إيموشنات

[شاعر الحب الحزين]

الإيموشنات اللي بتملا كلامكم

لما عن الحب تكتبوهالنا

ليه مش بنشوفها واحنا قصادكم

ليه بقت كده أحوالنا



إيموشنات بقينا بنختصر كلامنا فيها

هنتكلم إزاي لما نتقابل

كيبوردي عبيط بكتب الكلمة ومش بلاقيها

وياريتها كلمة دي رسايل

كيبوردي اللي تاعبني أول ب أول بيمحيها

حتى ف كيبوردي بختي مايل



السطور بتقولي كده كفاية

يا عم دي إيموشنات

يا سطور متعرفيش الحكاية

لساكي مركزة باللي فات

إيموشنات السعادة مش جوايا

ومفيش إيموشن للذكريات



إيموشن ضحكة بقيت

وجوايا كل إيموشنات الحزن

من غير إيموشن حسيت

كل كلمة منها بتاخدني بالحضن



كتر السلام يقل المعرفة

كتر الإيموشنات يقل الكلام

قلة الدوا م تمنعش الشفا

دي حاجة علمتهالي الأيام

خلتني حبة إيموشنات متخلفة

خدت عمري وقالت سلام



ش . ح

[ساحر الأحزان]

الايموشنات

دي تعبتنا من كتر حركتها

احسنت شاعرنا الجميل

تحياتي وتقديري لك

[ويبقى الأثر]

على رأيك من كتر الايموشنات مبقناش نتكلم
واحده صاحبتى كل رسايلها وردها لى ايموشن
الناس بقت تكسل تكتب وتعبر عن اللى جواها ربنا المعين بقا
جميله حروفك خالد والفكره قيمه
سلم مداد قلمك وقلبك الطيب

[شاعر الحب الحزين]

اقتباس المشاركة الأصلية كتبت بواسطة ساحر الأحزان الايموشنات دي تعبتنا من كتر حركتها احسنت شاعرنا الجميل تحياتي وتقديري لك

هنعمل ايه يا ابو المجد
اهي كلها إيموشنات
بتبقى حلوة ساعات ولأ ساعات

أحسن الله إليك أخي الغالي أمجد
أسعدتني حضوراً وقولا
شكري وتقديري وامتناني ❤️

[شاعر الحب الحزين]

اقتباس المشاركة الأصلية كتبت بواسطة ☆قيثارة الصمت☆ على رأيك من كتر الايموشنات مبقناش نتكلم واحده صاحبتى كل رسايلها وردها لى ايموشن الناس بقت تكسل تكتب وتعبر عن اللى جواها ربنا المعين بقا جميله حروفك خالد والفكره قيمه سلم مداد قلمك وقلبك الطيب

للأسف بقى نص كلامنا إيموشنات
اللي يكلمنا إيموشنات نكلمه بنفس الطريقة
بس بصراحة الإيموشن بيوفر كلام ومناهدة كتير
بس م يبقاش لناس وناس كده هيبقى مش عدل

اهو خدنا بتارنا من الإيموشنات
خلتها العنوان ومحطتش ولا إيموشن بين السطور ^_^

تسلمي ويسلم نبض قلبك الرقيق منة الله
دايما رائعة وصادقة بتفاعلك وردك
أسعدتيني بحضورك وكلامك اللي بعتز بيهم
شكري وتقديري وامتناني 🌺

[العاشق الذى لم يتب]

والله ياصديقى تقدرتقول
اننااصبحنافى زمن الايموشنات
مش هقولك فترات لابل كل حاجة بقى شكلهاوطعمهاغير
تسلم ياصديقى

[شاعر الحب الحزين]

اقتباس المشاركة الأصلية كتبت بواسطة العاشق الذى لم يتب والله ياصديقى تقدرتقول اننااصبحنافى زمن الايموشنات مش هقولك فترات لابل كل حاجة بقى شكلهاوطعمهاغير تسلم ياصديقى

اه والله يا رفعت يا اخويا
بقيتي بنداري وراها كلام كتير
وأسرار ومشاعر ياما

سلمت وسلم نبض قلبك الطيب
حمدلله ع السلامة أخي الغالي رفعت
أسعدتني حضوراً وقولا
شكري وتقديري وامتناني ❤️

[واد حبيب]

جميله منك كعاده ياغالي
تسلم يدك