قهوة واحدة تلمنا كلنا !

[* Fares *]

" وانت ايه رأيك يا دكتور ؟ "

كان هذا السؤال البرئ براءة الذئب من دم ابن يعقوب موجهاً إلي من قبل أحد معارفنا الشباب والذي أنهى مؤخراً دراسته الجامعية بكلية الآداب بقسم نسيت اسمه ويسألني عن رأيي بخصوص الموضوع مجال البحث وهو " يقدر يشتغل ايه بشهادته ؟ "

وماله !
ما دام السؤال in public ومفيهوش feelings يبقى so what

وكرد فعل طبيعي لثقته الغالية التي وضعها في وفي رأيي المتواضع فقد أخذت أفكر وأفكر .. وأزحف وأتوغل وأنتشر وأتسرب " إعلان مش حيفتكره غير جيل الثمانينات "
ولكن لم أجد بداً من أن أقول في النهاية كما قال الزعيم عادل امام :
" اتكل على الله واشتغل رقاصة "

وربما تبدو للوهلة الأولى أنها مزحة
لكنها في الواقع أصبحت حقيقة علمية مثبتة بالتجارب والأدلة

فيا سيدي المحترم يسعدني أن أقول لك أن من دعوته أنت " دكتور "
قد ظل لفترة لا بأس بها يبيع البامبرز والسريلاك وشامبو لا دموع بعد اليوم وأشياء شبيهة بلولوا الشياكة عنواني وأشياء أخرى أخجل من ذكرها !

نعم يا عزيزي بعد خمس سنوات من الـ practical والـ theoretical
والدوران بين الـ sheet والـ presentation والـ MCQ

تخرجت لأجد نفسي مسعراً الساعة بـ 70 جنية
ورحم الله امرئ عرف قدر نفسه !

لكن كما يُقال
لا يأس مع الحياة ولا حياة في مصر

جميعنا يشق طريقه حسب الإمكانيات المتوفرة
ويرضى بأي فرصة عمل تلوح له في الأفق عشان " المم "
وعشان يحس انه راجل ومسئول عن نفسه ويبطل ياخد مصروف

وإذا انتظر خريجو الجامعات وظائف تتناسب وتليق بشهاداتهم الجامعية
فالقهاوي مش حتلاحق على الطلبات

البطالة في مصر أصبحت لا تعني عدم وجود فرص عمل
ولكن تعني وجود عمل " زي قلته "

عمل لا تجد فيه نفسك ولا طموحاتك
ولا يتناسب مع وضعك العلمي

عمل عقيم
لا يمنحك فرصة للتطور والإرتقاء

وأيضاً عمل لا يسد إحتياجاتك المادية
وإنما يسمح لك فقط بحفظ ماء وجهك وعدم مد يديك للتسول من الرايح والجاي

أما الأعمال الحقيقية التي توفر كافة سبل الرفاهية لصاحبها
والتي يجد أصحابها تقديراً وإهتماماً من الدولة
وإحتفالات
وتكريمات
فهي أعمال لا تحتاج إلى شهادات علمية
مش محتاجة غير ليونة

وهناك إتجاه جديد لإنشاء مدارس للرقص لتعزيز الليونة بالعلم !

فكما قال الشاعر :
الأم مدرسة إذا شخلعتها
أعددت شعباً لين الأوساط

وربنا يوفق الدنيا على بعضها

^

بقلمي
تحياتي للجميع

[ساحر الأحزان]

انا تخرجت لو لقيت مجال عمل يناسب تخصصى يبقى كويس ؟ولو ما لقيت العمل فى أى مجال

كحل مؤقت أفضل لحد لما أوجد فرصة عمل مناسبة

تناسب طموحى واجد فيها نفسى

مقال جميل فارس

بالتوفيق

[سندس]

شكلك كنت فى صيدلة
بتبشرنا ليه بس
هنعمل ايه هى دى طبيعة بلدنا
نتعب و نجتهد سواء فى مجال و فى الاخر منلاقيش شغلة عدلة
الولاد يقعدوا عالقهوة
و البنات تقعد فى البيت
موضوع حلو اخى يسلمووو
و خليك متفائل يمكن تلاقى شغل

[همس الحنين]

فعلا مافيش حد بيتعلم وبيشتغل فى مجال تعليمه

الا قليل لان مافيش فرص عمل متوفره

واى خريج جامه مجبر يعمل اى شئ كى تستمر الحياه

منظومه فاشله فى كادر التعينات

تسلم لمقالك

[A-rab3awya]

فعلا هى ديه مصر
كفايه بس شعورك وأنت داخل كليه وأنت عارف أنك طالع منها من غير ﻻزمه وهتقعد زيك زى ماتعملمش من أصله
يلا ربنا يجازى اللى كان السبب...
والله يبشرك بالخير دايما كده :-)
وربنا يحفظ مصر و ترفع راسنا وطموحنا
تسلم ع موضوع الجامد دة...بجد حلو أوى

[ابو نصير]

سئلنى صحبى وقلى يابو نصير ابنك لما يتخرج من الجامعه ناوى يشتغل إيه
يشتغل قرن فلفل فى وزارة الطرشى هو فى يابو نصير وزاره بالأسم ده انا اول مره اسمع عنه
وانا كمان
تحياتى على الموضوع الراقى الذى يعالج براميل الطرشى اللى قاعدين فى الوزاره
بتوع البلد اللى نفخونا من ماية اللفت وسلملى ياأستاذ فارس على ابو الليف
اللى هيخلى البلد تمشى على وحده ونص ورقصنى ياجدع
واللى موش لاقى شغل يهز ؟؟؟؟؟؟؟؟؟؟
ابو نصير

[Words Whisper]

المُضحك المبكي
آه وربنا دا حالنا ..


بحب أسلوب حضرتك
الساخر القيم الراقي ..
الله يعطي حضرتك العافية
فعلا بحب أقرأ لك
شاركنا دوم بئا بقلمك ..




تقييمي - 5 ستارز ..

[دفاتر القمر]

دُمتَمْ بِهذآ الع ـطآء أإلمستَمـرٍ

يُسع ـدنى أإلـرٍد على مـوٍأإضيعكًـم

وٍأإألتلـذذ بِمـآ قرٍأإتْ وٍشآهـدتْ

تـقبلـوٍ خ ـآلص إحترامي

لآرٍوٍآح ـكُم أإلجمـيله

[* Fares *]

اقتباس المشاركة الأصلية كتبت بواسطة ساحر الأحزان انا تخرجت لو لقيت مجال عمل يناسب تخصصى يبقى كويس ؟ولو ما لقيت العمل فى أى مجال كحل مؤقت أفضل لحد لما أوجد فرصة عمل مناسبة تناسب طموحى واجد فيها نفسى مقال جميل فارس بالتوفيق

بالظبط كده

شكراً جداً لمرورك

[* Fares *]

اقتباس المشاركة الأصلية كتبت بواسطة سندس شكلك كنت فى صيدلة بتبشرنا ليه بس هنعمل ايه هى دى طبيعة بلدنا نتعب و نجتهد سواء فى مجال و فى الاخر منلاقيش شغلة عدلة الولاد يقعدوا عالقهوة و البنات تقعد فى البيت موضوع حلو اخى يسلمووو و خليك متفائل يمكن تلاقى شغل

oui mademoiselle

كنت في صيدلة

وأنا هنا بتكلم عن بداياتي وبدايات أي خريج

لكن أنا حالياً الحمد لله بشتغل في مكان أفضل بكتير

فيه assistants يقوموا ببيع الأشياء المذكورة في المقال

وعدت أنا إلى قواعدي سالماً في عالم الأدوية