عااالمك المواااازى ..!!

[pu.z.z.le]

تفاصيل حوالينا فى كل مكان دايما بتكون الاجابه عليها بكلمه من اتنين

ينفع - مينفعش

يجوز - ميجوزشى

حلال - حرام

صح - غلط

وعلشان تقرر تختار اى كلمه من الاتنين المفروض تكون فاهم ماهية اختيارك .... لكن فى الغالب دا مبيحصلش ... واختيارنا بيتبنى على نظرية القطيع .. ما استحسنه الناس فهو حسن وما استخبثوه فهو خبيث .

الموضوع هنا مالوش علاقه لموضوعى السابق (( مقهور ومقهوره )) لانى هنا مش بتكلم على قيود بتتفرض عليك .. بالعكس انا بتكلم على قيود انت بنفسك اللى بتفرضها على نفسك .. او حريه بتمنحها لنفسك فى غفله من كل اللى حواليك .

يعنى مفيش حد مثلا عمره هيفرض عليك التدخين ... بس انت اخترته لغرض ما فى نفسك .. قد تكون التجربه او قد تكون لتعويض نقص او قد تكون تقليد .. وقد تكون رغبه ذاتيه منك فى الفعل ... فى الاخير هو فعل ذاتى انت غير مقهر عليه ... بالعكس انت اللى بتختار تعمل دا والا لا .

الفكره كلها بتبدأ من طفولتك .. بمجرد ما تبدأ تدرك العالم من حواليك .. يبدأ التعليم . من كل اللى حواليك من اسره ومدرسه واصدقاء ومجتمع .. . دا صح لازم تعمله .. ودا غلط لازم تبعد عنه .... وطبعا بتكون الاستجابه فوريه وفى الغالب بيكون اللى بيعلمك عنده حق وانت بتكتشف دا لما بتعمل اللى قالك عليه وبتعرف بعدها انه كان عنده حق ...

لكن بيفضل جواك سؤال بديهى وساذج ... ياترى الاختيار التانى لو كنت اخترته كان ايه اللى حصل ... ؟؟

وكل ما تكبر كل ما تكتر الاسئله .. وكل ما يكبر معاها رغبتك للاكتشاف .. للتجربه .. للمعرفه ..

حب التجربه مش وليد اللحظه وانما هو غريزه فطريه قديمه قدم الانسانه ذاته .. واول تطبيق عملى لها كان اكل امنا حواء من شجرة التفاح اللى كانت الشجره الوحيده الممنوعه من بين كل اشجار الجنه اللى ملهاش عدد ... ومع ذلك سابت كل دا وقررت انها تاكل منها (( طبعا باغواء من الشيطان )) ودا اللى خلانا بعد كدا نصيغ الموقف فى جمله بنتوارثها جيل بعد جيل بتقول (( الممنوع مرغوب ))

وبما ان الممنوع كتير ... يبقى الرغبه كبيره وموجوده و لازم تكون فى اتجاه معاكس للمألوف والمتعارف عليه .. فهتبدأ تدور لنفسك عن البيئه والارضيه المناسبه اللى تشبع فيها رغبتك
بمعنى انك تقدر تمنع نفسك عن شئ معين وتلتزم بالقوانين او الاعراف او الاحكام اللى منعته .. .. بس من جواك كانسان عندك رغبه فى انك تجربه او تعرف ماهيته ايه وليه اتمنع

وبما انك متقدرش تجرى تجاربك دى قدام الناس والا وقعت فى التهلكه .. فبتضطر انك تعمل مختبرك الخاص البعيد عن كل الاعين .. ودا بقى بيكون سكنك الجديد .. او

عــــــــــــــالمك المــــــــــــوازى ...




جوا كل واحد منا عالم داخلى موازى للعالم للخارجى اللى من حوله .. لكن فى الغالب بيكون عكس الاتجاه واحيانا كتير بيتقاطع معاه فى نقط بسيطه ويرجع تانى يبتعد عنه ويتوازى معه عكس الاتجاه

العالم دا انت اللى بتحط تفاصيله وبترسم حدوده وبتقنن قوانينه .. انت بس اللى تقدر تحدد ايه الصح وايه الغلط .. ايه اللى ينفع وايه اللى مينفعش ... .. حتى الحلال والحرام بتتغير معاييره فى عالمك الموازى .

مفيش حد معندوش العالم الموازى دا ,, ومفيش حد متعارضشى فى قوانين عالمه مع قوانين العالم الخارجى .. ومفيش حد لم يهدر ثوابت متعارف عليها جوا عالمه الخاص .. كل شئ مباح بارادتك انت .. لذا فالفعل لا يحتاج سوى مجرد قرار منك ان تفعل هذا او لا تفعله .. مفيش رقابه غير رقابتك الذاتيه (( او هكذا تتصور )) ...

وعلشان منطولش ونوضحها اكتر .. نقول سؤال .. هل انت او انتى معندكمش اسرار خاصه بيكم وحتى اقرب قريب منكم ميعرفش عنها حاجه ؟؟

وهل فكرتوا مره لو شاءت الظروف وانكشفت الاسرار دى لاى سبب .. هل هتخجلوا من كل افكاركم او اسراركم او افعالكم فى عالمكم الخاص ؟؟؟

ابسط جمله لغويه هقتبسها من اعلان سنيكرز (( انت مش انت وانت فى عالمك الخاص )) فى الغالب انت شخص تانى او على الاقل فيك حاجات محدش يعرفها عنك ولو اتعرفت كتير من التقييم اللى بتاخده من الناس هيتغير ... بس متقلقش كلنا بشر وكلنا كدا .. بس انت اللى انكشفت مش اكتر والباقى لسه ربنا ساتر عليهم ....

والا انت كنت مفكر ان اشهر دعاء بالستر كان ان ربنا يرزقهم بملابس تسترهم... لا الستر جزء كبير منه هو اللى جه فى بالك دلوقتى

متزعلش ومتفكرش انك لوحدك اللى كدا .. دا احتياج بشرى مفيش حد سليم منه بس فى نفس الوقت الكل بينكره .. وبيرجع بينه وبين نفسه يعاتب نفسه وعارف ان دا حاصل وانه مصاب زى باقى البشر بمتلازمة العالم الموازى ... .....

مفيش حد بعيد عنها ولا شيخ ولا قسيس ولا دكتور ولا مهندس ولا مدرس ولا محاسب ولا متدين ولا منحرف .. ذكر كا او انثى ... ممكن ينكر بس من جواه عارف انه ياما جاتله افكار واقدم على افعال بينه وبين نفسه مينفعش ان ييجى اليوم اللى تتكشف فيه .

وعلشان كدا مبتفاجئشى من نوعية مشايخ السلاطين ولا القساوسه اللى هتكوا اعراض الاطفال فى الكنائس ولا كتير من النماذج اللى وقعت ولسه بتقع قدامنا كل يوم وبنكتشف اننا اتخدعنا فيهم ... بالعكس انت فيك منهم .. بس هم انكشفوا وانت لسه زى ما قلتلك ربنا ساتر عليك م اكتر .

وللحق ان اكتر ناس بتهرب لعالمها الموازى هى اقل الناس اخطاءا فى العالم الخارجى ... واكتر ناس هتتفاجئ بعالمهم الموازى هم نفسهم الاكثر اقتناعا بالعالم الخارجى وعاداته وتقاليده واحكامه وثوابته .. واللى عالمهم الموازى مليئ بالسلبيه هم الاكثر ايجابيه فى عالمهم الخارجى ... طبق القانون وافتكر ان العالمين متوازيين وفى عكس الاتجاه

واكبر مثال .. صندوق الوارد .. فى المنتدى فى الفيس فى الايميل .. فى الايميلات الموازيه فى الاكاونتات الاضافيه .. فى وقت تجربة الشئ اللى ياما منعت نفسك عنه .. فى وقت الرغبه فى تجربة الجديد والغريب .. فى وقت حاجتك للاكتشاف .. فى وقت تمردك .. فى وقت استسلامك ويأسك .. فى وقت كسرك والمك .. فى وقت بتكون عايز تعرف اللى انت ياما منعوك عن معرفته ..

انت فى كل دول .. مستحيل تكون انت اللى قدامنا .. حتى لو حاولت تخلى ظاهرك زى باطنك .. مش هتقدر .. ونصيحه متحاولش

اللى خلقك عارف احتياجاتك وعارف انك هتيجى عليك المرحله اللى هتفكر فيها بعالمك الموازى اللى تعمل فيه اللى انت مش قادر تعمله فى عالمك الخارجى .. علشان كدا كان الغالب فى الاسلام هو التركيز على ان الله موجود فى كل وقت وفى كل مكان وفى كل زمان .. وان وجوده فى حياتك بيشمل عالمك الخارجى وعالمك الموازى ... وان ايمانك بيه عمره ما هينفصل فى عالمك الموازى .. لانك هتتحاسب حتى وانت فى عالمك الموازى اللى محدش يعرف عنه حاجه ... ومع ذلك هروبك من عالمك الخارجى مكنش خوف من ربنا .. لان كدا كدا ربنا معاك ومطلع عليك .. انما كان هروبك من الناس ...

هروبك لحياه انت نفسك تعيشها او على الاقل حابب تجربها .. هروبك من كونك قديس للرجوع الى حالة البشر اللى بيصيبوا وبيخطأوا .. هروبك من المثاليه ... هروبك من التمثيـــــــــــــــــــــــــــــــل .

بتعيش مع كائنك المفضل حتى ولو كان فى بعض الاوقات خاطئ ... بتتعايش مع عالمه بكل ما فيه سواء كان صح او غلط ... مش لازم عالمك الموازى يكون مجرد بركه .. بالعكس ممكن يكون تنوير انت خايف تتكلم مع حد مش هيقدر يستوعبه ... ممكن تكون فكره مش مقبول طرحها فى عالمك الخارجى .. ممكن تكون بتساعد انسان مينفعش يعرف انك بتساعده ...

فعالمك الموازى موجود وانت عارف انه موجود واحنا كمان عارفين انه موجود ... بس اشتغل عليه وخليه ايجابى وقلل سلبياته ..

وربنا يستر على الجميع .....

[دفاتر القمر]

اكيد كل واحد فينا نفسه
يعيش بعالم تاني عالم يقدر يحقق
فيه كل اللي مقدرش يحققه بالعالم اللي عايش
فيه لكن ياتري في العالم الموازي ده هيكون شخص مثالي
طرح راقي برقي فكرك
دمت بهذا الابداع تحياتي

[Lamees]

عالمك الموازي نعم نعم موجود
وفه من الأسرار الكثير اللي تخص صاحبها فقط
نعم أن اطلع عليها أحد قد ينصدم قد يعتقد اننا لسنا من يعرفهم
عالم خيالي ولكنه صندوق لرغبات وأحتياجات لا نستطيع أن نظهرها للجميع

أخي الكريم أثار موضوعك دهشتي مما يحتويه من حقائق فعلية
قد تكون اقرب للتحليل النفسي للأشخاص
رائع وأكثر ما تنثره هنا أخي
أبداع أتمنى أن يدوم
فلا تحرمنا جديدك الرائع
تقييمي ونجومي & وسام التميز

كل التقدير والأحترام

روني ..~

[همس الحنين]

زى الوعى والاوعى

تعمل شئ انت مدركه والاوعى عاوز شئ تانى

اغلبنا جواه صراع بين ما يريده حقا ومالايريده

اوقات يستمر فى المثاليه ثم ينقلب

ولكن لما

لان الامر بدا نفاق

يمكن هنا الفرق بين شحص واخر

عمليى الضمير والنزعه النفسيه

بإنك على يقين بان حياتك هكذا صحيحه لانك تبتغى مرضاة الله هنا ستستمر ولن تقع

والفرق بين حياة المثاليه الخادعه لانك بتقوم بدور رُغم عنك نفاق او مرضاة للغير او حسب احوال المجتمع فهذا لابد وان يقع ويفتعل ما يريضيه فى الخفاء

قلمك راقى

احترامى

[pu.z.z.le]

اقتباس المشاركة الأصلية كتبت بواسطة امنيه شافعي اكيد كل واحد فينا نفسه يعيش بعالم تاني عالم يقدر يحقق فيه كل اللي مقدرش يحققه بالعالم اللي عايش فيه لكن ياتري في العالم الموازي ده هيكون شخص مثالي طرح راقي برقي فكرك دمت بهذا الابداع تحياتي

المثاليه محكوم باستحالتها لاننا نزلنا من الجنه على الارض تكفيرا لذنب

(( قلنا اهبطوا منها جميعا فإما يأتينكم مني هدى فمن تبع هداي فلا خوف عليهم ولا هم يحزنون ))

فازاى ناس تكون ضاله وفى انتظار هدى الله وتكون مثاليه

فسواء كان فى العالم الواقعى او الموازى هو انسان ليه ايجابيات و ليه كمان سلبيات ... وعلى حسب نسبة ايا منهما بنقدر نحكم عليه .. هل هو انسان سلبى او ايجابى ..؟ .... انما فى العموم كل واحد منا جواه الاتنين .. علشان كدا محدش عمره هيكون مثالى .

نورتى الموضوع

[pu.z.z.le]

اقتباس المشاركة الأصلية كتبت بواسطة اطياف الماضي عالمك الموازي نعم نعم موجود وفه من الأسرار الكثير اللي تخص صاحبها فقط نعم أن اطلع عليها أحد قد ينصدم قد يعتقد اننا لسنا من يعرفهم عالم خيالي ولكنه صندوق لرغبات وأحتياجات لا نستطيع أن نظهرها للجميع أخي الكريم أثار موضوعك دهشتي مما يحتويه من حقائق فعلية قد تكون اقرب للتحليل النفسي للأشخاص رائع وأكثر ما تنثره هنا أخي أبداع أتمنى أن يدوم فلا تحرمنا جديدك الرائع تقييمي ونجومي & وسام التميز كل التقدير والأحترام روني ..~

تقريبا انتى كنتى بتقرأى الموضوع وانتى مركزه فى كل كلمه .. لانى شوفت المغزى من الموضوع فى ردك

ردك رائع وعبقرى

نورتى الموضوع

[pu.z.z.le]

اقتباس المشاركة الأصلية كتبت بواسطة همسات فوق القمر زى الوعى والاوعى تعمل شئ انت مدركه والاوعى عاوز شئ تانى اغلبنا جواه صراع بين ما يريده حقا ومالايريده اوقات يستمر فى المثاليه ثم ينقلب ولكن لما لان الامر بدا نفاق يمكن هنا الفرق بين شحص واخر عمليى الضمير والنزعه النفسيه بإنك على يقين بان حياتك هكذا صحيحه لانك تبتغى مرضاة الله هنا ستستمر ولن تقع والفرق بين حياة المثاليه الخادعه لانك بتقوم بدور رُغم عنك نفاق او مرضاة للغير او حسب احوال المجتمع فهذا لابد وان يقع ويفتعل ما يريضيه فى الخفاء قلمك راقى احترامى

مش شرط يكون اللى فى الظاهر المثاليه واللى فى العالم الموازى يكون الافعال الدنيئه .. انما هنا العكس صحيح

كتير من النماذج اللى ممكن تقابليها فى حياتك وتحسى منها الشر هى من جواها مليانه خير ...

وعالمه الموازى بيمارس فيه افعال رائعه مش قادر يمارسها فى حياته العاديه لضغط ما فرض عليه شخصيته اللى لبسها قدام الناس .

مرورك رائع

نورتى الموضوع

[العندليب الاسـمر]

نعم يملك كل منا عالم موازي

فيه من الاسرار ما فيه وفيه من الرغبات ما فيه وفيه من الهوي ما فيه

وقطعا لا يوجد احد لم يعيش في جزء منه بطريقة او باخري

ولكن العبرة او المعيار في حجم ما نعيشه

فان سيطر علينا هذا العالم عشنا بئس العيش

وان كانت مجرد عوارض فانها تذهب مع عَرَضها

موضوع رائع بما تعني الكلمة اخي

سلمت يمينك

[pu.z.z.le]

اقتباس المشاركة الأصلية كتبت بواسطة العندليب الاسـمر نعم يملك كل منا عالم موازي فيه من الاسرار ما فيه وفيه من الرغبات ما فيه وفيه من الهوي ما فيه وقطعا لا يوجد احد لم يعيش في جزء منه بطريقة او باخري ولكن العبرة او المعيار في حجم ما نعيشه فان سيطر علينا هذا العالم عشنا بئس العيش وان كانت مجرد عوارض فانها تذهب مع عَرَضها موضوع رائع بما تعني الكلمة اخي سلمت يمينك

لو قدرنا نخلى السلبى ايجابى ساعتها بس لا حرج فى انه يسيطر علينا العالم الموازى فى عالمنا الواقعى لانه هيكون بوصلتك اللى فيها مبادئك وقيمك وتوجهاتك الخاصه

نورت الموضوع

[Words Whisper]

فيه فلسفة قائلة
بأن كل شخص له 3 شخصيات
شخصية مع نفسه و شخصية قدام الناس و شخصية بيتمناها
الكلام دا والكلام عن العالم الموازي حقيقة لكن لايعني ان الوجه الآخر سيء
لأنه سواء شيء على العام أو الخاص فالإنسان فعلا بيملك التقييم الذاتي و الضمير
ممكن تكون الوجوه الأخرى للشخص و العالم الآخر اللي بيحط قوانينه شيء جيد
خاصة ان كان من اللي مش بيخضعوا ف اهتمامهم الأول برؤية الناس لهم
وأكيد لكل شخص فينا خطاياه واللي مهما كانت بيطلب من الله سترها و المغفرة لأننا بشر ..

نورت حضرتك بمواضيعك القيمة ..
دمت بخير ..