كانت لغة طيبة والله ..

[noona]

إنا لله وإنا إليه لراجعون ... البقاء لله يا جماعة

أنا عارفة أن الصدمة شديدة عليكم...

بس ده واقع ... ودى الحقيقة اللى لازم تصدقوها

أنها ماتت خلاص...

"
"

لغتنا العربية ...

ومش هى بس ...دى لغتنا المصرية كمان ماتت

لغتنا ... يعنى ثقافتنا ... يعنى حضارتنا .. يعنى كياننا

مش ببالغ لما قلت انها ماتت ..

بدأت تختفى تدريجيا من حياتنا

طبعا انتوا مستغربين ازاى انا بقول كده ..:747:

امال احنا بنتكلم مع بعض ازااااى ؟؟؟

"
"

ماهو ربنا عوض علينا بردو ...

مش قاعدين من غير لغة يعنى :cv25:

عقبال عندكم كده بقى عندنا لغة جديدة

..

اسمها ...

..

" لغة الروشنة " ...

والشكرمون طاخ فى الترلوللى :732:

وأوعى الفحت لاتوقع تحت :Sh_077:

هارشين الموضوع ولا لسه :vb29: ؟؟

"

طبعا محدش فهم السطرين الملونين اللى فاتوا دول ( ولا انا والله انا جبتهم من النت دول :dunno

واللى فاهم بحييه جدا على نباهته وبنتهز فرصة الموضوع ده ييجى يشرحنا اللغة الجديدة والكلام الغريب ده للناس اللى متأخرة زينا ومش متابعة التطورات الجديدة فى قاموسنا اللغوى الموقر

طيب خلينا نفهم الموضوع أكتر ..

طبعا كلنا عارفين أن اللغة العربية هى لغة القرآن الكريم ... وده اللى أداها أعظم أهمية وإن كنا للأسف كتير مننا غير مدرك لمكانتها العظيمة

أنا مش بقول أننا نتكلم باللغة العربية الفصحى لأن كل الشعب المصرى تقريبا بيتكلم باللهجة المصرية (أو بالأصح اللغة المصرية)

أيوة .. اللغة المصرية ..

هى فعلا لغة معتمدة ومعترف بيها وكود اللغة بالنسبة لقانون المنظمة الدولية للتوحيد القياسى (أيزو 639) هو arz

وهى كمان لغة أكتر من 76 مليون مصرى ده غير انها من أكتر اللغات المشتقة من اللغة العربية فهماً بسبب انتشار الأفلام والمسلسلات المصرية فى العالم العربى والغربى

يعنى ليها أهميتها بردو ...

فخلينا بس نحافظ على لهجتنا لانها من أهم عناصر شخصيتنا المصرية والثقافة والحضارة والإنتماء ..

كده أنا حخرج بعيد عن الموضوع اللى كنت بتكلم فيه ..

طيب نرجع تانى للأهم

لغة الروشنة .... قلولى بقى اللغة دى جاية منين وفين أصلها .... بصراحة دورت على مصدر اللغة دى مش لاقية غير مجموعة من الأفلام اللى ظهرت على شاشات سينماتنا من سنوات وظهرت معاها مصطلحات جديدة وبدأت تنتشر بين الشباب بصورة كبيرة ...

طيب نفكر فى الأسباب اللى خلت اللهجة دى تنتشر بالصورة دى ...

-هل لأن لغتنا مقدرتش تستوعب أفكار الشباب وتعبر عنها ؟؟

-وللا بسبب حب الشباب لكل ماهو جديد وغريب ومختلف !!

-ولا يمكن إحساسهم أنهم عايزين يكون ليهم كيان مستقل بعيدا عن تعقيدات المجتمع اللى فى نظرهم ظلمهم كتير ..

وعشان كدا هما بدأوا يكونوا لنفسهم قاموس لغوى جديد خاص بيهم ؟؟؟

مش عارفة هل هو سبب واحد من دول ولا يمكن الثلاث أسباب مجتمعين ويمكن يكون فى أسباب تانية بس أنا مش عارفاها :cv34:

لدرجة أنى مرة كنت بشترى كتابين من أحد معارض الكتب ... لقيت كتاب أسمه..

..

" قاموس المصطلحات الروشة "..

بصراحة اندهشت فى الأول لكن أول ما بدأت أقرأ الكتاب ....

..

اندهشت أكتر طبعا :747: ..

لأنى ببساطة لقيت كتاب شبه المعجم العربى بالظبط لكنه عن المصطلحات والكلمات الروشة

واضح أن الموضوع كبير لدرجة أنهم ينزلوا كتاب معجم للمصطلحات الروشة عشان محدش يستهين بيها ..

دى لغة الروشنة ..

بس بصراحة والحق يتقال بردو ... فى كلمات قريتها وسمعتها كانت بتموتنى من الضحك :vb8:

زى الولد اللى راح قال لجدته ... وهى بتسمع لام كلثوم..

"أيه الأغنية اللى عليها تراب اللى بتسمعيها دى ؟؟"

:vb19:

ممكن تكون الجملة مفيهاش كلمات غريبة ... لكن تركيبة الكلمات لتكوين الجملة هو اللى غريب !!

وده اللى اكتشفته فى لهجة الروشنة دى .. أنها ممكن تعتمد على تركيب كلمات مختلفة فى المعنى أو الاستعانة بتشبيهات معينة لتكوين الجملة الروشة

زى الجملة اللى فاتت دى ...

فلغة الروشنة برغم أنها بتنطق باللغة العربية الا أن معانيها غامضة وغير مفهومة بالنسبة لقطاع الكبير من المجتمع

ومهما كانت الأسباب لازم نفتكر أن اللغة هى وسيلة تواصلنا مع الآخرين ومسألة انفراد الشباب بلغة معينة تعنى انعزاله عن باقى المجتمع خصوصاً الأجيال السابقة اللى تخطت مرحلة الشباب

ومعناه كمان تخلينا عن انتمائنا للغتنا وحضارتنا لبلدنا ...

مش معنى كلامى أننا نمنع الكلام باللغة دى لأن ده بقى صعب بعد انتشارها بالصورة الكبيرة دى لكن ممكن يكون الكلام بيها على سبيل الطرافة والفكاهة .. لكن استخدمها كلغة أساسية للتعامل مع الغير حتفقد خطوط تواصل كتير ومهمة مع الآخرين الشخص بيكون محتاجها فى حياته

"
"

مش ملاحظين ان صاحبة الموضوع مش كاتباه باللغة العربية الفصحى ...

كتبته باللغة المصرية :042802_3059_2407_pr... شوية انتماء للبلد بردو ...

حبيت كمان يكون الموضوع خفيف ومختلف شوية عن المواضيع السابقة ..

المرة الجاية حكتبلكم الموضوع باللغة الكوريكانية ..

من اختراعى الخاص ..

ومحدش يسألنى ايه اللغة دى ؟؟؟

:vb19:

تحيـــــــــــــاتى ،،،