خـــدت شهــــآدتـــي

[Şα3Đ..♥]

خدت شهادتي زي كل يوم كعادتي بصحي من النوم براحتي وافضل نصايه مدروخ ع السرير ما انا اصلي واد مأنتخ ومفيش ورايا مشاوير يبقي هصحي ليه بدري المهم بعد الاحداث الكتير اقوم احضر الفطار هيكون ايه يعني الفطار لا ثواني ده الفطار بتاع الكبار حبه فول وطعميتين من الكبار وجمبهم شويه خضار اشي جرجير واشي بصل اخضر وحتتين خيار المهم بعد الفطار جالي تيلفون قلت يمكن الواد عماد راجع من الشغل بدري فقال احود يمكن افطر وامشي دوغري بس مطلعشي عماد طلعوا اصحابي البُعاد قاللي حازم قوم ياعم قومت اجري خير يا واد وف صوت واحد ندهوا الولاد النتيجه ياعم ظهرت وانت نايملي ف العسل انا قولت ايه اللي حصل حد اتعور حد انكسر سيبتوا مفاصلي يا بقر طب ماهيا مسيرها تظهر قولتله يلا اتبخر علشان انا قايم افطر وهلبس الحته الجديده اهو من باب المنظره ما انا اصلي بقيت فاضي للمظهره المهم زي ما قولتلكوا هبقي اجيلكوا والنتيجه زي ما تكون وزي ما تبقي قومت روحت ع الجامعه لقيت زحام وقفت عند شباك رابعه من غير كلام مديت ايدي بالكارنيه قلت يا بيه هاتلنا النتيجه ابتسم وقاللي ليه قولتلوا والله دي حاجه عجيبه وناس غريبه اصحي بدري عشان نتيجه هي يعني البعيده هتروح فين قاللي روق يابني واهمد وبلاش حكاوي ده انت مسيرك بكره تقعد ع القهاوي قلتله والنبي تسكت هي نقصا بلاوي هات يا عم النتيجه ولا انت يعني غاوي زيطه مبروك يا سيدي اديك نجحت خدها علقها ع الحيطه قاللي الكلمتين بضحك وادهالي نصيحه قاللي يابني اوعي تقعد القعده دي اكبر فضيحه قلتلوا اسكت هو انا كل ما اجي انسي اني عاطل اخد طريحه المهم بعد ما هربت من رغيه والكلام وروحت بدري رغم الزحام والشوارع مليان رغي ومليانه وش غيرت بسرعه وخدت دوش جبت مسمار وبرواز وكان في كمان لوح ازار مركون من فتره ورا الجهاز جبته وجبت الشهاده وقولت اعملها برواز علشان يكون عليها القيمه ولا تتبهدل ولا تبقي قديمه وتفضل طول العمر سليمه يمكن ف يوم احتاج ليها ما الطبيعي بعد الشهاده اني لازم الف بيها ولا يعني لا سمح الله كنا بناخد الشهاده عشان نداريها اديني اهو خدت شهادتي بعد ما اتفقعت مرارتي تعالي بئه يابن والدي شغلني بيها يلا مسيري زي غيري ارجع اقعد ع القهاوي واديني هرجع زي عادتي اصحي من النوم براحتي وابقي غاوي احضر الفطار بنفسي ما انا اصلي كنت باخد شهادتي علشان اقعد ع القهاوي أتقبـــــل النقــــــد

[phalsteen]

المهم النجاح وفرحته والباقي ان شاء الله مقدور عليه
خوفتني ليه كدة من بعد التخرج
انتوا هتلاقوا كافية تفعدوا عليه
لكن احنا هنعمل ايه بئا نبيع مناديل في الاشارات

كلمات خفيفة واسلوبها سهل
برغم ان القضية معقدة
احسنت اخي
ودي وحترامي

[booody99]

يا سلام يا سلام

قد ايه مر الكلام

في ناس دايخه

وفي ناس بتنام

ده حال الانام

بيفك مع الايام

ناس تاخد اداره

وناس تاخد اعدام

........

اسمع يا ميدو يا فنان

خد مني خلاصة القول

عايز تشتغل يتبقى اخوان

يتبقى مدعوم من الفلول

.........

الواسطه هي الحل

عشانها الواحد أتذل

كلنا هناخد شهاده

وفي الاخر هتتبل

.........

حبينا نجاريك يا مبدع

والله ميه على ميه

تسلم ايدك يا ميدو

[قلب وكلمات]

ظريفة أوي محمد

بجد اسلوبها سلسل

حكاية واقع واللهجة عامية

ربتا يكرمك يا فنان وتلاقي شغل بدري بدري

تسلم اديك وقلمك

تحياتي

القيصــر

[Şα3Đ..♥]

اقتباس المشاركة الأصلية كتبت بواسطة nefertiti المهم النجاح وفرحته والباقي ان شاء الله مقدور عليه خوفتني ليه كدة من بعد التخرج انتوا هتلاقوا كافية تفعدوا عليه لكن احنا هنعمل ايه بئا نبيع مناديل في الاشارات كلمات خفيفة واسلوبها سهل برغم ان القضية معقدة احسنت اخي ودي وحترامي

انتوا ان شاء الله تشتغلوا سواقين تاكسي
ههههههههههه
منوره جدا
وتسلمي علي كلامك ومرورك

[ساحر الأحزان]

يمكن يا محمد لو كل واحد بص على أنة حياخد الشهادة وبعدها حينام

كان الكل ريح نفسة وبلاة التعليم ’’

ولية نتعب نفسنا على حاجة ملهاش لازمة ,,

فلازم تحط عندك اكتر من
أحتمال لو موفقتش بأنك تعمل بمجال تخرجك وتقدر تحقق طموحك بحاجة تانية أنت بتحبها

حميل منك يامحمد

ربنا يوفقك

[╯ Princess ╭]

الله اكبر
الله عليك يا محمد
انسجااااااام غير طبيعي بجد
جميله اوي
في حاجه غريبه بتميز كتاباتك
مش عارفه ايه هي
بس انا عايزه اقولك
انا عمري ما حبيت القراءه الادبيه غير دلوقتي
ولا عمري قرأت بإستمتاع ولا حتى ليا فيها
مش هنسالك الجميل دا

بجد انت كاتب راااائع
استمر
ومنتظره جديدك ع طول

[~ NoDa~]

مبروك ع النجاح
وكلماتك بسيطة
ابدعت

[ويبقى الأثر]

وهو ده حال معظم المصريين

ربى يسعد حياتك اخى ويوفقك لما يحب ويرضى

حروف عذبه وسلسه

تحياتى وتقديرى

[الابتسامه المصريه]

والله وجعت قلبى
ربنا معاكوا يا اولادى
على ال بتاسوه
وربنا يوفقكم
الى العمل وتشقوا طريقكم
وتبنوا مستقبلكم
وربنا معاكم
اسمح لي ابدي اعجابي بقلمك وتميزك واسلوبك الراقي وتالقك