِجم ودايماً بـ تفاعلك حاضر إن شاء الله
ولكل مٌجتهد نصيب سواً في المٌتابعه مِن الأعضاء
أو في الترقيات والتكريمات مِن الإداره أو مِن الأقسام
إللى أنت نشيط فيها ,,
شٌكراً مٌرشد على الإستضافه الطيبه منك
وبالتوفيق لكما إن شاء الله

[نجم وزهره ومسافات فراق]

انتا عرفت منين ان مدونتك كانت مرشحه من الاساس ؟ يعنى حد بلغك بدا والا عرفت بعديها زى ما انا عرفت من احد الاعضاء ؟


من العصفوره
الفكره مش عرفت منين
الفكره اني بكره اكون غبي والحمد لله عارف كتيييييييييييييييييييييييييييير
عندي مخزن معلومات يامورشو يا للي عامل شكل شعلة النار
يخونك يا اخي الاكل والفاكهه والشاي
دا انت ياعم خربت بيتي في الحوار ده
اكلتك وسقيتك شاي ماركة اشرب وانهض وفهكتك حلوه وجديده فكهتك دي يعني اكلتك فواكه
تقوم تقول عني نسيت
زهايمر بئا
وكمان انت نسيت ان النهضه خلاص شطبت ع المسامير والصواميل
بقيت هيكل يامورشو بعيد عنك


بس تعرف يامورشو احلى فيك انت ونور بيج بوس
انكم ناس عفويين
ناس انقياء
ومحدش يفهم بقول ده عشان توبيك
انا بحكي لمواقف خاصه وانت ونور عارفين ده
اه احيانا تولعوا الدنيا انما ناس طيبين بمعنى الكلمه

شكرا ياعم مورشو على الحوار الممتع وياك
وهات بئا باقي ال 200 عشان الحوار
بصيتك اهو وعلني

الف مليون شكر مورشو ليك ولحوارك وربنا يوفقك وتمتعنا كتير بحواراتك
ورجاء نفسي تستضيف رحال وتهريه اسئله
ويمكن النهضه تزروروا ههههههههههههه
الف مليون شكر بجد

[نجم وزهره ومسافات فراق]

اقتباس المشاركة الأصلية كتبت بواسطة ۩۩ elmagic ۩۩ حلقه حلوه مع شخصيه مجنونه نجم من الناس اللى شغاله كويس فـ المنتدى وبتموت نفسها فيه الشغل حلو ي نجم ولكن براحه ع نفسكـ شويه ي عم ~ بالتوفيق ليك ي برنس بقآ تسلم ي أبو حمييد للمجهود ,,

شخصيه مجنونه
طب هعمل ثوره ضدك ياماجيك
ماشي بئا
مش هقدر ارد عليك
مش لانك المراقب ابو بدله بني
انما لانك اخ عزيز وبحترمك جدا
بس انت نسيت حاجه
كنت كتبت كده
شخصيه مجنونه وصريحه
نورت التوبيك ماجيكو الغالي

[الابتسامه المصريه]

جميله الحلقه مورشو

دائما مميز

والجميل النجم

منور الحلقه يا اجمد نجم

ايه الجمال داه فى الاجابات

عبقرينو ولاا ايه

ههههههه

جميله الحلقه

بالتوفيق ليكم
وفى انتظار حلقه جميله اخرى
الله ينور قلبك بنور حب رسوله

[نجم وزهره ومسافات فراق]

اقتباس المشاركة الأصلية كتبت بواسطة الرحــاال المٌتَمرد نشاط وموهبه ما شاء الله يا أدهم لكن حصل نقاش بينا إمبارح فى قسم النقاش وأظن وضحت لك بعض الأمور إللى أنت هِنا أكدت عليها وشكلك إقتنعت ههههه منور يا نِجم ودايماً بـ تفاعلك حاضر إن شاء الله ولكل مٌجتهد نصيب سواً في المٌتابعه مِن الأعضاء أو في الترقيات والتكريمات مِن الإداره أو مِن الأقسام إللى أنت نشيط فيها ,, شٌكراً مٌرشد على الإستضافه الطيبه منك وبالتوفيق لكما إن شاء الله

نفسي مورشو بئا يمسكك انت هنا ياعم
عشان تتعصر شكلي كده
على فكره يارحال
انا احترامي ليك مش وليد مواقف ومؤكد انت عارف
اه انا اقتنعت فعلا بكلامك وكل حاجه
انما احيانا الانسان بيزعل لمواقف ما وانت فاهم قصدي وعارف قصدي
انما نقول الحياه
لازم تسير المركبه
ممنون لتواجدك الغالي رحالنا الغالي

[نجم وزهره ومسافات فراق]

اقتباس المشاركة الأصلية كتبت بواسطة الابتسامه المصريه جميله الحلقه مورشو دائما مميز والجميل النجم منور الحلقه يا اجمد نجم ايه الجمال داه فى الاجابات عبقرينو ولاا ايه ههههههه جميله الحلقه بالتوفيق ليكم وفى انتظار حلقه جميله اخرى الله ينور قلبك بنور حب رسوله

ولا عبقرينوا ولا حاجه ياست الكل
التوفيق من عند ربنا
وبتمنى اكون اتوفقت
ومتشكر لثناءك الطيب
نورتي بئا

[جبل عالي]

حلقة مميزة كل التميز كالعادة

مع شخصية فرضت تميزها بلا ألوان

تسلم الايادي مورشو دائماَ انت في مقدمة

المحاورين المميزين

[اسيل الفلسطينية]

جميل جدا انتقاء مميز لعضو جامد فعلا بصمته موجودة بكل مكان في المنتدى
ومميز في الحصريات عضو له ثقله انسان طيب جدا وعفوي
احسنت الاختيار اخي يعطيك الف عافية وبوركت جهودك