مقهور و مقهوره ...!!

[pu.z.z.le]

قهر المجتمع

ومن منا ليس مقهورا .. القهر صوره كتير .. وكاذب اللى يقول انه متعرضش لقهر من اى نوع .. او انه امتلك زمام حياته منذ نشأته ...

لكن سيبونا من كذبه وسيبوه مع نفسه لانه مش فى اطار موضوعنا ... احنا بنتكلم عن القهر الجماعى للفرد ... ببساطه كدا (( قهر المجتمع )) .. وهنا مش بس الكلام على المجتمعات المحافظه او المنغلقه .. انما كمان المجتمعات المفتوحه فيها قهر .....!!

القهر المجتمعى مرادف للعادات والتقاليد عندنا .. هتلاقيه من حواليك فى كل مكان وبكل صوره .. فى لبسك فى اكلك فى مشيتك فى طريقة كلامك حتى فى ردود افعالك

احيانا بحب اصنفه على انه مجرد استنساخ لافراد المجتمع بعضهم من بعض .. والهدف والغايه اللى بيبرر بيها انصار النوع دا من الرؤيه هو (( جعل المجتمع اكثر تماسكا )) ... فى الوقت اللى بندمر فيه ابجديات الحياه البشريه على الارض النابعه فى الاساس من الاختلاف ..

علشان منهريش فى كلام فلسفى عقيم تعالى اعرض عليك صور مريت بيها وحسيتها انها شئ عادى وكمان اعتدت على القيام بها وهى فى النهايه قهر مجتمعى

1- تى شيرت عجبك ولبسته واخدت عليه انتقادات فقررت انك متلبسوش تانى او لو هتلبسه هيكون فى اضيق الظروف وفى مناسبات معينه .

2- عجبها فكرة انها تقص شعرها بس اتراجعت قدام مجتمع بيفضل الشعر الطويل

3- كان فنان وبيحب الموسيقى ودرس الطب لان الدكتور محترم بين الناس اما الفنان فمنحرف بالفطره


4- حبت من قلبها وارتبطت بالانسان اللى حست انه هيسعدها واتجوزت شخص تانى لانه من وجهة نظر الاسره والمجتمع هو الانسب


5- اتعلم يتكلم بمفردات معينه وبمصطلحات معينه لمجرد انه يكون (( كووول )) فى وسط اصحابه .


6- اتحجبت علشان المجتمع يقول عليها محترمه وخلعت النقاب علشان تلاقى عريس


7- كتب واتكلم وساهم فى نشر افكار مش مقتنع بيها ... وكتم جواه كل افكاره علشان يفضل فى نظر مجتمعه عاقل


8- طول عمرها بتسأل ليه التدخين بيضر بسمعة وشرف البنت فى نفس الوقت اللى بيضر بصحة الولد بس وملاقتش اجابه


9- مش مقتنع بحاجات درسها او بيدرسها بس مينفعش يخرج عن نص كتاب الوزاره


10- نفسها تصور مشيتها علشان تعرف ليه بيبصوا وبيتكلموا عليها


11- ابويا دكتور وانا مالى (( توارث المهن ))


12- اقلب القدره على فمها تطلع البنت لامها ,, وامها كانت منحرفه



نماذج القهر مفيش اكتر منها .... وان كان كل اللى فات قاهركم فى مجتمعات منغلقه فالمجتمعات المفتوحه قهرها بمبدأ والعكس صحيح والمشترك بين الاتنين ... هو فرض رؤية ومنهج المجتمع على الفرد حتى لو مش مقتنع بيه ..

يعنى مينفعش بنت يبقى عندها 16 سنه ولسه فيرجن ... الحجاب تخلف ... والهدوء تبقى معقد ... مبتشربش حتى شمبانيا يبقى فى الغالب انت انطوائى ... متدين يبقى انت رجعى

كلها نماذج قهريه بامتياز ... بنمارسها على بعض وبندى لنفسنا الوصايه للحكم على الاخرين ... انت نفسك ياللى عانيت من اى نوع انا كتبته .. دور جواك هتلاقيك مارست القهر على حد من غير ما تحس ... لانه بقى شئ معتاد فى حياتنا نمارس قهرنا على الناس بداعى اطلاعنا ومعرفتنا وحفاظنا على العادات والتقاليد .

والجديد بقى والافظع فى القهر بقى قهر الرأى ... جرب تختلف مع حد فى الرأى وشوف رد فعله ؟؟

ان مخونكش هيتهمك بالجهل .. وان كان صاحبك قوى مش بعيد يقولك انت ضارب ايه ؟؟

فكرة انى اختلف عنك او عن المجتمع بقت بتساوى الانتحار ذاته ... وهتسمع دايما المقوله الاشهر (( متسبحش ضد التيار ) (( يا عم انت هتغير العالم )) ) .. ومن امثالنا الشعبيه (( كل اللى يعجبك والبس اللى يعجب الناس )) ...

فى النهايه وانت قاعد على كرسيك وشعرك بقى ابيض وبتقلب فى البومك ومزكراتك .. هتفتكر حاجاااااااااات كتير قوى كان نفسك تعملها ومعملتهاش .. وحاجااااااات اكتر كان نفسك متعملهاش وعملتها ... وكل دا بسبب انك لازم تراضى مجتمع افراده مش راضيين عن نفسهم

الكلام اللى فوق دا كله مش تمرد على المجتمع ... او رفع راية العصيان على العادات والتقاليد ... او بداية لتقنين الانحراف ... بالعكس ... دا شئ بديهى جدا اتخلقنا بيه وربنا حثنا على القيام بيه فى كل الاديان ... وقرر فى اكتر من موضع ان الحساب فردى مش جماعى .. يعنى لو اتبعت المجتمع وطلع غلط انت كمان هتتحاسب

(( أَمْ لَمْ يُنَبَّأْ بِمَا فِي صُحُفِ مُوسَى * وَإِبْرَاهِيمَ الَّذِي وَفَّى * أَلَّا تَزِرُ وَازِرَةٌ وِزْرَ أُخْرَى * وَأَنْ لَيْسَ لِلْإِنْسَانِ إِلَّا مَا سَعَى * وَأَنَّ سَعْيَهُ سَوْفَ يُرَى * ثُمَّ يُجْزَاهُ الْجَزَاءَ الْأَوْفَى * وَأَنَّ إِلَى رَبِّكَ الْمُنْتَهَى ))

وعارف / ه كمان ان اتباعك للآخرين هيكون سبب انهم هيتبرأوا منك يوم القيامه ؟؟ ... يعنى مثلا اتبعت كلام اخوانك وجيرانك وجوزت بنتك غصب عنها لانسان غير اللى هى عيزاه .. فى نفس الوقت اللى من شروط الزواج فى الاسلام الايجاب والقبول ... وجيت يوم الحساب وقولت انك اتبعت كلام فلان وفلان وفلان واصل المجتمع مكنشى يوافق على النوع دا من الزواج ... فهتسمع الايه دى

(( إِذْ تَبَرَّأَ الَّذِينَ اتُّبِعُواْ مِنَ الَّذِينَ اتَّبَعُواْ وَرَأَوُاْ الْعَذَابَ وَتَقَطَّعَتْ بِهِمُ الأَسْبَابُ. وَقَالَ الَّذِينَ اتَّبَعُواْ لَوْ أَنَّ لَنَا كَرَّةً فَنَتَبَرَّأَ مِنْهُمْ كَمَا تَبَرَّؤُواْ مِنَّا كَذَلِكَ يُرِيهِمُ اللّهُ أَعْمَالَهُمْ حَسَرَاتٍ عَلَيْهِمْ وَمَا هُم بِخَارِجِينَ مِنَ النَّارِ ))

اللى كانوا عاملين اوصياء على العادات والتقاليد اللى فى معظمها ضد الدين والعقل والمنطق .. هيتبرأوا من اللى اتبعوهم يوم القيامه وهيقولوا انهم مضربوش حد على ايده .. وانت ساعتها ياللى كنت بتمشى وراهم هتقول لو فى فرصه علشان نرجع واعمل معاهم زى ما عملوا معايا ... بس الوقت هيكون عدى وفات .

ودا نفس موقف الشيطان يوم القيامه اللى اغوى وضحك على مليارات البشر لما يقف بين يد الله

(( وَقَالَ الشَّيْطَانُ لَمَّا قُضِيَ الأَمْرُ إِنَّ اللّهَ وَعَدَكُمْ وَعْدَ الْحَقِّ وَوَعَدتُّكُمْ فَأَخْلَفْتُكُمْ وَمَا كَانَ لِيَ عَلَيْكُم مِّن سُلْطَانٍ إِلاَّ أَن دَعَوْتُكُمْ فَاسْتَجَبْتُمْ لِي فَلاَ تَلُومُونِي وَلُومُواْ أَنفُسَكُم ))

فجرب تكون نفسك .. تشكل حياتك ... تشغل عقلك ... تدور بنفسك على الصح وتعمله وتعرف الغلط وتبعد عنه ... حط خطوطك الحمرا بنفسك .. متسمحش لحد يفرض حياته عليك .. ويخلق منك صوره ليه .. متسمحش لحد يخلق منك مسخ جديد فى مجتمع كله مسوخ وماشى بنظرية القطيع ... محدش هيتحاسب على اعمالك غيرك ... فاتحاسب بس على غلطك مش على غلط الاخرين .. جرب واغلط وتوب واستغفر وربنا هيتقبلك .. لكن اوعاك تفكر ان فى انسان زيك بايده مفتاح الصح اللى لا يأتى من بعده باطل ... انت نفسك .. ربنا كرمك بعقلك علشان تفكر وتتدبر وتقرر ... وزى ما فرض عليك مقاومة النزوات والغرائز ... فرض كمان عليك انك تعمل الصح ولو كان ضد كل الناس وضد المألوف وضد المتعارف عليه وضد العادات والتقاليد ..

وافتكر دايما ان النبى لما كان بيبعث فى قومه علشان يقف ضد فساد العادات والتقاليد اللى توارثوها كان الاتهام الجاهز ليه ...

(( كَذَٰلِكَ مَا أَتَى الَّذِينَ مِن قَبْلِهِم مِّن رَّسُولٍ إِلَّا قَالُوا سَاحِرٌ أَوْ مَجْنُونٌ ))

واعمل حسابك ان المشوار طويل والمعاناه موجوده بس النتيجه هتدهشك لما تلاقيك قدرت تملك نفسك وامرك

--------------------------------

على الفرد دائما أن يقاسي ليبقى حراً من هيمنة المجتمع ستكون وحيداً وأحياناً خائفاً لكن الثمن ليس غالياً في مقابل أن تمتلك نفسك

 ! - نيتشه

-----------------------------

[youtube]

[همس الحنين]

القهر ليس فقط فى ان تصبح ما تريد او العكس

القهر فى مجتمع يجبرك على الاستمرار فى منظومه انت رافضها

لكنك جبرت ان تتدخل فيها

القصه يا ريت تكتفى على انك تعمل ما لا تحب

القهر الحقيقى بنظرى

ان يسيطر اليأس من المستقبل على النفس

ان المجتمع وضعنا فى حالة اجتماعيه كلها صراع وقتال

صراع على المعيشه على التعليم على الزواج على حتى التنفس بحريه

صعب ان تحيا بما تشتهر نفسك وتريد فى مجتمع كله ضغوط

صعب ان تكون حرا والحريه لها قانون وسياستها الاستعباد وحد السيف

كلنا مقهورين ولكن بنظرى قهر الوظيفه فيما لا تحب ارحم من قهرك

داخل نفسك ومكتوف الايد وممنوع من التنفس فقط لانك تحت سماء لا تعلم معنى الحريه

وابداء الرأى والتنفس عن مكنون نفسك

مقال راقى

تقيمى

[* Fares *]

مفيش شئ اسمه قهر
لكن فيه شئ اسمه إختيار
الانسان مخير مش مسير
بمعنى في كل الأمثلة المذكورة في مقالك
الشخص اختار الحل السهل
اختار انه يكون إمعة يرضى ويقبل باللي المجتمع عايزه
واختار انه يتأثر بكلام الناس
وكان ممكن يختار الحل الصعب
كان ممكن يدافع عن مبدأه ويكافح لحد ما يوصل لهدفه
كان ممكن يختار انه يرمي كلام الناس خارج حساباته
لكنه ضعيف الشخصية وبيحاول يداري الضعف ده بانه يعلق أخطاؤه على شماعة المجتمع
في حين زي ما ذكرت كل مجتمع وليه عيوبه
المهم ان انت تختار تكون مختلف وتتحمل نتيجة اختيارك ده

موضوع نقاشي ممتاز

تحياتي

[ساحر الأحزان]

انت بتمشى فى طريق وبعدما تقطع فية مسافة بتناقض نفسك ؟

طيب كان فين تفكيرك من الأول

أنت دلوقتى وسط تركمات مجتمعية

مش تلبس دة ؟

وكل دة ؟

وأنت بتناقض نفسك

أنا على حق وانت غلط

مجموعة تناقضات متضاربة

الواقع والحقيقة بتكون مؤلمة بسى بتكون أحسن لما تفوق وتعيشها

مقال جميل منك

وبأنتظار كتاباتك القيمة

[دفاتر القمر]

معاكي حق كلماتك لامست قلوبنا
وفعلا كم مره جينا فيها غشان خاطر مجتمع
مش بيرحم كم مره ظلمنا فيها غيرنا ونفسنا
عشان نرضي بس اللي حوالينا وياتري عملنا ايه برضاهم
غير اننا زي ما انتي وصفتي اصبحنا مقهورين
مقاله جميله بقلم مميز شكرا لكي

[pu.z.z.le]

اقتباس المشاركة الأصلية كتبت بواسطة همسات فوق القمر القهر ليس فقط فى ان تصبح ما تريد او العكس القهر فى مجتمع يجبرك على الاستمرار فى منظومه انت رافضها لكنك جبرت ان تتدخل فيها القصه يا ريت تكتفى على انك تعمل ما لا تحب القهر الحقيقى بنظرى ان يسيطر اليأس من المستقبل على النفس ان المجتمع وضعنا فى حالة اجتماعيه كلها صراع وقتال صراع على المعيشه على التعليم على الزواج على حتى التنفس بحريه صعب ان تحيا بما تشتهر نفسك وتريد فى مجتمع كله ضغوط صعب ان تكون حرا والحريه لها قانون وسياستها الاستعباد وحد السيف كلنا مقهورين ولكن بنظرى قهر الوظيفه فيما لا تحب ارحم من قهرك داخل نفسك ومكتوف الايد وممنوع من التنفس فقط لانك تحت سماء لا تعلم معنى الحريه وابداء الرأى والتنفس عن مكنون نفسك مقال راقى تقيمى

دى صور للقهر مجبتش سيرتها انا فى الموضوع (( دا انا اتقهرت منها سلف :d ))

بحييكى على الرد الراااائع

ومشكوره على المرور

[pu.z.z.le]

اقتباس المشاركة الأصلية كتبت بواسطة * fares * مفيش شئ اسمه قهر لكن فيه شئ اسمه إختيار الانسان مخير مش مسير بمعنى في كل الأمثلة المذكورة في مقالك الشخص اختار الحل السهل اختار انه يكون إمعة يرضى ويقبل باللي المجتمع عايزه واختار انه يتأثر بكلام الناس وكان ممكن يختار الحل الصعب كان ممكن يدافع عن مبدأه ويكافح لحد ما يوصل لهدفه كان ممكن يختار انه يرمي كلام الناس خارج حساباته لكنه ضعيف الشخصية وبيحاول يداري الضعف ده بانه يعلق أخطاؤه على شماعة المجتمع في حين زي ما ذكرت كل مجتمع وليه عيوبه المهم ان انت تختار تكون مختلف وتتحمل نتيجة اختيارك ده موضوع نقاشي ممتاز تحياتي

كتير يا فارس بنقابل ناس فى ظاهرهم قوة الشخصيه وهم من جواهم مسوخ

احيانا بيكون الاعتبارات معكوسه ... يعنى اللى يتمسك اكتر بالعادات والتقاليد يكون شخصيته قويه قدام الناس ... فى نفس الوقت اللى هو عايش فى صراع مع نفسه بسبب اللى هو عايزه واللى هو بيعمله .. وفى النهايه بيكون مجرد مسخ ينضاف لسلسله طويله من المسوخ بنقابلهم فى حياتنا كل يوم ..

نورت الموضوع

[pu.z.z.le]

اقتباس المشاركة الأصلية كتبت بواسطة ساحر الأحزان انت بتمشى فى طريق وبعدما تقطع فية مسافة بتناقض نفسك ؟ طيب كان فين تفكيرك من الأول أنت دلوقتى وسط تركمات مجتمعية مش تلبس دة ؟ وكل دة ؟ وأنت بتناقض نفسك أنا على حق وانت غلط مجموعة تناقضات متضاربة الواقع والحقيقة بتكون مؤلمة بسى بتكون أحسن لما تفوق وتعيشها مقال جميل منك وبأنتظار كتاباتك القيمة

المهم ان فى كل الحالات انت هتتعامل مع مجتمع رافضك ورافض فكرك ورافض طريقتك للتغيير وبيفرض عليك ثوابته اللى هو شايفها مفتاح النجاح والفلاح

وفى حالة انك قررت تواجه ضغوطه .. فلازم البدايه تكون من نفسك ضد نفسك ... وبعدها ممكن تبقى من نفسك ضد المجتمع .

نورت الموضوع

[pu.z.z.le]

اقتباس المشاركة الأصلية كتبت بواسطة امنيه شافعي معاكي حق كلماتك لامست قلوبنا وفعلا كم مره جينا فيها غشان خاطر مجتمع مش بيرحم كم مره ظلمنا فيها غيرنا ونفسنا عشان نرضي بس اللي حوالينا وياتري عملنا ايه برضاهم غير اننا زي ما انتي وصفتي اصبحنا مقهورين مقاله جميله بقلم مميز شكرا لكي

وحتى بعد ما تيجى على نفسك وتسايرى المجتمع لاعتبارات كتير منها انك مش عايزه تواجهى مجتمع فى كتير ناس منه بتربطك بيهم علاقات اخوه وصداقه ... وتكتشفى انهم اتسببوا ليكى فى توهه فى الطريق الغلط ... كلمة اسف مش هتسمعيها ... ولو سمعتيها بيكون اوانها رااااح .

نورتى الموضوع

[Words Whisper]

الأسلوب مش غريب عليا
شبه أسلوب قرأت له قبل ..

النوع 9 بالذات كلنا بنقع تحته
البوينت الأساسية مش مين مارس محاولة قهر الآخر
وانما ان دا مش يخلينا مجرد نسخة من حد وخلاص
العادات والتقاليد لاتساوي القيم والمبادئ
كتير العادات وكلام الناس مجرد ( هراء ) لايستحق نبحث فيه أصلا
الخروج عن العادات و عن رأي الأغلبية وعن أسلوب حياة الأغلبية ، متعِب
وممكن حتى يكون جارح جدا لينا
بس ع الأقل هنحس اننا بنحترم إنسانيتنا اللي هما مش احترموها
فهنعرف انه مهما حصل ومهما قالوا ومهما عملوا هما صغيرين وتاعبهم اختلافنا عنهم ..

موضوع قيم
شكراً لحضرتك ..
دمت بخير ..