ايه رايك في وجهة النظر دي؟

[™Amiliya]

حصل وان بنت بلغت الـ24 سنة متعلمة تعليم عالي مثقفة واهلها شايفين ان دا وقت تتجوز فيه

ويفرحو بيها اهلها مش عايزين يجوزوها الا من العيلة وهي رافضة مبدا العيلة

عشان المشاكل والامراض الوراثية وان هي معتبرة ان عيال عمها اخواتها

/


الاهل وجهة نظرهم ان ولاد العم او العمة او القرايب هم اولى ببنات العيلة من الغريب الي ممكن

ميققدرش بنتهم ويعملها مشاكل ويتعبها ومش ترتاح معاه وممكن يحصل بينهم عدم اتفاق

ويحصل ان بنتهم تعاني من الموضوع سواء في اولاد او لا

وان الغريب دا مش هيراعي اي حاجة ويدلو في دوامة هما بغنى عنها

-

اما انها تاخد من العيلة فان ابن عمها هيعزها ويحافظ عليها ويقدرها ويكرمها وهيراعي القرابة الي بينهم

ومهما حصلت مشاكل بينهم هيقدرو يلموها ويحلوها وانه من لحمها ودمها ودي ميزة

مش هتتواجد في الغريب

/

انتو ايه رايكم عل وجهة النظر دي صحيحة ؟ ام فيها نوع من الصحة ؟

-

تحياتي

[Stop Ana Eltop]

جواز القرايب مابيجلبش غير المصايب زى مابيقولوا
اول حاجه لو لقدر الله حصل مشاكل العيلتين خسروا بعض
ثانيا امراض الوراثه والاعاقات الى بتحصل للاطفال
وايه ابن عمها اولى بيها دى هى جاموسه مش عاوزينها تروح لحد تانى
بس ف الاخر دا قسمه ونصيب وساعة القدر بيعمى البصر
والسلام عليكم ورحمة الله وبركاته

[Lamees]

مش عشان في مميزات في ابن العم
يبقى لابد الجواز منه ده مش كفاية
لازم يكون الطرفين قابلين بعضهم
وكمان في تكافؤ بينهم
ده اهم من القرابة
طرح راقي ايمليا

[اشرف 2006]

اعتقد ان هذه العادات لم تعد موجوده الان الا فى الارياف


فالبنت اصبحت اكثر تعليما وثقافه عن ذى قبل والاهم


ان الزواج لا يتم بسبب القرابه بل يتم بالتوفق والحب


بين الطرفين ولا يوجد اى موانع ان تتزوج ابن عمها لو بتحبه


فالحياه الزوجيه اساسها الحب والتفاهم فقط لاغير


تقبلى تحياتى

[ŌиĹч.Ḿё]

ديمآآ بتكون مشكلة عند معظم البنات عشان الاهل وآلكلآم دأأ
الجوآآز مآ هو آلآ بطيخه محدش يعرف ايه جواها غير ربنا
متفهمنيش ان ابن عمها هيبقى كويس لآ سآعآت بتلآقى آبن
حلآل وبجد آللى ربنآ كآتبه ليهآ على بركه غلبهآ وآحترآمهآآ
وآن ربنآ مش بيعمل حآجه وحشة ..
موضوع آلام{اض ألورآثية دآ آنآ 4 عمآمى متجوزين 4 خألت
اللى همآ آخوآت آمى وآخوآتنآ الحمد الله كويسين وزى الفل بردو
واتجوز من بعض فا العلم دلوقتى مخللاش حاجه اسمها امراض وراثية
اللى لقليل
وراى المتواضع والاخير ان الاتنين مناسبين بس مينفعش الضغط فى المواضيع
دى وتصلى صلاة استخارة هيا ابداها من اى حد

ودى

[موري كول]

طيب مـ هي ممكن تتجوز واحد غريب اه ولاكن يحبها ويفهما عن ابن عمها ويقدرها كمان مش بالقرابه علي فكره


ومش في حاجه اسمها امراض وراثيه كل بأراده ربنا

وبرضو كل شئ اسمه ونصيب ^^

[ساحر الأحزان]

هو لكل واحد وجهة نظر

هما وجة نظرهم أن دة قريبها وعمرة ما حيهنا او يعاملها وحش بحكم القرابة

وهى وجة نظرها أن أهم حاجة فى الأختيار هى الحب والتفاهم

ودة لو أتوجد عند قريبها حتوافق علية

ولو أتوجد خارج العائلة يبقى حتختار

يبقى لكلا منهم نظرتة التى تحترم

ومعها أختيار الفتاة لشريك حياتها من دون أى ضغوط عليها ولكن ؟بالأقناع

جميل موضوعك

دمتى بخير

[اميره الشعر الشجين]

بصراحه انا مش مع حايه جواز القرايب دى مش بس عشان الامراض الوراثيه لان نادر ما بتحصل

بس عشان ان جواز القرايب دا بيعمل مشاكل يعنى نفرض ان مثلا واحد اتجوز بنت خالو وجه يوم زعلها اكيد امها هتزعل ومن اخوها كمان يعنى مشاكل احنا فى غنى عنها الا اذا كانو بيحبو بعض ومتفقين مع بعض

وبعدين لاغريب ولا قريب نافع كلو محصل بعضو والنهايه وحده الا اذا شاء الله يعنى الا هيعوزه الله هيكون

طرح رائع ياقمر ^_^

[الأميرة رودي]

هي نظريه خطأ
ممكن يكون ابن عمها بس مش بيراعي ربنا فيها او اخلآقه وحشه
ومفيش توافق بينهم فتتحول الحياه لجحيم بين الطرفين
وممكن يكون غريب عنها لكن متدين وعارف حقوقه وواجباته يحترمها ويقدرها ويحافظ عليها
بشوف علآات كتير بتكون ناتجه عن النظره دي وبتنتهى بالفشل
وأكتر من مثال حصل فى الواقع
بيكونو ولآد خاله أو ولآد عم ومش بيقدرو يكملو مع بعض وبينفصلو
هنا بقى بيحصل انشقاق فى العيله نفسها بينهم وبين بعض وبتكون العلآقه بعد كده سطحيه بعد ماكانت علآقه قويه
وبرده فيه ولآد عم بتكبر العلآقه بينهم لآعجاب وحب ويتزوجو والعلاقه تنجح ويكملو حياتهم مع بعض وببتوطد الترابط الآسري اكتر من الاول.
فهى مسأله بتختلف من شخص للتاني ومن ظروف لآخرى
.. ......
في مجتمعات بتتزوج البنت من ابن عمها رغما عنها ( لآنها تقاليد متوارثه )
حتى وان كانت تعيسه فى حياتها فهي مش من حقها تشتكي وتفضل عايشه حياتها بالشكل ده
وينتهى بها العمر وهيا أم وزوجه لآنسان مفيش بينها وبينه حب
للآسف المجتمعات دي موجوده لحد الوقتي .. وبتتحطم فيها طموح وحياة انسانه
زي البـدو - أو الصعيد
لسه فيه ناس بيفكرو بالشكل ده ومش عاوزين يفهو ان التفاهم والتقارب ( العلمي والاجتماعى و الثقافي والمادي ) مهمين جدا فى تكوين اسره جديده ..
بغض نظره عن صله القرابه او ان كانو غرباء .

موضوع قيم ايمي
تسلمي
فيض ودي

[™Amiliya]

اقتباس المشاركة الأصلية كتبت بواسطة stop ana eltop جواز القرايب مابيجلبش غير المصايب زى مابيقولوا اول حاجه لو لقدر الله حصل مشاكل العيلتين خسروا بعض ثانيا امراض الوراثه والاعاقات الى بتحصل للاطفال وايه ابن عمها اولى بيها دى هى جاموسه مش عاوزينها تروح لحد تانى بس ف الاخر دا قسمه ونصيب وساعة القدر بيعمى البصر والسلام عليكم ورحمة الله وبركاته

هههههههههه ايه جاموسة دي يابنتي ربنا يكرمك

هو بالنسبة لامراض الوراثية في كشف طبي بيتعمل بخصوص الزواج ويبان لو في حاجة ولا

منوراني