كانت لغة طيبة والله ..

[احلى ابتسامة]

الله يرحمها الفاتحة عليها ههههههههههههههههه مين هية اصلا ولا هزااار

[ياسمين الشامى]

ههههههههههههه كل سنه وانتم طيبين بصراحه موضوع رائع بس مالهوش حل
لانه كل يوم عمال بيزيد لابقينا نعرف هو مصرى والا لغه المصريه المترجمه الحديثه
ده افضل مسمى ليها
عموما كلش على الكلمات يعنى انتهيت ههههههههههه
سلاموز يعنى سلام
اتعديت باين ههههههه

[noona]

اقتباس:
المشاركة الأصلية كتبت بواسطة SiLver Spectra
هههههههههه

إيه العظمة دي

سرد الموضوع جامد بصراحة يا نهى


عجبني إنك كتي بتدافعي عن العامية.....لأنك لو كنتي هتدافعي عن الفصحة كنت هعترض
^^

اهلاااااااااا يا طارق

لا طبعا كنت اتمنى انى ادافع عن الفصحى لكن دفاعى عنها مفيش منه امل لان صعب نتكلم باللغة الفصحى وان كنا لازم نتقنها كويس ونتكلم بعد كده براحتنا


تواصل البشر فيما بينهم بيختلف مع إختلاف معطيات العصر

و طبعا بيبقى عن طريق اللغة

مافيش لغة ثابتة في الكون ....(مافيش حاجه ثابتة أصلا في الكون)

لازم بتتغير...و في الغالب بيلجأ الإنسان للإختصار

الإختصار إلي بيطلع أسماء بلاد و اسماء مناطق و قرى

لو هتقولي مثلا.....فلان معاه (إثنتي عشر دينار) ...بالعامية (إتناشر جنيه)

فرق كبير في سهولة النطق

كلمة (إثنتي عشر) دي لواحدها بتنطق على 4 مقاطع صوتيه في حين (إتناشر) بتنطق على مقطعين


عندك حق فعلا ويمكن ده سبب ان اللغة العربية ما استمرتش على ألسنة الناس لسنوات طويلة وبدأت تندرج تحتها لهجات تانية اسهل فى النطق ولو فكرت فيها حتلاقى ان كل اللهجات العربية زى المصرى واللبنانى والسعودى والسورى وغيره .. نطقهم اسهل بكتير من الفصحى


اللغة العربية....كانت لغة بدو

مشتقة من لغات قديمة

(يعني كانت لهجة من لغة في يوم من الأيام)

و كانوا بينطقوها من غير دراسة أو قواعد نحو

زي اللهجة المصرية....مافيش قواعد...بس لو قولت (إنتي جاي النهارده) هتبقى الجملة غلط

من غير ما أقول مؤنث و مذكر (إنت جاي ) أو (إنتي جايه)


لكن طبعا بعد ما الإسلام إنتشر و بدأت قبائل بعيدة عن الجزيرة العربية في الإنضمام

لقوا إنهم لازم يحافطوا على اللغة العربية عشان نطق القرآن

فبدأوا في وضع القواعد و النحو و غيره



طبعا مع الوقت....لغة العرف عند الناس (اللهجة العامية) إتغيرت

و كل شعب بقى له لهجة خاصة بيه


و دي ظاهره طبيعية بتحصل مع كل اللغات

زي اللاتيني و اليوناني إلي إنشقت منها أغلب اللغات الأوروبية



فاللغة المصرية زي ما سميتيها و عجبتني التسمية

أو اللغة الشامية و غيرها

تعتبر تطور للغة العربية


اللغة المصرية لما بحثت عن اصلها لقيتها خليط من اللغة الفارسية والتركية والهندية والعربية وغيرها ... يعنى فى كلام كتير احنا بنقوله مش لغتنا خالص زى أوضة مثلا دى كلمة تركى ... وغيرها كتير


إنتي عارفة إن إحنا عندنا مشاكل في القراءة و المعرفة بسبب اللغة!!

اللغة إلي بتتكلم بيها غير إلي مكتوب بيها

فتلاقي الطالب مثلا في إمتحان التعبير مش عارف يعبر و يكتب 7 سطور

و بيلاقي صعوبة في القراءة لو ما كنش متعود عليها


و تلاقي صعوبة في قراءة نشرة الأخبار مثلا باللغة العربية

و المذيع يتلخبط في بعض الكلمات

الحكاية دي عمري ما شوفتها في نشرة إنجليزية

بتلاقي المذيع واخد راحته و الكلام بيخرج منه بسهوله و طلاقة من غير أي مجهود


لأن اللغة إلي بيتكلم بيها هي نفسها لغة الكتابة و هي نفسها لغة العلم

و إن وجد إختلاف فالإختلاف طفيف جدا


تعرف والله يا طارق انا الاول كنت حعمل موضوع عن اننا ازاى مش متنقنين اللغة العربية اللى هى المفروض انها اللغة الرسمية لنا ولساننا اتعوج وبقينها بنتكلم بكل لغات العالم ومحدش بيعرف يقول جملة عربية صح على بعضها

تشوف الطفل الصغير دارس انجليزى وفرنساوى والمانى ... لكن لغة عربية مفيش ..

وده اللى سبب المشكلة اللى انت بتقول عليها يعنى لو حتى قلنا اننا نتكلم بالعامية اسهل لكن فى مواقف ممكن تمر على الشخص يحتاج فيها استخدام الفصحى زى كتابة الخطابات الرسمية وقراءة الجريدة ...الخ

-----------------------------------

نخش بقى على الروشنة

المصطلحات دي ممكن تدرجيها تحت الموضه مش أكثر

يعني كل فترة تطلع كام كلمة جديده

و في كلمات بتروح و كلمات بتيجي


الأسباب ؟

ممكن تغيير.....كتر الهزار.....الإختصار....الروشنة (عشان تمشي مع الجل و تسقيط البنطلون ههههههههه)

أنا بصراحه مش شايف إن فيها خوف و إن كانت بتعمل مشكلة في التواصل فعلا

لكن دول شوية كلمات بيقولها الشاب و بعدين كام سنه و يكبر و يتجوز و ياخد على نفوحه و ينسى الكلام دا كله
^^

هههههههههههه

لسه يا طارق الجيل اللى بيتكلم بالروش لسه مكبرش لانها ما ظهرتش غير من سنوات قليلة ومع ذلك انا اعرف ناس متجوزين وبيتكلموا روش بردو >> مش عارفة حيفضلوا عايشين سنهم لحد امتى :smurf: ؟؟

بيبقى في تغير في ثقافة اللهجة

لكن التغير عادي أو طبيعي.....لأن الطبيعي إن اللهجة تتغير مع الوقت

على رأيك هو مفيش حاجة ثابتة ويمكن تكون دى ظاهرة حتاخد وقتها وتخلص


موضوع روعة يا نهى

حمستيني على الكتابة.....هفكني من الإدارة و هكتب


استنى كده !!!!!!!!!!

اقتباس هفكني

هههههههههههه

خلاص فكك يا طارق من الادارة وخليك روش واكتب .. وقضيها الناس لبعضيها >> من عندى دى مش لطشاها من حتة ولا حاجة :vb19:


في واحد بيقولك أنا ما هرشتش الموضوع كويس

متهيقلي عرفتي معناها
هههههههههههههههه


هههههههههههههه

اه عرفت ...


دوام الإبداع يا نهى....




تسلم يا طارق على مرورك وردك الجميل

دايمااا منورنا كده ...

ونقول سلااااااموز زى الروشين

ولا سلامو عليكو بالعامية

ولا السلام عليكم بالفصحى

:vb19:

اختار بقى اللى تعجبك :spain-flag: هههههه

نورت يا طارق

تقديري واحترامى ،،

[razan]

زى الولد اللى راح قال لجدته ... وهى بتسمع لام كلثوم..

"أيه الأغنية اللى عليها تراب اللى بتسمعيها دى ؟؟"

:vb19:

هههههههههههههههه

حلوة اووى فعلا

موضوع جميل جدا يا نونا

بجد سلمت اناملك

على طرحك القيم

وفعلا انا زى حالاتك كدة

مش متابعة اللغة الروشة دى اوى

لكن للاسف لازم نتابعهاا عشان

لما تتقال ادامنا نبقى فاهمين معناها اية



ميرسى كتير ليكى

منتظرين ابداعاتك

[Genius]

اقتباس:
المشاركة الأصلية كتبت بواسطة احلى ابتسامة
الله يرحمها الفاتحة عليها ههههههههههههههههه مين هية اصلا ولا هزااار

[noona]

اقتباس:
المشاركة الأصلية كتبت بواسطة شاعر الاقصى
انا هقولك ليه باختصار

جميع التقدمات والصناعات اوربيه صح

فالتالي اللغه لازم تكون انجليزي عشان المعدن او الجيهاز انجليزي يعني غريب عنا

هو مش غلط ده

الغلط فينا اننا احنا الي بنمحوا اللغه وشكرا



فعلا اخى شاعر الاقصى ان من اسباب انتشار اللغات الاجنبية كالانجليزية والفرنسية وغيرها ... عائد على التقدم الاوربى وسيطرته على العالم بالاقتصاد القوى والتطور التكنولوجى وغيرها

وهو سبب ايضا لانتشار مدارس اللغات وانتشار ثقافة تعليم اللغات الاجنبية واهمال اللغة العربية .. قد تكون دون قصد ولكنها من الاهمية ان يكون تعليمها لا يقل عن تعليم اللغات

الف شكر على مرورك وتواجدك

نورت الموضوع

تحياتى وتقديرى ،،،

[noona]

اقتباس:
المشاركة الأصلية كتبت بواسطة البرنسيسه 2
شكرا على المو ضوع طبعا اللغه العربيه طاحت ومحدش سما عليها لا والي يقهر ان الي مثلا الي اللغه العربيه ممتا زه والنجليزيه معدومه هذى جاهل


اللغة العربية غابت عننا من زمان ... اصبحت كل علاقتنا بيها على الورق فقط

وزى ما قلتى بيعتبر ان اللى مش دارس لغات جاهل او تعليمه دون المستوى حتى لو كان بليغ فى لغة بلده ..

يعنى احنا مش بنقول مندرسش لغات .. لكن ندرس لغة البلد بنفس المستوى اللى بندرس بيه اللغات الاخرى .. فدراسة اى لغة اخرى بصفة عامة ممكن تندرج من باب التثقيف والتعليم وفى كتير مثقفين بيدرسوا وبيتعلموا لمجرد التعليم والتثقيف بعيدا عن اى هدف تانى

وتسلمى يا برنسيسة على مرورك وردك

نورتينى يا غالية

تحيـــــــــاتى ،،

[قلم بلا حبر]

ليه بس الله يرحمها ليه

اللغه موجوده ومنوره بيكم طبعا

خلينا نرجع الاختلاف لاساسه

اللغه العربيه الخوف عليها مش بس من قاموس الروشنه ,,, الخوف عليها من الطمس تحت اللغه الاولى فى العالم (( الاتجليزيه )) اللى اكيد مفروضه بحكم الواقع والعلم ,, واللى عايز يشوف شغلانه كويسه لازم يكون معاه لغه وكمبيوتر ,, ده أ ب توظيف

نيجى لقاموس الروشنه ,, مفيش جديد ,, اللغه فى مكان بيكون ليها الشكل الرسمى والشكل المتداول بين العامه ,, اللى بيسمى فى اى مكان بالعاميه او الشعبيه ,,, ودى فى الاخير اسمها لهجات

يعنى أذيك فى مصر مختلفه عن شلونك فى الخليج تختلف عن كيفك فى سوريا ,, الاختلاف اختلاف لفظى انما المعنى الواحد والكل عائد على (( كيف الحال ))

اللغه زى اى حاجه موجوده فى الحياه ,, مرنه ,, قابله للتشكيل والتحويل ,, وده من سمات الاستمراريه ,, انك تكون مرن

لولا قاموس الروشنه كنا حنلاقى 70% من لغتنا مصطلحات انجليزى ,,

انما العاميه او الروشنه او اللهجات كلها مرادفات لمعانى لغويه قائمه بذاتها وموجوده ,,

وعلى كده بنلاقى احتياج الانسان للغه هو اللى بيتحكم فى شكلها وطريقة نطقها

يعنى حتى العاميه المصريه فيها اختلاف فى اللهجات ,, فاللهجه الساحليه مختلفه عن وجه بحرى مختلفه عن قبلى ,, وكل لهجه فيها اكتر من طريقة نطق ,, وكمان مصطلحات مختلفه باختلاف المكان

الخطر بيكون لما بستعيض عن كلمات عربيثه بكلمات انجليزيه ,, او الغه تسيطر على السنة الغالبيه زى ما حصل مع الجزائر بعد الاحتلال الفرنسى ,, الواحد فيهم ميعرفشى يتكلم سطر على بعضه بالعربى ,, وفى نفس الوقت لو بيتكلم عربى تلاقيه مبيعرفشى يكتبه ,, يعنى مشاكل مشاكل مش حبة هزار اتعودنا عليهم فى مصر

طول عمرنا فى مصر بنحب التغيير ,,, هو فى اكتر من اغنية بلح زغلول اللى ظهرت علشان اسم سعد زغلول كان اتمنع من التداول (( زى التاميفلو بتاع الانفلونزا ))

كان الحل انهم سموا نوع من البلح باسمه وغنوا ليه ,, هل ده اعتداء على اللغه ,, يعنى البلح ده اكيد كلنا عارفينه ولسه لحد دلؤتى بيسمى ((ب لح زغلول ))

وكتير من التغيرات ,, زى زمان كان يقولك (( نهارك سعيد )) دلؤتى اتحولت على حسب الزمن لصباح واحلى صباح وصباح الفل وصباحيات ,, الخ

الفكره ان اللغه مرنه فى ذاتها لانها لو اتسمت بالجمود فأكيد حتحصل اللاتينى

فعادى انى الاقى نفضله ,,, ومعنى تانى فكك منه بمعنى سيبك منه ,, وفى الفصحى دعك منه

مش حنختلف لو نطق دى طالما ان معناها فى النهايه لازم يكون ليه أصل لغوى

الخوف من الافتكاسات قصدى الاختراعات وفى الفصحى الخوف من الابتكارات

المهم الافتكاسات دى بتكون كلمات ملهاش اى اصل لغوى نستند ليه واحنا بنحاول نرتجمها ,, والمثال الواضح قدامى دلؤتى (( أكتش كدر فى الآلولو )) عنتر هلال هو الوحيد اللى معاه ترجمتها ,, وقلبى حاسس انه مش عارف معناها هو التانى

المهم يا نهى مرونة اللغه سمحت بتعدد اللهجات والاستعمالات لنفس المعنى ,,, طالما اننا بنلاقى ليها ترجمه فى قاموس اللغه يبئى خلاص ,, انما ادور وملقيش يبئى عليه العوض حتتنطق ومحدش فاهمها

موضوع مميز يا نهى

ليكى خالص التقدير عليه

تحياااااااااااااااااااااااتى"""""""

[noona]

اقتباس
المشاركة الأصلية كتبت بواسطة القلب الطيب





أيه الموضوع الجامد ده يانوناااااااااا

والشكرمون طاخ فى الترلوللى :732:

أول حاجه وضحلي الجمله دي الي فكت كل مسامير دماغي هههههه

دنا قعدت أدور عليها في النت هههههههه


ههههههههه سلامة مسامير دماغك يا ياسمين

انا علمى علمك مش عارفة ايه دى بس فعلا انا جايباها من النت

كتبت مصطلحات روشة فى السيرش .. طلعتى من ضمن المصطلحات :vb12:


أنا مش بقول أننا نتكلم باللغة العربية الفصحى لأن كل الشعب المصرى تقريبا بيتكلم باللهجة المصرية (أو بالأصح اللغة المصرية)




أيوة .. اللغة المصرية ..



هى فعلا لغة معتمدة ومعترف بيها وكود اللغة بالنسبة لقانون المنظمة الدولية للتوحيد القياسى (أيزو 639) هو arz


والله يابنتي تهريج يخلو اللهجة المصرية لغة مصرية**

يعني معناها

في لغة سعودية ولغة عراقية ولغة كويتية

ومتقليش العربي لهجه:spain-flag:

معناها كده أنا عندي لغة سعودية ولغة مصرية ولهجتي عربي ههههههه

خلينا نتكلم بقى بمنطقية وبلاش التهريج ده**

اللغة طبعا هي العربية *واللغة العربية الفصحى* لغة لن تنقرض ممكن يقل أستخدامها وتنحصر على حجات معينة

بس هي موجوده وهتفضل موجوده على الأقل مدام القرآن موجود

يعني مثلا أستحالة يدرسوا الطلاب في المدارس كتب بلغة مصرية*اللهجة المصرية* ممكن يبقى بديلها الأنجليزي


بصى يا ياسمين هى فعلا تم الاعتراف بيها كلغة لكن ما اعتمدوهاش فى مصر كلغة مصرية تستخدم فى التعاملات وطبعا مش حيعتمدوها ..

مسألة انها لهجة او لغة مش حتفرق معانا فى شئ مدام التعامل رسميا مش حيكون بيها .. اعتمادها جه بسبب انتشارها وشهرتها بين اللهجات العربية المختلفة


خلينا بقى في اللهجه وهي المعرضة للتغير

اللهجه على حسب معلوماتي هي طريقة إستخدام اللغة الي بتختلف من بيئة لإخرى

زي قلم إلي بتتقال أحيانا كلم :spain-flag:

هههههههههههههههههه سمعتها كثير دي

وبتتأثر بعوامل كتير زي الأحتكاك لفترات طويلة مع شعوب آخرى

ومثال عندنا في السعودية منطقة الشرقية متأثرة بالبحرين وبأجواء أرامكو والإجانب الي فيها

فلهجتهم فيها كلام من هنا وهناك وتشكيلة حلوه

حتى أنتي لو عشتي في بلد عربي غير مصر هتلاقي نفسك بتعمليلك لهجة جميلة وغريبة

زي حالتي *مصعودي*:spain-flag:

هههههههههههه

عارفاها مصعودى دى كنت بتكلم بيها اول ما رجعت مصر

والناس كانت بتضحك عليا :icon1366:

اكيد يا ياسمين كل دولة ليها لهجتها اللى هى فى الاخر مشتقة من اللغة العربية فى الاساس بالاضافة للغات تانية .. وده شئ طبيعى لتسهيل التعامل لان اللغة العربية برغم سهولتها فى الكتابة والفهم الا انا اصعب فى النطق .. يعنى كانت محاولة لتسهيل الحديث مش اكتر



وده محتااااااااج وقت مش قصير

بس بقى لغة الروشنة

مش هتأثر لأنها مبتستمرش الوقت الكافي علشان تبقى جزء من كلمنا

ومش بعيده بعد كم يوم تبقى هارش قديمه

هارش دي أيه حاجه غريبة ولي تقولي الموضوع مقمل:spain-flag:

وفي رد طارق ذكر بإن الغرب كلمهم زي لغتهم **مش ضرورة*

فمثلا في أمريكااااااا

what do you do


بتتقال

whaddaya do

يعني كمان هما بيقصوا الكلام وبيبهدلوا على الآخر:spain-flag:

معلش أنا كده طولت عليكي وموضوع رووووووعه

بالتوفيق

أختك

انتى نورتى يا ياسمين الموضوع الفكرة فى الموضوع هى انتشار لغة غالبية الشعب غير ملم بيها ... يعنى لو كنت اتكلمت ان ازاى الناس فى مصر بتتكلم انجليزى فى كلامهم او فرنساوى ..اكيد كنت حلاقى هجوم وده لسببين ..اولا لان الانجليزية بالذات من اكبر واشهر لغات العالم ويمكن تكون اللغة الوحيدة اللى بيشترك فيها سكان الدول المختلفة لما بيكون فى صعوبة تواصل بينهم ...يقوموا يتكلموا انجليزى على طول ..ثانيا ان اللغة دى معتمدة عالميا ومسألة اننا نتكلم بيها تدل على ثقافة صاحبها

عشان كده ما اتكلمتش فى الموضوع ده وخليتنى فى الروشنة اللى هى غير مفهومة ومعتمدة .. ومحدش حيزعل عليها :cupidarrow:

وتسلمى يا ياسمين على مرورك ردك المميز ..

سى يوووو :spain-flag1:

انجليزى اهو ههههه ..

تحيـــــــــاتى ،،،

[noona]

اقتباس
المشاركة الأصلية كتبت بواسطة الابتسامة الحائرة

بسم الله الرحمن الرحيم
شكرا اختى نونااا ع الموضوع الجامد

اللغه العربيه ...... لغة القرءان الكريم

اللغه التي برع فيها بنو العرب و كانت لغتهم الاساسيه التي يتباروا فيها في اسواق عكاظ و غيرها

تلك اللغه التي كانت يوما ما سلاحا للعرب

اصبحت الان هلاكا لهم

لم تعد هي اللغه العربيه كما كنا نعرفها

تدهورت مع تغير اوراق عصور الزمن

حتي وصلنا الي عصر شباب مصر 2000

و بما ان مصر هي بلد الحضاره فلازم الحاجات دي بتنبع منها يعني


اللغه الشبابيه العصريه التي ظهرت بمفاهيم جديده و قواعد جديده

فبدلا من قواعد النحو و الصرف اصبح لدينا قواعد الروشنه و اصول الصياعه

فنجد مصطلحات جديده غريبة الاطوار و الشكل

حتي اصبحنا في وقت لايستطيع فيه الناس ان ينكروا هذه اللغه


و صار لها قواميس خاصه بها في معارض الكتب و غيرها

نجد مثلا


(( العب باشكا )) يعنى العب على المكشوف !!

(( حطيت إيدى على البلف )) يعنى فهمت الموضوع !!!

(( أدعك الفانوس دلوقتى )) يعنى ممكن تمشى وترحل !!!

(( أرحلك )) أخرجك من الشلة !!

(( الجوند )) فلوس !!

(( مكيش القفف )) معاه فلوس كتير !!

(( يا صباح المظلات )) للمتقدمين للكليات العسكرية !!

(( فهمـى )) يعنى نفض وكبر الجمجمة !!!

(( أحلق )) طنش !!!

(( انت حتزاولنى )) انت حتشتغلنى !!!

(( مهييس )) عامل دماغ وطاير قووى !!!

(( يا صباح اللى بتغنى )) صباح الخير !!

(( يا مساء الليل )) يعنى يا مساء الخير !!!

(( فوكك )) سيبك من الموضوع دة !!!

(( أراك أمس )) يعنى مش عايز اشوفك تانى !!!

(( أحنا عيال قادرة وكفأة .. ودكتوراة فى الحداقة )) يعنى احنا شباب 100 / 100 !!!

(( كل معرفتى بيه .. هاى باى )) يعنى مش صاحبى قوى !!!

و طبعا الجمل دى بقت قديمة اوى


لاتتعجبوا فهذه هي اللغه المتداوله اليوم بين كثير من الناس و لم تعد قاصره علي الشباب فقط

فاصبحت هذه هي اللغه الرسميه لكثير ممن تحت الثلاثون عاما

:SuN037:



اهى طمطم سابقا جبتلكم القاموس كله لحد عندكم

ههههههه

مش متخيلة اليوم اللى ممكن يجي والناس كلها تتكلم كده

يعنى تخيلى مثلا كمان 100 سنة الناس حتكون بتتكلم ازاى

اكيد حتتطور اللغة اكتر من كده .. ومش حتفضل ثابتة

المهم يا طمطم حتى لو مش كنا بنستخدم اللغة العربية فى التعاملات نفهمها ونتعلمها كويس ونعرف حتى نكتب ونقرا بيها

اللهجات فى التعامل هى وسيلة تواصل الناس وبعضها ومسألة ان اللهجة تكون مفهومة من الجميع بتسهل التواصل اكتر وبتخلى فى راحة فى التعامل مع الغير

نورتى يا طمطم الموضوع بردك الجميل

وتسلمى على المصطلحات :cupidarrow:

تحياتى وتقديرى ،،،