تنبيه للبنات اللي ع الفيس بوك . اوعي تقبلي طلب صداقه من ولد

[shady koky]

ممكن!!..طلب صداقه عالفيس
...

...

......

طلب صداقة ياترى من مين

ايه ده من ولد يووه طيب اضيفه ولا لأ

النفس الطيبة : بلاش تضيفه " وَلاَ مُتَّخِذَاتِ أَخْدَانٍ "

النفس الشريرة : اخص عليكى وتحرجيه

اضيفه وخلاص يعنى هيعمل ايه انا مش هكلمه اصلاً

انا مش بحب احرج حد

وبعد الإضافة : مرة كانت فاتحة صاحبتنا الشات وهو كان قاعد اكيد استغل الفرصة وهوبا نط بالبرشوت عليها

هاى

هى : ايه هاى دى ارد وخلاص

هى: أهلاً

هو : انا مش هقولك الحوارات بتاعت منكن اتعرف والكلام ده بس انتى واضح انك انسانه محترمة اووى وغير بقية البنات فى الفيس بوك

كل الحاجات اللى بتحطيها دينيه وحقيقى انتى بتأثرى فيا كتير بس محتاج منك طلب

هى: ياه انا عملت كل ده ده شكله انسان محترم اوى وبعدين انا بعمل خير لازم ارد عليه عشان يكمل الخير

: اتفضل اطلب

هو : انا محتاج منك تتابعينى فى الالتزام وتشجعيني منكن

هى : ممممم ازاى اتابعه يعنى

النفس الشريرة: تابعيه انتى ايه مش عايزة تخدى اى نوع من الثوابات احفظوا مع بعض قراءن وذكروا بعض بالصلاة والاذكار

يسلام على الصحبة الصالحة والله اعلم يمكن الموضوع يقلب ويبقى الزوج الصالح وتعيشى حياة دينية سعيدة

وتعيشي فى تبات ونبات وتخلفى صبيان وبنات

هى : بعد معاركة كبيرة مع نفسها الطيبة والشريرة

اخيراً وافقت وقالتله ماشي

ومرت الايام وفكرت نفسها بكده بتخد ثواب واجر وفى نفس الوقت زوج صالح مد ايده ليها عشان تساعده

وللأسف اكيد الشيطان كان فرحان وكل يوم بقى يدخل بينهم حوارات جانبيه وهى مكملة بحجة انها بتساعده على الإلتزام والايام تمر والكلام يتحول والحوارات تزيد

وبقى الكلام كله كل واحدعن حياته وانه معجب بيها وعمره ماشاف لا فى ادبها ولا طيبتها والحوارات دى و البنت معدتش تقدر يعدى يوم من غير ماتطمن عليه وتكلمه وللأسف شمعة الايمان اللى فى قلبها اطفيت والنور اللى كان يملىء قلبها بقى يضلم

وبقت على طول ذهنها شارد وتفكر فيه وبدأ قلبها يدق ليه لحد ما جيه يوم مالقتهوش على النت

كانت هتتجنن مش ممكن طيب ازااى ده اكيد فيه حاجة

منمتش اليوم ده ولا اللى بعده ظهر لحد ما مر 10 ايام وهى مبتنمش من كتر قلقها

ولقيته فى اليوم ال 11 اون لاين وهوباا نطيت على الشات بالبرشوت ماهو خلاص الشمعه انطفت والنور ضلم

وسألته بكل شغف انت كنت فين كل ده

رد عليها حد تانى

ايوا انا صاحبه بس هو مسافر برا البلد وكان مبلغنى ادخل على حسابه وادنى الباس وررد عشان الغيله حسابه لانه هيستقر هناك ومش ناوى يرجع دلوقتى خالص فقالى اقفله عشان محدش يقلق عليه

طيب حضرتك عايزانى اوصل له حاجة

هى : لا ابداً خلاص

قالها طيب عن إذنك

واتقفلت المحادثة على كده واتقفل الاكونت واتقفل قلب البنت معاه

مبقتش مصدقة ايه اللى بيحصل ده طيب ليه يعنى طلع بعد كل ده بيتسلى وبمجرد انه انشغل مفكرش يقولى حتى مع السلامة .. يااااه انا غلطت اووى فى حق نفسي يوم لما سمعت كلام شيطانى

وغلطت فى حق ربنا اكتر لما فكرت تضيف شاب على النت وتغضب ربنا عشان متحرجش ولد غريب عنها ومتعرفش عنه حاجة

طيب ليه كده وانفجرت البنت من البكاء وبقى ايامها كلها كئابة وحزن وندم

وفى مرة بعد فترة كبيرة اوووى دخلت الفيس بوك لاقيت الاكونت مفتوح ولاقيت صورته عليه دخلت جوا الصور لاقيت صوره مع فتيات صديقاته وصور مع الشله ومكتوب تعليق عليها

احلى ايام قضيتها فى حياتى الصيف ده

والتعلقيات ايوا يابرنس انت كده موقع قلوب البنات كلها

التعليق اللى بعده : ياجاااااااااامد وهكذا .....

نزلت دمعه ندم وتأكدت فعلاً انها انضحك عليها وانه لا كان عايز يلتزم ولا حاجة

بس كان حابب يتسلى مع نوع جديد من الفتيات

وقررت انها تلغيه من عندها وعاهدت ربها انها لا يمكن ابداً تضيف عندها او تكلم شاب تانى إلا لو كان زوجها

الملخص :

انه بجد يبنات فيه شباب كتير إلا من رحم ربي نسأل الله العفو العافية بيكون داخلين الفيس بوك او الشات والنت بصفة عامه بحجة التعارف والصحوبية وبيتأقلم مع كل بنت حسبها يعنى الملتزمة يبقى ملتزم
المتبرجة يبقى متبرج وهكذا
عشان كده اوعى تدى ودانك لشيطانك واوعى تفكرى إنك تكلمى ولد على النت او فى الجامعة او فى اى مكان
وياريت ميكونش هدفك انك بتتكلمى بحجة الدعوة او انك تلاقى نصك التانى .. حكاية صاحبتنا خلصت على كده بس فيه قصص وحكايا للأسف بتخلص على حاجات يدمى لها القلب
حافظى على الجوهرة اللى ربنا عطهالك ( قلبك )
صدقونى عمر ماولد بيخطب بنت كلمته لانه عمره ماهيثق فيها
أسأل الله ان يهدينا جميعاً ويرزقنا العفاف والتقى
الدال على الخير كفاعله

[رنا هشام]

جزاك الله خيرا وجعله فى ميزان حسناتك
يا رب احفظ بنات المسلمين

[shady koky]

امين يارب العالمين

[سراقة]

هو النت اصلا معمول للصداقه

[shady koky]

م انا عارف ههههههههههههههههههههههههههههههههه

[simsim96]

ربنا يهدي جميع المسلمين يارب
جزاك الله خيرا وجعله في ميزان حسناتك

تقبل مروري

[بنت المختار]

ببساطة ما أقبل أي طلب غريب
سواء بنت او شب
بس عندي اصدقائي الي معرفة وعشرة عمر
والباب الي يجيك منو الريح سدو واستريح
وربنا يحمي جميع بنات وشباب المسلمين
يسلمووووووووو

[the love rays]

يسلمووو على التوبيك الرائع دا يا شادي جعله الله فى ميزان حسناتك

المشكله بس ان الانسان مش بيتعلم من اخطائوه وتجاربوه فى الحياه

والمشكله الاكبر ان الشباب فى الايام دى مش بيراعى ان ممكن دا يحصل مع اخته

ولو مش عندوه اخوات بنات يبقى بنته فى المستقبل ولو مش عندوه بنات اكيد حفيدتوه ههههههه

تقبل مرورى

[زهرة الحياة 2]

جزاك الله كل خير اخى على هذه لنصيحة
وجعله الله فى ميزان حسناتك.
وربنا يهدى الجميع يارب
تقبل مرورى

[ملكة القلوووب]

لا حول ولا قوة الا بالله
مايخافوا ربهم
الحمدلله انا آخذه حذري من اول مااشتركت بالفيس


الله يهيديهم يارب

مشكور اخي على التنبيه