انا مجرد عابر سبيل فى الدنيا

[طارق طروق]

الصيف هل اهو وهتلاقى بقى المشاكل
والخناقات فى البيوت وهتسمعوا الكلام المعتاد بتاع الصيف
اللى هو
اللى ياخد ازازه ميه من التلاجه يرجعها مكانها
حد يلم الازايز الفاضيه ويملاها
مين اللى حاطط ازازه فاضيه فى التلاجه يا غجر

[طارق طروق]

واحد بلديتنا راح المدرسه
عشان يسأل ايه سبب طرد ابنه من المدرسه
اداره المدرسه قالتله عشان ابنك غبى
وهنثبتلك جابوا بيضه نعامه وسألوا ابنه
بيضه ايه دى؟
الولد قال بيضه الحمار
بصوا لابو الولد
راح قالوهم اقسم بالله ما غششته

[طارق طروق]

واحد بيقول لمراته انا بحب فيتراك
قالتله طالما طلعت صريح معايا
انا بحب طارق
مسكها خنقها وقالها فيتراك دى مربى
قالتله وطارق ده عسل

[طارق طروق]

الو امن الدوله؟
ايوه
امن الدوله قسم التسجيلات؟
ايوه يا ابنى عايز ايه
لو سمحت هى ماما فى اخر مكالمه
قالتلى هات عيش وايه تانى عشان نسيت
قالتلك هات عيش وجبنه وزيتون وبسطرمه ومتتأخرش
عشان ابوك رايح الشغل

[طارق طروق]

حمدالله على السلامه يا منه
متغبيش تانى بقى
ومنوره المدونه والمنتدى كله

[طارق طروق]

الاميره رودى عندى فى المدونه؟
لا لا لا اكيد بحلم
وانا اقول المدونه نورت اكتر ليه
عموما هبقى اروح المدونه بتاعتك يا رودى
عشان انورهالك اكتر واكتر
حكم انا لما بروح مدونه حد بتنور اوى اوى
ومش بيدفع كهربا ولا غيره عشان ده نور طبيعى منى
اللهم زدنى تواضعا
منوره يا رودى بجد

[طارق طروق]

على فكره عايز اقولكم حاجه مهمه جدا جدا هتنفعكم
وياريت تعملوا بيها وتشتروها
انا بموت فى حاجه اسمها مورو
هكتبهلكم بالانجلش عشان
اللى مش بيعرف يقرا عربى
MOro ودى عباره عن نوجا بالكراميل مغطاه بالشيكولاته
بس طعمها لذيذ اوى اوى
وعندى على طول وقبل ما بتخلص بجيبها
انا مش شايف بصراحه انى قولت حاجه مهمه للدرجه دى

[طارق طروق]

هحكيلكم حكايه قطه بجد والله
كان فيه قطه بيضا جت العماره عندنا
وكانت حامل مش عارف مين القط المنيل
على عينه اللى ضحك عليها المهم
القطه سكان العماره اهتموا بيها وانا منهم طبعا
فرشت ليها فرشه فى احد الطوابق على باسطه العماره
وولدت ما شاء الله خمس قطط حلوين اوى
وقامت القطه بالسلامه وبقت ترضع عيالها
كانوا صغننين وقافلين عنيهم دلوقتى كبروا شويه
بس لسه مش عارف مصيرها ايه هى وعيالها

[طارق طروق]

لو خيرونى بين صاحب بيكدب وصاحب بيسرق
هختار الصاحب اللى بيسرق
لأن اللى بيكدب ممكن يعمل كل شىء بغيض
والثقه بتبقى معدومه فيه خالص خالص
وممكن يبيع الصداقه بأسرع ما يكون
لكن الصاحب اللى بيسرق ممكن اخليه يتوب
واساعده على التوبه حتى لو بمساعده ماديه
بمشروع صغير وهقوله سلف لحد ما تنجح فى مشروعك
عشان لا احرجه
يمكن يكون للبعض منطق غريب لكن بالنسبه لى مش غريب عادى

[طارق طروق]

معلش هستأذن منكم هروح ابص
على مدونه الاميره رودى وراجع اكتب تانى
اى نعم المشوار بتاع مدونه الاميره رودى بعيد
بس مش هتأخر عليكم