الاخوة اللى بدقن ؟ وشباب مصر الثورجية واللى بايعين القضية

[عايش ومش عايش]

شباب فاتح صدره للحياة أسوة بمطرب الجيل
(أحمد ومنى 1)
تعرّف "أحمد" اللذيذ الروش اللي قدر بأعجوبة إنه يوقف كل
شعر رأسه بـ"جيلّ زحلقة"، وبيلبس عادة ملابس ضيقة وبنطلون
ساقط وفاتح صدره للحياة أسوة بمطرب الجيل؟ هتعرفه بالتأكيد
من تركيزه في رسالة الموبايل التي بيكتبها بـ"فرانكو آراب"..
أحمد اللي بيكذب على أبوه وبياخذ فلوس الدروس عشان يتعشى
بيها مع البنت بتاعته في "كنتاكي"، البنت بتاعته...
"منى" صاحبة أشهر لفات الطرح، وتركيبات "الميك آب"
في الجامعة،أحمد هيرجع البيت بعد ما لف مع أصحابه لفتين أمريكاني
بالعربية، ودخّن سجارتين ويقعد على الكمبيوتر بعد ما يتأكد إنه
قفل باب الأوضة كويس، ويبدأ في الدردشة مع منى،
والفُرجة على المواقع الإباحية في نفس الوقت، وهي هتقعد في الناحية
التانية تكلمه، وتتفرج على "يوميات ستار أكاديمي"، وتشيل المانيكير
الأحمر عشان تحط الأزرق اللي هيليق مع هدومها بكرة.
هي دي صورة الغالبية العظمى من شباب اليومين دول للأسف،
( الا من رحم ربى ) شباب ضايع، بيجري ورا الموضة وبياخدوا
مصروفهم من أهاليهم ومش عاوزين يتعبوا وعاوزين
كل شيء على الجاهز.

شباب متدين
(أحمد ومنى 2)
الأخ أحمد برضه هتعرفه من أول لحظة.. الأخ أبو دقن، ببنطلونه
القصير، وأجمل ما فيه غضه للبصر، والتزامه بالصلوات الخمسة في
مسجد الكلية، وأسوأ ما فيه نظرات الاستحقار التي يرسلها هنا
وهناك، كلما رأى "توتو المتبرجة".
والأخت "منى" المحجبة اللي أول ما تمد لها إيدك بالسلام حتى تعتذر
وتقول لك "آسفة ما باسلّمش بالإيد"، ويمكن ترفض تكلمك أصلا،
ولما بيرجعوا البيت، أول حاجة هتعملها هتحوّل قناة روتانا زمان اللي
أمها متابعاها من المطبخ إلى قناة الناس أو الرسالة أو اقرأ، وهيقعدوا
يستمعوا في هدوء إلى ثواب غض البصر والصوم، والجنة التي
سينالانها في الآخرة بما أن جنة الدنيا قد استعصت عليهما،
وعذاب القبر وعذاب النار الذي سيناله كل من المتبرجات والفاسقين
الذين يبيحون الاختلاط وعمل المرأة،وبعدما يخلص البرنامج،
هيتقوقع في غرفته يقرأ في بعض الكتب السلفية، وهتتكوم هي
في وضع الجنين وتنام.
لأ... هي دي صورة الغالبية العظمى من شباب اليومين دول،
شباب متدين، منطوٍ، ومنغلق، ومتشدد، يصعب عليه تقبل الآخر،
ويكتفي بالعلوم الدينية، ولا يسعى للتقدم.

شباب ثورجي
(أحمد ومنى 3)
"أحمد الثورجي" هتعرفه برضه وسط المظاهرة من شعره الطويل
والكوفية الفلسطينية والجينز الديرتي، معاه اللاب توب بتاعه،
وبيحب يعمل حاجته بنفسه، وعشان كده قرر إنه يشرب
"توباكو"!، ويلف سجايره بدل السجائر "المكنة".
و"منى" المرة دي هي شعرها قصير ومسترجلة حبتين، عادة ما ترتدي
بادي بلا أكمام، تضع عليه جاكيت أو شال عندما تكون في طريقها
للبيت الموجود في أحد الأحياء الشعبية، وبتخبّي علبة السجاير تحت
ملابسها قبل ما تخشّ البيت، بتحب فيروز، وبيعشق منير، وبيحطوا
صورة جيفارا فوق السرير، ويناديان بالحرية...
"يا حرية فينك.. فينك؟!... ميدان الفلكي بيننا وبينك"...
"ميدان الفلكي"؟؟؟ بتاع باب اللوق ده!! أيون.
ما هو أصل "الحرية" في الهتاف السابق، مش حرية الإنسان والرأي
والتعبير، دي "قهوة الحرية الشهيرة"، ووراها "قهوة الندوة
الثقافية"،وإذا تعمقت في وسط البلد شارعين كمان ستجد
"قهوة زهرة البستان" و"قهوة البورصة" و"قهوة التكعيبة"،
وإذا لم تجد صاحبك أو صاحبتك في المظاهرة، تأكد أنك سوف
تجدهما "على القهوة"!! يجلسان يتناقشان حول كتاب
"كونديرا" أو "ماركيز" ويلعنان حظهما؛ لأنهما ولدا في
القاهرةوليس في عاصمة الأدب والفن "باريس"، لكن
الأكيد أنك لن تجدهما في بيوتهما.
أيوه... بقى فيه شباب كتير اليومين دول، بيقولوا على نفسهم
مثقفين ومشغولين بالهم العام، ومع ذلك مش بيعملوا أي حاجة غير
القعدة على القهوة، في الوقت اللي البلد فيه محتاجة للعمل من
أجل التغيير مش مجرد التظاهر والانقسام ما بين مؤيد للنظام..
ومعارض له.. وأغلبهم في الآخر يسعون وراء حضور المؤتمرات
والحصول على المنح والعطايا من المراكز الثقافية الأجنبية.
طب أحمد ومنى رأيهم إيه في الموضوع ده؟؟
"أهالينا مش قادرين يفهمونا... كل همهم ناخد شهادة...
طب وبعد ما ناخد الشهادة، نقف في طابور العاطلين، محتاجين
سنين عشان نتجوز، وعيب إننا حتى نحب، إحنا عاوزين نستمتع بحياتنا..
فيها إيه لما نهتم بالموضة، ونحب، ونعيش؟! ولما نتخرج هندوّر
على أي فرصة ونخرج بره البلد دي".
"الدين هو أساس كل شيء في الحياة، الدين هو الصح وأي شيء
تاني غلط، مش كفاية إننا عايشين ومستحملين الفساد اللي حوالينا،
واللي سببه عصيان ربنا، الناس التانية هما اللي المفروض
ينصلح حالهم مش إحنا".

"الحرية يا جماعة، لازم كل واحد يبقى حر في حياته، ولازم نكون
متحضرين أكتر ونقدر نتقبل بعض، وجزء من الحرية إننا نستقل بحياتنا
عن أهالينا.. شوفوا مثلاً في الغرب الشاب بيخرج وهو عنده 16 سنة
من بيت أهله، ويشتغل، ويصرف على نفسه، وهنا أبويا هو اللي
بيفرض عليّ الكلية اللي باخشّها، والهدوم اللي بالبسها وكل شيء،
وحتى لو حاولت أستقلما باعرفش؛ لأن الشركات مش بتشغل طلبة
أو حديثي التخرج،ولا حتى بتديهم فرص يتدربوا، القهوة هي
قلعة الحرية ولا عاوزيني أسيب حلمي وأطلع أجري ورا القطر".
تأملْ معي حال مصر، وقد تحول معظم شبابها إلى هذه الصور بعدما
فرضت الفضائيات سلطتها على المجتمع، وصدّرت أفكاراً مغلوطة
عن القيم التي يجب اتباعها، بالأمس كان الشباب المصري من أهم
الدعائم التي قام عليها دور مصر طوال قرن كامل من الزمان، ولكن
مصر غابت وغاب معها أهم أدوارها تأثيراً وإقناعاً، ويُرجع البعض
الأسباب إلى الدولة التي هجّنت الثقافة، وتركت عقول الشباب فارغة
لتملأها أوهام الفضائيات.
إحنا طبعا عارفين إن أكيد شباب مصر مش كله في المظاهرة، ومش
كله على القهوة، ومش كله بيغني اخترناك وعضو في الحزب الوطني،
ومش كله بيشرب مخدرات ومسطول، ومش كله سواقين
ميكروباص، ومش كله ضارب شعره جيلّ وبيقلد تامر حسني...
بس الأكيد إن كلهم غلبانين.
وإن أكيد فيه ناس متوازنة، وقادرة تحقق المعادلة الصعبة، وتنجح
وتشتغل وتحقق أحلامها، وتكون نموذج للشاب المصري المثقف
المتحضر الناجح، بس دول للأسف قليلين.
تخيلوا مصر فيها 21 مليون طالب، وقدّ العدد ده فيه بطالة،
وتخيلوا معايا الناس دي كلها شايفة مستقبلها إزاي؟ يا ترى يكونو
غلط ولا صح لو عاشوا بس يومهم أو اتقوقعوا على نفسهم
أو اتمردوا وثاروا من وقت للتاني؟
تفتكر غالبية الشباب المصري بيفكروا إزاي؟
وشايف مستقبلك إزاي في ظل الظروف الحالية؟
وتفتكر إيه هي مشكلة الشباب المصري الحقيقية؟
ومين اللي في إيده حلها؟
قول لنا رأيك... يمكن نطلع بحاجة ؟:051:

[روكا 1]

الموضوع جميييل جدا وعجبني جدا جدا وبشكرك عليه بس اللى عايزة قوله
ان حضرتك جبت 3 شخصيات فعلا موجوده في مجتمعنا وخصوصا منى واحمد
الجزء الاول وده اللى شدني جدا في الموضوع لان للاسف معظم شباب الايام
دول كده بيروحوا الكليه سواء بنات او اولاد مش بيعملوا حاجة غير انهم يجيوا
يقعدوا مع بعض ع اساس ان الكليه مكان للقاء زي الكورنيش كده والواحد منهم
لما يحب يفكر انه يلتزم شوية يجي ع الناس اللى موجوده في الكليه ملتزمة الى
حد ما يغلسوا عليهم وف الاخر يترريقوا عليهم ويسموهم ال ايه متدنين دول
هما اللي بيقول كده وبكده ادخل ع النوع التاني من منى واحمد النوع المتدين
النوع التالت باه انا بصراحة ما شوفتوش اووي بالنسبة للمجتمع اللى انا عايشة
فيه لاني ما بحبش الثورات ولا المظاهرات
بس الشباب مش شايف نفسه في اي حاجة غير انه عايش حياته ناكل ونشرب
ونسمع اغاني ونضحك مع اصحابنا لانه مفيش هدف واضح قدامه والمشكله الحقيقه
مفيش قدر من توفير ليهم متطلباتهم زي بعد ما نخلص ياترى هنلاقي شغل
لا مش هنلاقي اشمعنا احنا اللى هنلاقي يعني فبيحصلوا احباط وفشل عدم مبالاه
اللى في ايده الحل هو احنا الشباب لان الحال مش هيتعدل غير لما يكوون
في دافع قووي بالتغيير0
اسفففففه جدا جدا ع الاطاله مرة تانية موضوع رائع جدا تسلم ايدك

[عايش ومش عايش]

اقتباسالمشاركة الأصلية كتبت بواسطة روكا 1

الموضوع جميييل جدا وعجبني جدا جدا وبشكرك عليه بس اللى عايزة قوله

ان حضرتك جبت 3 شخصيات فعلا موجوده في مجتمعنا وخصوصا منى واحمد
الجزء الاول وده اللى شدني جدا في الموضوع لان للاسف معظم شباب الايام
دول كده بيروحوا الكليه سواء بنات او اولاد مش بيعملوا حاجة غير انهم يجيوا
يقعدوا مع بعض ع اساس ان الكليه مكان للقاء زي الكورنيش كده والواحد منهم
لما يحب يفكر انه يلتزم شوية يجي ع الناس اللى موجوده في الكليه ملتزمة الى
حد ما يغلسوا عليهم وف الاخر يترريقوا عليهم ويسموهم ال ايه متدنين دول
هما اللي بيقول كده وبكده ادخل ع النوع التاني من منى واحمد النوع المتدين
النوع التالت باه انا بصراحة ما شوفتوش اووي بالنسبة للمجتمع اللى انا عايشة
فيه لاني ما بحبش الثورات ولا المظاهرات
بس الشباب مش شايف نفسه في اي حاجة غير انه عايش حياته ناكل ونشرب
ونسمع اغاني ونضحك مع اصحابنا لانه مفيش هدف واضح قدامه والمشكله الحقيقه
مفيش قدر من توفير ليهم متطلباتهم زي بعد ما نخلص ياترى هنلاقي شغل
لا مش هنلاقي اشمعنا احنا اللى هنلاقي يعني فبيحصلوا احباط وفشل عدم مبالاه
اللى في ايده الحل هو احنا الشباب لان الحال مش هيتعدل غير لما يكوون
في دافع قووي بالتغيير0
اسفففففه جدا جدا ع الاطاله مرة تانية موضوع رائع جدا تسلم ايدك

فعلا عندك حق فى كلامك ولازم يجى الدافع دة لانى كدة مش هينفع

وطول ما الواحد قدامة هدف لازم يوصلة ويحققة

ومفيش اطالة ولا حاجة بالعكس انا سعدت بالمناقشة معاكى

وبجد التوبيك نور شوية كتير

[روكا 1]

أولا كل سنه وانتوا طيبين ..
ثانيـا ..

ايه انجازات النظام السابق الى قعد سنين عشان نحكم على الثوره بالفشل وهي وليده .؟ الطفل بيحتاج سنه عشان يقدر يقف على رجله .. فما بالكم بـبلد بقالها سنين مسروقه و منهوبه و " مريـــضه " لازم تاخد وقت على ما تفوق .. وبعدين احنا لسا فى بدايات تجربة الديمقراطيه .. احنا مش فى تحضر الشعب الانجليزي مثلا ولا فى عقليته " سيبكم من الى بيحصل اليومين دول " عشان نحكم نفسنا بنفسنا زي ما بيحصل فى المملكه المتحده .. احنا قدامنا اشوووواط طويله علي ما نفهم تلت حاجات :

أولا ..الديمقراطيه الصحيحه .. احترام الراي و الرأي الاخر .. اختلاف الرأي لا يفسد للصالح العام قضيه .. مش معني ان احنا مختلفين ان انا بحب مصر وانت بتكرهها .. فـلكل شيخ طريقه

ثانيـا .. الصبــر .. اي زرع لازم ياخد وقت على ما يطلع .. واي حاجه لازم تاخد وقتها .. ربنا خالق السموات و الارض خلقهم فى سبع ايام .. مكانش ربنا قادر انه يقول كن فيكون ؟؟ لأ طبعا كان قادر بس دا مثال نتعلم منه الصبر و التـروي و عدم الاستعجال .

ثالثا .. إبدأ بنفسك .. كل واحد فينا عاوز يشوف بلدنا احسن بلد .. مختلفين فى الفروع اه .. بس في الاخر عاوزين نبقي عالم أول .. عاوزين نبقي مجتمع متحضر و متقدم ثقافيا و فكريا وحضاريا و صناعيا .. ودا مش هيجي الا لو كل واحد فينا عمل لنفسه هدف اصغر .. انه يحقق دا فى بيته و حياته و مجتمعه الصغير .. و دا هينعكس على المجتمع الكبير بالايجاب ..

يبقي لازم نحترم بعض .. و نتعلم اساس الحوار الصح و احترام الرأي الاخر .. نصبر على التجريه الى فيها البلد لأول مره من سنيييييين طويله نعزل حاكم بايدنا و ان شاء الله نختار حد بايدنا " مصر عمرها ما اختارت حاكمها " و نبدأ بنفسنا أولا عشان نصلح من بلدنا ..

مرة تالتة بحييك ع الموضوع

[laroz]

قبل الثوره كل الكلام دا كان ماشى موجود أما بعد الثوره ناس كتير عقولها إتفتحت وطبعا أنا بتكلم على الشباب سواء الفاضى منهم أو المثقف او أين كان كلهم بعد الثوره إتغيروا والدليل إنهم قدروا يسقطوا نظام بحالو عجزت أجيال كانوا احسن منهم فى كل حاجه إنها تسقطوا الناس دلوقتى عرفه إيه يعنى حريه إيه يعنى بلدنا تبقى احسن بلد فى الدنيا ناس كتير اعرفها كانت مستعده تشتغل من غير فلوس علشان يحسنوا إقتصاد مصر محدش بقى بيفكر فى نفسوا غالبيه الشعب بيفكروا فى مصلحه مصر مش كل الناس بس أكيد كتروا بعد الثوره وعلشان البلد لازم نغير نفسينا الأول قبل ما نفكر نغير الناس وبجد أنا عندى أمل كبير إن مصر دى بعد كام سنه هاتختفى منها سلبيات كتير وهاتبقى احسن. بفكر فى مستقبلى قبل الثوره إنى اسافر لأن طبعا مصر مكنتش بتخلى حد ينجح بعد الثوره عندى تصميم إنى أنجح فى بلدى وأفيدها لأن مصر محتجانى وأنانيه منى إنى أسيبها فى الأوقات الحرجه أى شاب عندوا حلم إنوا ينجح بره هاينجح فى بلدوا مهما كانت الظروف بس إحنا بنستسهل ونقول مفيش شغل مفيش حاجه الناس الينجحت دى كانت ذيها ذينا وممكن تكون ظروفها اصعب بكتير من ظروفنا ناس كتير ممكن تكون مش موافقه على الكلام دا بس انا مقتنعه بيه

الموضوع رائع

[عايش ومش عايش]

وانتى طيبة يا سكرة

هارجعلك تانى وانقاشك فى كل كلمة

[عايش ومش عايش]

اقتباسالمشاركة الأصلية كتبت بواسطة larozقبل الثوره كل الكلام دا كان ماشى موجود أما بعد الثوره ناس كتير عقولها إتفتحت وطبعا أنا بتكلم على الشباب سواء الفاضى منهم أو المثقف او أين كان كلهم بعد الثوره إتغيروا والدليل إنهم قدروا يسقطوا نظام بحالو عجزت أجيال كانوا احسن منهم فى كل حاجه إنها تسقطوا الناس دلوقتى عرفه إيه يعنى حريه إيه يعنى بلدنا تبقى احسن بلد فى الدنيا ناس كتير اعرفها كانت مستعده تشتغل من غير فلوس علشان يحسنوا إقتصاد مصر محدش بقى بيفكر فى نفسوا غالبيه الشعب بيفكروا فى مصلحه مصر مش كل الناس بس أكيد كتروا بعد الثوره وعلشان البلد لازم نغير نفسينا الأول قبل ما نفكر نغير الناس وبجد أنا عندى أمل كبير إن مصر دى بعد كام سنه هاتختفى منها سلبيات كتير وهاتبقى احسن. بفكر فى مستقبلى قبل الثوره إنى اسافر لأن طبعا مصر مكنتش بتخلى حد ينجح بعد الثوره عندى تصميم إنى أنجح فى بلدى وأفيدها لأن مصر محتجانى وأنانيه منى إنى أسيبها فى الأوقات الحرجه أى شاب عندوا حلم إنوا ينجح بره هاينجح فى بلدوا مهما كانت الظروف بس إحنا بنستسهل ونقول مفيش شغل مفيش حاجه الناس الينجحت دى كانت ذيها ذينا وممكن تكون ظروفها اصعب بكتير من ظروفنا ناس كتير ممكن تكون مش موافقه على الكلام دا بس انا مقتنعه بيه

الموضوع رائع

لو تلاحظى انى قولت الا من رحم ربى يعنى مش كل الناس بتفكر كدة

وانا قولت مش كل الناس ع القهوة او كلهم فى التحرير او كلهم ع الفيس

المشكلة انى مش بتكلم ع الثورة او غيرها انا بتكلم ع الشباب

لانى الثورة مغيرتش حاجة للاسف بالعكس بقت اوحش من الاول

وعمتا دة موضوع انا مبحبش اتكلم فية لانى هيقولوا الفول بقى والكلام دة :vb12::vb12:

بس عايز اقولك حاجة احنا مش هنتغير كبلد الا لما نتغير احنا كبشر

عمتا رائيك يحترم ونورتى التوبيك وفى انتظار اى مناقشة معاكى

[رنين]

اه هو انا اتعصبت شويه
ليييييييييييييييييه لانى بكره التشاؤم
بس بصراحه هو حال البلد بقى لا يسر عضو ولا حبيب
هو بقى وكان يعنى عشان محدش يقول انى من الفلول
بس يا ترى هيبقى ايه ؟؟؟
ده بقى ف ايدنا نشكله براحتنا
يعنى زمان بنقول نظام فاسد اهو راح
دلوقتى بنقول مفيش حكومه والبلد ف حاله دوشه وهيجان
تمام
يبقى ال جى هنسيبه لمين
ها هتسيبه لمين يا كابتن؟؟
هتسيبه لمين يا انسه؟
المفروض بقى نبطل نلعن اليوم ال اتولدنا فيه وبقينا مصريين ونحس فعلا انها نعمه علينا اننا من اهل البلد دى
نحس بيها ونشتغل عشانها ندرس عشانها مش عشان نهج
وحتى يعنى لو هجيت تعالى قابلنى لو اشتغلت بشهادتك
بس ما علينا
ياريت روح الميدان دى ترجع تانى
احنا لما تجمعنا على مطلب واحد حققناه
دلوقتى ف ناس مطالبها اختلفت وابتدينا نخون ف بعض

ودى بقى النقطه ال عايزه اوصلها>>>>خدت بالك كل ده ولسه موصلتش )
احنا عايزين قضيه الكل يلتفت حولها
محدش يخون التانى
عايزين كلنا يبقى هدفنا واحد زى ما كان هدفنا كدا اننا نسقط النظام
ولقيت المسيحى جمب المسلم جمب المتدين جمب الواد الفافى والاخت المنقبه جمب ام بدى عليه شال والدكتور جمب الميكانيكى
كله مع بعضه
عايزين روح الثوره تكون جوانا

انا هقولك ع حاجه وانا بقدم ف الكليه
ناس كتير قالتلى انتى كدا عايزه تكونى دكتوره
ادخلى صيدله وخدى اللقب وبلاش وجع قلب
هتدخلى طب وهتعنسى بقى وبتاع
فانا ضربتها ف دماغى لقتنى كدا كدا هعنس ههههههههههههه
والله انا دخلتها عشان حسيت انى ممكن اخدم فيها اكتر
ولما رحت الكليه واتقابلت مع ناس حسيت انهم جواهم نفس احساسى

بس ياريت لما نتعلم جوا ونطلع للنور منلقيش الكل بيدور ع الفلوس وال حب ف يوم يخدم ناسه مش لاقى ياكل او حتى مش لاقى اهتمام


انا حسيت انى جبت كلام من الشرق ع حبه من الغرب
بس ال بيجى ف بالى بكتبه بقى

تحياتى ليك مستنين المواضيع ال جايه

[بنوته متفائله]

كل النماذج ديه موجوده فى مجتمعنا بس الى وصلنا ليه دلواتى بيقول ان بكره احلى باذن الله يمكن الشباب بعضه مش عارفين الطريق الصح عشان مدى الفساد الى كنا فيه والاحباط والتشائم من بكره شباب مصر زكى وعنده اراده بس محدش بيستغلها لما يلاقو الفرصه هنصبح افضل شعب
احيك على مواضيعك الهادفه

[Ŝmilể Ḿőøn]

تفتكر غالبية الشباب المصري بيفكروا إزاي؟
بعد ما يتخرج يمشى ويسيب البلد ويشوف مستقبله بره ومعلهمش لوم

وشايف مستقبلك إزاي في ظل الظروف الحالية؟
انا بالنسبالى لسا فى ثانوى عام وعلى ما اتخرج بقى مش عارف ايه اللى ها يحصل فى البلد
بس لو فضلت بالشكل ده او رجعت زى الأول انا ها اسيبها ومش علشان انا معنديش انتماء ولا الكلام ده كله
بس علشان فى حاجات كتير نفسى احققها واللى ما اعتقدش ابدآ انها ممكن تتحقق لو فضلت فى مصر

وتفتكر إيه هي مشكلة الشباب المصري الحقيقية؟
فى مشاكل كتير اوى منها التطرف
وتضيع الوقت فى حاجات تافهه ودى مشكلة مش صغيره
كل الشباب اللى بتدرس اتعودت انها لما تخلص دراسة يبقى وقت الأجازة ده كلو بيضيع فى حاجات ملهاش لازمة
وحتى المتخرجين

ومين اللي في إيده حلها؟
الحل حل ايه بالظبط ؟
كل مشكلة فى مصر علشان تتحل محتاجة معجزه ودى مش نظره يأس بس حقيقة
والسبب هو اللى اتعود على طبع صعب جدآ يغيره ولو حصل وقدر كام واحد فينا ها يقدر ؟

مصر فيها مشاكل كتير اوى معقده ومحتاجه سنيـــــــــــــن علشان حالها يتصلح ومش مجرد وقت وخلاص فى السنين دى محتاجة ان كل واحد يفكر يقدم حاجا تناسبه وتناسب سنه
رأيى مش عاجبنى انا شخصيآ بس ده الواقع اللى انا بشوفه كل يوم