مما راق لى :

عاشق الجمال · منذ /11-30-2015, 05:19 PM

مما راق لى :
امبارح كان فى جنازه فى الجامع اللى جنبنا بعد الجنازه ما خلصت بالليل الناس جابوا النعش وحطوه قدام باب المسجد واحد من أهل المنطقه نزل للمسجد الساعه 3 الفجر علشان يصلى ركعتين قيام الليل ملقاش عامل المسجد والمسجد مقفول قعد مستنى شويه لقى الجو برد وكان مخفف هدومه شويه وراح طالع فوق النعش وفتحه ودخل نام جواه مش عارف ازاى جاله قلب ينام جواه عم عاطف عامل المسجد جه فتح المسجد وشغل ازاعة القرأن الكريم وبدأ يجر النعش لوحده جوه المسجد المسافة قريبه جدا والارض سيراميك سعدته على جره بسهوله وصاحبنا نايم فى ملكوت الله وعم عاطف اصلا سمعه تقيل مبيسمعش كويس لغايه لما دخل النعش فى مكانه امام القبله متطرف اقصى اليمين عم عاطف اقام الصلاه حظى الاسود جه انى اقف قدام النعش على طول كنت واقف وجنبى راجل فوق الخمسين سنه على اليمين وواحد شاب من سنى على الشمال الإمام قرأ الفاتحه الشاب اللى واقف جنبى قالى الحق النعش بيتحرك انا مقدرتش امسك نفسى من الضحك قطعت الصلاه وقلتله أنت عبيط يلا
كبرنا تكبيرة الإحرام والإمام بيقرا فى سورة النجم فجأه
لقيت النعش بيتحرك وواحد بيرفع الغطا وطالع من النعش
وبيفرك فى عينه وبيتاوب ويقولك انتوا اقمتو الصلاه يا باشمهندس الراجل اللى كان على ناحيه اليمين وقع على الأرض من الرعب والخوف انا جريت من المسجد حافى والواد اللى كان على شمالى بيجرى ورايا حافى هو كمان انا وصلت البيت فى زمن قياسى وطول الطريق عمال أقرأ الشهادتين الواد طول الطريق وهو على لسانه يا جدعان الراجل طلع من النعش دا انا اول مرة اصلى الفجر فى حياتى يا ولاد الكلب
وكمل جرى وهو حافى برضوا
انا اول ما دخلت البيت قفلت الشبابيك والابواب ونزلت تحت البطانيه ومسكت المصحف فى ايدي
المهم؟ انا لغايه دلوقت مجبتش الشبشب