!.... الــــــزمــــــــــن ....!

[pu.z.z.le]

لو سرعة النت عندك كويسه يبقى فات من عمرك ثانيه او اتنين علشان تشوف الموضوع دا

... ولو سرعة النت عندك نص نص فانت محتاج لكام ثانيه لحد ما الصفحه تحمل معاك

... ولو كان نت تعبان يبقى ممكن تكون عملت فنجان قهوه لحد ما الصفحه تفتح فى كام دقيقه ...

المهم ان كل دا حصل فى الزمن الماضى .. وحاليا انت فى الموضوع ووصلت لحد الجمله دى

اهلا بيك فى الزمن



قرأتها ؟؟

مبرووووك

..... أصبحت هى كمان فى الزمن الماضى ...

للدرجه دى الوقت بيجرى من غير ما نحس ؟؟؟

من شويه حدث انك دخلت المنتدى .. وفتحت القسم او شوفت عنوان الموضوع فى الرئيسيه .. وبعد كدا فتحت الموضوع .. وقرأت الكام سطر اللى فاتوا .. ومن بينهم ترحيبى ليك فى الزمن ...

هو ايه اللى بيحصل ؟؟؟؟؟؟؟

اللى بيحصل انك بتحاول دلوقتى تستكشف ماهية الزمن وسبقك لكدا ملايين البشر اللى حاولوا يسيطروا على الزمن ...

السرعه العاليه جدا جدا جدا للزمن بامكانها انك تخليك تراجع كل افكارك عن الحياه لو اعرتها بعض من اهتمامك .. لكن تعالى الاول نشوف محاولات الانسان لقياس الزمن

كانت البدايه مع تكرار احداث طبيعيه بشكل منتظم .. زى تعاقب الليل والنهار .. زى فصول السنه الاربعه الصيف الربيع الخريف الشتاء ...

كان الزمن معروف بانه واحد من المطلقات .. استنادا لثباته بين حدثين مختلفين زى الليل والنهار مثلا ... وكانت اولى المحاولات لقياس الزمن استنادا الى اعتباره من المطلقات هى المزوله الشمسيه ثم الساعه الرمليه ثم البندول .

المتعارف عليه حاليا بوحدات قياس الزمن هو

الاسبوع - اليوم - الساعه - الدقيقه - الثانيه - الفمتو ثانيه ... اما الشهر والسنه فالقياس بهم غير دقيق لاختلاف عدد الايام بالشهر الواحد وتنوع السنه ما بين عاديه وكبيسه ..

مش هقلبه درس فيزيا انما معلومات كان لازم منها علشان نقدر نتكلم عن الزمن اللى فعلا احنا بنهدره بدون وعى

------------------------------



فى النظريه النسبيه لاينشتاين افترض هو ان الانسان لو قدر يوصل لسرعة الضوء ساعتها بس هيتوقف الزمن .. ودا افتراض ثبت صحته لما عملوا تجربه من كام سنه ووضعوا ساعه على صاروخ وساعه على الارض ووجدوا بعد انطلاق الصاروخ ان فى تباطؤ فى الساعه الموجوده على الصاروخ ...

طيب وبما ان الزمن حاليا وانت بتقرا الموضوع بيسير بسرعته الطبيعيه .. يبقى احنا علشان نوقفه محتاجين حركتنا تكون بسرعة الضوء اللى هى 300 الف كم / ثانيه



نفهم من اللى فات دا ان سرعة الزمن بالنسبه لينا ... هى حاصل طرح سرعتنا من سرعة الضوء ..

بمعنى لو انا بتحرك بسرعة 1000كم / ث (( ودا على اساس انى راكب نفاسه مثلا )) .. يبقى سرعة الزمن هتكون بالنسبه ليا وقتها حوالى 299 الف كم / ثانيه ...

فما بالك وانت قاعد بتتاوب دلوقتى وانت بتقرا الموضوع ومدد رجليك ومولع سيجارك او ماسكه فنجان القهوه فى ايدك او بتشرب حضرتك كوباية الشاى بتاعتك .. يبقى سرعة الزمن هتكون بالنسبه ليك قد ايه ؟؟؟؟





زمان كنت بتسمع (( الوقت كالسيف .. ان لم تقطعه قطعك )) ..

احب اقولك ان الجمله غلط علميا .. لانك وللاسف مش هتقدر تقطعه . .. على الاقل فى الوقت الراهن .. انت بكبيرك خالص تحاول تستفاد منه على قد ما تقدر .. لان السرعه اللى بيتحرك بيها مش منتظر اننا نحصل عليها لا فى جيلنا ولا فى جيلين بعدنا .. واحنا لحد دلوقتى علشان نخرج قمر صناعى لمدار حول الارض بنحتاج لصاروخ من 4 مراحل





اليوم اللى حضرتك هتؤمن فيه بأنك بالنسبه للزمن شئ متأكل .. هو نفس اليوم اللى هيخليك تعيد صياغة حياتك بشكل جديد يتناسب مع صراعك مع الزمن اللى لحد دلوقتى حضرتك بتتعامل معاه باستهتار مبالغ فيه (( حتى انا ))

من 5 دقايق فاتوا انت مكنتش هنا فى الموضوع ... ومن 5 ساعات فاتوا انت مكنتش فى المنتدى ... ومن 5 ايام فاتوا الموضوع نفسه مكنش موجود .. ومن شهور فاتوا انا مكنتش هنا ومن 5 سنين فاتوا انت احتمال مكنتش فى المنتدى ومن 50 سنه فاتوا مكنش فى نت اصلا ...

والسؤال دلوقتى ... مع كل فمتو ثانيه بيمر عليك وانت عايش ياترى بتعمل ايه ؟؟؟؟


ولا حاجه

ايا كان اللى بتعمله فبالنسبة لسرعة الزمن .. يعتبر ولا حاجه .. فما بالك لو كنت مقضيها ومبتعملش حاجه اصلا

دايما كنا بنسمع من الكبار واحنا صغيرين .. بكرا لما تكبر تعرف ... وتقريبا نقطة الانقلاب فى حياتك بتبدأ بعد سن ال 30 اللى هى فى الغالب بتعتبر متوسط عمر الانسان .. واللى عندها بيبدأ حسابك للزمن يتغير وادراكك بيه يكبر ... لانك بتبدأ تحس بسرعته الحقيقيه لما تلاقى ان الحاجات اللى المفروض تعملها كتييييير ... وخسايرك فى فترة ما قبل الثلاثين واللى المفروض معملتهاش وهتعملها أكتر ... و تبدأ تجني وتستقبل اثار كل دا واحده تلو الاخرى ...

هتسمع الكلام دا زى ما احنا سمعناه قبل كدا ورميناه ورا ضهرنا .. بس النهارده انا مدعمه ليك بالعلم علشان ميكونش ليك حجه ..

بقيت بعد الموضوع دا مطالب باعادة تقييمك لسنك واللى عملته واللى واجب عليك تعمله قبل ما يبدأ انقلاب الزمن عليك وتبدأ بس فى مرحلة رد الفعل وليس الفعل لما تلاقى سنك بقى 30 سنه ...

علشان كدا لو انت اقل من ال 30 حاول من النهارده تجمع كل الواجبات والفروض اللى المفروض تخلصها واتخلص منها .. حاول متأجلش حاجه .. حاول تتخلص من كل الاحمال اللى محوشها لما تكبر (( الكدبه اللى بتضحك بيها على نفسك )) ..

واوعاك تقول لسه بدرى ... بدرى من عمرك ان شاء الله ... انت بتتكلم عن عمر بيتسرب من بين ايديك بسرعه مفيش ادراك ليها لحد دلوقتى ..

لو لسه معرفتش انت هتعمل ايه فى مستقبلك .. لازم تعرف

لو لسه محددتيش انتى عايزه ايه .. الحقى وحددى ..

لو لسه حضرتك بتأجل حاجات المفروض تخلص فى المرحله اللى انت فيها سواء كانت مراهقه او شباب فى العشرينات .. لازم تخلصها

ولو لسه انتى محسمتيش امور المفروض تتحسم قبل ال 30 من عمرك .. احسميها ..

امبارح انت عشته بمزاجك ..

والنهارده انت بتضيعه براحتك

.. بس بكرا هتكون ملزم بحاجات على غير ارادتك لانك اهدرت زمنها ...

لو عايز توقف الزمن .. خليك اسرع منه ...

بالتوفيق

[Lamees]

عمرنا ما هنكون أسرع من الزمن مهما حاولنا
معاك أننا نحدد واجباتنا والتزاماتنا ونحاول ننجز المطلوب مننا
بس لو في أدينا فعلاً ننجزه بس في حاجات بنطلبها من ربنا
وممكن نعيش عمرنا كله نستناها لا تقول 30 سنة ولا أكتر
يعني أقصد أن في حاجات بيضيع منننا فعلاً الزمن وأحنا لسه بنستناها
ويمكن متحصلش

أخي الكريم أسعدني التواجد بين متصفحك
دائماً ما أجد فيها الراحة النفسية
تحيتي

[pu.z.z.le]

اقتباس المشاركة الأصلية كتبت بواسطة اطياف الماضي عمرنا ما هنكون أسرع من الزمن مهما حاولنا معاك أننا نحدد واجباتنا والتزاماتنا ونحاول ننجز المطلوب مننا بس لو في أدينا فعلاً ننجزه بس في حاجات بنطلبها من ربنا وممكن نعيش عمرنا كله نستناها لا تقول 30 سنة ولا أكتر يعني أقصد أن في حاجات بيضيع منننا فعلاً الزمن وأحنا لسه بنستناها ويمكن متحصلش أخي الكريم أسعدني التواجد بين متصفحك دائماً ما أجد فيها الراحة النفسية تحيتي

علميا جائز جدا فى وقت من الاوقات نوقف الزمن . لما نقدر نوصل للحركه بسرعة الضوء ... بس حكاية اننا نكون اسرع منه دى مش مؤكده

لان وبحسب نفس النظريه ان سرعتنا لو فاقت سرعت الضوء فالمفروض ان الزمن يبدأ يتراجع ويعد بشكل تنازلى فى الاتجاه المعاكس ... ودى النظريه اللى اتبنى عليها اغلب افلام الة الزمن ..

نورتى الموضوع كالعاده

[همس الحنين]

بنظرى الزمن كامقياس وقت مسرع من عمرك

محسوب عليك بكل تفاصيله

ده لو بنحسبها بالمنطق ده

ان الوقت ثوانى او اوقات مسرعه

بس لو حسبنها بنظره تانيه

هتلاقى ان حساب عمرك الحقيقى

مقدار تفهمك للحياه

مع مقدار استيعابك بقيمتك كانسان

ضيف عليهم مقدار تعاملك وخبرات التعامل

امتى وفين وازاى

مش هنحدد لان كل انسان ممكن يبدأ حسه الادراكى لمناحى الحياه

بالتجارب ولو من سن مبكر

بيختلف من شخص لشخص

النقطه اللى اتفق معاك فيها

ان الانسان لابد وان يحسب ويخطط هو عاوز ايه
والا هيضيع عمره كله وهو لسه فى مرحلة نمو الادراك العقلى

مقال راقى

تقديرى

[pu.z.z.le]

اقتباس المشاركة الأصلية كتبت بواسطة همسات فوق القمر بنظرى الزمن كامقياس وقت مسرع من عمرك محسوب عليك بكل تفاصيله ده لو بنحسبها بالمنطق ده ان الوقت ثوانى او اوقات مسرعه بس لو حسبنها بنظره تانيه هتلاقى ان حساب عمرك الحقيقى مقدار تفهمك للحياه مع مقدار استيعابك بقيمتك كانسان ضيف عليهم مقدار تعاملك وخبرات التعامل امتى وفين وازاى مش هنحدد لان كل انسان ممكن يبدأ حسه الادراكى لمناحى الحياه بالتجارب ولو من سن مبكر بيختلف من شخص لشخص النقطه اللى اتفق معاك فيها ان الانسان لابد وان يحسب ويخطط هو عاوز ايه والا هيضيع عمره كله وهو لسه فى مرحلة نمو الادراك العقلى مقال راقى تقديرى

القصد ان فى النهايه كل مرحله وليها متطلبات ... ولو فاتت المرحله من غير ما نكون عاملين كل المطلوب .. ففى النهايه هنيجى عند نقطه معينه ونحس بكم التراكمات اللى المفروض نخلصها .. واللى فى الغالب هيكون الكثير منه وقته عدى ..

يعنى تخيلى لو حد ما عاش فترة شبابه بانطلاقها وحيويتها وجه يعيشها وهو فى الاربعينات ويعمل حاجات المفروض كان عملها فى العشرينات .. هيبقى تصرفاته عامله ازاى وانتى هتوصفيها ازاى ؟؟؟

او حد مجربش الب واتجوز جواز تقليدى وخلف وافتكر انه مجربش الحب فرجع يعيش قصة حب اتسببت فى هدم بيته ... ؟؟

قابلت نماذج زى كدا .. علشان كدا كتبت عن واقع .. وكانت نصيحتى انك لازم تفتكر الجمله اللى كانوا مصدعنا بيها واحنا صغيرين (( لا تؤجل عمل اليوم الى الغد )) ..

وعلشان تحسى بعمرك الحقيقى .. لازم تعيشى تفاصيله فى اوقاتها .. بتكون الذ بكتير عن لما تأجليها وتعيشيها فى سن مختلف ...

مشكوره على المرور الرائع دايما

نورتى الموضوع

[Words Whisper]

الفكرة مش بس في الفعل الحالي
وإنما في التخطيط كمان للي مأجلينه لما بعد
عشان مش ف حاجه بتيجي فجأة و لا من العدم
وعشان نيجي ف وقت وبدون مانعرف ازاي ، نقوم بإيجادها
يبئا غالبا هتتسبب في إهدارنا احنا شخصيا ..


شكراً ..
دمت بخير ..