السوبر مآآن

[نور ونار]

كل مره كنت بكتب كنت بخطط واظبط الافكار والاقى مدخل حلو
ولازم كمان هدف ونهايه كويسه تقول معنى اى حد يستفاد منه
لمآ يقراه المرادى ولا فى تخطيط ولا تظبيط ولا بدايه حلوه ولا نهايه
كمان معروفه ،، هسيب نفسى اتكلم وبس شويه افكار منعكشه
جوايآآ مش هحتار اختار لفظيات اصلهآآ مش ناقصه

زمآآن وانآ صغيره حبيت اوى السوبر المآن وحبيت اطلع شبهه
مش عشان اطير واكسر لا عشان مساعدته للنآس كانت دى
اكبر حاجه فى قدراته نفسهآآ ،، موقف حصلى وانا صغيره
كآى بنوته صغيره بعتونى اجيب حاجه من البقال ،،البقال كان فى نفس
الشارع ،، روحت وفى وسط الشارع شوفت لعبه بتتلعب بين شله بنات
وولاد عيال زى ،، وقفت اتفرج بس اللى شوفته ان اللعبه بايظه
فيهآآ ظلم وفى بنت عامله بلطجه على اللعبه وظالمه بنوته تانيه
بس عشان هى اكبر منهآ فى السن والجسم،، ادآيقت اوى وقتهآآ
وزى اى تصرف عيله روحت داخله وسط الزحمه
وقولتلهآآ انتى مبوظه اللعبه انآ شايفاكم اانتى خسرانه
اعترفى بالخساره والصغيره دى كسبت وعايزه تاخدى حقهآآ
طبعآآ عشان اطفال راحت زقتنى وقتهآآ رديت الزقه بضربه
وجريت لانهآ اكبر منى فى الجسم .. لو لحقتنى هتطحنى :d
اشتريت الحاجه وروحت ،، روحت وانآ مبسوطه قال يعنى
رديت الحق لصحابه ونصفت البنت وبكدآآ بقيت سوبر مآآن
بعدهآ بنص ساعه مامه البنت دى جات لمامتى ولاقيت
ماما بتسالنى انتى ضربتى البنت دى ولسه هنطق واقولهآآ
دى كانت بتظلم فى اللعب ا وهى زقتنى لاقيت طرآآآآآآخ على وشى
وقتهآآ عرفت مش لازم اى حق تعمله يتقالك برافو
لا ممكن كمان تنضرب على وشك ،،وكمآن تتمنع من حق انك تدافع
على نفسك ..والقلم اللى على وشى دآ دليل ان حتى حلمك بسوبر مان
مش اوبشن ،، موقف تانى كبرت شويه بقيت حلوه كدآآ بتاع رابعه
ابتدآئى وكنآ فى امتحآن الحساب وكان فى مساله صعبه جدآآ
او معنى اصح عامله قلق واصلا المساله دى كانت محطوطه تحدى
بين المدرسين بتوع الماده عشان تعجيز لطلبه بعض ،، المهم
المدرس دخل غشش المساله فى اللجنه اللى انآ فيهآآ
وكتبهآ ع السبوره بعد ما غشش وخرج جه موجه من الاداره
زياره يشوف سير الامتحانات ويتابع لفت نظره المساله
وجه عليا وشاف ورقتى وقالى حليتى المساله دى ازآى ؟
سكت سابنى وراح لغيرى لاقى اللجنه كلهآآ حلآهآ بنفس الطريقه
وبنفس الخطوات فهم وقتهآ ان حد غشش فسال مين غششكم يا ولاد
المساله ؟ ماتخفوش يا حبآيبى قولوآ بس ..
محدش نطق جالى وشاف اسمى وقالى انتى بنت الاستاذ فلان
والاستاذه فلانه ؟؟ قولتله اه
قالى طب قوليلى بقآآ انتوآ غشيتوآآ المساله ؟
قولتله : اه
قال مين اللى غشش ؟
قولتله مستر كمآل
قالى هى دى تربيه الاستاذه فلانه برافو يا حبيبتى
وبردو حسيت بنفس احساس السوبر مان
بعد الامتحآآن لاقيت ماما بتناديلى هو حصل منك كذآآ
قولتلهآ اه وقبل ما اكمل لاقيت طرآآآآآخ على وشى !!
اتلغبطت وبقيت مش فاهمه هو الكذب هنآآ هيكون كويس ؟
وبتضربنى عشان قولت الحقيقه ؟ لاقيتهآ بتزعق فى وشى
وبتقولى وديتى الراجل فى داهيه ...
بردو مش فهمت هو كان المفروض اكذب ؟؟ هو انآ اللى غلطانه ؟
ولاقيتهآ بتكمل كلام بنفس النبره.. حق عليه انه حليلكم المساله ؟
بردو اتلغبطت مش هى دايمآ بتقولى الغش وحش ؟
هو دآ مش غش ؟ ولا دآ اسمه حاجه تانيه اسمه هاكونآمآتآتآ ..
عدى الموقف عآدى وهو منحوت جوآآيآآ ،، بيقول حاجه واحده
كل حاجه لهآآ اكتر من معنى واكتر من وش .. وان المتناقضات
موجوده خلص الموقف وكلمه الصدق اللى نطقتهآآ فى نظر الجميع
جريمه !! وان الغش اللى عمله المستر هو البطوله !!
اه وكمان هو بقآ ضحيتى ..
عدوآآ بس معايا كدآ بقوآ اتنين ضحآيآآ ..
وانآ الفك المفترس !!
كبرت شويه كمآآن وبقيت بردو فى بدايه مرحله المراهقه
المرحله اللى كلهآآ دآيمآآ بتبدآ باشمعنآآ .. وكلهآآ تمرد الى حد كبير
وعشان انآآ مش مراهقه عاديه كل حاجه كنت بفكر فيهآآ
وان الاسره معظمهآآ من الذكور وشايفه بردو ازآى الولد بيتربى
وفى فرق معامله ،، بمعنى مش تعلى صوتك ؟ هو يعلى عادى
قولى حاضر ،، هو يعترض عادى !!.. انتى تخدميه
هاتيله ميه نضفيله اوضته ومش تقولى لا ؟
طبعآآ كان سهل وانآ صغيره اقول حاضر وبس ،،عشان بس ارضى
ماما واشوف ابتسامتهآآ وتقولى برافو واخد البوسه ..
بس بعد ما بقيت مراهقه ومش كل حاجه عجبانى
كان لازم يتقال اشمعنآآ ؟؟ فكانت الاجابه الكلاسيكيه
اللى بتتقال انتى بنت ! هو ولد !
شوفتى بابا بيطبخ شوفتى بابا بيكنس بينضف البيت ؟
طبعآآ الاجابه دى تقنع بيهآآ طفله عندهآ 9 سنين
مش بنت عندهآآ 13 سنه انسه يعنى
اتجآدلنآآ كتير ولانى كنت بقرآآ احتدت الموقف
لدرجه فى كتب كتير لاقيتهآآ اختفت من المكتبه بعد الموقف دآآ
وبردو التمرد جوآيآآ والتميز اللى تابع العآدآت والتقاليد
بتاع ان الولد مش يرتب غرفته يعلى صوته يتاخر بره
يعمل كل حاجه جوايا وفى دماغى لحد جه موقف
كنآ قاعدين فى جلسه وصادفت انى قاعده فى مكان اعلى
من مكان اللى قاعد فيه اخويآآ .. عآدى يعنى وقاعدين براحتنآآ
مش اتصورت ان التقليد ممكن يكون كدآآ لاقيت مآمآ تعالى حبيبتى
اقعدى جنبى وسيبك من المكان دآآ..
لا مستريحه كدآآ ..
يبنتى تعالى هنآآ ..
لا ..
اخويآ قال : عيب يعنى اوى تكونى بنت وقاعده القاعده دى
قاعده ازاى يعنى
هو انت مش شايفه نفسك
لا مش شايفه
مآمآ سردت تاريخ عائلتهآآ
دآ آحنآ وكنآ قدك كنآ بنبوس ايد اخونآآ ومش نستجرآ نقعد قدامه
وانتى قاعده القاعده دى انزلى ( بنبره عنيفه )
لا مبتسمه..
وقبل ما اكمل لاقيت طرآآآآآآآآآخ ع وشى
بردو مش فهمت ،، هو دآ طبيعى ؟؟
يعنى ايه خليكى مستقله وعايزينك دكتوره قد الدنيآآ
وبيكسروآ فيآآ ماهيتى ؟ مش همآآ اللى قالوآ مآفيش فرق
بين بنت وولد ؟؟ ولا هو مافيش فرق فى الواجبات
ولمآ تطلبى حقك يبقآ فى فرق وهو حقه اكبر منك ؟
ليه بينطلب منى اكون شخصيه قيآديه مع انى طول حياتى
تابعه ؟ تابعه لفكر والدى ومعتقد والدتى وسيطره اخويآ
وعشان قولت لا معترضه على حق ليآآ وكلمه لا
بقيت فى نظرهم قليله الادب ومش محترمه !
ومبدآ اللى اترسخ جوايآآ عنصريه لازم يكبر
عشان اورثه من بعدى لبنتى ولبنت بنتى !!
بس عمومآآ بعتبر كل اللى فات دآآ تجآرب
رسمت شخصيتى آه بالطريقه الصعبه
ماهو كدآ لازم اى حاجه حلوه لازم تترسم صعب
بس عمومآآ انآ كنت مختلفه عن اى طفله
لانى كنت بسال نفسى عن ماهيه الاشياء
والمعانى ورآ المواقف ،، حتى لو بعرف معناها
بعدين بس كنت بعرفهآآ...
آمى بعتز بيهآآ وبعتز بتربيتهآ جدآآ ورغم اختلاف فكرى
الان لانه اصبح مجرد لحد بعيد الا ان دفعتنى لكثير من الاشيآء
وكان فعلهآآ من واقع خوفهآآ وبرمجه المجتمع وثقافته
وآكيد كل احترامى ليهآآ لانهآ نفسهآآ ضحيه مجتمع ..
كل اللى فات دآآ قالى حاجات كتير
ومن اهم الحاجات دى ..
اول حاجه لمآ تلاقى كل الناس بيقول على اللى قدامك
ضحيه اقلب نظرك وفكر مختلف واسال سؤال
ما يمكن يكون جانى ؟ لو قلبت السؤال هتستفاد كتير !!
تانى حاجه لمآآ ربنآ يكرم واجوز واخلف بنوته ..
اكيد مش هصدرلهآآ ثقافه مجتمع موروثه ..
هتكون مستقله ..
شكرآ للمتابعه ..

[SiLver Spectra]

اقتباس هتكون مستقله

فكرتيني بحلقة العراف اللي لسه شايفها لما عادل امام كان رايح يخطب لابنه
فابو البنت كان يساري و البت اليسارية برضو تهزق في عادل فيبص لابوها و يقوله : ينفع اللي بتقوله بنتك دا ؟
فيرد عليه : شخصية مستقلة كائن مستقل ههههههه

*****
دا شيء كويس انك بتفكري و بتحاولي توزني الامور و تخرجي برا القولبة الفكرية الموروثة
بس التمرد لو ماكنش متعقل فتاثيره هيكون اسوء بكتير من اتباع التقاليد
و دي من الاسباب اللي رسخة في المجتمع فكرة اتباع الموروث و تجريم الخروج عنه
لان دائما الانسان بيخشى الفوضى ..و دا بيخليه يرضى دائما باللي ورثه و اتعود عليه و مايحاولش يخرج عنه
بالرغم ان التمرد هو سر التطور و التغيير..لكن بيتضح انه سلاح ذو حدين خاصة لو استخدم بشكل انتقامي

[نور ونار]

اقتباس المشاركة الأصلية كتبت بواسطة silver spectra فكرتيني بحلقة العراف اللي لسه شايفها لما عادل امام كان رايح يخطب لابنه فابو البنت كان يساري و البت اليسارية برضو تهزق في عادل فيبص لابوها و يقوله : ينفع اللي بتقوله بنتك دا ؟ فيرد عليه : شخصية مستقلة كائن مستقل ههههههه ***** دا شيء كويس انك بتفكري و بتحاولي توزني الامور و تخرجي برا القولبة الفكرية الموروثة بس التمرد لو ماكنش متعقل فتاثيره هيكون اسوء بكتير من اتباع التقاليد و دي من الاسباب اللي رسخة في المجتمع فكرة اتباع الموروث و تجريم الخروج عنه لان دائما الانسان بيخشى الفوضى ..و دا بيخليه يرضى دائما باللي ورثه و اتعود عليه و مايحاولش يخرج عنه بالرغم ان التمرد هو سر التطور و التغيير..لكن بيتضح انه سلاح ذو حدين خاصة لو استخدم بشكل انتقامي

دآ آكبر درس استوعبته
ان لكل شىء له وجهين
ومليآن متناقضآآت اكيد الآنحراف
والتشدد محصلتهم واحده ..
اهم شىء تكون وآآعى اللى بتعمله
بس اه هتكون مستقله آوى ههههههه
نورتنى آمشير ..

[๓αℓάҝ]

حصل معايا نص موقف البنت بس البنت قعدت فوقي ))
و بقيت اخاف أنزل الشارع بسببها :d

عجبني فكرة الموضوع ،
احنا اتربينا علي عادات متصلحش الزمن ده . مافيش نقاش بينا و بين أهلنا .
و في قواعد محطوطه محدش قالنا عليها و المفروض نعمل بيها .
الفكره اننا هنعمل نفس اللي بيعمله ده :d
برمجه هتلاقي نفسك بتقولي نفس الأسطوانات اللي سمعتيها و انتي صغيرة :d
غسيل مخ بقى ، اكيد مش هتزرعي فكرة ان الولد احسن من البنت بس ممكن تزرعي فكره ماشيه في زمنا و هتكون في زمن أولادنا ^^
بس حقيقي فاهمه قصدك بطريقه تحزن :d
نفسي أتناقش من غير معدي الحدود اللي مش عارفه هي ايه :d

[۩۩ elMagic ۩۩]

هو كل زمن وله المعتقدات الخاصه به
مينفعش العادات والتقاليد الموروثه من سنين
انها تُتبع في الوقت الحالي
لان دا بيموت الشخصيه وبيولد التناقض
ما بين عادات الماضي والحاضر
وهنا هتكون الشخصيه مهزوزه ومشتته
بس انتي قدرتي تتغلبي عليها بطريقة تفكيركـ
وبقرايتك للعديد من الورايا والكتب ،،
موضوع قيم جدا كالعاده
ابدعتي نور ,,

[الأميرة رودي]

مش كل حاجه صح بنعملها بتكون مقبوله
فيه حاجات بتكون صح ميه ف الميه وانتى مقتنعه من جواكي انك على حق
ولكن بتقابل غضب ونفور من المجتمع
حكايه العنصـريه متوارثه ويمكن من بدايه الخلق
لان اللى اتخلق الأول أدم ومنه خُلقت حـواء. فعاطيه شعــور دائم للرجل بـ فضله على المرأه
انه سبب وجودها
صحيح مسببه انزعاج لـ أغلب النساء
ولكن بلآقي نساء لما تكلميها عن العنصريه وتفضيل الولد على البنت
ترد بكل بساطه وتقولك ماهو ده الصح ( وهو الولد زي البنت )
الولد بيشيل اسم ابوه وبيعمر بيت ابوه وفى الميراث بـ يرث ضعف البنت
يبقى عاوزه تساويهم ببعض ازاى !!

وبرغم انى بشوف ف بيوت كتير ان المرأه هى الحاكم المتحكم والزوج مجرد صوره وتابع ليها
الا ان الفكره دي كمان غير مقبوله
وان اتضح كده تلآقي ألف لسان بيتكلم ونظـره سخريه للزوج ده وكلام كتير ع الزوجه دي..
المجتمـع مليان تعقيدات
الخيــر أحيانا بيندرج تحت اسم الشـر
موقفك مع المدرس وصدقك كان جميل وده اللى المفروض اتعلمناه أصلا ف تربيتنا وديننا ان الكدب حرام
ولما جيتي تطبقي اللى اتعلمتيه وتقولي الصدق اتعاقبتي
يعني فعــلا قمه التناقض والعقل كل اللى عليه انه يستوعب التناقضات دي ويحاول
يتأقلم ..

موضوع جدااا قيــم
لمستى أكتر من نقطه
والسـرد وترتيب الأفكار ممتاز
أحييكِ على كل شئ هنـــا

[دمعه حائره]

مجتمع زكورى وعنصري
مع ان الدين بينفر من النوعيه دى من التعامل
لكن هى عادات اكتر من انها عقيدة
ولازم يكون فيه توازن وعدل فى العلاقات بشكل مايسبب كراهيه او تمرد
فيه ثوابت بنتفق عليها زى مافيه حاجات واضح فيها اوى التميز والعنصريه
مابقاش الزمن زى الاول ولازم كل واحد يعرف واجباته ايه
وخصوصا فى تربيه الاولاد
مواقف كتير وضحتيها وعجبنى وجهة نظرك
تسلمى نور

[Lamees]

تناقضات يعلمونا الا نكذب وعند قول الحقيقة نعاقب
نحاول نصرة المظلوم ولكن العقاب ينتظرنا عند اول شكوى منا
مجتمع ذكوري يميز الولد عن البنت له كل الصلاحيات وتحرم الفتاة منها
فقط لانها فتاة لها موروث مجتمعي من العادات والتقاليد لابد لها ان تسير عليه
جميل نور رغبتك في الأستقرار
ربنا يوفقك

[احساسى صحيح]

تعرفى يا نور إننا كبنى ادمين فطرتنا بتتغلب على تربيتنا
يعنى ممكن انسان يتربى بدون والديه وعندما يكبر
يكون حاله افضل واخلاقه وعلمه ما اروع ما يكون
وانسان يتربى مع والدان قمه فى الاخلاق والعلم
ومن الممكن إنه يطلع سادى وعديم النخوه والاخلاق

الملخص لمعظم ما سردتيه ليس امنية إنك تكونى إنسان خارق
بل إنك بتحبى الحق وتدافعى عنه
وبتقدرى تميزيه حتى رغم صِغر سنك
ونفسك تحققيه على ارض الواقع
يعنى إيمانك ببواطن الخطأ والصح
وإصرارك على الصح من وجهة نظرك
ودون النظر للاخرين ومنظورهم للأمور
وده هو إللى انا ماشى عليه
وحاسس إن فى توافق فى الفكر معاك من تلك الناحيه ..

اشكرك على تلك الفضفضه
تحياتى ..

[نور ونار]

اقتباس المشاركة الأصلية كتبت بواسطة ๓αℓάҝ حصل معايا نص موقف البنت بس البنت قعدت فوقي )) و بقيت اخاف أنزل الشارع بسببها :d عجبني فكرة الموضوع ، احنا اتربينا علي عادات متصلحش الزمن ده . مافيش نقاش بينا و بين أهلنا . و في قواعد محطوطه محدش قالنا عليها و المفروض نعمل بيها . الفكره اننا هنعمل نفس اللي بيعمله ده :d برمجه هتلاقي نفسك بتقولي نفس الأسطوانات اللي سمعتيها و انتي صغيرة :d غسيل مخ بقى ، اكيد مش هتزرعي فكرة ان الولد احسن من البنت بس ممكن تزرعي فكره ماشيه في زمنا و هتكون في زمن أولادنا ^^ بس حقيقي فاهمه قصدك بطريقه تحزن :d نفسي أتناقش من غير معدي الحدود اللي مش عارفه هي ايه :d

المفروض كل جيل له متطلباته
واحتياجاته فمآينفعشى بقآآ اتربى
على نفس التربيه اللى والدتى اتربتهآآ
اكيد عصرى محتاج اكتر من كدآآ ومتطلباته
فى نفس الوقت بنتى ما تنفعشى تتربى كدآآ
بس الاكيد بقآآ احنآ بقينآآ نستسهل ويقولك
هربى التربيه اللى اتربتهآآ يمكن الخوف الفطرى من تجربه
الجديد ،، او ممكن احنآ مش بالقدر الكافى مش بنقرآآ
فى اصول التربيه وعلم النفس .. صادف انى بقرآآ
فكونت شخصيتى ،، غيرى ممكن يتهز ويكون ضعيف ومن غير شخصيه
آصلآآ ..
ملك اسعدنى تواجدك وردك آضآف الكثير فى متصفحى
نورتينى ..