بجد انا تعبت مش عارفة لية انا بالذات

[♥SaRa]

اسعد الله صباحكم
اطيب الله مسائكم
^
^
صراحة انا بجد مخنوقة جدا بسب الحكاية دي ومش عارفة لية دائما بيحصل معايا انا كدة كل شوية مشكلة ياتري دة من اية لاني خلاص بجد بقيت عايزة اولع في نفسي
بصوا الحكاية كلها
اني من يومين رن رقم غريب علياالساعة 3 المهم الصراحة رديت لان بعض الاوقآت زميلاتي بيتصلوا من فون حد من عيلتهم
وبعدين لما رديت حصل الحوار دة
انا:آلو
الشاب:ازيك عاملة اية يا سارة؟
انا: الحمدلله تمام مين معايا؟
الشاب :وازي ايدك عاملة اية؟
"انا ايدي مكسورة اصلا "
انا :مين حضرتك "بصوت بيزعق "
الشاب : تحبي اجيلك ولا تيجي
انا الصراحة اول لما سمعت كدة ارتبكت وقفلت في وشوا علي طول
"وعرفت انوا كان بيعاكس فا قولت عادي تلاقية بيقول "اسم بالصدفة "
وبعدين اعد يتصل كتير فا كالعادة لما حد يتصل ويعاكس
فتحت المكالمة وحطيتها تحت المخدة وخرجت اكمل الي كنت بعملة
وبعدين لما رجعت لقيتة قفل قولت بس يبقي خلاص مش هيصل تاني زي الي قبلة
وبعدين بعد الفجر كدة لقيتة بيصتل تاني
فا صراحة اتخنقت رحت قفلت الفون خالص علشان اريح دماغي
وبعدين بعد لما نمت وخلاص صحيت ع الساعة 2 تقريبا
وقولت افتح الفون بئة علشان اشوف لو حد اتصل بيا من زميلاتي علشان كنا خارجين في اليو م دة
وذهلت لما شوف 36 ميسد كول من الرقم دة
قولت لالا دة شكلة انسان بارد
وشلت الخط دة وركبت خط تاني معايا احطياطي ومحدش يعرفة غير الانتيم بتاعي "زي اختي بالظبط"
وركبتة
وبعد كام ساعة لقيت مسج مكتوب فية
عاملة اية يا سارة...."اسمي بالكامل"مش دة ميلك الفيس.... واية رائك في الياهو..."الميل بتاعي"
واية اخبار اهلك بتتصلي بيهم ولا مطنشاهم
علشان يكون عنك فكرة انا مش بحب التعامل دة خليكي كويسة."
صراحة اول ما شوفت المسج حسيت اني بحلم وجسمي قشعر
وبعدين اعدت افكر ومكنتش عارفة اعمل اية؟
وبعدين قفلت الفون خالص واتصلت بالتلفون الارضي بصحباتي واتفقنا اننا نتقابل في اليوم دة
وبعدين اتقابلنا وفطرنا في النادي وخلاص وكنا اعدين بنهزر ونتكلم وانا نسيت اصلا وكبرت دماغي وكان معايا الفون بس مقفول طبعاً
وبعدين زميلتي فونها رن وردت عادي وبعدين قالتي في حد عايزك يا سارة
رحت رديت يا تري مين الي عارف فون زميلتي
وقلت:آلو
"وصعقت لما سمعت نفس صوت الولد"
بيقول:بصي يا سارة انا قولتك مش بحب التعامل دة
فهمتي ولو مسمعتيش الكلام ذنبك علي جنبك
رديت:انت اكيد مجنون ومريض نفسي "بصوت عالي"
وقفلت في وشوا تاني
راحوا زميلاتي استفسروا قولت ليهم كذا كذا
راحوا قالوا ليا اني لازم تخلي احمد"ابن عمي يكلمة"
فا قولت حاضر
وبعدين لاقينا الجرسون جي يدينا عصير وقال الطلب يا افندم
فا كلنا قولنا ان احنا مش طلبنا حاجة اكيد حد تاني
راح قال بس في الكابتن جالي علي الكافية وقالي ان في بنت هنا اسمها سارة طلبت دة
بعدين البنات سكتوا وانا قولت ليها مفيش حد هنا اسموا سارة"وكدبت اعمل اية انا خلاص كنت مش قادرة"
وراح الجرسون مشي
وبعدين قولت ليها :استني طب وريني الكابتن دة
وبعدين رحت انا وزميلتي اية"الانتيم بتاعتي "
وراح الجرسون قال :اهو
"لقيتوا بيشاور علي شاب اول مرة اشوفة في حياتي "
رحت لملمت شجاعتي وقولت هروح لية.
اية قالت ليا :لا بلاش
انا صراحة اصريت علشان عايزة اعرف مين دة .
رحت قلت لية:لو سمحت حضرتك مين
رد:اهلا اهلا بيكي اخيرا ياة انتي عنيدة قوي
قولت لية وانا ببص بصة استحقار:انت اكيد مجنون رسمي وبعدين انت تعرفني منين
راح قالي:مش مهم عرفتك منين المهم انتي عاملة اية؟
رحت مشيت وشبتوا وبلغت امن النادي علية ان هو كان بيعمل اعمال شغب وبخيرم علينا
وبعدين رحت البيت وفتحت الفون علشان اطمن البنات اني وصلت
فا فتحتة وبعد ما خلصت مكالمة نسيت وسبت الفون مفتوح
لقيتو بيتصل فا رحت رديت واعدت اشتمة
وصوتي علي
فا طبعا ابن عمي اعد معايا في الشقة فا سمع صوتي
ودخل وانا بكلمة وقالي بتكلمي مين وسحب مني الفون ورد وبعدين اعد يقول ازاي طب ماشي وبعدين شتم وقفل المكالمة
وانا طبعا مكنتش سامعة بيقول اية
وبعدين ابن عمي قالي: اخس عليكي بجد اخس انا مش مصدق الي انتي عملتية دة
رحت رديت بأستغراب:فية اية انا معملتش حاجة دة كداب.
قالي هنشوف دلوقتي:وبعدين راح في مسج جة علي الفون
فرحت بفتحها لقيتها صورتي انا والولد الحيوان دة واحنا لما كنا في الكافية لما كنت بكلمة
راح ابن عمي اتعصب وراح اداني كام شتيمة وقالي :انتي مش لازم تعدي في مصر انتي تروحي مع اهلك في ايطاليا وهما يتصرفوا معاكي لاني بجد مش مصدق ازاي تعملي كدة.
صراحة انا بكيت واعدت احاول افهمةالحكاية كلها
وقولت لية طب اتصل بزميلتي وأسألها
راح بصلي وقال : لما نشوف اخرك؟
وفعلا اتصل بيها وعرف منها الحكاية كلها
وخد فوني مني
لغاية ما تخلص الحكاية دي
وبعدين انهردة اهو وقت العصرية كدة
لما كان ابن عمي برة
نزلت علشان كنت عايزة شوية طلبات
رحت السوبر ماركت وانا راجعة لقيت الشاب نفسة بصيت لية بصة استحقار وانا معدية من جنبوا
راح قالي : بصي لو ابن عمك اتدخل تاني متزعليش من الي يحصلك احسن ليكي ولية يبعد
انا كملت طريقي وكأني مش سمعت حاجة
وبس انهردة بليل مقولتش حاجةلابن عمي
لاني بجد خايفة علية
وانا دلوقتي قلقانة ومش عارفة اعمل اية
وكنت انهردة رايحة المستشفي علشان بخصوص الجبس وكدة
راحت لقيت مسج:
ألف سلامة عليكي
معلش بقي استحملي
وحتي الآن بيبعت مسجات
وبيتصل بس انا مش برد ومش بعمل حاجة
ومفيش فايدة لو قفلت الفون لان كدة كدة هو عارف كل حاجة عني
انا بجد حاسة اني منحوسة وربنا بيعاقبني علشان حاجة
بس انا بصلي وبعمل كل حاجة
ورغم كدة المصايب دائما ورايا
بجد انا نفستيتي تعبت وبقيت حآسة اني دائما مكتئبة
افيدواني وقولوا ليا اعمل اية وهنفذوا لو دة هيساعدني
لاني تعبت بجد

[۩۩ elMagic ۩۩]

غريب امر الواد دا
وإنه عارف عنك كل حاجه كده !
ممكن يكون تبع حد من صحباتك اللى دايما تتكلمي معاها
أو يكون ضحك على واحده منهم وخلاها تقوله كل حاجه عنك
وانتى مش معاكى حد كبير شويه غير إبن عمك دا ؟
عموما انتى مش قدامك غير إنك تلتزمي البيت شويه اليومين دول
ومتتكلميش بقدر الامكان مع اى حد من صحباتك فى اى حااجه
ويبقى قولي لإبن عمكـ اللى حصل بينك وبين الواد والتهديد بتاعه
ولو معاكى حد كبيير خليه يتدخل بردوا ..
واضح إنه واثق اوى من نفسه فا متضمنيش
ايه ممكن يحصل فا انتى متخرجيش خالص لفتره مؤقته أسلم ليكي
وإبن عمكـ شكله أكبر منكـ فا متقلقيش عليه
ربنا معاااكي ..

[طمطم]

اولا متقوليش انك منحوسة .

ثانيا اللى بيحصلك ده شغل هبل من واد تافه بيتفرج ع مسلسلات عربى كتير ,,
انتى قولتى انه عارف ميلك وفونك والمكان اللى بتقعدى فيه مع صحابك,, ده مالوش غير حاجة واحدة ..
حد من صحباتك هى اللى قالتله الحاجات دى , اصله مش بيشم ع ضهر ايده يعنى !

حلك ., ابن عمك يقدم فيه بلاغ ف اقرب قسم وياخد عليه تعهد انه مش يقربلك ,,
ساعتها هيعرف ان الله حق وهيحترم نفسه بالعافية .. بدل م هيتروق هناك = ))
انما تفضلى قافلة فونك ومرعوبة كده علشان عيل زى ده .. مينفعش!

[M.B]

انتي الاول لازم تعرفي مين بيدي الارقام وعرف الواد ده عنك كل حاجه

انتي تجيبيبي رقم جديد ومتديهوش لطوب الارض وتصبري وتشغلي الرقم الجديد ده كام يوم ولو محدش اتصل يبقي انتيمتك دي الي عرفته كل حاجه وهي الي بتديه الرقم وفي حالتك دي سامحيني لازم تشكي في كل الناس الا قرايبك

واعتقد انه مش هيعرف يتصل لان الي بيديه االرقم انتيمتك تمام

وخلي ابن عمك ضهرك يا ساره اي حاجه تحكيها عشان يعتبر ملكيش غيره

وليا كلام ليكي ع الخاص تاني زي ما قولت

[esra2 mohamed]

بصى هو اكيد حد من صحابك يعرفه
حاولى للاول تعرفى مين منهم
ولحد ماتعرفى متحكيش معاهم فى اى حاجه وعامليهم عادى جدا
بس من غير مايحسوا بحاجه وماتحكلهمش حرف عن اى حاجه

وابن عمك بقااا لازم يدخل ويتصرف بما ان اهلك مسافرين

ولازم تاخدى حذرك وفى طلباتك وكدا انزلى مع حد كبير لحد ماتنهى الحوار

[sεηυσяιтα ησOση]

متخافيش من حاجة تافهة

الولد ده مش هيقدر يعملك حاجة

انتىتخلى ابن عمك فعلا يعمله بلاغ

ده اسلم حل ليكى ومتخرجيش لوحدك خالص

واكيد واحدة من صحابك فعلا هى الى بتعرفو معلومات عنك

[نونو555]

اكيد حد من اصحابك هو الي بعمل كده وانتي حولي تعرفي بذكائك مين هي بدون متحسسي حد ويارب ربنا يوفقك ويبعد عنك الولد الندل الحقير ده

[نونو555]

انا مش عرفه اقول ايه ربنا يكون في عونك بجد

[روح صامتة]

يا بنتي حوار مدروس
هوة قبل ما يكلمك عارف تحركاتك
حوار ان ايدك مكسورة هوة شافها قبل كده
واضح انه له فترة مراققبك وانتي مش واخدة بالك
والدليل
انه قريب منك ف النادي و كمان من مكان السوبر ماركت
على فكرة اعتقد كمان الموضوع له علاقة بالماديات
اكمنه عرف عنك انه عايشة بره ممكن يكون حابب يستغلك ماديا
يا بنتي سيبيه يبعت وينادي ف مالطة
و يرن لما يزهق
و بلغي عنه ف القسم
هوة شكله بيقرا رروايات كتير
بس بردو كلامك عن رقم صحبتك بيدل انها عرفته بالرقم دا
او شوفي يمك انتي ع الفيس حاطاه
بالنسبة للايميلات و الفيس
فاكيد استعان بحد من صحباتك عشان يوصلك
او انتي كلمتيه من اكونت مزيف عادي بتتعمل كتير
ع العموم نفضي وكانه مش ف حياتك
وماتبصلهةش باستحقار
ما تبصيش اصلا ^^
و ابعدي عنه تماما لا تقربيله و لا تكلميه ابدا لانه هوة عايز كده
ربنا يوفقك
ارق تحياتي

[خارج عن القانون]

الحوار مالوش غير تفسير واحد

انه ساكن جمبك فى المنطقه ويا اما زميل او اخو حد تعرفيه او تعرفيها

والحل بسيط جدا تروحى امن النادى وتعرفى منهم عملو ايه مع الواد ده

وهو مين من الاساس وعضو والا ضيف

ولو عرفتيه بلغى ابن عمك او عمك نفسه وهو هيصرف

ولو معرفتهوش يبقا عادى جدا

تروحو تعملو محضر فى القسم بان الرقم ده بيرخم عليكى

وبيستخدم صور ليكى بطريقة سلبيه وبيحاول يبتزك

ساعتها هيجبهولك لغايه عندك

واقرار فى القسم بعدم التعرض

هيخليه زى اللى بتلبسيه فى رجلك ومش هتشوفيه تانى

وبخصوص تهديده بانه يآذى ابن عمك

فهو قالك كده علشان متقوللهوش

عشان هو فى الاصل خايف من ابن عمك

ومش عايزه يخش فى الموضوع ليخربهوله