 لما كنا صغيرين
 السلام عليكم
.......
أما كنا صغيرين وتحتها يندرج كل حاجه جميله بكل المعانى
كنا اسره صغيره سعيده وكانت مامتى محور سعادتنا كنا بنستمد منها الطاقه اللى تخلينا نعيش حلو كانت معانا فى كل تفاصيل حياتنا بداية من تصحينا الصبح نفطر لازم ونشرب اللبن وتجهيز اللانش بوكس ونودعها ببوسه ع ايدها ونروح الكى جى بكل فرحه مشوبه بحزن بسيط اننا نمشي سايبين ماما.....
ونرجع نلاقيها مجهزه الغدا وبعدين تقعد معانا تذاكر لنا وقبل المذاكره تسالنا عملنا اى
وبعد المذاكره ننام وتقوم هى تكمل شغل البيت
وكان يوم الجمعه عندنا كأنه عيد نروح كلنا ل تيته مامة مامتى
ونروح هناك الاقى مامتى ف قمة سعادتها وتقعد مع تيته جمبها وتستمع لها ويفضلو يحكوا ف كل حاجه واحس ان مامتى مبسوطه جدا جدا ونقعد نلعب كلنا كبير وصغير ونقضى يومنا كاحلى ما يكون
....
والجمعه اللى بعدها نخرج بره البيت نروح النادى ومامتى تلعب معانا ومش تسيبنا لحظه نلعب ونتبسط ونروح وكلنا طاقه ايجابيه تكفينا لغاية ما نجددها
فعلا عيشنا ايام حلوه ف طفولتنا وسعدنا بها.
وهكذا مرت الايام بكل سعاده وسرور ومش كنا نبطل ضحك......
ولكن فى وسط الفرحه والضحك حصل دروب غير حياتنا للنقيض تماما
هو وفاة التيته واصبحت بوفاتها كتبت شهادة وفاة الفرحه عندنا
مامتى اصبحت الدموع لا تفارها ولا لحظه
حتى يوم فرح اختى من اول دقيقه ف الفرح دموعها منهمره بصوره ملحوظه
حاولت كتير تداريها عننا ولكنها تغلبها ف النهايه...
اصبح كل ذكرياتنا اننا نقول فاكرين اما كنا صغيرين ودى العباره اصبحت لازمه لينا وعايشين عليها نستمد منها لحظات افتقدناها بشده.....
|