انا مجرد عابر سبيل فى الدنيا

[طارق طروق]

وقابلت سندريلا الامير طارق بالصدفه
وقالتله انا سمعت انك مبقتش تدخل
منتدى بنات مصر زى الاول ممكن اعرف السبب؟
قالها مافيش داعى تعرفى السبب
هى الاسباب كتيره ومافيش داعى اشغلك بيها
المهم كنتى رايحه فين يا سيندريلا؟

[طارق طروق]

طبعا معروف ان المدونه اداه تفريغ
يعنى اللى بيخطر على بالى بكتبه بدون ترتيب
وفى حاجات كتير بتخطر على بالى
وحاجات فجأه كدا بتظهر لكن ببقى محتار اكتب ايه ولا ايه

[طارق طروق]

فى الكافتريا اللى شغال فيها
قبل مولد النبى عليه افضل الصلاه والسلام
صاحب الكافنريا لغى الساندوتشات والبيتزا
وكل المأكولات عشان نبيع حلويات المولد بكل اصنافها
طبعا كانت حلويات كتيره جدا جدا وصاحب الكافتريا
والله اختارنى انا بالذات من كل اللى شغالين بالكافتريا
عشان امسك الحسابات معاه هو نظرا للأمانه بتاعتى
بمعنى هو قاعد على مكتب بيحاسب الزباين وانا قاعد على مكتب بحاسب الزباين
المفروض هو وانا نكون حافظين تمن كل قطعه حلويات مولد
والحمدلله كنت حافظ تمن كل قطعه من مئات القطع ده غير علب الحلوى الجاهزه طبعا
وربنا الحمدلله وفقنى وكنت عند حسن ظنه فى الامانه وفى حفظ كل تمن القطع من الحلوى

[طارق طروق]

فيه كدا شعور دايما بحس بيه
عارفين لما حد فينا يتمنى امنيه وفى نفس الوقت
يخاف ان الامنيه دى تتحقق يعنى فيه هنا تناقض غريب وعجيب
التناقض هنا امنيه تتمنى انها تتحقق وخايف من تحقيقها فى نفس الوقت
لأنها امنيه جايز تكون لصالحك وجايز تكون ضد صالحك
اممممممممممممممممم
مش عارف بقى حد فيكم فاهم انا اقصد ايه ولا مش فاهمين
ما علينا ما علينا

[طارق طروق]

صديقه كانت معايا فى الكليه كل ما تشوفنى تقولى
تصدق يا طارق حلمت بيك انى بديلك ساعه دهب
كل ما تشوفنى تقولى كدا لحد ما جيت مره قولتلها
بجد كل يوم بتحلمى نفس الحلم؟
قالت ايوه قولتلها طب ما تحققى الحلم ده وتجبيلى ساعه دهب
تقريبا كدا الحلم بتاعها متكررش تانى من وقت ما قولتلها كدا
برغم ان الدهب محرم للرجال ولو انا خطبت هلبس دبله فضه طبعا
بس كنت بهزر معاها عشان الدهب لو مش محرم على الرجال
كنت زمانى لابس ساعه دهب مع انى مش بحب البس ساعات
مش عارف ليه

[طارق طروق]

بتنرفز اوى لما الاقى واحد اسمه طارق زى اسمى والاقيه متخلف
بحس كدا ان بوظ سمعه اسمى مش عارف ليه

[طارق طروق]

ومحدش يفتكر عشان انا قوى وبتحمل
ابقى استحق الالم

[طارق طروق]

فيه فرق بين التغاضى وبين الكبت
التغاضى انى مثلا اتغتضى عن شىء بمزاجى وخلاص انساه بقى
لكن الكبت ده بيبقى داخلى وممكن مع كتر الكبت يولد انفجار
والكبت اما بسبب ان الواحد بيكون ذوق زياده عن اللزوم او مسالم
وعشان كدا الكبت ده المفروض يطلع مهما كان عشان اثاره بتكون مش كويسه
مش كدا ولا ايه؟

[طارق طروق]

احلى حاجه فى الشتاء ان الواحد مدفى نفسه
وقاعد على سريره ومتغطى وواخد اللاب على حجرى
وساند ضهرى على السرير لحد بقى ما يكبس عليا النوم
اللى مش عايز يجى لحد دلوقتى وعندى شغل الصبح ان شاء الله
والله التكييف عندى سخن وبارد ومش بشغل السخن خالص خالص
ولسه لحد دلوقتى ما استعملت الدفايه ولا شغلتها خالص خالص
لما يجى وقتها بقى ابقى اشغلها

[طارق طروق]

على كدا بقى بنت الجيران المسكينه
المفروض تشغل دفايه وهى منتظرانى
فى البلكونه فى عز البرد ده وعلى فكره مش غرور منى ولا حاجه
والله واقسم بالله ما بحب الغرور ولا مغرور ولا بحب المغرور
بس مش بأيدى انى احبها زى ما بتحبنى لكن بأيد قلبى
ومش معقول هقول لقلبى افتح يا سمسم هيفتح على طول
لكن خلينى اسيب الظروف والايام هى اللى كفيله انها تساعد قلبى
على انه يفتح للحب من تانى مين عالم