انا مجرد عابر سبيل فى الدنيا

[طارق طروق]

المفروض ظروفنا النفسيه ومشاكلنا الخاصه
بتبقى لينا احنا وبس
بمعنى اننا منخليش الظروف دى تأثر
على تعاملنا مع الناس ونقول معلش
اتحملونا شويه عشان بنمر بظروف نفسيه صعبه مثلا
عشان هما مش مجبورين يتحملونا عشان ظروفنا
بس مين بيعرف كدا بقى

[طارق طروق]

خطر على بالى دلوقتى وانا قاعد مدفى
ومتغطى ب 2 بطانيه ياترى الناس
الغلابه اللى حكمت عليهم الظروف القاسيه
انهم يناموا فى الشوارع تحت كوبرى او جسر او غيره
ياترى متغطيين بأيه فى الجو البارد ده؟
وعشان كدا ربنا يقدرنى على فعل الخير
طبعا هيكون معاهم هما مباشره
مش لبعض الجمعيات الخيريه اياها
اللى بتاكل مال النبى وتحلى بمال الصحابه
ربنا ينتقم منهم ويورينا فيهم يوم

[طارق طروق]

بيعجبنى اوى الناس اللى بتفهمنى بمجرد نظره العين
بحس فعلا انهم اذكياء

[طارق طروق]

بعتذر لعدم الكتابه عشان كنت عامل حادثه
بالعربيه بتاعتى ولسه تعبان شويه
وبشكر كل من زارنى فى مدونتى
وادعولى بالشفاء العاجل
مع السلامه بقى

[طارق طروق]

دمعه حائره
سهر
فجر
متشكر جدا ليكم
الله يسلمكم

[طارق طروق]

رساله الى العزيزه الاصيله
جبل عالى
بشكرك جدا جدا
انتى الوحيده هنا فى المنتدى
اللى سألتى عن غيابى فى مدونتك
وده شرف كبير ليا وغيابى عن المنتدى
وخصوصا المره دى اللى كنت عامل فيها حادثه
بين لى وعرفنى حاجات كتيره
بشكرك مره تانيه يا جبل عالى
واتمنى دايما تكونى بخير انتى واسرتك الكريمه
شكرا شكرا يا جبل عالى

[طارق طروق]

وعشان افادى قطه صغيره
وانا سايق العربيه عملت حادثه
ومش ندمان على اللى حصلى
بس كنت هندم طول حياتى لو دوست
القطه وماتت وكأنى فعلا قتلت قتيل بجد
انا عارف ان القانون مكنش هيحاسبنى
عشان قتلت حيوان لكن ضميرى كان هيحاسبنى
ومحاسبه الضمير اقوى من محاسبه القانون
وعشان كدا الحمدلله ربنا خد بيدى وبقيت كويس

[طارق طروق]

ناس كتير بعد الحادثه زارتنى فى المستشفى
الاجمل هنا ان معظم الناس دى من زباين الكافتريا
اللى شغال فيها بجد شعور جميل جدا جدا لما الاقى يوميا
ناس كتير بتيجى تزورنى فى المستشفى والبيت ويقولولى
وحشنا البيتزا بتاعتك يلا بقى شد حيلك وقوم بالسلامه
عشان تعملنا البيتزا الجميله بتاعتك اما بخصوص صاحب الكافتريا
عمل الكثير والكثير معايا ومازال لحد الان الناس بتسأل عليا
سواء زيارات او موبايلات والحمدلله على كل شىء
وعلى فكره جالى هدايا كتير اوى اوى وغاليه اوى اوى
وصاحب الكافتريا عملى مفاجئه انه صلحلى العربيه
ورجعهالى احسن من الاول وكأنها لسه جديده على حسابه
والحمدلله على كل شىء المهم انى بقيت بخير بفضل الله
ثم بفضل كل الناس اللى كانت بتزرنى

[طارق طروق]

شعور صعب جدا لما الانسان يحصله حاجه
ويحس انه بينه وبين الموت شعره
ويفضل بقى يفكر بكل الذنوب اللى عملها فى حياته
ويفضل بقى يدعى لربنا وهو فى محنته بعد الحادثه
ويقول مش هعمل كدا تانى لما ربنا ياخد بيدى ويعديها على خير
ومن منا بلا ذنوب

[طارق طروق]

وبخصوص عضويه التمييز
بشكر من منحنى هذه العضويه
بس بصراحه كنت اتمنى السؤال عنى فى غيابى
وخصوصا ان نوهت هنا وقولت انى عملت حادثه
كانت هتبقى اقوى من عضويه التمييز عندى
لكن الظاهر هنا ان الناس متعرفش الا اللى قدامها
او اللى بيكون موجود فقط لا غير والغايب ملهوش مكان
ال يقولوا ال اسره المنتدى كلام هندى طبعا
لأن الاسره لو غاب فرد منهم لاى سبب بيسألوا عنه
ما علينا ما علينا