عارف وانت صغير

[فداااااااااااء]

عارف وانت صغير جملة ليها مشاعر خاصة لما تلاقى حد يقولهالك تحس ساعتها إنك إنتقلت من عالم الشقاء اللى بتعيشه إلى عالم فيه سعادتك ، وتخليك تضحك ، ... افتكر لما كنت صغيرة وابى خدنى فى شارع كان اول مرة اشوفه علشان يشترى لى لب اقرع كنت شايفة الشارع دا كبير اوى وواسع خالص وكان اول مرة فى حياتى اكل اللب دا كان طعمه لحد دلوقتى احسه غريب وكل ما اكله افتكر بابا الله يرحمه ، ولا لما اخواتى كانوا يوقفونى جون عند باب بيتنا وكانوا يشطوا الكورة اللى كانت دايما عارفة طريقها وشي على عطول وكانوا يضحكوا عليه بشكل هستيرى ، ولما كنت بلعب السبع بلطات فى الحارة كان اللى بيجرى ورايا بالكورة احسه بيضربنى بغل كانت ضربة صعبة بس كنت بردها لما يكون على الدور بس كنت بضربه فى كفاه بغل برضوا ، ولا لما كان رمضان يجي وأحس ان نور الدنيا بيتغير وبتتزين بأجمل ضوء ساعة آذان المغرب ، ولا فرحة العيد وآذية ولاد جيرنا لما يحطوا البومب تحت رجلين البنات وهما ماشيين ويضحكوا عليهم ( ولاد مؤذيين دايما) ،..... الايام دى الواحد بيفتكرها أول مايشوف صورته وهو صغير ، صحيح بنضحك على شكلنا ونفضل نتريق ، لكن لما ندقق فى صورتنا واحنا صغيرين نحس انننا فقدنا اجمل شيئ فى حياتنا ، فقد الضحكة الخالية من الهوم ، وفقدنا الراحة ، كان اتقل شيئ بنحمله على كتافنا هى شنطة المدرسة ،واقسى همومنا الواجب اللى نعمله ، واكبر تفكير خبيث هو اننا نخفى الشهادة علشان والدنا مايشفش الكحك اللى فيها ونزور امضته هههههههههه ،ولا لمتنا ويا اصحابنا ، ياااه أيام من عمرنا فاتت ، أحيانا لما نقعد مع نفسنا نسأل روحنا ياترا الايام دى إحنا عشنها بصحيح ولا كانت حلم جميل سرعان ما صحينا منه ، ......رغم السعادة اللى بنكتسبها من رجوعنا لذكريتنا فى طفولتنا ، الا ان الحزن والآلم اللى بنشعر بيه لفقدنا ليها مؤلم وقاسى،.. ..ولكن على الرغم من كدا لما تحس بضيق عليك من الدنيا وزادت همومك وتحتاج فى ساعتها لضحكة حلوة ، روح هات صورتك القديمة وانت صغير وافتكر شقوتك ، والمقالب اللى كنت بتعملها ساعتها بس هتضحك هتضحك بجد من القلب انا كتبت موضوعى دا بلغة عامية على الرغم من انه مش اسلوبى فدااء

[الفيلسـوف]

اجمل شى يااخت فدا انى كتبتى الموضوع بلغه العاميه

لانى دايما الذكريات دايما بتفكرنا بحاجات جميله

مهما كان طفولتنا كان فيه حاجه مولمه

انى اجمل ما فيها هى المواقف البسيطه

اللى كنا بنعملها زمان وديه اللى كانت ف حد ذاته متعه

لايشعر بها الا من جربها

بجد موضوع عاجبنى اوى اوى تسلم ايدك

[BaAnOtA 7eKayaa]

موضوعك عجبنى جدا يا فداء ^ ^

وفعلا لما نزعل مفروض نبص فى صورنا ونفتكر طفولتنا المتشرده *_^

[fanaa]

يااااااااااااااه ياطفوله
♥عشق
مشكوووره ياجميل

[^^khL oUD]

احلي ايام ايام واحنا صغيرين
ايام مش هتتعوض ولا عمرها هترجع
الواحد ساعتها لما كان بيضحك كان بيضحك بجد مش زي الوقت


تسلمي ع التوبيك ^^

جميل .

[رآقيہ بأخلاقـى]

مفيش أجمل من العاميه يا قمر
موضوعك جميل وصحى فينا ذكرايات جميله
بس احب اقولك انا مكنتش بعرف ازور امضة بابا
لان امضته كانت عباره عن فورمه مش مجرد كتابة اسمه وبس
الموضوع ده كان تعبنى علشان مش بعرف ازورها وبضطر اوريه الشهادة
علشان يمضيها كان ممكن اطنش بس المضروبه الابله مكانتش بتسكت
عامله زى المسروعه
جميل طرحك فكرتينا بأجمل ايام عمرنا
ربنا يرحم والدك ووالدى وجميع موتى المسلمين يارب
تسلمى ع طرحك الرائع حبيبتى
تحياتى ..

[ساحر الأحزان]

فكرتينا بالذى مضى فداء

كانت ايام جميلة ولذيذة

وصعب رجوعها

ولكنها تبقى ذكرى جميلة بداخل القلوب

[زهـــ*ــرة النرجــس*]

روح هات صورتك القديمة وانت صغير وافتكر شقوتك ،
والمقالب اللى كنت بتعملها ساعتها بس هتضحك هتضحك
بجد من القلب

فعلا كانت ايام حلوة و اكيد بنحس بالسعاده من القلب فعلا لما نفتكرها
تسلم ايدك على الكلمات الجميلة اللي فكرتنا

[شاعر الحب الحزين]

طب واللي عنده زهايمر بقى يعمل ايه يا فداااء

بس تعرفي مع ان الطفولة شيء جميل

بس كلامك عن الذكريات ووصفك الجميل كانوا احلى

حتى موضوعك زي مواضيع زمان اللي بتفضل ف القلب والعقل

الذكرى بتوجع اكتر ما بتضحكنا لأنها صعب ترجع تاني ف واقعنا

الحمدلله من قبل ومن بعد

انا بحييكي فداااء على لمساتك الجميلة ف الكتابة

بصراحة استمتعت وانا بقرأ موضوعك

ربي يوفقك ويسعدك

[فداااااااااااء]

اقتباس المشاركة الأصلية كتبت بواسطة ƧĀƉ_ĿŌ∀Ē اجمل شى يااخت فدا انى كتبتى الموضوع بلغه العاميه لانى دايما الذكريات دايما بتفكرنا بحاجات جميله مهما كان طفولتنا كان فيه حاجه مولمه انى اجمل ما فيها هى المواقف البسيطه اللى كنا بنعملها زمان وديه اللى كانت ف حد ذاته متعه لايشعر بها الا من جربها بجد موضوع عاجبنى اوى اوى تسلم ايدك

هو جميل ان اكتب بالعامية بس بالنسبة لى العامية فى الكتابة متعبة اكثر

لانى مش متعودة عليها فى كتاباتى

مرورك عطر صفحتى اخى ƧĀƉ_ĿŌ∀Ē

تسلم روحك على جمال مرورها هنا وتسلم للردك الجميل