الحلقة الرابعه من ( بهدوووء ) معانا ( Hearts Whisper ) ( يوميات الاعضاء )

[morshooo]

بسم الله الرحمن الرحيم

اهلا بيكم جميعا

والحلقة الرابعه من برنامجكم

( بهدوووووء )

البرنامج باختصار هيتم استضافة احد اعضاء المنتدى المميزين اصحاب النشاط

وهنخلية يقول رئية بصراحة فى ( قسم ) هو هيختار وطبعا القسم الى هيختارة

اكيد هيكون مميز فية وبيدخلة وهنحاول نعرف منة لو كان ( مشرف ) كان هيعمل اية

يمكن مشرفين الاقسام دى تاخد برئى ضيوفنا ويحاولو يطبقوها .

النهاردة الحلقة الرابعه

معانا

Hearts Whisper


( اتعهد انا العضوة ( Hearts Whisper ) ان اكون صريحة امامكم ولا اضع امامى اى صداقات شخصية مع من اتواجد مكانهم وسوف اعبر عن ما بداخلى بكل صدق وسوف اتحمل مسئؤلية ما سوف اقولة ولا اقبل اى ضغوط من احد لكى يعدل من رئى الشخصى )

س / اهلا بيكى فى برنامج ( بهدوووووء ) ؟

اهلا بيك يا مورشو
واهلا بهدؤك وربنا يستر ^^

س / طبعا مطلوب منك الصراحة وانتى اقسمتى على دا ؟

طبعا الصراحة قبل كل شىء

س / هتختارى قسم اية تقولى رئيك فية ؟

قسمى وبيتى التانى اليوميات طبعا
هوانا ليا غيره

س / اهلا بالقسم الغالى ^_^ ؟

اه طبعا دا الغالى اوى كمان ^_^

س / عايز اعرف رئيك فى قسم يوميات الاعضاء ؟

اليوميات دا بيتى التانى انا معظم شغلى فى المنتدى ومتعتى فيه
وطبعا هو من انشط واقوى الاقسام فى المنتدى كله
وغالبا هوا المراية الى بتعكس لنا الاعضاء وحياتهم واسلوبهم وتفكيرهم
يعنى لو عايز تتعرف على اى عضو بيكون من اليوميات

س / اية عيوب يوميات الاعضاء من وجهة نظرك ؟

يعنى هى ممكن تكون مش من القسم نفسه من اعضاء القسم
غالبا الاعضاء مش بتدخل غير الحلقات الى اصحابها معروفين جدا فى المنتدى
فاسم الضيف هوا الى بيجذب الاعضاء مش البيرنامج او فكرته وانا بقول غالبا
لان فى بعض الاعضاء بتقدر الفكرة والضيف وتحتوى الموضوع كله
فبالتالى فى اعضاء كتير بيتظلموا فى الموضوع دا

********
وفى نظام المسابقات غالبا مقدمين اليوميات بيبقوا عايزين اى فكرة مسابقة
تكون سهلة ومش مجهدة عشان تلاقى اقبال عليها بعكس اقسام تانية
بتلاقى الاقبال على المسابقات بشكل غير العادى رغم ان اليوميات معروف بنشاطه وكم اعضاءه ماشاء الله مش بقر انا بحسد بس

*********
ممكن تشجيع المشرفين للاعضاء غالبا بيقتصر على التعليق على الموضوع
فقط يعنى قسم زى اليوميات ازاى ميبقاش فيه تكريم اسبوعى
للحلقات المميزة واصحابها ويتم فيه مسابقات تفاعلية فبجد هو مفتقد لبعض
النشاط من المشرفين والاهتمام بالاعضاء اكتر من كدا

س / انتى شايفا ان الجميع مهتم بطرح مواضيعه وحلقاتة كل اسبوع فى القسم ؟ عشان نعمل تكريم اسبوعى ؟

هو القسم بينزل فيه حلقات دايما مش لازم نفس البرنامج الى اختار منهم كل اسبوع
فبالحلقات دى مهما ان كان اصحابها مين وهل البرنامج دا دايم وملتزم بيه ولا لاء يتم التكريم
على اساس الحلقات الموجودة ونزلت خلال الاسبوع كله

س / لو تم تعينك مشرفة للقسم اية اول قرار هتاخدية ؟

يمكن الفكرة مش جديدة وهى نقابة فى اليوميات بس هتكون مختلفة شوية
يعنى هتكون فيها نقاد للبرامج ودا يمكن اكتر حاجة هتساعد على تطوير البرامج
اكتر من كدا
وطبعا النقابة هنظمها للتفاعل الدائم من مسابقات وحملات خاصة بالاعضاء الجدد واستضافتهم
وفى أفكار كتير بس كفاية عليك كدا

س / لية مقدمتيش فكرة النقاد للبرامج لمشرفى القسم قبل كدا واهتميتى بيها ؟

والله كنت بفكر فى كدا بس حبيت لما اظبط الفكرة شوية ويكون انتا وكبرياء موجودين
وربنا يسهل بقا لانها مش هتكون مقتصرة على النقد بس ومحتاجة تفرغ تام عشان نبدء فى تنفيذها

س / مورشو متهم بالغرور ودا عشان بيتقال انة دائما بيقول انا بعمل وبنزل برامج فى اليوميات ؟

على فكرة انتا متقالش عليك مغرور عشان كدا
عشان بتقول مش بتعمل حاجة الا وانتا مقتنع بيها وواثق من نفسك اوى
راجع الذاكرة وهتعرف كدا هههههه
بس طبعا انا قلت قبل كدا ان الى يقرب منك هيعرف غير كدا خالص ^_^
واعضاء كتير ايدونى
انما بقا بخصوص بتنزل برامج وكدا فطبيعى اى حد ناجح او متميز فى عمله
هتلاقى الحاقدين كتير اوى ايزى خالص ^_^
انما ممكن اقولك انك سريع اوى فى تنزيل الحلقات ممكن تكون محتاج تسيب فرصة شوية للحلقة تاخد حقها وبعدين تنزل التانية بس
انما مغرور وكدا معتقدش خالص

س / كبرياء رجل اغلب الوقت متغيب وبيغيب لفترات طويلة ودا بيأثر على نشاط القسم ؟

والله هو اكيد ليه ظروفه مش هكدب عليك
دا اكيد بيأثر على نشاطه جدا جدا بس طبعا ساعات فى ظروف اقوى مننا بتمنعنا وفى اعضاء كتير فى المنتدى كدا
بس هوا لما بيبقا موجود نشاطه ببقا ملحوظ كويس اوى وليه سيستمه الخاص فى برامجه

س / شايفا ان فعلا الاعضاء مهتمة باليوميات ؟

مش كله فئة معينة بس الى ملحظاه كويس اوى ان اغلب الاعضاء الجدد لما
بيدخلوا اليوميات ويقدروا يتفاعلوا ويندمجوا فى القسم
بتلاقيهم مقبلين عليه دايما واوقات ببقا اكتر من اعضاء القسم الى دايما بدخلوه ومعروفين فيه زيى كدا ههههه مانا نايمة صاحية فيه

س / حاسة انك ممكن تكونى مشرفة القسم وانك تستهلى دا ؟

والله الادارة الى تقرر كدا مش انا لو انا فطبيعى هقولك انى اد المسؤلية دى وعندى كتير ممكن اضيفه للقسم
بس اهم شىء هل الادارة شايفة كدا ولا لاء

س / لو قولتلك رشحى حد يكون مشرف للقسم هترشحى مين ؟

صراحة مش عارفة لان فى اعضاء كتير بيدخلوا القسم ودايما متواجدين
بس كانت ملك روحى موجودة هنا وكان نشاطهعا ملحوظ جدا ممكن سندريلا حاليا
وفى غيرهم كتير بس مش عارفة مين بالظبط

س / لو دخلتى كمشرفة للقسم شايفة ان هيبقى فى تفاهم بينك وبين مشرفية ؟

والله دا اهم شىء واعتقد ان التفاهم دا موجود حاليا لانى معظم برامجى وشغلى فى اليوميات
بستشيركم فيها واخد رأيكم ولو فى اى تعديل بعدله قبل ما انزله فى اليوميات

س / تحبى تقولى اية لمشرفى القسم ؟

مش هقول زيادة عن الى قلته غير ربنا يوفقكم
وتظلوا متواجدين بنا دايما

س / اخيرا تحبى تقولى اية للقسم والاعضاء ؟

القسم دا احلى قسم فى المنتدى
وبايدكم هيكون أحلى واحلى
و ياريت نشوف نشاط فيه اكتر من كدا
وفى برامج واعضاء ياريت يرجعوا من جديد
ينورونا فى القسم
وميرسى اوى يا مورشو على الاستضافة
وربنا يجعل كلامنا خفيف على قلوب الجميع ^_^

ماتنسوش قبل ما نختم

تستنونى الحلقة الجاية

وضيف جديد ووجهة نظر جديدة

وكلة ^_^

( بهدووووووووووء )

[صافي]

من احلي الاقسام علي قلبي حببتي نودي كانت مسكاه وحشتني اوي
محدش معاه نمرتها كانت معايا بس الفون اتسرق الله يخرب بيتك يامرس
اممم تقريبا طلعت عن الموضوع ههههههه
Hearts Whisper عجبتيني ياحلوة وعجبتني صراحتك
مورشو بعيدا عن اسمك الي مش فهماه هو يشبه اسم شوكولاته بس دايما مواضيعك جميله
منورين ياحلوين

[۩۩ elMagic ۩۩]

أيه داااا
اول مره اشوف البرنامج دا هادي أوى كده
اكييد شوشو عامله حاجه فى الحلقه دي
مخلياها هاااديه خالص ماشاء الله
بجــد حلقه جميله جداا وهاديه
خااااليه من المشاااكل
مش انت صاحب الحلقه ي أبو حمييد
وشيمــاء من الناس المميزه جداا هنا بالقسم
وماشاء الله أفكارهاا بتعجب الناس كلهــا
بالتوفيق ليكـي أشوشو وعقبال ما نشوفكـ
لابسه الفستان الازرق ونفرح بيكــــي
تسلم ي أحمد للمجهود
مودتـــــى ,,

[Mo chahin]

على رأي ماجيكو ..

اول حلقه من برنامج هدوء .. تبقى هاديه فعلا هههه

لا حقيقي عجبتنى اجابات شيماء ..

ووفقت جدا يا مورشو فى اختيارك .. كالعاده ..

لكن عندى ملحوظه كده او اتنين يا شيماء تعليقا على كلامك ..

اختيار المشرف على القسم مش من خلال وجوده الدايم فقط ..

لا طبعا فى مقاييس تانيه اهم واهم .. زى مثلا احتواء المشكلات وتقبل النقد ايا كان وغيره وغيره ..

واحنا شايفين دا فى مورشو وسامى واى حد هيكون معاهم اكيد هيكون مرتقى لمستواهم الادارى والاخلاقى ..

واكيد انتى هتكونى منهم ان وفقك الله وتم اختيارك ..

غير كده انا تماما متفق معاكى ..

وكمان اشهد لكفائتك ومجهودك وتواجدك الطيب ..

موفقه واشكرك مورشو ..

[مُنـــــايا]

حلقه جميله وضيفه اجمل هادئه في تواجدها واجابتها حقق الله لكـِ ما تتمنين ومضيف وحواري رائع دمتم بسعاده ودي وتقديري

[فرانكو.هدوء ملك]

كالعادهـ

حلقاتك تُدرس والله يا مورشو

وخير من استضفت

ضيفه جميله معبره في كلماتها

أرآها جميله جدا

الي الامام يا فتي
ههههههههههه

دمتم بكل خير

[big bốss]

قشطه عليكى يا شيماء

عايزه عيار يكون طايش كدا علشان صراحتك دى

منوره الحلقه

و تسلم يا احمد على الهدؤ دا

[العاشق الذى لم يتب]

وعلشان الهدوءمطلوب دوما
والأيام دى مطلوب أكتر ومعاه شوية طناش
فأنا أحب أى هدوء يجيى منك ايامورشو
مع إنى لاشايف هدوء ولاحاجة
يمكن الأخت شيماء هدأت أعصابى شوية
بهدوءها وسلاستها وحضورهاالمتميز دوما فى كل مكان وزمان
وكمان نشاطها المتواصل فى كل الاقسام
وهى صاحبة أفكاردائماماتوكن جديدة ومفيدة
أشكرك يأأجدع مذيع ومحاور من غير لف ولادوران
تسلم وتعيش وتقدم لنا أحبة وأعزاء نعتز ونفخر بيهم فى منتدانا الغالى
والشكر لأاختى الفاضلة شمس
ربنا مايحرمناش من عظمتها
مودتى
رفعت

[Hearts Whisper]

ايه دا تصدقوا دى انا الى منورة الحلقة :d
والله كانت حلقة حلوة اوى واسئلة مورشو كانت رائعة
واستمتعت جدا جدا بالحلقة تسلم يا مورشو
ليا باك بقا للرد على الجميع

[Hearts Whisper]

اقتباس المشاركة الأصلية كتبت بواسطة صافي من احلي الاقسام علي قلبي حببتي نودي كانت مسكاه وحشتني اوي محدش معاه نمرتها كانت معايا بس الفون اتسرق الله يخرب بيتك يامرس اممم تقريبا طلعت عن الموضوع ههههههه hearts whisper عجبتيني ياحلوة وعجبتني صراحتك مورشو بعيدا عن اسمك الي مش فهماه هو يشبه اسم شوكولاته بس دايما مواضيعك جميله منورين ياحلوين

مورشو دى مورشدى بس بعد الثورة
حصلها انكماش وزيادة واو ههههههههه
وطبعا اليوميات القسم المحبب على قلوبنا كلنا
تسلمى لذوقك با قمر ربنا ما يحرمنا منك
نورتينى