فلسفه مصرى - ام الاجنبى

[pu.z.z.le]

الدنيا زى المرجيحه يوم تحت وفوق .....

من بديهيات الفلسفه المصريه منذ فجر التاريخ من ايام رع ونفرتيتى الى مادو وريتاج ان تحاول رصد كل ما هو غائب عن الادراك وطرحه فى صوره منمقه سهلة الفهم

حيث انه كانت ولازالت المدرسه الفلسفيه المصريه غنيه بالتراث وغنيه أيضا بالتناقضات ... وتعد الاقدم والاندر بالتاريخ ....

كثيرا ما وقف الاخرين فى حيرة من امرهم وفى النهايه لجأوا للتوصيف البليغ للحاله المصريه بجملة

عجيب أمركم أيها المصريون ...

لا تملك امام الحس الفلسفى المصرى الا انك تفتح بقك وتطلع عينيك لبرا وتقول (( هاااااااااح )) >>>>> احمد موسى استايل .

منذ القدم والمصرى يمارس فلسفته وفق ما يسمى (( الدماغ العاليه )) ... قلما تجد رابط واحد بين مدلولات افعاله واقواله ... فقط انظر وانتظر واصمت وقول (( لله فى خلقه شؤوون ))

المصرى فى فلسفته الحياتيه دأب على الانتقاد .. بداية من انتقاد الذات .. لحد انتقاد الجمادات ..

فطبيعى تلاقى مصرى بيتريق على نفسه وفى نفس الوقت عادى جدا يتريق على زوزا (( عربيته يعنى ))

كثيرا ما وقف الفلاسفه المتأثرين بالفلسفه الاغريقيه ورجال الحكمه البوذيين والمتأملين الصينيين جاحظى العينين من براعة المصرى فى تناول قضايا شائكه حيرت ملايين الفلاسفه والحكماء على مر العصور ... فعادى جدا لما تسمع

اقلب القدره على فمها ... تطلع البت لامها ...

فى صوره حياتيه بتلخص معاناة الرجل منذ استجابة ستنا حواء لاغواء الشيطان واكلها للتفاحه من الشجره .. الى استجابة زوجتك او حبيبتك لنصايح صاحبتها وامها واختها وجارتها وبنت عمها وبنت خالتها واى واحده تقعد جنبها فى الميكروباص .... الامر الذى استلزم من باقى فلاسفة الكون على مر التاريخ انهم يكتبوا مجلدات ومليارات الصفحات علشان يوصلوا لنفس الحقيقه وهى ان النكد بالنسبه لحواء شئ وراثى واعتيادى مش امر طارئ

ومن ثم اقتبس عنه الاخرين فى مزكراتهم خلاصة ما وصل اليه المصرى فى فلسفته عن تلك العلاقة المتوتره دائما بين المراه و المرأه .. كعلاقة أم الزوج بالزوجه او ام الزوجه بالزوج

إذا كانت الغلة تيجى قد التبن ... كانت الحما تحب مرات الابن ......

أول حزنها .... جواز ابنها

الحما حمة ... و لو كانت ملكة من السماء ....

قالوا : حماتك تحبك ... قلت : دا كان زمان .. و بنتها عندها يا ما شيعت نسوان ... لما جرى اللى جرى و المقدر كان .. صبحوا يقولوا عليا دا حرامى و بيسرق الكِتان ...



او كما فى علاقة البنت بالبنت فى الحصول على العريس ....

ان كان بختى فى حجر أختى اخطفه و اجرى ...

فى اشاره واضحه الى الطريقه التى ينبغى ان تكون عليها الفتاه حتى تحصل على ما تريد ... كما قال امير الشعراء

وما نيل المطالب بالتمني ولكن تؤخذ الدنيا غلابا ...


وعلى الناحيه الاخرى لم تترك مدرسة الفلسفه المصريه المرأه بينها وبين ذاتها .. بل تواجدت بقوه لاسداء النصح وتوجيهها فى حياها سواء العائليه او غ6يرها .. فى صور متعدده تجذبك ببريقها الى عوالم اخرى تصنع لديك الفارق الحسى فتنسل من مكانك لتهيم بافكارها نحو اللاحدود (( ))

على سبيل المثال

ان كنتى وحشة .. خليكى نخشة

الطويلة تقضى حاجتها ... و القصيرة تنده جارتها ...

الغجرية ست جيرانها .. ان ما خافوا منها يخافوا من لسانها ..

أول سبوع يا عروسة خوخة و تفاحة .... و تانى أسبوع يا عروسة على المحكمة راحة ..

جت العازبة تشكى ... لقت المتجوزة بتبكى ...

اللى يسعدها زمانها تجيب بناتها قبل صبيانها .... (( علشان بتكبر بسرعه وتربى معاها اخواتها وتشيل عنها شغل البيت .. ياله من مكر ))

اما عن علاقة المرأه بالرجل فقد استفاضت فيها المدرسه الفلسفيه المصريه مدعمة ومساندة لتكوين اسره صالحه لتكون نواه لمجتمع قوى .. فكان الاتى

الحس عالى و السرير خالى ....

حطى جوزك فوق السطوح .... ان كان فيه خير ما يروح ...

خد بنت الندل ... و خاصمه ...

خدى شايب يدلعك ... و لا تخدى صبى يلوعك ...

اللى يقول لها جوزها يا عورة .... الناس يلعبوا بيها الكورة .....

- واسداءا للنصح لم تترك تلك المدرسه الفلسفيه المرأه بدون توجيه لكيفية الحفاظ على بيتها وزوجها

ابنك على ما تربيه .. وجوزك على ما تعوديه ...

شايلة و مرضعة .. و جارة أربعة .. و طالعة الجبل طالبة الحبل (( بتكتفه بالعيال ))

قصقصى طيرك .. لا يلوف على غيرك ...

طول مانى قاعدة على الحصيرة ... ما انت شايف طويلة و لا قصيرة ...

كما لم يبرح المصرى مجلسه الفلسفى قبل ان يضع علامات تقود المتلهف الى المسار الصحيح فى تعاملاته .. من خلال الربط العبقرى بين الانسان والمكان ... على سبيل المثال

جاور الحاوى ..... و لا تجاورمحلاوى

المنوف .. لا يلوف .. ولو اكلته لحم الكتوف ..

مايه مالحه .... ووشوش كالحه ...

و فى صوره اخرى يلخص المصرى بفلسفته ما يطمح اليه الانسان من امور بدوما وهو أن يصبح ابنه ممتهنا لما يقوم هو به فكان

ابن الوز ..... عوام

وانطلاقا من تلك الجمله البلاغيه توارث البشر لالاف السنين وظائف اباءهم ...

عندك مثلا

.. ابن الفرعون - فرعون
وابن المستشار وكيل ونيابه


------------------ نتكلم جد بقى -----------------

المثل الشعبى ما هو الا تجربه واقعيه من نبض الحياه .. من تعاملات الناس .. وارد جدا يحصلك او يحصل لغيرك ..

انا معنديش اعتراض عليه خصوصا ان فى امثال لما تطبقها بعد فرز معانيها تلاقيها صحيحه الى حد بعيد ... لانها فى الغالب بتكون نتيجة لعصارة تجارب على نفس الموقف ..

المشكله بتكون مع نوعية الامثال اللى مؤداها نصايح ... اللى مستقاه من رؤيه الله اعلم مين صاحبها ... اكيد انا هنا بتكلم مع ناس متعلمه ومثقفه ومدركه وقدرة المثل الشعبى فى التأثير عليهم ضعيفه ... دا 90% من الامثال اللى ذكرتها تلاقيهم اصلا اول مره يسمعوه

تناقل الخبرات بين الناس كان فى زمن من الازمنه هو الوسيله الوحيده للمعرفه .. وكانت الامثال الشعبيه بمثابة دستور غير مكتوب بيجتمع عليه الناس .. وبمجرد ما كنت تقول (( على رأى المثل )) تلاقى الناس اصغت لكلامك واتهيأت انها تقتنع ولا سيما لو قدرت تجيب مثل شعبى ينطبق تماما على الموقف اللى بتتكلم عنه ...

النهارده اصبحت الامثال الشعبيه مجرد تراث ... لما نبص فيه ونحاول نفهمه ونستوعب اللى فيه هنتعب لان اغلب المصطلحات من ازمنه بعيده ... لكن على النقيض فى ملايين المصريين لسه بيتناقلوا الامثال الشعبيه فيما بينهم .. وبيرددوها وبيستشهدوا بيها فى نقاشاتهم وحواراتهم ...

والمشكله هنا هو ان اغلب الامثال دى اصبحت بالنسبه لعضرنا (( expire )) منتهية الصلاحيه ... ومع ذلك فهى مستمره معانا بشكل او بالتانى ...

فى اى مكان فى العالم هتلاقى فى امثال شعبيه بتتناقلها الناس .. لكن عندهم القدره على الفرز بين ما هو صالح وما هو طالح .. مش بيرددوا زى البغبغانات بالاضافه لكم الفائده والبلاغه اللى بتلاقيها بين الكلمات .. يعنى على سبيل المثال

يوجد دائماً من هو أشقى منك ، فابتسم
There is always one who suffers more than you do, so you should be optimistic.

عندما تحب عدوك يحس بتفاهته
When you love your enemy is when he feels of his emptiness.


إذا طعنت من الخلف فاعلم أنك في المقدمة
If you have been betrayed from behind the scene, then you should be proud because you are the only one who is in front.

كلنا كالقمر .. له جانب مظلم
We are all like the bright moon, we still have our darker side.

لا تتحدى إنساناً ليس لديه ما يخسره
Don't challenge someone who has nothing to loose.

المهزوم إذا ابتسم أفقد المنتصر لذة الفوز
If the loser keeps his smile the winner will loose the thrill of victory.

لا تطعن في ذوق زوجتك، فقد اختارتك أولا
Don't be critic to yor wife's taste, she is the one who selected you at the first place.

امثال فعلا تحسها مناسبه جدا لكل العصور ... وتقدر تستوعبها وتلامس جواك الحقيقه اللى بعدها ممكن تقول (( فعلا كلام صح ))

احنا محتاجين نطور من تراثنا ونعيد تقييمه .. وننبذ الردئ منه ... ونحافظ على القيم ونحدثه ...

انكارنا لتراثنا القديم بالكليه .. مش صحيح ... وحفاظنا عليه برده بالكليه امر غير مرغوب فيه ...

انت نفسك تقدر تستقى من تراثنا فى الامثال الشعبيه بعض القيم وتطورها وتوصلها لنفس القيمه اللى قراتها فى الامثال الاجنبيه اللى عرضتها من شويه ...

فكرة انك تتهم كل ما هو قديم بالتخلف والرجعيه .. دا بقى هو التخلف ذاته .. لان ماليس له ماضى .. لا حاضر له ولا مستقبل .

بالتوفيق للجميع ...

(( تم اقتباس الامثال الانجليزيه بترجمتها .. ))

[همس الحنين]

بصراحه علشان اقرأ موضوعك لازم اكون مركزه

احيانا بتكون متوجه لفكره وتنيهها بفكره اخرى

فوجب على قرائك الاصغاء بتمعن

يمكن جزئيه الامثال فعلا اتفق معاك فيها انها اغلبها مأخوذه من الواقع ساعات منها صائب واغلبها قد يكون مخالف عقائديا وده بيكون منهى عنه واننا نتلفظ به من الاساس

بس مش بننكر ان الامر لابد وا يكون حاصل وواقعى والا من اين اقتبس العالم ما يقال عنه مثال او حكمه

والجزيئه التانيه اللى بتفق معاك فيها ان من ادعى ان الماضى تخلف فهو بالاصل معاق فكريا

لان الماضى اساس الحاضر وعين المستقبل

انما نأخذ منه العبره او ما نستفاد به فى مجالات الحياه

الفلسفه المصريه غريبه لان شعبها دائما ما يمزج الجد بالتهريج

دائما ما يقلب الحزن الى تريقه ولو على ذاته

احيانا مجديه واحيانا محزنه
يمكن مش فلسفه بس طبيعة وسمات وضعت بنا

تقدير الكامل لمقالك

[Lamees]

يمكن أننا نتبع الأمثال الشعبية دي أمر أصبح معدوم
الأمثال دي فعلاً أصبحت تراث فقط ولا يؤخذ به ولا يوضع في الأعتبار
أغلب الأمثال المصرية المذكورة لأا أعرفها ولا أسمعها
يمكن تكون بتترد في أماكن تانية بس تقريباً محدش بيمشي وراها أوي كده
غير لما يكون قبلها لغى عقله ومش مطلوب أننا نلغي عقلنا ونمشي وراء
أمثال قد لا تنطبق على الجميع
ولكني معك في تطوير هذة الأمثال وأعادة تقيمها بما يناسب
عقولنا حالياً وأحتياجاتنا

تسلم أخي للطرح

تقييمي
ودي ..~

[™Amiliya]

تيتا الله يرحمها كانت كل كلامها تقريبا وتوجيهاتها واستغرابها من تصرف
وتوضيحها لاخطائنا مستند ع مثل شعبي وكنت دايما اقولها ابه الافاظ البلدي دي الناس اطورت يانناه تضحك عليا وتقولي مثل تاني للحالة الي انا فيها فكنت شايفة وقتها مفيش فايدة فيها
ومع الوقت كبرنا وكبرت معنا الامثال وبقيت جزء من الحياة اليومية في البيت
لدرجة احيانا انا واخويا لما نعمل حاجة او نقول حاجة نيستناها تتحفنا بمثل

كميةكبيرةومتنوعةكانت في جعبةجدتي خاصةاقلب القدرة ع فمها تطلع البنت لامها كنت اترق واقولها لا تطلع البنت لجدتها عمتها مبقيش ممتها يانناه

ع قد مابكون متغاظة من بعض الامثال الا انها بتوصف حالة حقيقية بنعيشها وممكن ترطب علبنا الاجواء وزي مقالت همسات الجعب المصري قادر ع مزج الكوميديا وقلب الحالات من والى

طبعا الامثال المترجمة اكثر فائدة لسبب انها بتقولك خلاصة حكمة خلاصة الموقف تعظيك نتيجة للحالة ان كان كذا اصبح كذا

كل الامثال العربية والغربية تعتبر،حصيلة مواقف وخلاصة للحياة

بحبها حقيقة بسبب جدتي اولا واحيانا بستخدم منها الي يلخص حوار معين
بينقذ الموقف وبينهه بظريقة مختصرة

واكتر الامثال بستخدمها عشمتني بالحلق خرمت انا وداني ههههه بقولها باستمرار لاهلي لو قالولي هيعملولي حاحة واتاخرو او طنشو ولصحابي بردو

والمثل التاني يقتل القتيل ويمشي في جنازته
دا طبعا شيفاه قمة الصح لكل انواع الغيبة والنميمة وضرر الاخرين ولامبالاة في انتهاك الحرمات

اسعدك الله ذكرتني باشياء لا تنسى

[ساحر الأحزان]

الامثال تراث شعبى

وحكم متوارثة

بتكون عن تجارب عاشوها ناس قبلنا

فبتفضل زى التاريخ كدة بتتناقلة الاجيال

برغم ان فية امثال غريبة وعجيبة

الا انها بتكون من النوع المرح احيانا

وكتذكرة للخبرة المتوارثة

مقال جميل منك

[pu.z.z.le]

اقتباس المشاركة الأصلية كتبت بواسطة همسات فوق القمر بصراحه علشان اقرأ موضوعك لازم اكون مركزه احيانا بتكون متوجه لفكره وتنيهها بفكره اخرى فوجب على قرائك الاصغاء بتمعن يمكن جزئيه الامثال فعلا اتفق معاك فيها انها اغلبها مأخوذه من الواقع ساعات منها صائب واغلبها قد يكون مخالف عقائديا وده بيكون منهى عنه واننا نتلفظ به من الاساس بس مش بننكر ان الامر لابد وا يكون حاصل وواقعى والا من اين اقتبس العالم ما يقال عنه مثال او حكمه والجزيئه التانيه اللى بتفق معاك فيها ان من ادعى ان الماضى تخلف فهو بالاصل معاق فكريا لان الماضى اساس الحاضر وعين المستقبل انما نأخذ منه العبره او ما نستفاد به فى مجالات الحياه الفلسفه المصريه غريبه لان شعبها دائما ما يمزج الجد بالتهريج دائما ما يقلب الحزن الى تريقه ولو على ذاته احيانا مجديه واحيانا محزنه يمكن مش فلسفه بس طبيعة وسمات وضعت بنا تقدير الكامل لمقالك

الموضوع كله بيتكلم عن الامثال ... بس مقسوم لجزأين .. الاول مكتوب بسخريه .. والتانى بيتبنى وجهة نظر ...

الفكره الاولى هى نفسها الفكره الاخيره ... زى بعض القصص اللى تبدأ معاكى بشكل عادى جدا .. وتنتهى بصدمه ليكى كمشاهده لما تحسى ان مجاش فى بالك ان الاحداث تنتهى بالطريقه دى .. زى مثلا نأسف على الازعاج لاحمد حلمى

ود أسلوب فى الكتابه مش اكتر .. لان فى النهايه اللى بيكتب لو القارئ لسطوره حفظ نمط كتابته المتكرر دايما هيجيله ملل .. فبيكون محتاج ينوع فى الاسلوب مش بس ينوع فى الفكره ...

بشكر حضورك المميز دايما

نورتى الموضوع

[pu.z.z.le]

اقتباس المشاركة الأصلية كتبت بواسطة اطياف الماضي يمكن أننا نتبع الأمثال الشعبية دي أمر أصبح معدوم الأمثال دي فعلاً أصبحت تراث فقط ولا يؤخذ به ولا يوضع في الأعتبار أغلب الأمثال المصرية المذكورة لأا أعرفها ولا أسمعها يمكن تكون بتترد في أماكن تانية بس تقريباً محدش بيمشي وراها أوي كده غير لما يكون قبلها لغى عقله ومش مطلوب أننا نلغي عقلنا ونمشي وراء أمثال قد لا تنطبق على الجميع ولكني معك في تطوير هذة الأمثال وأعادة تقيمها بما يناسب عقولنا حالياً وأحتياجاتنا تسلم أخي للطرح تقييمي ودي ..~

انتى لازم تركزى وتحفظى شوية امثال .. وخصوصا بتوع النصايح (( يودوا فى داهيه الصراحه )) ...

دايما منوره

[pu.z.z.le]

اقتباس المشاركة الأصلية كتبت بواسطة ايميليا تيتا الله يرحمها كانت كل كلامها تقريبا وتوجيهاتها واستغرابها من تصرف وتوضيحها لاخطائنا مستند ع مثل شعبي وكنت دايما اقولها ابه الافاظ البلدي دي الناس اطورت يانناه تضحك عليا وتقولي مثل تاني للحالة الي انا فيها فكنت شايفة وقتها مفيش فايدة فيها ومع الوقت كبرنا وكبرت معنا الامثال وبقيت جزء من الحياة اليومية في البيت لدرجة احيانا انا واخويا لما نعمل حاجة او نقول حاجة نيستناها تتحفنا بمثل كميةكبيرةومتنوعةكانت في جعبةجدتي خاصةاقلب القدرة ع فمها تطلع البنت لامها كنت اترق واقولها لا تطلع البنت لجدتها عمتها مبقيش ممتها يانناه ع قد مابكون متغاظة من بعض الامثال الا انها بتوصف حالة حقيقية بنعيشها وممكن ترطب علبنا الاجواء وزي مقالت همسات الجعب المصري قادر ع مزج الكوميديا وقلب الحالات من والى طبعا الامثال المترجمة اكثر فائدة لسبب انها بتقولك خلاصة حكمة خلاصة الموقف تعظيك نتيجة للحالة ان كان كذا اصبح كذا كل الامثال العربية والغربية تعتبر،حصيلة مواقف وخلاصة للحياة بحبها حقيقة بسبب جدتي اولا واحيانا بستخدم منها الي يلخص حوار معين بينقذ الموقف وبينهه بظريقة مختصرة واكتر الامثال بستخدمها عشمتني بالحلق خرمت انا وداني ههههه بقولها باستمرار لاهلي لو قالولي هيعملولي حاحة واتاخرو او طنشو ولصحابي بردو والمثل التاني يقتل القتيل ويمشي في جنازته دا طبعا شيفاه قمة الصح لكل انواع الغيبة والنميمة وضرر الاخرين ولامبالاة في انتهاك الحرمات اسعدك الله ذكرتني باشياء لا تنسى

شكلك هينطبق عليكى المثل (( من عاشر القوم 40 يوم صار منهم ))

وانتى عاشرتى جدتك اكتر بكتير .. فطبيعى لسانك يجيب من امثالها ..

واحنا كدا كدا قلنا ان مش كلها منتهية الصلاحيه ...

تحياتى لجدتك ولحضورك المميز

نورتى الموضوع كالعاده

[pu.z.z.le]

اقتباس المشاركة الأصلية كتبت بواسطة ساحر الأحزان الامثال تراث شعبى وحكم متوارثة بتكون عن تجارب عاشوها ناس قبلنا فبتفضل زى التاريخ كدة بتتناقلة الاجيال برغم ان فية امثال غريبة وعجيبة الا انها بتكون من النوع المرح احيانا وكتذكرة للخبرة المتوارثة مقال جميل منك

ومرور ورد أجمل منك