عايزه خطيبك يحبك ويحترمك ويموت فيكى أتفضلى أدخلى

[عاشقة الهدوء]

ازيكم ياقمرات جميعااااااااااااا عاملين ايه ؟؟؟؟ يارب تكونوا بخير انا النهاردة جاية وجايبة لكم معايا كام حاجة كده عايزة أقوللكم عليها انا بجد كان نفسى أيام خطوبتى حد يقولى حاجة من الحاجات دى بس يلا الحمد لله على كل حال خلاص خلاص انا عارفة انكم زهقتوا منى وزمانكم بتقولوا بلاش رغى بقى يارغاية وقولى المفيد المهم بقى هنبدأ مع بعض اهو بس صلوا بينا على النبى عليه أفضل الصلاة والسلام أول حاجة بقى 1- إوعي لما ييجي في موقف هزار مثلا ويقولك يا غلسة ، ترديهاله وتقولى انت اللى غلس ، انتوا مش اصحاب وبتتبادلوا الكلام اللي زي ده ، صدقيني هتكبري في عينه جاااامد ، وهيحس إنك غير عن بقية البنات . ********** 2. الرقة ، خلي بالك إنه هو راااجل ، وخاطب أنثى ، عارفه يعني إيه أنثى ؟؟ يعني رقة ودلع ، يعني إيه ؟؟ يعني مفيش صوت عالي ، الصوت العالي ده ضد الأنوثة خاااااااااااالص ، حتى تلاقي في لغة الجسد أصلا ، البنت لما تيجي تكلم خطيبها تلاقي تلقائي صوتها اتغير وبقى اوطي عن العادى ، وما نبقاش عارفين الرقة دي جات منين هههههههههههه ، خليكي كده على طول ، مش لما تبقي رايقة بس ، ولما تتنرفزي تطلع أمنا الغولة ، معلش بهزر معاكوا انتوا زي اخواتي ، الراجل بيخزن صورة ليكي في عقله اللا واعي ، لما بيشوف زميلته في الشغل هادية وصوتها هادي ، مع العلم إن الصوت الهادي ده بيكون مغري جدا، بلاش تيجي في باله صورتك وانتي صوتك عالي ، لا ما تديهوش فرصة لكده ، عشان يشوفك دايما أحلى حاجة . بس مش رقة اوفر يعنى خليكى فى المعقول عشان مش نتعدى شرع ربنا برضه ************* 3. من صور الرقة برضو ، لما تزعلي معاه ، ما تمديش بوزك شبرين ، لا يا حبيبتي ازعلي وبيني له إنك زعلانه ، بس زي الأطفال ، عارفه إزاي ؟ بنظرة عينيكي المكسورة دي ، ومدي شفايفك سم "سنتيمتر" كده ههههههههههه ، مانتي كده ده زعلانه ، بس ليه تترسخ في باله صورتك وانتي مكشرة ، بصي هقولك على حاجة ، قربي من المراية وكشري كده وشوفي شكلك عامل إزاي ، يا ساااااتر ، ترضي يشوفك بالشكل ده ؟؟ يبقى عودي نفسك من دلوأتي ما نمدش البوز شبرين لما نزعل ، يبقى زعلنا كله أنوثة ورقة ، وأصلا هو مش هيقدر يقاوم ويخليكي زعلانه كده كتير ههههههه . *********** 4. الغموض ، مش لازم كل حاجة في حياتك يكون هو عارفها ، لا ، خليه يبقى متشوق يكلمك ويسمع صوتك ويعرف انتي بتعملي إيه ، مايبقاش قاعد مكانه ، وعارف انتي دلوأتي نايمه ، انتي نازلة ، خليه يدور وراكي ، حتى لو مش مبين لك ، بس بيحس بالإثارة إنه يكشف غموضك ، مافهاش حاجة لو سألك عن حاجة ، وبصيتي له برقة : وقلتي له سر مش هقولك ، هيتجنن هو عشان يعرف إيه السر ده ههههههههه ، الرجاله دول زي الأطفال ، فيهم فضول لازم نثيره . ************ 5. لازم تعرفي إن خطيبك غير صاحبتك ، يعني في حاجات ينفع تقوليها قدام صاحبتك ، وما ينفعش تقوليها قدامه ، زي إييييييييه ؟؟ - انتي دلوأتي عندك مشكلة في البيت مع بباكي أو أختك ، أي حد من العيلة ، ما ينفعش الكلام ده يتقال قدامه أبداااااااااااا ، حتى لو بتموتوا في بعض ، هقولك ليه ، ده أولا بيقلل قيمتهم في نظره ، مش لازم دلوأتي ، بس في رجاله ممكن لا قدر الله بعد زمن بعيييييييد يعايك بالكلام ده ، آه والله ممكن تحصل ، أو يحس مثلا إن مالكيش ضهر تتسندي عليه ، فيستقوى هو عليكي بعدين ، الكلام ده ممكن ما يظهرش دلوأتي ، بس بعدين ممكن يظهر ، انتي عارفه كمان واحده مرة قالت كلمة : قالت أهلي هما اللي باقيين لي دايما ، لكن جوزي لا ، معاها حق ، فإيه لازمته تشتكي له من أهلك لمجرد الفضفضة ؟؟ امسكي أي واحده من صحباتك وفضفضي لها يختي لغاااااااية لما توجعي دماغها . اتفقنا ؟؟ - الحاجة التانية ، مشاكلك مع أهله ، إوعي إوعي تقولي له عليه ، ليه ؟؟ عشان الراجل بيحب أهله جدا ، وبرضو انتي بالنسبة له جديدة ، مش معقولة هتبقي انتي أهم عنده من أهله ، عليكي بقى والمدح قدامه ، أنا بحب مامتك جدا ربنا يبارك لها ، أختك زي أختي طيبة وعسولة ، بس مش بزيادة أوي عشان ما يبقاش باين إنك بتكذبي ههههههههههه، وأي حاجة مضايقاكي منهم اشتكي لوحده صاحبتك ، وولا يهمك يا قمر . **************** 6. إيه رأيك في لبسي ؟؟ الطقم ده شكله حلو عليا ؟؟ طيب الميكب ده مناسب لوشي ؟؟ مش دي تساؤلات كتير مننا بنقولها ،، صح ؟؟ إوعي إوعي إوعي تكون لخطيبك ، ليــــــه ؟؟ عشان لازم تكوني قدامه واثقة من نفسك ، ما تسأليهوش رأيك في لبسي إيه ، خليكي واثقة إنه يناسبك ، محتارة وعايزة تسألي السؤال ده ، اسأليه لمامتك ، لأختك ، لصاحبتك ماشي ، لكن لخطيبك لأأأأأ ، ليه لأن إحنا مشاعرنا بتشكل هالة حوالينا بتتنقل للأشخاص اللي قدامنا ، لما يشوفك واثقة من نفسك ، هتترسخ الفكرة دي عنده في العقل اللا واعي ، وليكي أن تتخيلي أد إيه الراجل بيحب البنت الواثقة من نفسها ، لما يمدح جمالك ، مش تقولي له ما تبالغش ، أو تقولي له : مش أو كده ، لا ابتسمي وانتي مكسوفة وخلاص ، أو قولي له شكرا ، عيونك الحلوين ، ولما تحبي تبقي شقية ، قولي له : من زمان ، انتا لسا واخد بالك ؟ ************* 7. أنا حاسه النهارده لون بشرتي بهتان كده ، مش عارفه ليه ،، أنا وزني زايد الأيام دي ، أنا بقالي كام يوم عندي هالات سودا تحت عيني ، أنا عندي حاجة مش بحبها في جسمي ، إوعي تلفتي نظره للعيوب اللي فيكي ، عارفه لما تعملي طبخة وتبقى مالحة شويه ؟؟ وقبل ما تحطي الأكل تفضلي تقولي معلش الأكل طلع مالح ، الكل لما ييجي ياكل مش هياخد باله إن الأكل طعمه جميل ، بس هياخد باله إن الملح زيادة ، حتى لو الملح مش زيادة وانتي اتهيألك . عارفه لما تلفتي نظره للعيوب اللي فيكي ، هييجي وقت ومش هيشوف غير العيوب دي ، طاب ليه ؟ بالعكس انتي تعكسي الوضع ، وتلفتي نظره للحاجة الحلوة اللي فيكي ، من غير غرور ، يعني ماما النهارده بتقول لي وشك منور ، وهكذا .. ************** 8. لما خطيبك يكون متضايق بتعملي إيه ؟؟ في بنات خطيبها بيفضل ساكت ، مش بيحب يتكلم عن اللي جواه ، ما تفضليش تزني عليه ، لازم تعرفي في إيه ، لا ، انتي هوني عليه ، وقولي له معلش مفيش حاجة تستاهل ، وكل حاجة هتبقى كويسه إن شاء الله ، أنا خطيبي مثلا مش بيحب يكلم حد لما بيكون متضايق ، يا إما ببعت له من فترة للتانية رسالة فيها دعاء مثلا ، أو بكلمه دقيقة كده على السريع عشان أسلم عليه ، بس عشان يحس إني معاه وحاسه بيه ، هو لما يروق هييجي يكلمك عادي ، وممكن ساعتها يقولك هو كان متضايق ليه ، وانتي أهم حاجة عندك إنه بقى كويس ، صح ؟؟ وممكن مثلا : تحاولي تكلميه وتسأليه سبب ضيقه ، وبعد ما تعرفي تحاولي تهوني عليه الوضع ، وتخليه يتفائل ، تحاولي تبيني له الجوانب الإيجابية في الموضوع مثلا ، او تقولي له ده ابتلاء من ربنا وهيتحل ، وتقعدي تدعي له كده دعوتين من قلبك ، خطيبي بيتبسط أوي لما بيلاقيني أدعي له ، حاولي تخليه يفرفش ، ويفضفض معاكي ، قولي له ابتسامتك وحشتني ، وريني شكلك كده ؟ شكلك مش حلو بالنونه اللي بين حواجبك دي . يا بنوتات في حاجات ما تنفعش غير للي كاتبين كتابهم عشان نبقى قريبين من ربنا برضو . ************* 9. خليكي إيجابية ، هتسأليني إزاي ؟؟ هقولك ، لما يتصل عليكي وانتي زهقانه ، ويقولك عامله إيه ؟ ما تقوليلوش : آهوه ، ماشي الحال ، وصوتك بنطق من الزهق ولا الزعل ، انتي كده بترسلي له إشارات غير محسوسة إنك مملة ، مش هيبقى عايز يكلمك ، وحتى لما ييجي يزورك ، خليكي حيوية وإيجابية ، وبلاش تقعدي تتكلمي في المشاكل ، والأخبار الوحشه ، وسيرة فلان وعلان ، ولما يكون في مشاكل في الشقة برضو هقولك تتعاملي إزاي في مشاركة منفصلة . الملخص ، خليه يتشد إنه يكلمك ويقعد معاكي ، يتصل عليكي ويسمع صوتك ، مش يبقى شايل هم المكالمة والهم اللي هيسمعه . ************* 10. حبايب قلبي ، كتير سألوني إزاي أبقى غامضة ، هقولك شوية تفاصيل كده ، يا رب تفيدكم ، أول حاجة : البنات الي لسا ماتخطبوش ، أو لسا مخطوبين ، إوعي تعودي خطيبك على الاستئذان وانتي طالعه وانتي نازلة ، عارفه ليه ؟؟ أولا انتي لسا في بيت بابا ، وطول عمرك بتاخدي الإذن منه ، يبقى احتراما ليه ، أمشي على كلمته ، لغاية لما أروح بيت جوزي ، حتى لو مكتوب كتابك ، لأنه مالوش حق الطاعة ، إلا لما يديكي حق النفقة والسكن ، يعني لما تبقي في بيته ويصرف عليكي ، يبقى واجب عليكي إنك تطيعيه وتستأذنيه لما تنزلي . اتفقنا يا قمرات ؟ ثانيا : هتتحطي بعدين في مشاكل وتحكمات انتي هتزهئي منها ، واسألي البنات اللي قبلك في كده . ثالثا : وهو ده المرتبط بكلامنا ، تبقى عندك الحرية انتي رايحة فين وجاية منين ، افرض انتي عايزة تجيبي حاجة مش عايزاه يعرفها ، افرض رايحة مشوار مش حابه إنه يعرف عنه ، هتعملي إيييييييه ؟؟ طيــب ، دي أول نقطة ، النقطة التانية : ما تديهوش أحداث يومك من نفسك ، لو هو سألك كان بها ، ولو على طول بيسألك ، قولي له سر ، هيلحّ ويقولك إيه يعني ، قولي له أسرار بنات ، ما ينفعش تعرفها . مصر أوي إنه يعرف لما تيجي نازلة ، مش لازم تقولي له رحت المكان الفلاني واشتريت كذا ، وقابلت فلانه وحصل كذا ، الأحداث بالاختصار ، منها ما تبقيش رغاية ومخه يوجعه ، ومنها هتستفيدي إيه لما يعرف كل حاااااااجة ؟؟ مش عايزين تبقى قدامه كتاب مفتوح ، ويعرف أخبارك ، ويتنبأ بردة فعلك قبل ما تعمليها ، فهمتيني ؟؟ 11. طريقة العتاب ، لو في حاجة مضايقاكي منه أويييييي ، وعايزة تلفتي انتباهه ليها تعملي إيه ؟؟ أو حصل موقف مش ظريف كده ، وما عجبكيش تصرفه معاكي ، إيه الحل ؟؟ أولا عشان تبقي عارفه ، في نوع من الرجاله بيبقى حساس ورومانسي جدا ( ده محتاج تفصيل في موضوع بوصلة الشخصية عشان تعرفي نوع خطيبك ، بس أنا هقولك بكل عام ) المهم النوع ده بيتحسس من النقد جدا ، ولما تنقديه بيتجرح جامد ، وبيأثر فيه ، أنا خطيبي من النوع ده ، لما بحب أقوله على حاجة بعمل إيه ؟؟ وإحنا بنتكلم في موضوع عادي ، أجيب له اللي عايزة أعاتبه عليه في وسط الكلام ، وأكلم كلام في بقية الموضوع التاني العادي ، عشان ماديهوش فرصة إنه يتحرج مني ، أو أحرجه بأنه يضطر يرد عليا ويبرر لنفسه ، وفي نفس الوقت هو بيحس من نفسه وياخد باله فهمتيني ؟؟ يعني مثلا بنتكلم على الجامعة ، فبقوله أنا رحت النهارده الجامعة ورجعت متأخر ، انتا عارف امبارح لما كنت متضايق ، ما كانش نفسي تخرج بسرعة عشان كان نفسي أخفف عنك ، ( عشان بنتكلم شات / ده على سبيل المثال مش بجد ) وأرجع على موضوعي الأولاني ، النهارده حصل كذا في الجامعة ، وأسترسل في بقية الكلام . يبقى وصلت له المعلومة وما أحرجتوش . في طريقة كمان ، بيسموها طريقة السندوتش ، يعني إيه ؟؟ يعني تبدئي كلامك بمدح ، بعدين تقولي له اللي مضايقك ، بعدين تختمي كلامك بمدح ، إزاااااااي ؟ يعني في موقف مثلا ضايقك شويه وحسيتي إنه عمل موقف كده مش كويس في الناحية المادية مثلا ، تقولي له : حبيبي ، ربنا رزقني بيك ، كريم ومفيش زيك الحمد لله / بس .... ( وقولي الموقف ) وبعدين ، بس الناس كلها بتحسدني عليك ، وبتقول لي خطيبك كريم جدااا ، ربنا يخليهولك . ده مثال ، أنا عارفه إن النواحي المادية بتبقى حساسة جدااا بين المخطوبين . ***************** 12. الطااااااااعة ، والاعتراف بالخطأ ، يا سلام على حلاوة كلمة حاضر _ مع الاحتفاظ بشخصيتك طبعا _ فيها إيه لما تكوني غلطانه ، وتعترفي بغلطك ، وتعتذري ، تقولي معلش يا فلان ، انا أخطأت في كذا . فيها حاجة ؟؟ ما نقصش من قدرك حاجة ، بل العكس هتكبري في نظره كمان ، برضو لما يكون متعصب ومتضايق ما تقفيش قدامه ، لا كل حاجة يقولها قولي حاضر ، هتمتصي غضبه خالص ، بعدين لما يهدا ، أكييييييد هتقعدوا وتتناقشوا في الموضوع تاني ، ساعتها ناقشيه في الكلام اللي مش عاجبك وأقنعيه بيه . لكن وقت ما هو متعصب وبيزعق ، هتزعقي انتي كمان قدامه ، والدنيا هتبقى وحشه خااالص . لما برضو يطلب منك حاجة تعمليها ، برضو حااضر كلمة سحريية ، بس إوعي ده يأثر على شخصيتك وكيانك المستقل وتبدئي تتنازلي عن قناعاتك عشانه ، لا ، تطيعيه في حدود المعقول ، وفي حدود الحقوق اللي ليه بس . ************ 13. أهالينا دايما بيقولوا لنا : التقل صنعة . واللي احنا طبعا عمرنا ما فكرنا في الكلمة دي ولما جينا نفكر فيها ماعرفناش نطبقها . هيا بيني وبينكوا صعبة شويه ، خاصة لما تكوني بتحبي خطيبك ، آآآه بقى ، هتقل عليه إزاي ده ، ده واحشني خالص ، مش ده اللي بنقعد نقوله ؟؟ صح ؟ طب اشمعنى هو بقى بيعرف يتقل وإحنا لأ ؟؟ على فكرة ، قربي هقولك على حاجة ، لما ما تتقليش عليه ، هيزهق منك يا قمر ، خاصة لما تبقي قريبة منه أوووووووي ومش مدياله فرصة يتنفس ، هيتخنق ويهرب الراجل ، مش كده ؟؟ طايب ، نعمل إيـــــــــــــه ؟ نتعلم إزاي نتقل ؟ إزاي ؟؟ أولا : مش انتي اللي تتصلي عليه على طول ، انتي في فترة خطوبة ، يعني المفروض انتي اللي تاخدي الدلع ، قبل ما ناخد على دماغنا بعدين هههههههههه ، أنا بهزر طبعا ، إن شاء الله هتبقى حياة حلوة ، سيبيه لغاية لما يفتكرك ويتصل من نفسه ، عشان لما تيجي مرة وتتصلي عليه يبقى مبسوط ، ويقول دي افتكرتني ، بدل ما يبص للموبايل يشوف اسمك ما يبقاش طايق نفسه ، المسجات يا قمر ، مش عمال على بطال ، ماشي ؟؟ لما ييجي يتصل عليكي بأه ، مش من أول نص رنه ـ تجرييييييي على الموبايل تردي ، مش هيهرب ما تخافيش ، اتقلي يا قمر ، اصبري بعد كام رنه ، ردي عليه وكلميه ، مرة ما ترديش ، قولي له أصل كنت مشغولة معلش ، بساعد ماما ، وللا قاعده مع صاحبتي ، طبعا ملاحظة هامة ، كل ده ما يبقاش مرة واحده يا بناااااااات ، واحده واحده ، أنا بدأت شويه شويه ، مش مرة واحده ، يقول مالها قلبت عليا مرة واحده ليه . ومش مشكلة لو وحشك أوي في مرة كلميه وطمني عليه بس ما تطوليش أوي ، عارفه ليه ، الراجل بيمل بسرعة غير عن الست ، فقبل ما هو يقطع كلامك ويقفل معاكي ، خليكي ذكية انتي ، واقفلي قبله ، فهمتيني ؟؟ في كام نقطة كده مرتبطين بالنقطة اللي فاتت : ****************** 14. ما تحسسيهوش أبدا إن سعادتك مرتبطة بيه ، إزاي الكلام ده ؟؟ يعني لو ما كلمكيش النهارده يبقى المزاج مش تمام ، لو ما خرجتوش آخر الأسبوع هيجيلك اكتئاب ، لو ما جاش اتغدى معاكي تبقي مدايقة ، ما تحسسيهوش إن هو المسؤول عن إسعادك ، وإن هو الوحيد اللي قدامك اللي ممكن يعمل كده ، كده يا قمر بتضيفي عليه عبء مش هيقدر يشيله ، لا ، خليه يحس إنك سعيدة بيه ومن غيره ، صدقيني صدقيني كده هيحب يجري وراكي ، وهيحس جواه إنه عايز يقرب منك كمان ، فهمتي اللي عايزة أقوله ؟؟ *************** 15. ما تحسسيهوش إنك متعلقة بيه وإنه كل حياتك يا قمر ، يعني لو لا قدر الله سابك هتموتي من غيره ، انتي فعلا لو سابك هتتعبي ومش هتقدري ، بس مش لازم هو يعرف ، عارفه ليه ؟؟ لأنه هيبقى متطمن إنك وراه ، يعمل اللي هو عايزه هيرجع يلاقيكي مستنياه ، يلعب براحته ، هتسامحيه أكيد ، يضايقك براحته ، مانتس ما تقدريش من غيره ، بصي يا حبيبة قلبي ، لما تعملي لنفسك قيمة قدام نفسك ، مش هيحصل كده ، انتي بتحبي نفسك ، أيوا بتحبيها ، لأنك لو مش بتحبيها ، مستحيل هو يحبها ، إزاي هيحبها وانتي مش بتحبيها ؟؟ تقدري تجاوبيني ؟؟ وعشان انتي بتحبيها ، يبقى هي أولى منه باهتمامك ، كرامتها أولى من إنك تنزليها عشان واحد باعك أو هيبيعك ، أيوا هييجي يوم ويحس إن خسارتك سهلة ، لما يلاقيكي كده ، يبقى إيه الحل ؟؟ الحل إنك تبقي غالية في عين نفسك ، وتحسسيه إنك تقدري تعيشي من غيره، بلاش كلام أنا لما شفتك عرفت أعيش ده ، الكلام الفارغ ده بلاش منه ، لما عرفتيه حياتك زادت حلاوة ماشي ، أوك يا قمر ؟؟ ***************** 16. الحاجة التالتة وأخت الكلام اللي فات ده ، حسسيه إنك اجتماعية ومشغولة ، غلط جداااااااااااا ، لما تتخطبي تسيبي صداقاتك ، وتنسي هواياتك، وترتبطي بيه ، تبقى حياتك هوا وبس ، وما تدوريش حوالين محور غيره ، ليه تعملي في نفسك كده ؟؟؟؟ الراجل بيشوف الزواج ده جز من جانب حياته ، إنما الست فالزواج ده بيبقى كل حياتها ، لا يا قمر مش كده ، خليه ياخد نفسه شويه ، وانتي كمان تعزي نفسك ، عارفه لما تيجي تتجوزي وتلاقيه نازل مع اصحابه ما تبقيش زعلانه ، ليه ؟؟ لأن انتي كمان عندك اللي يشغلك ، هواية هتعمليها أو صاحبة تزوريها أو تخرجي معاها ، فهمتيني ؟؟ الزواج مش هو كل الحياة ، لأ هو جانب نخليه سعيد منها بس ـ معايا؟ في حاجة مهمة جدااااااااا يا بناويت ، كان المفروض أقولها من البداية ، ************** 17- مين اللي حط في قلب خطيبك حبك ؟؟ ومين اللي حط في قلبك حبه ؟؟ مين اللي قادر بسهولة ينزع الحب ده من قلوبكم ؟؟ مفيش غير جواب واحد هو ربنا ، صح ؟؟ والله ، ربنا قادر في وقت يكرهكم في بعض بنفس مقدار الحب اللي كان ، مش صح ؟؟ _بعيد الشر عنكم _ طاب نعمل إيه ؟؟ أول حاجة لازم تفكري ، هو أنا اتخطبت ليه ؟؟ السؤال ده مهم جدااااااااااااا ، عشان أفرح ماما وبابا ؟؟ وللا عشان أبقى زي البنات ومش أقل منهم ؟؟ وللا عشان أرتبط وأحب وأحس بمشاعر حلوة ؟؟ النوايا اللي فاتت دي مش عيب إنك تحسي بيها ، ومش غلط برضو ، أمال إيه ؟؟ النوايا دي صح إنها تكون موجودة بس مش بشكل أساسي ، بشكل ثانوي ، عشان مش هي الأساس ، أمال يه الأساس ؟؟؟؟؟ الأساس إن ربنا أول حاجة لازم نحطها قدام عينينا في كل حاجة ، أنا بتخطب وهتجوز ، عشان طاعة لربنا ، عشان دي سنة ربنا فينا وأنا بلبيها ، عشان بطبق سنة الرسول صلى الله عليه وسلم ، عشان بعف نفسي عن الحرام ، عشان هبني أسرة تنفع ديني ، تخيلي بقى لما تنوي النوايا الجميلة الصادقة دي ، إن شاء الله كل ما تتعبي في التجهيز أو أي حاجة تاخدي أجر ، تخيلي ؟؟ عشان بتسعي لهدف كبير وسامي ـ كده كده هتتعبي ، لكن الفرق إنك بتتعبي وبتاخدي أجر كمان يا سلااااااااام ، وكمان إن شاء الله ربنا هيزرع الراحة والسعادة في طريقكم. وكل فترة اقعدي مع نفسك ، وجددي نواياك يا قمر ، عشان مع الزحمة ممكن تنسي . دي أول نقطة النية ، تاني حاجة إيه ...؟ اقري معايا الحديث ده كده : إذا أحب الله العبد نادى جبريل : إن الله يحب فلانا فأحبه ، فيحبه جبريل ، فينادي جبريل في أهل السماء : إن الله يحب فلانا فأحبوه ، فيحبه أهل السماء ، ثم يوضع له القبول في أهل الأرض صحيح البخاري يعني إيه ؟؟ يعني كل ما تقربي من ربنا أكتر ، كل ما ربنا يقرب بينك وبين خطيبك أكتر ، فهمتيني ؟؟ وكل ما تبعدي عن ربنا ، ممكن ربنا يزرع البعد ده بينكم أكتر ، مش شرط من أول مرة ، لا ، ربنا بيمهل ويمهل ويمهل يمكن ترجعي ، بس لما ما يبقاش في فايدة منك خلاص . في دعاء حلو أوي : الله اجعلني له كما يحب ، واجعله لي كما أحب ، واجعلنا لك كما تحب . ودايما ادعي إن ربنا يسخره لك ويسخرك ليه . ************* 18- الدعاء يا بناااااااات ، يا سلاااام عليه وعلى حلاوته ، يا سلام قبل ما تقفلي معاه السماعة ، تقولي له : خلي بالك من نفسك ، ربنا يحميك ، يااااه على فرحته ، قبل ما ينام ، تقولي له ما تنساش تقول أذكار النوم ، ربنا يحفظك ، وهو نازل من عندك ، تقولي له : أستودعك الرحمن . والله هيتبسط ، لما يبقى متضايق ، ابعتي له دعوات في مسج ، مش دعوات مكتوبة يا بنات ، انتبهوا ، لا دعوات من قلبك انتي ، اتفائل ، الدنيا لسا جميلة ، ربنا يريح قلبك يا حبيبي . خلاص مسج خفيف لكنه جميل وهيفرح بيه جااااااااااامد. من فترة للتانية : ربنا يخليك ليا ربنا ما يحرمنيش منك ، انتا هدية ربنا ليا . وهتلاقي نتيجة جميلة إن شاء الله. ***************** 19- بصوا يا قمرات ، في رجاله بيتأثروا أوي بالدموع ، تمام ؟؟ وفي مش بيتأثروا أوي ، طيب نعمل إيه ؟؟ مش عمال على بطال تعيطي ، لو خطيبك من النوع الأول ، هتصعبي عليه في البداية ويقعد يحايلك ، بس مرة على مرة ، من كتر ما بيشوفك بتعيطي ، هيزهق ويطفش، وتبقى دموعك ما تأثرش فيه بعدين ، وتبقي انتي الخسرانه . طاب ولو خطيبك من النوع التاني ؟؟ يبقى لما نيجي نعيط مرة في السنة ، يحس إن حصل حاجة ، لأنه شايفك ما بتعيطيش كتير قدامه ، فيما معنى الكلام إنك بتعيطي في الشديد القوي بس ، وبالتالي هيتأثر جااااااامد ، مزبوط ؟؟ يبقى العياط عمال على بطال بلاش منه . تاني حاجة ، الاعتذار الكتير ، في بنات الاعتذار عندها صعب جدا ، وفي بنات العكس الاعتذار عندها أسهل من الهوا ، وده غلط جداااااااا ، الاعتدال كويس في كل حاجة ، فيه إيه لما تبقي غلطانة وتعتذري ؟؟ انتي كده اعتذرتي في الوقت المناسب للاعتذار ، إنما يبقى هو غلطان وتعتذري !!!! تيجي إزاي ؟؟ يبقى نعتذر في الوقت المناسب بس ، عشان يحس بقيمة كلمة الأسف ده ، ما تضطريهوش ييجي في يوم ويقولك أعمل بيها إيه كلمة آسفة . تكملة عن الأنوثة ، حلو أوي لما تحسسيه إنك أنثى بكل معنى الكلمة ، يعني إيه ؟؟ يعني في ألفاظ ما تقدريش تسمعيها ، لأنك رقيقة وما تستحمليش تسمعي الكلام ده ، وده لو فكرتي فيها ، هتلاقيها ************ معلش الموضوع طويل شوية بس بجد والله حاجات مهمة قوى وانا كان نفسى قوى حد يقولهالى أيام الخطوبة ولما عرفتها قلت اجرى على فتوكاتى حبايبى اللى لسه فى مرحلة الخطوبة علشان يمكن حد منهم يعرف يستفاد منها بحاجة واكون اخدت ثوابهاو فيدتها وهيا ان شاء الله تفيد غيرها انا تعبت قوى والله فى نقل الموضوع بطريقة حلوة بس كله يهون علشان خاطر عيونكم ويارب بس تستفادوا منه مش تحرجونى بقى وتخرجوا حتى من غير دعوة حلوة ربنا يهديلى جوزى يارب ويرزقنى واخويا وبنت عمى بالذرية الصالحة وجميع المسلمين يارب موضوع مفيد ومميز أعجبنى نقلته ألى حضراتكم جزى الله كاتبته كل خير اللهم أمين أختكم (عاشقة الهدوء )

[دمعه حائره]

موضوع رائع وقيم جدا وهايفيد بنات كتير
تسلمى هبه دايما مميزة فى اختياراتك
ربنا يوفقك ويحفظك

[الرحــاال المٌتَمرد]

والله كلام ممتاز يــ هبه
وياريت كل البنات تنفذه
يسلموا على الاختيار القيم

[بحر الهموم]

مشكوووووور والله يعطيك الف عافيه

[عاشقة الهدوء]

اقتباس المشاركة الأصلية كتبت بواسطة دمعه حائره موضوع رائع وقيم جدا وهايفيد بنات كتير تسلمى هبه دايما مميزة فى اختياراتك ربنا يوفقك ويحفظك

الآروع مرورك ياحببتى وحضورك الرااقى والمميز

تسلمى من كل سوء وشر نورتينى احترامى وتقديرى

[زهره الشتاء]

نصآئح وتوضيحآآآت قييمة وجمييله
تسسلم أيدك ي قمرى
موضوع جمييل جدآ
منتظرة المزيد
دمتى بخير

[~♥ Queen sozan♥~]

يا مظبطانا يا بيبو

لما اتخطب بقة هبقة انفذ هههههه

تسلم ايدك

[مشتاقه للجنه]

اقتباس الرقة ، خلي بالك إنه هو راااجل ، وخاطب أنثى ، عارفه يعني إيه أنثى ؟؟ يعني رقة ودلع ، يعني إيه ؟؟

ايوه خاطب أنثى خلى الوش التانى لما تتجوزووا بقى ويبص يلاقى نفسه
متزوج واحد صاحبه هههههههههههههههه

بجد نصائح جميله ومفيده لكل بنوته مخطوبه

ربنا يسعد قلوب كل البناتيت

ويكرمهم ويرزقهم بالزوج الصالح

[عاشقة الهدوء]

اقتباس المشاركة الأصلية كتبت بواسطة "الرحاال""الزجاال" والله كلام ممتاز يــ هبه وياريت كل البنات تنفذه يسلموا على الاختيار القيم

تسلم يا أيمن أسعدنى مرورك ربنا يحفظك

[lover moon13]

موضوع مفيد ونصائح غاليه لكل البنات
تسلم ايدك يا عيونى