انا مجرد عابر سبيل فى الدنيا

[طارق طروق]

وشهرزاد لما كانت بتحكى للأمير
القصه عشان ميقتلهاش
قبل ما الامير ينعس
قالتله مولاى ممكن طلب قبل ما تنام؟
قالها طلبك مستجاب مهما كان
قالتله طلبى هو انك تقوم تعملى ساندوتش فول وساندوتش طعميه

وهنا ادركت شهر زاد الصباح وعندئذ سكتت عن الكلام المباح

[طارق طروق]

نفسى ابيع العربيه بتاعتى
واشترى توك توك واكتب عليه من ورا
يا ناس يا شر كفايه قر
العين صابتنى ورب العرش نجانى

[طارق طروق]

على فكره انا عايز اقولكم حاجه
انا عايش على طبيعتى سواء على النت او خارج النت
وصريح جدا ويمكن صراحتى بتسبب لى مشاكل كتيره
لكن مقدرش اغير من طبيعتى وانافق حد

[طارق طروق]

وبزعل اوي لم اتفهم غلط
وبضايق اكتر من الصدفة السيئة اللى بتبوظ حاجات فى حياتي
الطبيعي انها تمشى صح .. وده اللى حياتي ماشية عليها
دايما صعوبات وعقبات وحاجات تبوظ حاجات بحبها

[طارق طروق]

انا مش بعترف بحاجه اسمها حظ
مافيش حاجه اسمها حظ
بسمع كتير كلمه يااااااا حظك

[طارق طروق]

وسعات بنندم على حاجات بنعملها
او قرارات بناخدها
وعلى رأى ام كلثوم
وتفيد بأيه يا ندم يا ندم

[طارق طروق]

وعرفت من الاخت العزيزه فجر
ان قوانين القسم تلزمنى انى اشارك هنا فى مدونتى بعشر مشاركات فى اليوم
طبعا مكنتش اعرف وربنا يسهل ومصرحش وانا بكتب ولا ازود عن عشر مشاركات ان شاء الله
هو صح تقييد لى فى الكتابه
بس لازم احترم قوانين القسم مهما كان
مع شكرى وامتنانى لأختنا العزيزه فجر
وعلم يا فندم

[طارق طروق]

ضياع اللايكات
بيفكرنى زى ما اكون
عمال احوش احوش فى مبلغ
وفى الاخر ضاع المبلغ كله يا خساره
وبكدا هحاول احوش المبلغ من تانى
حدش فيكم يفرحنى كدا ويقولى اللايكات راجعه تانى؟
دا حتى اللى عملتلهم لايكات فى الاخر
دخلت ملقتهاش اضطريت اعملها تانى
دلوقتى اصحاب اللايكات دى هيقولوا
الواد طارق باين عليه اهبل ولا ايه

[طارق طروق]

والامير طارق ركب الحصان بتاعه
وراح وقف تحت البرج اللى ساكنه فيه سيندريلا
ومكنش يعرف انها ساكنه فى الطابق ال90
يمكن حد فيكم يسألنى ويقول
بلاش فشر يا طارق هو زمان كان فيه ابراج و90 طابق كمان؟
هقوله ايوه ما عندك اهو برج بيزا المائل ما علينا
وبعدين زمان كان فيه بركه كان البرج من دول
من 200_300 طابق

[طارق طروق]

على فكره انا نومى خفيف جدا جدا
ممكن من اقل صوت اصحى
وعشان كدا تلاقينى دايما مرهق
مش من الشغل بس لا من قله النوم
عشان مش بنام نوم متواصل
لدرجه لو سمعت صوت كلاكس عربيه
يعنى حد بيضرب كلاكس لحد عندنا فى العماره
تلاقينى اصحى على طول
فيه ناس بقى تلاقى نومهم تقييل اوى اوى
لدرجه لو هما نايمين على السرير فى بيتهم
تلاقيهم ممكن يصحوا يلاقوا نفسهم
عند حد من قرايبهم يعنى حد يكون شالهم وهما نايمين
ولا هما حاسين