حطلها سم فيران o-O

[phalsteen]

عـــــــــواف عليكم اخوانا
وحشتكم انا
عارفه انا الكل بيقولي كدهون واللهي
استني بئه حكم انا رايقه النهاردة وواقعه علي ضهري
ومن امبارح وانا بعيط كدهوت
والناس كلها بتتريق عليا
الظلمه

انا قولت اعمل بنصيحه الدكتور ولاول مرة في حياتي هيحصل
بس عشان اخف والعب استغمايه مع حمني

المهم لاقيت واحدة لاككه داخله ال هتطمن عليا
بعد ازيك وسلامات
واحضان المصارعيين دهين
ويجي خمناشنر بوسه مش لطيفه



قعدت جنبي وهاتك يا رغي
استني تلم نفسها وتقوم مبحبش حد يقعد جنبي بتنحس انا

بعد ما شبعت رغي في كل الطنطات جيرانا
وكمان كل اصحاب المحلات
واسعار الطماطم والفاكهه والسمك اللي طمعه مش عاجبها
وابنها اللي بيحب بنت واحد جزار
وبنتها اللي بيجلها عرسان كتير كدهون
وطبعا كلها ظبابيط وطيارين ودكاتره
بس بنتها حبت حمودة البلطجي وفرحانه اوي بيه

لاقتها فجأة بصتلي وبتقولي
انت مالك يا بت ضعفانه ليه كدة
لا غذي نفسك
محدش هينفعك لما توقعي علي بوزك

كلي حلويات كتير
وافضلي طول ما انتي رايحه وجاية كلي كدة

وبضحكه اشمئزاز

قولتلها ليه هتدبحوني علي العيد
انا عامله دايت اطنط

بصتلي بصه وحشه اوي اخونا
وكأن لا سمح الله شتمتها

اسكتي يا بت يا سما عمك سيد
ليلاتي ع الله يقولي انتي ايه اللي حصلك
دانتي كنتي نسخه من بوسي

بوسي مين احجه احنا هنفشر
دنا شايفه قصادي عم برعي بالظبط

المهم الست صعبت عليا فجيت علي نفسي واقنعتها ان الدايت دا
مش شتيمه ولا ممنوعات لقدر الله
يعني عادي مفيش مانع من حتيتين تلاته زبده علي الفطار
وعلبه مربي وطبق كنافه بالقشطه

وفي الغدا عادي حله محشي وبانيه وبطه مقليه
وكفايه مكرونه مش مهم عيش بئه

والعشا نصحتها تنام خفيف وتاكل دراع جوزها

الست اقتنعت وربنا زاح عني ومشيت

تاني يوم لاقيت عمو سيد مقابلني
وبيقولي ايه الشياكه ديت يا ام محمد
سلامتك يا غاليه
الشارع مضلم والنبي

فعرفت انه عاوز حاجة اكيد

وقبل ما اكمل الجمله والنبي لاقتيه بيقولي
ام سيد عاملت البايت اللي قولتلها عليه
وتعبانه اهيت من الصبح

بايت

طب حطلها سم فيران
وهتبقي كويسه ان شاء الله

ربنا يقدرني علي فعل الخير
دايما يارب