اعمـل إيـه ؟

[رآقيہ بأخلاقـى]

السلام عليكم ورحمة الله وبركاته
.....
يا جماعه انا النهاردة جايه ومعايا مشكلة
بصوا بقى انا وقع تحت ايدى حساب فيس بوك
لبنوتة جارتنا وهى صغيرة فى السن عندها 14 سنه
فى تالته اعدادى ..
الاول هقولكم انا وقع تحت ايدى الحساب ازاى
علشان محدش يفكر انى بشتغل فى الهكر والكلام الفاضى دة
البنت دى كانت بتفتح الفيس بتاعها من على جهازى
لان النت عندها مفصول وهى تبقى صاحبة بنت اخويا
المهم حسابها اصبح متسجل عندى واقف بس على كلمة السر
ولسوء حظها قالت لبنت اخويا على كلمة السر وطلبت منها
انها تفتح الفيس ولو لاقيت حد بيكلمها تقول ان هى فلانه صاحبة الاكونت
المهم انا بالصدفة داخلة الاوضه على بنت اخويا لاقيتها تنزل المتصفح تحت
عرفت ان فى سر ومش عايزانى اعرفه .. بس على مين
طبعاً سألتها وقلتلها فى ايه وبتكلمى مين قالت ده حساب فلانه
وقالتلى اعملى كذا كذا قومتها وقولتلها خلينى اشوف هى بتعمل ايه
وشوفت بقى اللى كنت متوقعاه منها بتكلم شباب وقصص حب مع اكتر من واحد
ومن ضمنهم واحد اكبر منها بـ 12 سنه يعنى عنده 26 سنه
اتصدمت من اللى شوفته ومخى وقف عن التفكير
ومش عارفة اتصرف ازاى .. كل اللى عملته انى حذرت بنت اخويا منها
وفهمتها ان اللى بتعمله البنت دى غلط كله وكمان قولتلها احنا اصحاب
لو حصل معاكى اى حاجة تعرفينى بيها علشان لو وقعتى فى مشكلة اعرف اساعدك
انما بقى البنت صاحبة الاكونت مش عارفه اعمل معاها ايه
انصحها ؟ مش هتسمع منى يعنى هتقولى حاضر وخلاص
وترمى ورا ضهرها وتستمر فى اللى هى بتعمله
ولا اقول لمامتها وهى تتصرف معاها ؟
خايفه انى اتسبب ليها فى مشاكل كتير وكمان ممكن والدتها متصدقنيش
وتقول انى عايزة اسوء سمعت البنت
وللاسف والدها متوفى بس فى اعمامها وبردو لو عرفوا ممكن يا تبقى مشكلة ليها
يا اما يحولوا الكلام ده كله عليا انا ويقولوا انا اللى كدة
وعايزة اسوء سمعت بنتهم
ياريت لو حد عنده حل تانى يقولى عليه لانى بجد محتارة ومش عارفه ايه اللى ممكن اعمله
فى مشكلة زى دى ... لو مكانى هتعمل \ى ايه ؟؟؟

[Aya 7ekaya]

مشكله كبيرة اووى ي نور اهم حاجة انتى تبعدى بنت اخوكى عنها وتتابعى الموضوع وتتاكدى انها تبعد عنها

انا رايى انك تحاولى تكلمى البنت بردو ولو عرفتى تتابعى الفيس بتاعها ده وتشوفى اتمعت لنصيحتك ولا لأ تابعيه لقتيها رميت الكلام ورا ضهرها قولى لولدتها ووريها الكلام علشان هى كده بتضر نفسها جدا وممكن تقع ف مشكله ومشاكل كمان كتير

[اميره الشعر الشجين]

14 سنه !!! وبالتفكير دا
بصراحه موقف جدعنه منك مع بنت اخوكى بس برضو حاولى انك تنصحى البنوته دى بينك وبينها وتفهيمها ان دا غلط وممكن يوقعها فى مشاكل كتير من غير ما تحس

[™Amiliya]

الاول حببتي لازم تحطي في بالك انها في مرحلة مراهقة سواء البنت او بنت اخوكي
الي بتساعدها في بعض الاشياء
وغياب الرقابة والوعي والارشاد في المرحلة دي وقبلها من ناحية الام قبل اي حد خلاها تعمل كدا

انا راي تتكلمي مع ممتها بشكل عام وتوعيها وانها تصاحب بنتها قبل متنزل عليها العقاب
لان البنت لو واجهوها هتعند او تعمل اكونت تاني محدش يعرفو وتتصرف بذات التصرفات
لكن الحوار ومعرفة الحرام والحلال والغلط والصح هي هتقرر بنفسها بعد التوجيه هي عايزة تكون ايه وتتصرف ازاي
هي صغيرة ومحتاجة ايد مساعدة بعقل وقلب مش منفصلين

وربنا يستر ع بناتنا وولادنا من الشر

[شاعر الحب الحزين]

الموضوع له حلول كتير يا نور

هي صاحبة بنت اخوكي صح فهمي بنت اخوكي تفهم صاحبتها

ان الكلام اللي بتعمله ده غلط وانها لسه صغيرة ع الكلام ده

اعزمي امها على فنجان قهوة عندكم وفهميها بالذوق كده

لو ما صدقتش وريها اللي بنتها عاملاه ف الفيس من الكلام مع الشباب

هي لسه صغيرة يعني جاهلة بتحب كذا واحد ماشي ما هو مش كل حب حب

ده جهل وكلام فاضي ولازم حد يوعيها ويفوقها من اللي هي فيه

انتي بإمكانك مادام حفظتي كلمة السر تدخلي بالأكونت بتاعها وتطلبي من الشباب

يبعدوا عنها على اساس انك انتي هي ك واجب اخلاقي وفعل انساني

لإن اللي بيمشي ف الطريق ده بمزاجه مش هيسيبه غير بالعافية

قدامك اكتر من حل يا نور اختاري الحل المناسب وطبقيه

موضوع جميل وبيدل على اخلاقك الجميلة وخوفك ع البنات ومستقبلهم

ربنا يسعدك ويوفقك ويقدرك على فعل الخير يا نور

تسلمي

[مُنـــــايا]

شوفي يا نور الحل الوحيد ..انك تبعدي بنت اخوكي عنها بهدوء
وتصاحبي بنت اخوكي وتكوني دايما رقيبه عليها لانها بسن خطر

وثانيا ً ...البنت التانيه ده مش في حل غير انك تكلمي مامتها بهدوء وتوعيها
وتخليها تراقب بنتها ما دام والدها متوفي ........
سن 14 سنه ياااااااااااربي ....ده احنا مش كنا بنات بقي
ربنا يهديها يارب

[ساحر الأحزان]

البنت دى مسكينة ودة لأنها فى عمر صغير وبداية سن المراهقة الى فية أى كلمة حلوة

بتصدقها وخصوصا وأن والدها متوفى وأن رقابة مامتها عليها غير كافية لأن ما نعرف ظروفها أية ؟

يمكن ست عاملة وعدم تواجدها عمل فراغ عند البنت أو ليها أخوات كتير ومسئولياتهم كتيرة

والأم مضغوطة ؟

أنتى الأول أقعدى مع البنت دى وعرفيها بتجارب تصرفاتها بقصة أو موقف منك قرتية وسمعتية

قبل كدة وأن تعدد العلاقات مش فى مصلحتها ..وخصوصا وأنها فى سن حرج جدا

وأقنعها حيحتاج منك وقت على شان تعرف سوء وعواقب تصرفاتها

وأن غلبتى أقعدى مع مامتها وشوفى علاقتها معاها أزاى وأن حصل وفتحتى موضوعها يبقى هاتية بطريق غير مباشر

أن دى فتاة صغيرة ومحتاجة منها أنها تعاملها كصديقة وتقرب منها على شان تحكى ليها

وتقدر تنصحها وتابعها

وربنا يصلح حالها

[دفاتر القمر]

البنت صغيره ومحتاجه النصيحه
كلميها ولو مامتها عرفت انا بعتقد
انهاهتشكرك بس خلي ده اخر محاوله
واكيد ده هيكون عمل خيري منك
وربنا هايجزيكي عليه
ماتقوليش مليش دعوه يمكن ربنا بين حقيقتها ليكي
عشان تنصحيها ربنا معاكي وابقي طمنينا عملتي ايه

[انا جيجي]

بصى يا نور الاول موقفك مع بنت اخوكى موقف انسانة عاقلة

بالنسبة بقا للبنتين اولا بنت اخوكى تحاولى تاخدى منها الباس وورد بتاع الفيس بتاعها ومن وراها تتابعيها فى كل حاجة بتعملها

والبنت التانية تحاولى تكلمى معاها بالراحة
وتنصحيها منفعش معاها تروحى لمامتها وتخليها تقرا الكلام الى انتى شوفتيه بنفسك عشان بنت اخوكى تبقا فى السيلم وانتى بكده تكونى انقذنتى البنت التانية من دوامة يا عالم هتعرف تخرج منها ولا لا

[همس الحنين]

مبدئيا انتى اتصرفتى صح

الامر خطير ومش جديد ومحتاج رقابه شديده من أهلها

المشكله فى انك توصلى المعلومه للبنت بطريقه غير مباشره

سواء تنصحيها من بعيد لبعيد

سواء تكلمى امها عن امر مشابه لزميله للبنت

منعا انها تقع فى مشكله مع اهلها

سن خطير ومحتاج متابعه من حديد

بس استمرى مع بنت اخوكى وحوارك يكون معها بمحبه ولين

ربنا يسترها على كل البنات

تسلمى يا نور