من الاخر لازم تقلع

[ahmed 22]

بسم الله

لو تفتكروا المشهد في الفيلم بتاع احمد مكي اللي هو طير انت ....
مشهد بتاع سوما العاشق لما كانوا بيقوله
احنا عندنا اتجاه جديد في السينما
بيقوده زميلي الفنان جاد شويري
بتاع اغنية فانكي اه وفيه ماسج واضحة وصريحة عاوزين نوصلها للغرب
يا جماعة احنا مالناش علاقة بالارهاب ... ا
حنا سكسي جيرلز .. بيكينز ..بنعمل شوبينج .. مفتحتين زيكم

تصدقوا بالله ... المشهد ده كوميدي اه ..
بس اصدق واكثر مشهد واقعي في اخر عقدين للسينما المصرية مثلا ...
ولخص توجه القائمين علي الدول والحقوقيين حاليا والناس في جملة واحدة ..

الفيلم ده كان سنة 2009 وتقريبا هو ده اللي كان في وعي الناس وقتها
يعني كان كله متفهم وعارف الاتجاه اللي رايحين ليه وبيتهكم عليه ...
ومع ذلك احنا مشينا فيه لان التهكم والسخرية ماكنش كفاية عشان تقول استوب او تردع ... .. و
بالتالي الاول كنا بنقول الموضوع علي سبيل الدعابة والهزار والافيه ...
وبالتالي حاليا احنا عايشين فيه ... وفي مرحلة التأقلم

اول ميزان للتقدم وضعناه لنفسنا اعلاميا من عشرة او 15 سنة هو انه احنا لازم نقلع ..
ولما حد يسألك فين الاثبات انك شخص متقدم .. فين بطاقة الحضارة بتاعتك
فتقوم تقلعله عاطول .. كدا انت برنس في نفسك ..
او وديه مهرجان الجونة وسويرس يزبطه ...

للاسف احنا في مرحلة الاحداث يعني محدثين نعمة ...
اللي هو كان مثلا شخص ينتمي لعائلة فقيرة وكدا
وربنا كرمه وبقا غني ومعاه فلوس ...

طبعا مش كل تحول من الفقر للغني بيكون بشكل سئ
يعني عندك مثلا محمد رمضان
ومحمد ابوتريكة

ده كان منتمي لاسرة فقير وكذلك الاخر
ده ربنا كرمه وبقا معاه فلوس
وده ربنا كرمه وبقا معاه فلوس
السمة المشتركة بينهم
انهم شخصيات عامة

السمة الغير مشتركة
ان ده شخص بيكره الناس فيه بمواقفه
وده بيحبب الناس فيه بمواقفه برضه

بمعني ان الفلوس مش في ايد كل شخص بتحوله لشخص افضل
السائد في مجتمعنا بسبب ارث كبير من قلة الوعي والجهل والفقر
خلي الكثير من البشر بيتجه بعقله اكتر للافساد من الخير كل ما يمتلك وسائل رفاهية اكتر
بسبب ان النقلة الجديدة في حياة كتير من البشر عندنا
علي اساس غير سوي في لغبطة كبيرة بين قناعاتنا وقناعات غيرنا
مع جهلنا في وضع معايير للحكم علي الكتير من الامور
وبسبب وجودنا خلف سلم الحضارة منذ فترة طويلة ....

النقلة الحضارية والتكنولوجية ينطبق عليها نفس الكلام
احنا اكيد مش محدثين حضارة
بس محدثين في لغة العصر اللي اتبني عليها النظام العالمي الجديد
واللي احنا اكيد مش مكناش مشاركين في بناءه
وبالتالي كل اساساته مبنية علي ميزان
غير الميزان الحضاري والديني والاجتماعي بتاعنا

التحول ده احنا حاليا بنعيشه كمجتمع عربي من 50 سنة
ما بين كوننا دول الي حد متخلفة عن ركب الحضارة من فترة
الي دول بتحاول تعافر انها تستغل مواردها انها تلحق بالركب االموجود حاليا

ده احدث فجوة كبيرة جدا ..
طبقا للطبيعة الجغرافية او الخريطة الاجتماعية والدينية لبلادنا ..
بس تحس ان الميزان المشترك بين كل الدول العربية
انها حطت نفسها تحت مخدة الفكر الاستعماري
اللي كانت تحت منه لفترات طويلة..

زي واحد مربي كلب كدا
ومستني لما صاحبه يرميله عضمة ويقوم يرجعها ليه
فيقوله جود بوي ... فيقوم الكلب يهز ديله
ويفرح ..

عارف ان التشبيه قبيح شوي ... بس والله فعليا هو اصدق تشبيه لحالنا ..
تحس انك كدولة تحت ضغط انك المفروض دايما
انه مطلوب منك انك تثبت نفسك طول الوقت للبشرية والعالم ..

مطلوب منك انك تقول انا موجود بشكل ما عشان غيرك يشوف
مش عشان نفسك انت ...

مع انه عادي مش هيفرق مع غيرك سواء انت موجود او لاء
انت موجود لنفسك ... مش موجود لنفسك برضه

بس الضغط ده اللي حطيناه علي نفسنا من 50 سنة بالذات
خلانا مع الوقت نطلع اسوأ ما فينا ونخطأ الطريق ...
خلانا مع الوقت نظرتنا للحياة تتبني علي نظرة الناس لينا
يعني فجأة حطينا نفسنا ان احنا عشان نكون احسن
لازم نقتدي بالناس اللي عديتنا بمراحل دي في اسلوب حياتهم
سواء كان صح او غلط بدون فلتر ...
والأهم من ده ان بتستسهل انك تاخد الحاجات السطحية
المرتبطة اكتر بالاكل والشرب والمنظر بالذات
مع العادات المرتبطة اكتر بالانفتاح الغير مقنن ....
وبتنبهر اكتر بالشكل السطحي اللي ظاهر في اسلوب حياتهم
اكتر من أنك عاوز فعليا تشوف هما وصلوا للشكل الخارجي ده ازاي ..

انا هنا مش بلوم الغرب
انا بلوم ضيق تفكيرنا في ذاتنا
لدرجة خلت كل افكارنا للحياة سطحية
وبالتالي ارتبطت جودة الحياة عندنا عند النخبة
بالشكل الخارجي والعام وليس الدواخل ....

مش شرط دايما للوصول للقمة انك تتبع طريق واحد
كل الطرق تؤدي الي روما
بس ليه اخترنا الطرق اللي الي حد ما كلها ضد كل ثوابتنا ؟

هو ده السؤال المطروح ؟

فيه 3 انواع من الدول العربية حاليا في مراحلة مختلف من التغير ما بين الصعود
ليكونوا في نقط الضوء كدول ما بين العالم

احنا مثلا كمصر حاليا مازلنا بنمر بالاثار الجانبية لكونا محدثين نعمة
ودي المرحلة الاولي لسا لانها في مرحلة ان الناس بتحاول تنتقل بحياتها لمستوي اعلي ... البعض بينجح والاخر لاء ... وبالتالي ميزان الدولة بالكامل مش قادر يتوازن ... والي حين تملكهم للمال هيكونوا تحت الاختبار الاصعب
بس مصر علي الرغم من اقتصادها تقدر تقول متوسط
ولكن تملك ميزة المرونة بسبب خلفيتها التاريخية والحضارية
ما بين انها تملك بعض المزايا المشتركة اللي بتملكهم دول متقدمة في المرحلة المرحلة التالتة والرابعة .. زي ما هوضح في المثالين الجايين


هتيجي تروح للسعودية هتلاقيها في المرحلة التالتة من التطور او التقدم .. لانها دولة عندها موارد والي حد كبير دولة غنية فحاليا مشكلتها في فكرة انفتاحها فكريا وعالميا و عايشة في مرحلة تكسير الجليد عشان تغير تفكير الغرب فيهم ..
وده ضروري عشان ينالوا
استحسان الناس ليهم ... اللي هما المفروض هيصرفوا دولاراتهم هناك

هما شايفين حاليا انهم سهل يمروا بازمات اقتصادية
وهما متأثرين برضه حاليا منها
وبالتالي مش لازم يكون البترول والسياحة الدينية اللي خليتهم
بمستوي اجتماعي عالي يكون هو مصدرهم للدخل الوحيد
لأن العالم بيتغير والاتجاه للبترول عامة بيقل وهيقل
بطبيعة حروب المناخ
واستخدام الكهرباء والطاقة الشمسية كبدائل وكطاقة نظيفة
وحاجة زي السياحة الدينية المتمثلة في الحاج والعمرة الكورونا بهدلتها ...
وقللت من المداخيل بشكل عام

وبالتالي الاتجاه كان بأن السعودية لازم تبقي الامارات
والرياض تبقي دبي وتنافسها في الرفاهية والمزايا ..
وتكون وجهة للعالم والناس
وجهة للسياحة والسفر والترفيه ...
وبالتالي لازم نكسر التابوهات والثوابت المحطوطة علينا كدولة
معروف عنها في عرف الغرب الانغلاق والعزلة الدينية
وفي مفهومنا كعرب اسمه انضباط اخلاقي .
وبالتالي لازم نفتح الابواب للترفيه
ونحاول نكسر الجليد مع الوقت ..
ولو هنلاحظ هنلاقي تغيير كبير في نمط الحياة في السعودية
اخر 4 سنين بشكل ملحوظ ...
تغيير للاحسن او للأسوأ
علي حسب انت فين في المعادلة اللي بتشوفها ..

هتروح للامارات وهي في المرحلة الرابعة خاصة امارة دبي
هتلاقيها وصلت للاندماج شبه الكامل مع العالم
لاني اسمع ان في بعض الولايات في الامارات بيختلف اسلوب حياتهم
عن دبي علي حسب الامير اللي في كل منطقة ..
والبعض منهم ليهم تفكير مختلف في فكرة العادات والتقاليد ..
يعني مش محتاج اتكلم عن دبي كتير ...
هي شارحة نفسها ..

المهم الثلاث امثلة اتفقوا انه لازم اما تقلع .
او توافق انك تخلي الناس عندك تقلع ...

طيب ده شكل الموضوع السطحي ...
لو اتكلمنا افكار .... يبقي انت المفروض لازم تتعري من ثوابتك
عشان تناسب العالم الجديد ....
طول ما انت بتستقطب الناس ليك
طول ما انت في وضع تنازل ....

طول ما انت راهن وجودك انهم يجولك
او بتحاول تبعد عنك سمعة الارهاب
طول ما انت هتحس طول الوقت انك مطلوب منك تقدم فروض السمع والطاعة
وان كانت لا تطلب منك
انت فقط تقدمها لأنك تظن انها طريقك الوحيد للنهوض والتقرب منهم ...

لازم تغير معاييرك اللي بيفرضها عليك ديني
حاليا الاتجاه مثلا
انك طول الوقت لما يكون فيه نقاش مجتمعي او فكري
هتلاقي كلمة جديدة بقت بتطلع وهي
* والله لو هنخرج الموضوع من المنظور الديني
فالموضوع ليه فوايد كيت وكيت وكيت ..

لأن دلوقتي كمان فيه ثوابت جديدة اتأسست في المجتعات الغربية
وبتحاول بكافة الطرق انها تفرضها علي العالم كله
بمسميات حقوق الانسان والحريات بشكل خاص ..
وعن طريق ادوات زي السينما والاعلام
وباستخدام منصات زي نيتفلكس وامازون واتش بي او وغيرهم
وبيدعوا لافكارهم الجديدة بشكل قوي ... حتي بيستخدموا منصات زي الدوري الانجليزي
يعني يكفي مثلا انك تضع شارة المثليين في جولتين متتاليين
عشان تفكرك انك لازم تتأقلم وتتعاطف وتقبل وتعيش في العالم الجديد
وجزء من الحاجات دي اكلمنا عليها في نقاش في الطرح السابق
وبالتالي مش هكررها ...

والحريات اللي جزء منه مربوط بحرية الرأي
ولكن حرية رأيك مقيدة فيما يخص رأيك في الثوابت الجديدة
والعالم كله لازم هيجرمك عليها ويهاجمك
زي حوار ابوتريكة الاخير اللي كان من كام يوم
لما هاجمه العالم الغربي كله عشان قال رأي يخص شارة قيادة بتاع الرينبو دي ..
حرية رأيك مجرمة لما تناقش قضايا الهولوكست او القضية الفلسطينية
حرية رأيك مجرمة فيما يخص كل شئ اتبني عليه غلط في العالم
واتأسس ليه قواعد عشان تساعد قلة من الناس علي الصعود
علي اكتاف ناس كتيرة زيك لازم تتفرج وتسكت وتتعلم وبعدين تقلدهم
فالعالم كله يسير علي نفس المنوال بطبيعة العولمة ..

المهم عشان ماطولش اكتر من كدا
العالم بتاعنا مليان تناقضات السنين ...
وبالتالي كل الناس مطلوب منها انها تمارس تناقضاتها
في حرية غيرها عشان تسلم منها ...
من الاخر لازم تقلع عشان تقدم فروض الولاء
لاول سكة التطور والتقدم بالعرف اللي احنا تواصلنا بيه مع انفسنا
لوجهة نظر قاصرة لمين يقود مجتمعاتنا اللي اتأثرت بمفكرين بتوعنا
ماقدروش يفلتروا الحياة لما يناسب طبيعتنا السوية اعلاميا وفكريا ..

الخلاصة يعني عشان اللي مابيحبش الهري الكتير
احنا عندنا شوية عقد نقص كدا كتيرة ربنا يكرمنا ونتخلص منها
عشان نشوف حياتنا تنتقل فعليا للشكل الصحيح المناسب لتراثنا وعادتنا وتقاليدنا ..
ونشوف الدنيا بمنظور اوسع من فكرة اننا ننتظر الناس تثني علينا ..

[دالتكس]

موضوع رائع جدا

[دالتكس]

موضوع رائع جدا

[ahmed 22]

اقتباس المشاركة الأصلية كتبت بواسطة دالتكس موضوع رائع جدا

حبيبي يا رايق ... انت اروع
وانت عامل ايه النهاردة ؟

انت كويس ..
طب تمام

[ahmed 22]

اقتباس المشاركة الأصلية كتبت بواسطة دالتكس موضوع رائع جدا

لا يا صاحبي مش معقول
وداخل الموضوع بمنظرين
للدرجة دي المعزة

انا مش عارف اعمل في الصدفة الكونية دي
انا ممتن لحضورك يا غالي

تعالي كل يوم

[حـيـــــآة ❤]

للاسف صحيح كل حاجه كويس بيست
دلوقتي انا بدخل التيك توك بلاقي كلها قالعه
الاغاني بردو ال بيسموها راب ومهرجانات ال كلها نسخه من اغاني الأجانب
عقدة خواجات انما اي كلها نفسها تسافر وتبقى زيهم

عارف اقتراننا بالماضي دا وبالحضاره بتاعنا دا ال عمره م هيخلينا نتميز اصلا أو حتى نكبر كدوله
كل موقف نقول فيه احنا حضارة سبعتلاف سنه لحد م هويتنا احنا اتهمشت إن كان بكدا أو بتقليدنا للغرب الشنيع دا
و هما هناك بيضحكو علينا اصلا علفكره مش بيقولوا جود بوي ولا حاجه
طب اقولك خبر ضحكني شفته من حبه
السعوديه منحت سيف من الذهب للمغني الجامد اوي حمو بيكا ال مفيش منه🤣
خلاص التحضر بقى عباره أن خليك قالع خليك سفيه خليك بلا شخصيه
و ربنا يرحمنا برحمته

[حـيـــــآة ❤]

تسلم على الطرح المهم ❤️

[شاعر الإحساس]

عنوان ملفت للانظار ...
لكن المحتوى رغم انه مضحك بس يبكي
في نفس الوقت...

احنا فاهمين غلط وابتدينا نقلد بصوره عمياء...
يعني قلع وعري بصوره مبالغه...
واي حد بيدافع يقولك بلاش تخلف العالم بيتطور!!
وهو عشان يتطور لازم قلع !!!

غير ياعم الاجانب بيقلعوا من يومهم ...
لكن عندهم مخترعين ومطورين وعلماء في الطب
وكل حاجه بتخرج من عندهم ...
كل تطور او صناعه او غيره بتطلع من عندهم ...
وصولا للميتافيرس قريبا ...
باختصار هم بيقلعوا ودي حياتهم ودينهم وربنا يحاسبهم
لكن قمة التطور ...
انما انت هنا اللي بيقلع بيقلع بس !!!!
مفيش اي تطور في اي مجال ينافسوا بيه...
حتى الكلام الفاضي مش عارفين يجاروا الاجانب فيه

زمن غريب ...مش بس العري
حتى الزوق الهابط من بيكا وكمال وغيرهم
والدول تشجع ...هدايا بنتلي ..سيف دهب ...طيارات خاصه
ليه مخترعين هم !!!! علماء فضاء وطب !!?
دا حتى اللي بيقدموه رغم انه مش مهم للحياه...
لكن حتى لا يرتقي الى فن الاجانب برضو ..
رغم انه بياخدوا ملايين الجنيهات وبسهوله...
دا بيخلص الجيل اللي طالع يتعب ويشقى ليه !!
يتعلم ويطلع طبيب او مهندس او معلم ليه !!!?
طالما الشهره والفلوس بقت بالسهوديه والشكل دا !!!
القيم ضاعت ...الا من رحم ربي
من الاخر تقليد اعمى...بدون موازنه



نورت ياابوحميد
موضوع حساس ومعاش ومهم
دام تواجدك يا صديقي

[Lamees]

انا بجد شعرت بالحزن الشديد وانا بقرأ
موضوعك شديد الواقعية والمصداقية
اوقات بتمنى الساعة تقوم بقى
عشان نخلص من الدنيا دي
كارهه الحياة وكل التناقض
اللي فيها كارهه التعري
والتدين الظاهري الكاذب
كارهه المبادئ المزيفة
كارهه التقليد الأعمى
كارهه التأخر بتاعنا
كشعوب عربية
كارهه التقدم المزيف
والمصالح اللي بتحكم
ربنا يرحمنا

شكرا كتير احمد على المنظور الثاقب
للحقائق الأمور

يسعدك ربي

[mrmr al sayed]

شكرا جزيلا