السلام عليكم
إستنى بس ...
مش قادر اتكلم بجد
فيه حاجات
ماعرفشى إيه هى الحاجات
حايشة لسانى من الكلام
مش قادر انطق أى حرف
مش قادر اسمع أى حرف
إستنى بس ..
لما روحى
تلقط النفس اللى ضاع منها
وتايه من سنين
لما اشوف نفسى اللى غابت عنِّى فين .
إستنى بس ..
لما المشاعر تستريح م السفر
وتنشف العرق اللى غيَّر شكلها
خليها تلقى نفسها .
خليها تلبس توب جديد
م النهاردة هاينحسب للقلب عيد
إستنى بس ...
لما العيون تحفض جمالك
لساها بادئة تبتدى
تتهجى حرف السحر فيه ..
إستنى بس ..
لما قلبى يبطل الدق اللى فيه .
عدت ساعات
وعنيا قالت :
سبنى حبة
داللى عدى كان ثوانى
والصمت زاد
والكلام بقى بين عيونَّا
كل مَايخلص
يعيدوا الهمس تانى
والإيدين باصين لبعض وغيرانين
والدمع زاد بين الصوابع
والكفوف صوتها طلع .
متشوقين
سيبنا إيدينا لبعضهم
وعيونا حاضنة بعضهم
ماعرفش إحنا روحنا فين؟
ولا أصلاً روحنا إمتى ؟
ولا إمتى رجعنا تانى؟
ماعرفشى إيه كان المكان
الأماكن كلها كانت جميلة
والناس برغم الزحمة
شايفينها قليلة
عدت ساعات
بعد الساعات
والوقت فات
وكلامنا لسة ف أوله
سابت إيدينا بعضها
وعيونا فكت حضنها
وبتنتظر
فرصة تيجى لنا نكمله
بكرة أكيد هانكمله
دا كلامنا لسة ف أوله
كلامكوا لسه ف أوله
بكره أكيد هتكملوا
أصل الكلام لو يبتدى
يتمنى حرف يطوله
واللحظة لو داقت لقا
بتعيش كده متشوقة
للحظة تانية تتملى
بعيون بتحضن بعضها
وايدين بتحكى سرها
وقلوب بيطلع نبضها
موال محبة ف أوله
منقول
واتمنى ان ينال اعجابكم