سماء ثامنه

[الحان الورد]

.

لِـ نُثرثر


أنا متشوقة لإجازة نص السنة ، لسبب واحد هو إن غالبًا إن شاء الله يعني
قولوا يارب
هسافر السعودية ^___^
يا الله ، قد إيه واحشني بيتنا هناك ، و المكان اللي كنا بنخرج فيه دايمًا
والمراجيح
يااااه .. المراجيح فعلًا
أنا بحب أتمرجح دايمًا ، ومن ساعة ما نزلت مصر مالقيتش مراجيح مناسبة
هناك بقى كنا بنروح مكان مليان مراجيح
وأتمرجح لحد ما أقول بس
و مكة والمدينة ، ومركز طيبة بتاع المدينة ، والدونات
و برج الساعة بتاع مكة ، عارفينه ؟
آخر مرة كنت هناك , الأمن مرضيش يطلعني عشان كانت في تصليحات وشغل عمال
ع الله بقى يكونوا خلصوا =)
وأوضتي هناك الصغيرة جدًا ، المعتقل بتاع الثانوية العامة
صاحبتي كانت مسمية أوضتي الزنزانة =)
عشان صغيرة ، وفيها شباك واحد كبير بس فوق كده ، والحاجات فيها مرصوصة بطريقة تحسسك إنها زنزانة فعلًا =)
بس والله وحشتني ^_^
يارب بس ربنا يكتب السفرية دي ومتحصلش حاجة كده ولا كده


،،


هو موضوع تافه فـ ممكن تعدي الحتة دي
دماغي بتهفني أحيانًا أتفرج على فيديوكليبات ، فـ كنت بتفرج على اليسا من شوية
أنا بحبها ، أو فيها حاجة بتعجبني
وبحب أغانيها ,,
رغم إني بشوف إن معظم الأغاني بقت مكررة ، والكلمات هي الكلمات والمعاني هي نفس المعاني
بس بحب أسمع اليسه برضو
المهم إن كليب أغنية تصدق بمين ده عسل أوي
مفيش قصة حضرتك
عو عبارة عن عرض أزياء .. فـ قشطة يعني أنا انبسطت اوي
وقعدت أتفرج على فساتين اليسا وجزمها وتسريحاتها بقى
لا هي جميلة صراحتن يعني
عشان بس محدش يقول إن البنات بينفسنوا على بعض وكدزه
صباح التفاهات =)

- أنا غالبًا همسح الكلمتين دول عشان مستتفهة نفسي أوي خالص جدًا يعني صراحتن -


،،


كنت بقرأ إمبارح في مجموعة مقالات كده ،
ولفتت نظري جملة بتقول :
" ماذا لو أن السعادة خارج هذه الدائرة ؟
خارج المشاعر والروايات والمسلسلات والأفلام الطويلة الموشاة بكلام ناعم ؟ "
فـ اللي هو إحساس أيووووووووون ، أنا بقول كده برضو
يعني أنا دايمًا بحس إن معظم الناس عندها تصور واحد للسعادة
أو تصورات متشابهة ..
يعني مين قال إن البشر دول كلهم سعادتهم في حاجة واحدة ؟
يعني مين قال لابهاتنا وماماهاتنا إن سعادتنا هتكون في الجواز والخلفة ؟
مين صور للمجتمع سعادة البنت إنها بتكون في وقت ما تلبس الفستان الابيض ؟ فقط ؟
وإنها مهما عملت بس ملبستهوش مثلًا ، هتفضل مش سعيدة أو في حاجة ناقصة ..
يعني مين مثلًا صور الحب بالطريقة اللي بنشوفها في كل حتة دي ؟
يعني ليه في ناس مش قادرة تفهم إن سعادتها في حاجات ، وأنا سعادتي في حاجة تانية ؟
وإن مش مفروض نمشي على نفس الخطوات عشان نوصل لنفس النتايج عشان نبقى مبسوطين ..
وإن السعادة فعلًا هي غايتنا كلنا
بس كل واحد ليه طريقته .
يلا ، مسيرهم يكبروا و يفهموا

[الحان الورد]

.

acceptance is the key to be
to be truly free
will you do the same for me
?

[الحان الورد]

.


إديني جناح .. علمني أرتاح
علمني أفضفض وأبقى صريح
ده الصبر مرار .. والناس صبار
كل ما أحضنهم ، ببقى جريح

❤

[الحان الورد]

-

أنا لسه واخدة بالي المغرب إن العيد الكبير جِه وإحنا لسه في أجازة الصيف ! D':
يعني في اجازة واحدة العيدين خلصوا ،
طب وبعدين نعمل إيه باقي السنة ؟ :d
إني واي ، هابي عيد يا جماعة
كل سنة وانتو طيبين .. انبسطوا بقى وكده d:

❤

[الحان الورد]

-





شفت البلالين دي النهاردة الصبح وإحنا بنصلي العيد ،
بس النوع اللي هو أشكال ، سبونج بوب و قلوب ومش عارف إيه وكده يعني
ومن كام يوم لما كنت خارجة في مشوار ، شفت كتير منهم برضو ،
وكنت بشاور نفسي جدًا أجيبلي واحدة
بس كنت مؤحرجة أمشي بيها صراحتن يعني D':
بس بعدين رجعت لمت نفسي ، أنا ليه مجبتليش واحدة ؟

[الحان الورد]

-

يا الله ..
أعنِي على نفسي إذا ضعفت ،
إذا وقفت في منتصف الطريق أو سئِمت .

[الحان الورد]

-

جميعنا نبتلع كمية لا بأس بها من الدمع ،
نفرغ أوجاعنا تحت الاسرة ، و فوق وسائد إسفنجية سريعة الإمتصاص ،
يأتي الصباح ..
نتناول فنجان قهوة ، نتحدث عن الأخبار اليومية ..
نحن الذين علقنا أحلامنا على سيناريو مليء بالتفاصيل الشبيهة بنا ..

* نور البواردي .

[الحان الورد]

-


كنت قاعدة باكل ، فـ شغلت التلفزيون عشان يسليني وكده
المهم لقيت مسلسل إبن حلال ، فـ سبته يعني ..
كانت الحلقة اللي الواد المجنون ده إبن الناس الإغنياء قتل فيها يُسر ..
المهم في الموضوع واللي حقًا أثار أعصابي ,
المشهد بينه وبين أبوه بعد ما عرف القصة ,,
الواد بيقوله هي اللي إستفزتني - قصده على يُسر اللي إتقتلت -
فـ أنا إتعصبت وقعدت أشتمه يعني :d
وعماله أقوله - وهو في التلفزيون يعني :d -
إنت حيوااااان
حيوان
وأبص على أبوه وأقوله
إنت الحيوااااااان الكبير بقى
الأب خلى إبنه كتلة من الغرور المُقيت والبشع ,, عشان هو غني و صاحب نفوذ
جه في بالي عادل إمام في فيلم التجربة الدانماركية وهو بيقول لواحد من ولاده ،
إنتَ مش إبن وزير .. إنتَ إبن كلب d':
المهم الإبن فضل يقوله
هي اللي إستفزتني
قوم إيه بقى ..
الأب راح زعقله برضو وقاله وهو إنت اللي يستفزك تقتله - خدها من على طرف لساني -
وبعدين بيكمل زعيق ويقوله إنت إييييه ؟
حيوااان ؟
و طاخ
ضربه بالقلم
وبعدين زعق تاني
حيواان ؟
طاخ
و راح ضربه بالقلم كمان مرة :d
وأنا في بالي بقول , هو فعلًا إبنك حيوان ,, بس ده مايخليكش تنسى
إنك إنتَ الحيوان الكابير يعني d':
مع إني أصلًا ساعات بعتبر كلمة - حيوان - مش شتيمة ،
وكلمة - كلب - مش شتيمة برضو ,
دي مخلوقات زينا ، وفرقنا عنهم في العقل بس ، والانسانية المفروض يعني
بس رغم كده ساعات بيكونوا أحسن مننا ,,
هو يعني لو كلب حب كلبة بعدين هي رفضته ، هيروح يموتها ؟ :d

ما علينا ..
الميدتيرم هيبدأ بكره إن شاء الله و نسألكم الدعاء :')
لا أوقعكم الله في ضيقة ولا زنقة إمتحانات إبدًا d':

وكمان حاجة ،
وحشني المكان هنا حقيقي :')

[الحان الورد]

-

إعلان بيريل الجديد , بتاع توربو ده
أسخف من السخافة ذات نفسها أقسم بالله -_-

[الحان الورد]

-

" أنا التي لا تقتلني أحزاني بقدر ما تقتلني أحلامي ،
آمنتُ أن عليّ التخلص من تلك الأحلام الزجاجية التي تحطمت ، كيلا تؤذيني شظاياها " .