سماء ثامنه

[الحان الورد]

-

الهيستولوجي دي مادة غبية أوي -_-
عمالة أشجع نفسي من الصبح إني أذاكرها وأبسطها شوية ,
أقرأ كلمتين بعدين الاقي الدنيا ضلمت ._.
تفاصيل التفاصيل وكمية حفظ بشعة
ده غير إني في الأول بقرأ جزء معين كده مجرد قراية ،
مبفهمش حاجة طبعًا
فـ امسك كلمة كلمة أترجمها ، أرجع أقرأ الجزء تاني
مفهمش برضو ._.
أنا مش عارفة العيب في مين بس هو أكيد في المادة نفسها :d

[الحان الورد]

* من 3 سنين *

- أنا بحب أغنية يا الميدان جدًا ، بس كل مابسمع مقطع
" ساعات بخاف تبقى ذكرى ، نبعد عنك تموت الفكرة "
بخاف جدًا نوصل في يوم للحال ده !

- لأ يا بنتي !
لأ طبعًا
عمرنا ما هنوصل لليوم ده !
مش معقول بعد كل اللي حصل وكل اللي ماتوا ..


* الوقت الحاضر *

ساعات بخاف تبقى ذكرى ، نبعد عنك تموت الفكرة
نرجع تاني ننسى اللي فات
نحكي عنك في الحكايات ..

- بإبتسامة مُتهكمة -

- فاكرة قلتلك إيه عن المقطع ده من 3 سنين ؟
- ........
- بالظبط كده !
يا شيخة يخربيتنا إحنا !!

[الحان الورد]

حدود الفِكر والتفكير في الحقيقة مِلكِي
بس مِلكي مش مساعد إن حدودي تكفي
تسند ضعف عزمي ولأصل حلمي تحمي
ففضلت أعافر في صمتي أبني في حيطان مدينتي
بس يأسي من عالمكم خنجر كان في صدري
جرح بكره المضمون من ساعات اليأس
خلّى أملي في الحيَاة طاقة كانت بالعكس
تكشف كل سلب وتسلب كل حق
تعفي نفسي من النضال والصراخ بِـ لأ
إختياري لإختياركوا وعد وإتفاق
إني أمضي على الضمانة وأحلف بالولاء
أسف مش هساعد ، أكون لحلمي باعد
أقتل كل شاهد ، كان للثورة واعد
الخروج عن المضمون فكرة مش مألوفة
والمألوف للعقول فكرة كانت موصوفة
تحجم كل جامح ، تربط كل حي
تمحِي من قاموس حياتك إن بكره جيّ
جاي غصب عني لو هتكون معايا
كذبة واضحة من البداية وعايشة للنهاية
إنت عكس فعلي
إنت كل ماضي
إنت راضي الحقوق تضيع وتبقى عادي
فرق العمر والتفكير بين الجيل الحر
زي حبك للحياة إختيار المر
إحنا جيل يحاول ، إحنا جيل يغيّر
وإنتو جيل في الحرية عمره كان قصيّر
سرق الأمل منّا واللي بيشكي يموت
كده أو كده ميت فاصرخ بعلو الصوت
كل الشوارع لينا والثورة للثوّار
والحُر لو يسكت يبقى ملاه العار
طال الفرق بينا ، إحنا بينا شق
جيل بيرفض السكوت ، الخلُاصة لأ
لأ لكل صمت
لأ لكل خوف
لأ بتلعن إختياركوا وتنكر الظروف
لأ تصبّر اللي خايف حتى إن صبره طال
لأ تكسر الحصون حتى لو جبال
ساقط رغم حجمك مهما إنك تكون
إحنا نور الحقيقة في عتمة الظنون

**

مشاعر متُخبطة لما نرجع نسمع أغنية زي دي ,
و وجع على كل اللي آمن ومشي , غصب عنه إو بإرادته ..
بس يعني
في حتة أمل صغيرة لسه ، بنعافر إنها تفضل موجودة ..
ربنا قادِر ..

* بالمناسبة ، إخراج الأغنية متميز جدًا ومعبر
عجبني .

[الحان الورد]

،

إعتراف صُغير ..
أنا مكنتش بحب أقول لحد يدعيلي ،
كنت باخدها من ناحية إنك المفروض تدعي لنفسك أولى ،
أو الموضوع يكون بينك وبين ربنا على طول ,,
مش عارفة الحقيقة ليه بالظبط ، بس كنت كده يعني ..
خلال السنة دي , تحديدًا إمتحانات الترم الأول
جالي خاطر إن يمكن أكون بعمل ذنوب تمنع إستجابة الدعاء ،
وإني لو قلت لحد يدعيلي ، يمكن يكون صالح أو قريب من ربنا فـ تُستجاب الدعوة ..
ساعتها حسيت نوعًا ما إن الحاجز إياه اللي بيمنعني أطلب من حد يدعيلي
إتكسر شوية ، أو بقى أخف ..
عمومًا يعني
ياريت تدعولي بالنجاح وإن ربنا يسهل إمتحانات الترم ده ويعدي السنة على خير ،
وإدعوا لكل الطلاب اللي بيمتحنوا دلوقتي ،
واللي هيخلصوا قبل رمضان بيوم :\

ربنا يوفق الجميع إن شاء الله .

[الحان الورد]

،

أنا بحب عُمر طاهر جدًا
وأوقات كتير كلامه على الفيسبوك بينور للواحد حاجات مكنش شايفها ..

كان لسه كاتب :
" فقال له شيخه : العطاء كله لما تفهم هو ربنا حرمك ليه . "
وحد كتب في تعليق تحت
" ما أشقاك إلا ليسعدك " .

[الحان الورد]

-

بقالي كام يوم مبعرفش أنام بالليل كويس ،
أرق شوية وبفضل أتقلب وقت طويل ، كنت مفكرة ده في الليلة اللي قبل الامتحان
بس إتكرر إمبارح مع ان إمبارح كان يوم الأنتخة :3
كنت مستغربة يعني لإني من الشخصيات اللي طول عمرها بتفخر
إنها مكان ما تحط راسها تناااااام :3
بعدين انتبهت لـ كمية المنبهات اللي بشربها طول اليوم !
عشرات الأكواب من الشاي والشاي والشاي
وبما إن النكسافيه كان مسببلي مشاكل ، فـ بعدت عنه شوية
بعدين رجعت أشربه بشكل أفضل ماشاء الله عليّا
بلاك من غير حليب خالص
فـ مش عارفة يعني ، وحدة بتشرب الكميات دي وترجع تقول أنا مبنامش ليه -.-
غريب أمركم أيها المصريون والله ..
بالمناسبة يعني ، بعد ما اكتشفت مقررتش أقلل الكمية
لأ
أنا قررت أنام الفجر أو الصبح بما إن مفيش نوم هييجي قبل كده ,,
و لإن دورية المنبهات بتقل وتقف على بعد 12 عندي

،،

رمضان قرّب ودايمًا بسمع جملة جهز نفسك لـ رمضان ،
أنا ماببقاش عارفة أجهز نفسي إزاي الصراحة ، بس ببدأ أجهز قائمة الدعوات ^_^
النهاردة لما كنت بفكر في كده
إفتكرت مقولة كانت لـ عمر بن الخطاب تقريبًا أو حد تاني
مش فاكرة أوي ،
كان في مامعناها ان الصحابة كانوا بيفضلوا يدعوا بـ حاجات معينة في رمضان
مابيجيش رمضان اللي بعده إلا وكل الحاجات دي متحققة ,,
إفتكرت إن أنا في رمضان اللي قبل 3 ثانوي ، قعدت أدعي كتير جدًا
أجيب درجة حلوة في إختبار القدرات ، كنت بقول في الأول يارب فوق 95
بعدين جمدت قلبي شوية وبقيت بدعي بـ يارب 99
وربنا مخيبش ظني
ساعتها الواحد بيحس بإحساس فوق الوصف والله ،
رمضان اللي فات للأسف كنت فيه سيئة جدًا ، وكان الوقت بيضيع مني بطريقة رهيبة ومبعملش حاجة تُذكر ,,
فـ إن شاء الله إن شاء الله يعني ناوية رمضان ده يكون غير خالص السنة اللي فاتت ، وحاسة كمان إنه هيكون بعد إمتحاناتي مباشرة , فـ هيكون فرصة
رائعة لـ الراحة اللي أنا محتاجاها حقيقي ..
اللي عايزة أقوله يعني جهزوا دعوات نفسكوا فيها فعلًا
ولِحوا فيها كتير ، كل يوم ، في كل وقت
خصوصًا الأوقات المُستجاب فيها الدعاء ,
زي قبل الفطار وآخر الليل وبعد الأذان وغيره ..
وربنا هيكرمكم فوق ما تتصوروا إن شاء الله
ولو حاجة إتأخرت فـ لعله خير ، أو هو أكيد خير فعلًا ..

ربنا يريح قلوب الجميع ويحقق الأماني .

[الحان الورد]

،

حلقة " إخترع منطقك الخاص " ,,
من برنامج [ عمرولوجيات ] ..
الحلقة حوّة على فكرة
لو حابب تاخد الخلاصة جرّي لآخر كام دقيقة من الفيديو ،
تحديدًا من الدقيقة 8:46
بس إنت مش هتخسر حاجة لو إتفرجت ع الحلقة كلها ..
آه ، ومتتخضش من للكبار فقط دي

من النهاردة مافيييش منطق ، آآآنا المنطق

[الحان الورد]

،

مادة الهيستولوجي اللي كنت إتكلمت عنها قبل كده ..
- شتمتها عشان نكون دقيقين يعني -
محطوطة مع مادة تانية ، على نفس القدر من الرغي والحفظ ,
بس بنسبة أقل قليلًا ,
في آخر يوم إمتحانات ,
الموافق 28 \ 6 ..
بعد عناء ما يقارب الشهر ,

سمعوني تصفيق هائل وحار للبشمهندس اللي حط جدول إمتحاناتنا ..
-_-

[الحان الورد]

،

أنا حزينة
الفولدر اللي كنت بحتفظ بالصور فيه إتمسح
ده كان كنزي الوحيد
بقالي أكتر من شهر عايزة أعمل فرمتة لـ اللابتوب بس مستنية أجيب فلاشة
عشان اشيل الفولدر ده عليها ,,
معرفش ايه اللي حصل بس إتمسح غصب عني
الصور اللي جمعتها على مدار سنوات إستخدامي للنت
ذكرياتي
تعبي وشقايا
كله ضاع وياقلبي لاتحزن

[الحان الورد]

-

قُل لِي لماذا إخترتَني
وأخذتني بيديك من بين الأنام
ومشيت بي ..
ومشيت .. ثم تركتني
كالطفل يبكِي في الزحام
إن كنت يا - ملح المدامِع - بعتنِي
فأقلُ مايرثُ السكوت من الكلام
هو أن تُؤشِر من بعيدٍ بالسلام
أن تُغلق الأبواب
إن قررت ترحل في الظلام
ماضر لو ودعتني ؟
ومنحتني فصل الخِتام ؟
حتى أريح يديّ ، من تقليب آخر صفحة
من قصتي ..
تلك التي يشتدُ أبيضها فيُعمِيني
إذا اشتد الظلام
حتى أنام
حتى أنام ..

هذِي شموعك لم أزل
بالليلِ أرجوهَا .. فلم تتعطفِ
مابالها لم تنطفِ ؟
مُت ! أو لتتركنِي أمُت !
إختر مماتًا أو حياةً واختفِ
لا تَحيَ كالأشباحِ فيّ ..


- الشاعرة ميسون السويدان -
* من أجمل القصائد اللي قرأتها ..